Indi Pagpatumbayai ang Imo mga Masigkatumuluo

“SA SULOD sang napulo ka tuig, nasilaw kami sa inggat sang kalibutan, kag nawili sa pagtipon sang madamo nga manggad. Bisan pa ginpadaku kami sa kamatuoran, nagpalayo kami kay Jehova kag nagbatyag nga wala na sing espirituwal nga kusog nga makabalik,” siling ni Jarosław kag sang iya asawa nga si Beata. *

Ang isa pa ka utod nga lalaki nga si Marek, naghinumdom: “Bangod sa nagabag-obag-o nga kahimtangan sang katilingban kag pulitika sa Poland, pirme lang ako nagakadulaan sang trabaho. Nagpaluya gid ini sa akon. Nahadlok ako magsugod sang negosyo kay wala ako sing eksperiensia sa sini. Sang ulihi, nasulay ako nga magnegosyo kay abi ko paagi sa sini, maamanan ko sing materyal ang akon pamilya nga indi maapektuhan ang akon espirituwalidad. Apang nagsala gid ako.”

Bangod sa madasig nga pagmahal sang mga balaklon kag madamo ang nagakadulaan sang trabaho, nangin desperado ang pila kag naghimo sing di-maalamon nga mga desisyon. May mga utod nga naga-overtime, nagakuha sing dugang nga trabaho, ukon naganegosyo bisan pa wala sila sing eksperiensia sa sini. Abi nila ang dugang nga kita makabulig sa ila pamilya kag indi makahalit sang ila espirituwalidad. Apang,  bisan ang maayo nga plano mahimo mapaslawan bangod sa wala ginapaabot nga mga kahimtangan kag indi estable nga ekonomiya. Subong resulta, ang pila nasiod sang kakagod kag ginbaylo ang ila espirituwalidad sa materyal nga mga butang.—Man. 9:11, 12.

Ang iban nga kauturan nawili sa paghingamo sa kalibutanon nga mga butang amo nga wala na sila sing tion para sa personal nga pagtuon, miting, ukon sa ministeryo. Subong resulta, naapektuhan ang ila espirituwalidad kag ang ila kaangtanan kay Jehova. Naapektuhan man ang ila importante nga kaangtanan sa mga ‘may labot sa ila sa pagtuo.’ (Gal. 6:10) Amat-amat nga napahilayo ang iban sa ila mga kauturan. Binagbinaga sing serioso ini nga aspekto.

Ang Aton Obligasyon sa Aton mga Masigkatumuluo

Subong mag-ululutod, madamo kita sing kahigayunan nga ipakita ang aton gugma sa isa kag isa. (Roma 13:8) Sa inyo kongregasyon, mahimo may “mga napiutan nga nagapangayo sing bulig.” (Job 29:12, NW) Ang iban mahimo ginakulang sa materyal. Si apostol Juan nagapahanumdom sa aton: “Ang bisan sin-o nga may palangabuhian sining kalibutan kag nakita niya ang iya utod nga nagakinahanglan apang ginasira niya ang ganhaan sang iya mapinalanggaon nga kaawa sa iya utod, paano naton masiling nga may gugma sia sa Dios?”—1 Juan 3:17.

Mahimo nga nakapakita ka na sing kaalwan sa iban. Apang, dapat naton dumdumon nga indi lamang materyal nga bulig ang aton mahatag sa aton mga utod. Ang iban mahimo nasubuan ukon naluyahan sing buot. Ang pila nagabatyag nga indi sila takus para mag-alagad kay Jehova, may balatian, ukon namatyan sing hinigugma. Ang isa ka paagi nga mapalig-on naton sila amo ang pagpamati kag pagpakig-istorya sa ila. Sa amo, mahatagan naton sila sing emosyonal kag espirituwal nga bulig. (1 Tes. 5:14) Sa masami, ang paghimo sini labi nga magapabakod sang aton kaangtanan sa aton mga kauturan.

Ang mga gulang sa kongregasyon amo ang labi nga yara sa posisyon nga magpamati sing mahinuklugon, mangin mahinangpanon, kag maghatag sing Makasulatanhon nga laygay. (Binu. 20:28) Sa paghimo sini, ginailog nila si apostol Pablo, nga may “mapinalanggaon nga balatyagon” sa iya espirituwal nga mga kauturan.—1 Tes. 2:7, 8.

Apang, kon ang isa ka Cristiano magpalayo sa panong, paano niya matuman ang iya obligasyon sa iya mga masigkatumuluo? Bisan ang mga gulang mahimo masulay nga mangin materyalistiko. Kamusta kon ang isa ka Cristiano magpadala sa sini nga pagsulay?

Ginabug-atan Bangod sa mga Kabalaka sa Kabuhi

Subong sang nabinagbinag na naton, ang pagpanikasog sing tuman sa pag-aman sa pisikal nga mga kinahanglanon sang aton pamilya masami  nagadala sing kabalaka kag makapaluya sa espirituwal. (Mat. 13:22) Si Marek, nga ginsambit kaina, nagpaathag: “Sang naputo ang akon negosyo, nagdesisyon ako nga magtrabaho sa abroad. Nagtrabaho ako didto sang tatlo ka bulan, pagkatapos nasundan pa ini sang tatlo ka bulan, kag sang ulihi nangin sigesige na ini, kag kon magpauli ako malip-ot lang nga tion ang tener ko sa balay. Indi gid maayo ang nangin epekto sini sa akon di-tumuluo nga asawa.”

Indi lamang ang pamilya ang maapektuhan sini. “Luwas sa madamo nga inoras nga pagtrabaho sa nagatagiti nga init,” siling ni Marek, “nakaupod ko ang bastos nga mga tawo nga nagapanghingalit sa iban. Daw wala sila sing kinalain sa mga gangster. Nagbatyag ako sing kapung-aw kay ginasimusimo lang nila ako. Bangod indi ko na maatipan ang akon kaugalingon, nagaduhaduha ako kon bala may ikasarang pa ako nga mag-alagad sa iban.”

Ang masubo nga resulta sang desisyon ni Marek dapat magpahulag sa aton nga magdulog sing makadali kag maghunahuna sing maayo. Huo, ang pag-abroad mahimo makasolbar sang pinansial nga problema, apang indi ayhan ini magtuga sang iban pa nga problema? Halimbawa, ano na lang ang matabo sa espirituwal kag emosyonal nga kahimtangan sang aton pamilya? Ano ang mangin epekto sini sa aton pagpakig-angot sa kongregasyon? Indi ayhan ini magaupang sa aton sa pagbaton sing pribilehiyo nga makaalagad sa aton mga kauturan?—1 Tim. 3:2-5.

Apang, indi na kinahanglan mag-abroad ang isa agod masiod sia sa trabaho. Binagbinaga ang natabo kanday Jarosław kag Beata. “Sang primero daw wala man kami sing problema,” siling niya. “Sang bag-ong kasal kami, nagnegosyo kami sing hotdog kag nakapuesto sa lugar nga madamo sing tawo. Maayo ang amon kita kag nagdaku ang amon negosyo. Apang tuman sa amon kasako amo nga indi na kami makatambong sa Cristianong mga miting. Sang ulihi, nag-untat ako sa pagpayunir kag sa pag-alagad subong ministeryal. Bangod nawili ako sa daku nga kita, nagpahimo pa gid kami sang daku nga tiendahan kag nakigsosyo sa isa ka di-tumuluo. Wala madugay, nagakadto na ako sa iban nga pungsod agod magpirma sing kontrata nga minilyon ka dolyar. Talagsa na lang ako nagapauli, kag naapektuhan sini ang akon kaangtanan sa akon asawa kag bata nga babayi. Sang ulihi, nag-untat kami sa pag-alagad kay Jehova. Bangod wala na kami nagapakig-angot sa kongregasyon, nalipatan na namon ang amon mga kauturan.”

Ano ang matun-an naton sa sini nga eksperiensia? Ang paghandum nga magtigayon sang kaugalingon nga “paraiso” makasiod sa isa ka Cristiano. Mahimo ini magresulta sa pagpabaya sang isa sa iya pribilehiyo ukon pagkadula pa gani sang iya “mga panapton,” ukon Cristianong identidad. (Bug. 16:15) Mahimo ini magpahilayo sa aton sa mga kauturan nga aton anay ginaalagaran.

Usisaa sing Bunayag ang Imo Kaugalingon

Mahimo ka magsiling, ‘Indi ina matabo sa akon.’ Apang, dapat naton binagbinagon kon ano gid bala ang kinahanglan naton sa aton kabuhi. “Wala kita sing nadala sa kalibutan, kag wala man kita sing mapagua,” sulat ni Pablo. “Gani, kon kita may pagkaon, panapton kag pasilungan, mangin kontento na kita sa sini nga mga butang.” (1 Tim. 6:7, 8) Lainlain ang talaksan sang pagkabuhi sa kada pungsod. Ang ginakabig nga simple sa manggaranon nga pungsod maluho na sa iban nga pungsod.

Bisan ano man ang talaksan sang pagkabuhi sa pungsod nga ginapuy-an naton, binagbinaga ang masunod nga ginsiling ni Pablo: “Ang mga determinado nga mangin manggaranon nagakahulog sa pagsulay kag sa siod kag sa madamo nga binuang kag makahalalit nga kailigbon, nga nagatugdang sang mga tawo sa kalaglagan kag kapahamakan.” (1 Tim. 6:9) Ang siod masami nga indi matalupangdan. Gindesinyo ini sa pagdakop sa biktima nga indi makapangaman. Paano naton malikawan nga masiod sang “makahalalit nga kailigbon”?

Ang pagpahamtang sing prioridad makapahulag sa aton nga maghatag sing dugang nga tion para sa intereses sang Ginharian, lakip na sa personal nga pagtuon. Ina nga pagtuon makabulig agod ang isa ka Cristiano “may ikasarang gid,  kag nasangkapan sing bug-os” sa pag-alagad sa iban.—2 Tim. 2:15; 3:17.

Pagligad sang mga tinuig, nagpanikasog gid ang mahigugmaon nga mga gulang sa pagpabakod kag pagpalig-on kay Jarosław. Napahulag sia sa paghimo sing daku nga mga pagbag-o. Nagsiling sia: “Isa ka bes, serioso ako nga gin-istorya sang mga gulang kag ginkutlo nila sa akon ang halimbawa sa Biblia tuhoy sa isa ka manggaranon nga pamatan-on nga luyag magkabuhi sing dayon apang indi handa nga biyaan ang iya materyal nga mga pagkabutang. Dayon mataktikanhon nila ako nga ginpamangkot kon bala ini nga impormasyon naaplikar sa akon. Nakabulig gid ini nga makamarasmas ako!”—Hulu. 11:28; Mar. 10:17-22.

Bunayag nga gin-usisa ni Jarosław ang iya sitwasyon kag nagdesisyon sia nga untatan ang dalagku nga mga kontrata sa negosyo. Sa sulod sang duha ka tuig, nakapasag-uli sila sa espirituwal. Si Jarosław nagaalagad na karon subong isa ka gulang. Nagsiling sia: “Kon may mga utod nga nawili sa pagnegosyo kag nagpatumbaya sang ila espirituwalidad, ginagamit ko ang akon halimbawa agod ipakita sa ila nga indi gid maalamon nga magpagota sing sampihakan sa mga di-tumuluo. Indi mahapos pamatukan ang makagalanyat nga mga tanyag kag di-bunayag nga mga buhat.”—2 Cor. 6:14.

Si Marek nakatuon man sing leksion sa masubo nga paagi. Bisan pa ang iya daku nga sueldo sa abroad nakabulig sa iya pamilya sa pinansial, naapektuhan sini ang iya kaangtanan sa Dios kag sa iya mga kauturan. Sang ulihi, gin-usisa niya liwat ang iya mga prioridad. “Sa sulod sang mga tinuig, daw kaangay ako kay Baruc nga ‘nagapangita sing dalagku nga mga butang para sa iya kaugalingon.’ Ginbubo ko ang akon tagipusuon kay Jehova, ginsugid ko sa iya ang akon mga kabalaka, kag nabatyagan ko nga nagbalik liwat ang akon kapagsik sa espirituwal.” (Jer. 45:1-5) Si Marek nagatinguha na karon nga malab-ot ang “maayo nga buhat,” ang mangin isa ka manugtatap sa kongregasyon.—1 Tim. 3:1.

Si Marek nagapaandam sa mga luyag magtrabaho sa abroad: “Kon yara ka sa iban nga pungsod, mahapos ka lang masiod sining malaut nga kalibutan. Mabudlayan ka sa pagpakigsugilanon sa iban bangod indi ka makahibalo maghambal sang ila lokal nga lenguahe. Huo may dala ka nga kuarta pagpauli mo, apang may upod ini nga pilas sa espirituwal nga madugay magpali.”

Mapahamut-an naton si Jehova kon magpabilin kita nga balanse sa aton sekular nga trabaho kag sa aton obligasyon sa aton mga kauturan. Mangin maayo kita nga halimbawa sa iban kag mapahulag man sila nga maghimo sing maalamon nga desisyon. Ang imo pagsakdag, kaluoy, kag maayo nga halimbawa makabulig sa mga kauturan nga ginabug-atan. Ang mga gulang kag hamtong nga kauturan makabulig sa ila mga masigkatumuluo nga mahuptan ang pagkabalanse kag malikawan nga madaug sang mga kabalaka sa kabuhi.—Heb. 13:7.

Kabay nga indi naton pagpatumbayaan ang aton mga masigkatumuluo paagi sa pag-una sang aton sekular nga trabaho. (Fil. 1:10) Sa baylo, mangin “manggaranon [kita] sa Dios” samtang ginauna naton ang mga intereses sang Ginharian sa aton kabuhi.—Luc. 12:21.

[Nota]

[Mga Retrato sa pahina 21]

Ang imo bala trabaho nagaupang sa imo sa pagtambong sa mga miting?

[Mga Retrato sa pahina 23]

Ginapabaloran mo bala ang mga kahigayunan nga mabuligan ang imo mga kauturan?