May Rason Ka Gid nga Magkalipay

HALIN sa pinakagamay nga buhi nga selula tubtob sa pinakadaku nga hugpong sang mga galaksiya, makita naton ang pagkaorganisado. Indi ini katingalahan bangod ang aton Manunuga ‘indi Dios sang kagamo.’ (1 Cor. 14:33) Dalayawon man ang kahimusan sang Dios tuhoy sa pagsimba. Binagbinaga ang ginhimo ni Jehova. Nagtuga sia sang bug-os uniberso nga organisasyon nga ginahuman sang ginatos ka milyon ka intelihente nga mga tinuga—tawo kag anghel—nga may kahilwayan sa pagbuot kag nahiusa sa putli nga pagsimba. Daw ano gid ka dalayawon!

Sa dumaan nga Israel, ang Jerusalem amo ang simbulo sang dutan-on nga organisasyon sang Dios kay diri nahamtang ang templo ni Jehova kag nagapuyo ang iya hinaplas nga hari. Ang isa ka Israelinhon nga ginbihag sa Babilonia nagpabutyag sang iya balatyagon tuhoy sa balaan nga siudad: “Ang akon dila magtapik sa akon ngalagngag, kon indi ako makadumdum sa imo, kon indi ko pagpasulabihon ang Jerusalem labaw sa akon pinasulabi nga kalipay!”—Sal. 137:6.

Amo man bala sina ang ginabatyag mo sa organisasyon sang Dios sa karon? Nagapahalipay bala ini sa imo labaw sa bisan ano nga butang? Nahangpan bala sang imo kabataan ang kasaysayan kag hilikuton sang dutan-on nga bahin sang organisasyon sang Dios? Ginaapresyar bala nila nga bahin sila sang bug-os kalibutan nga paghiliutod sang mga Saksi ni Jehova? (1 Ped. 2:17) Ngaa indi ninyo paggamiton ang masunod nga mga panugda sa inyo gab-i sang Pangpamilya nga Pagsimba agod buligan ang inyo pamilya nga maapresyar ang organisasyon ni Jehova?

Dumduma ang “Madugay Na nga Panahon”

Kada tuig, nagatipon ang mga pamilya nga Israelinhon agod saulugon ang Paskua. Sang nagsugod ini nga kapiestahan, ginsilingan ni Moises ang katawhan: “Kon ang imo anak magpamangkot sa imo sa ulihi, ‘Ano ang kahulugan sini?’ isiling mo sa iya, ‘Paagi sa kusog sang kamot ginpagua kami ni Jehova sa Egipto, sa balay sang mga ulipon.” (Ex. 13:14, NW) Indi dapat pagkalimtan sang mga Israelinhon ang mga ginhimo ni Jehova para sa ila. Pat-od gid nga ginsunod sang kalabanan nga Israelinhon nga amay ang sugo ni Moises. Sang ulihi, ang isa sa ila kaliwat nangamuyo: “O Dios ko, nabatian namon ang ginsugid sa amon sang amon mga katigulangan tuhoy sa mga ginhimo mo sang mga adlaw nila, sang madugay na nga panahon.”—Sal. 44:1, NW.

Para sa mga pamatan-on sa karon, ang kasaysayan sang mga Saksi ni Jehova sang nagligad nga 100 ka tuig ukon kapin pa daw kaangay man sang mga hitabo sang “madugay na nga panahon.” Paano mo ini matudlo sa imo kabataan? Ang iban nga ginikanan nagagamit sang Jehovah’s Witnesses—Proclaimers of God’s Kingdom, Tuigan nga Libro, mga kasaysayan sa kabuhi sa aton mga publikasyon, kag iban pa nga report tuhoy sa kasaysayan sang organisasyon, lakip ang aton bag-o nga DVD tuhoy sa katawhan sang Dios sa moderno nga tion. Ang mga video tuhoy sa paghingabot sa aton mga kauturan sa anay Union Sobyet kag Nazi Germany makabulig sa mga pamilya nga magsandig kay Jehova kon makaatubang sila sang mga pagtilaw. Gamita ninyo ini nga materyal sa inyo gab-i sang Pangpamilya nga Pagsimba. Magabulig ini nga maglig-on ang pagtuo sang inyo kabataan pananglit nga makaatubang sila sang mga pagsulay.

Ang mga kabataan madali lang matak-an kon istoryahan sila tuhoy sa kasaysayan. Gani, mas maayo nga hatagan sila sing asaynment. Halimbawa, mahimo mo papilion ang imo bata sang nanamian niya nga pungsod, ipa-research sa iya ang kasaysayan sang mga Saksi sa sini nga lugar,  kag ipasugid ini sa iya sa inyo pagtuon. Basi may mga ka-kongregasyon kamo nga madugay na nga nagaalagad nga mahimo ninyo agdahon sa inyo gab-i sang pangpamilya nga pagsimba. Puede sila interbyuhon sang inyo bata kag pasugiron sang ila mga eksperiensia. Mahimo mo man ipadrowing sa ila ang talalupangdon nga mga hitabo sa organisasyon subong sang pagtukod sang sanga talatapan, internasyonal nga kombension, ukon paggamit sang ponograpo sa pagbantala sa mga pamalay.

Tun-i Kon Paano ‘Nagapanghikot ang Tagsa ka Bahin’

Ginpaanggid ni apostol Pablo ang Cristianong kongregasyon sa “bug-os nga lawas, bangod ang mga bahin sini nagaangtanay sing nahisanto kag ginatingob paagi sa tagsa ka lutalutahan nga nagahatag sang kinahanglanon, suno sa nagakaigo nga pagpanghikot sang tagsa ka bahin.” (Efe. 4:16) Kon tun-an naton kon paano nagapanghikot ang lawas sang tawo magadugang ang aton apresasyon kag pagtahod sa aton Manunuga. Sing kaanggid, kon usisaon naton kon paano nagapanghikot ang mga kongregasyon sa bug-os nga kalibutan, magadayaw gid kita sa “madamo nga bahin sang kaalam sang Dios.”—Efe. 3:10.

Ginalaragway ni Jehova kon paano nagapanghikot ang iya organisasyon, lakip na ang langitnon nga bahin sini. Halimbawa, ginasugid niya sa aton nga ang bugna ginhatag niya anay kay Jesucristo, nga dayon amo ang ‘nagpadala sang anghel nga nagpakita sini paagi sa mga tanda kay Juan nga iya ulipon, nga nagpanaksi.’ (Bug. 1:1, 2) Kon ginpahayag sang Dios ang pagpanghikot sang di-makita nga bahin sang iya organisasyon, indi bala nga ginapakita sini nga luyag man niya nga mahangpan naton kon paano ‘nagapanghikot ang tagsa ka bahin sini’ sa duta?

Halimbawa, kon malapit na ang pagduaw sang inyo manugtatap sang sirkito, ngaa indi ninyo pagbinagbinagon ang mga hilikuton kag pribilehiyo sang mga nagalakbay nga manugtatap? Paano nila kita ginabuligan? Mahimo man ninyo binagbinagon ang mga pamangkot pareho sang: Ngaa importante gid nga ireport ang pag-alagad sa latagon? Paano ginasakdag ang pinansial nga kinahanglanon sang organisasyon? Paano naorganisar ang Nagadumala nga Hubon, kag paano ini nagaaman sang espirituwal nga pagkaon?

Kon mahangpan naton kon paano ginaorganisar ang katawhan ni Jehova, magabenepisyo kita sa tatlo ka paagi: Magalambo ang aton apresasyon sa mga nagapanikasog para sa aton. (1 Tes. 5:12, 13) Mapahulag kita nga sakdagon ang teokratiko nga mga kahimusan. (Binu. 16:4, 5) Kag magalig-on ang aton pagsalig sa mga nagapanguna kon makita naton nga may Makasulatanhon nga basihan ang mga desisyon kag kahimusan nga ila ginahimo.—Heb. 13:7.

“Tan-awa Ninyo ang Puluy-an nga mga Torre Sini”

“Magmartsa kamo, kag libuta ninyo ang Sion, kag isipa ang mga torre sini. Talupangda ninyo ang mga pamakod sini. Tan-awa ninyo ang puluy-an nga mga torre sini, agod masugid ninyo ini sa palaabuton nga kaliwatan.” (Sal. 48:12, 13, NW) Ginpalig-on sang salmista ang mga Israelinhon nga mangin pamilyar sa pisikal nga hitsura sang Jerusalem. Pat-od gid nga indi malimtan sang Israelinhon nga mga pamilya ang ila eksperiensia sang naglakbay sila pakadto sa balaan nga siudad para sa tuigan nga mga kapiestahan kag nakita ang dalayawon nga templo sini. Mahimo nga napahulag sila nga ‘isugid ini sa palaabuton nga kaliwatan.’

Binagbinaga ang hara sang Sheba nga sang primero daw indi magpati sa ginsugid sa iya tuhoy sa maayo nga paggahom kag daku nga kaalam ni Solomon. Paano sia nakumbinsi? “Ako wala magpati sang mga polong nila,” siling niya, “tubtub nga nag-abut ako kag ang akon mga mata nakakita sini.” (2 Cron. 9:6) Huo, daku gid ang epekto sa aton sang aktual nga makita sang aton “mga mata.”

Paano mo mabuligan ang imo kabataan nga makita sang ila mismo “mga mata” ang katahom sang organisasyon ni Jehova? Kon malapit ang sanga talatapan sa inyo lugar, tinguhai nga magduaw sa sini. Halimbawa, sanday Mandy kag Bethany nagapuyo mga 1,500 kilometros ang kalayuon sa Bethel sa ila pungsod. Apang, masami sila ginadala sang ila mga ginikanan  agod mag-tour sa Bethel sang gagmay pa sila. “Sang wala pa kami maka-tour sa Bethel, abi namon tuman ka serioso kag mga tigulang lang ang mga tawo didto,” siling nila. “Apang, may nakilala kami didto nga mga pamatan-on nga malipayon nga nagaalagad kay Jehova! Nakita namon nga ang organisasyon ni Jehova indi lang gali sa amon lugar, kag kada kadto namon sa Bethel napalig-on gid kami sa espirituwal.” Sang nakita nanday Mandy kag Bethany kon paano nagapanghikot ang organisasyon sang Dios, napahulag sila nga magpayunir, kag nakapribilehiyo pa gani sila nga mag-alagad sa Bethel subong temporaryo nga mga boluntaryo.

May isa pa kita ka paagi nga ‘makita’ ang organisasyon ni Jehova nga wala maeksperiensiahan sang mga Israelinhon sadto. Sining karon lang, madamo kita sang nabaton nga DVD nga nagapakita sang nanuhaytuhay nga bahin sang organisasyon sang Dios, subong sang: Jehovah’s Witnesses—Organized to Share the Good News, Our Whole Association of Brothers, To the Ends of the Earth, kag United by Divine Teaching. Kon makita mo kag sang inyo pamilya ang pagpangabudlay sang mga Bethelite, boluntaryo sa mga emerhensia, mga misyonero, kag mga utod nga nagahanda kag nagaorganisar sang mga kombension, labi nga magadalom ang inyo apresasyon sa bug-os kalibutan nga paghiliutod.

Ang tagsa ka kongregasyon sang katawhan sang Dios may importante nga papel sa pagbantala sang maayong balita kag sa pagsakdag sang tagsa ka katapo sini. Gani subong pamilya, hatagi ninyo sing tion nga dumdumon ang “bug-os nga paghiliutod sa kalibutan.” Makabulig ini sa imo kag sa imo kabataan nga mangin “malig-on sa pagtuo,” kag kabigon ini nga rason para magkalipay.—1 Ped. 5:9.

 [Kahon/Retrato sa pahina 18]

Organisasyon sang Dios Topiko nga Takus Gid Tun-an

Madamo kita sang materyal nga magamit agod mahibaluan ang kasaysayan kag pagpanghikot sang organisasyon ni Jehova. Makabulig sa aton ang pagbinagbinag sang masunod nga mga pamangkot:

☞ Paano nagsugod ang hilikuton sang mga nagalakbay nga manugtatap sa moderno nga tion?—Jehovah’s Witnesses—Proclaimers of God’s Kingdom, pahina 222-227.

☞ Ano ang talalupangdon tuhoy sa “Adlaw Sang mga Kabataan” nga Teokratikong Asembleya sang 1941?—Jehovah’s Witnesses—Proclaimers of God’s Kingdom, pahina 86, 88.

☞ Paano nagahimo sing desisyon ang Nagadumala nga Hubon?—“Pagpanaksi sing Maid-id Tuhoy sa Ginharian sang Dios,” pahina 108-114.