Takus Gid Ini nga Panikasugan!

ANG Pangpamilya nga Pagsimba kag pagtuon sa Biblia importante gid agod ang kabataan mapadaku “sa disiplina kag nagatuytoy nga panghunahuna ni Jehova.” (Efe. 6:4) Apang kon isa ikaw ka ginikanan, nahibaluan mo nga ang mga bata madali lang matak-an. Gani, ano ang himuon mo agod makuha ang ila atension? Binagbinaga ang ginhimo sang pila ka ginikanan.

“Sang gagmay pa ang amon kabataan,” siling ni George, nga taga-California, U.S.A., “ginatinguhaan namon nga mag-asawa nga bag-obag-uhon ang amon pamaagi sa pangpamilya nga pagtuon sa Biblia. Kon kaisa nagabayo kami kaangay sang mga karakter sa Biblia kag ginaakto namon ang amon nabasa sa Ang Akon Libro Sang mga Sugilanon sa Biblia. Naggamit pa gani kami sang mga props subong sang espada, setro, basket, kag iban pa. Naghimo kami sang mga Bible game nga pakta kon sin-o ako, kag sang isa pa ka Bible game nga may nanuhaytuhay nga pamangkot nga ang iban mahapos kag ang iban mabudlay sabton. Nagahimo man kami sing mga project kaangay sang pagdrowing sa arka ni Noe ukon paghimo sang time line sang mga hitabo sa Biblia. Kon kaisa ginadrowing man namon ang mga karakter ukon mga istorya sa Biblia. Subong, nagaplano naman kami nga idrowing ang espirituwal nga hinganib nga ginalaragway sa Efeso 6:11-17, kag ipaathag sang kada isa sa amon kon ano ang ginarepresentar sang kada isa sini. Ini nga pamaagi nakabulig sa amon nga mangin masadya ang amon pangpamilya nga pagtuon.”

Si Debi, isa ka iloy sa Michigan, U.S.A., nagsiling: “Nabudlayan kami sang akon bana nga makuha ang atension sang amon bata nga babayi sang tatlo ka tuig pa lang sia. Isa ka adlaw, samtang ginabasa ko sa iya ang istorya nanday Isaac kag Rebeca sa Ang Akon Libro Sang mga Sugilanon sa Biblia, nagkuha ako sang duha ka monyika kag gingamit ini sa pagtungod sa mga karakter sa istorya. Namati gid sia sing maayo! Sang masunod nga mga binulan, ining duha ka monyika nagtungod sang nanuhaytuhay nga karakter sa Biblia. Pagkatapos namon mabasa ang istorya, ang amon bata nagapangita dayon sing mga hampanganan nga magamit namon sa istorya. Daw kaangay ini sa pagpangita sing mga bahandi! Ang karton sang sapatos kag ang pula nga laso nangin balay ni Rahab nga may eskarlata nga lubid. Ang hampanganan nga man-ug nga 1.5 metros ang kalabaon nga ginburambod sa silhig nangin man-ug nga saway sa Numeros 21:4-9. Gintago namon ang mga props sa daku nga bag. Nalipay kami nga makita sia nga pirme nagapungko sa sála nga nagapamaluskay sang unod sina nga bag. Makalilipay man nga makita sia nga isahanon nga nagadramadrama!”

Indi mahapos ang pagpadaku sa kabataan, kag ang semanal nga pagtuon indi pa bastante para mapatudok naton sa ila ang handum nga alagaron si Jehova. Apang ang pangpamilya nga pagsimba kag pagtuon sang Biblia mahimo mangin pundasyon para sa iban pa nga espirituwal nga instruksion. Walay duhaduha nga takus gid ini nga panikasugan!