Pag-alagad kay Jehova Upod ang Bug-os nga Pagkaserioso
Pag-alagad kay Jehova Upod ang Bug-os nga Pagkaserioso
“Bisan ano nga butang nga serioso, . . . padayon nga hunahunaa ini nga mga butang.”—FIL. 4:8.
1, 2. Ngaa madamo ang wala nagatamod sing serioso sa kabuhi, nga nagadul-ong sa ano nga mga pamangkot?
NAGAKABUHI kita sa labing mabudlay nga tion sa maragtas sang tawo. Para sa mga wala sing suod nga kaangtanan kay Jehova, daw imposible malandas ining “makahalanguyos nga mga tion nga mabudlay atubangon.” (2 Tim. 3:1-5) Bangod nagasalig sila sa ila kaugalingon nga kusog sa pag-atubang sang ila mga problema, limitado lamang ang ila kadalag-an. Agod malikawan nila nga tamdon sing tuman ka serioso ang kabuhi, madamo ang nagaubos sang ila tion sa mga kalingawan.
2 Ginauna sang madamo nga tawo ang pagpangalipay agod malimtan ang ila mga problema. Mahimo man ini matabo sa mga Cristiano kon indi sila maghalong. Paano naton ina malikawan? Kinahanglan bala kita mangin serioso sa tanan nga tion? Paano naton mabalanse ang aton mga salabton kag mga kalingawan? Ano nga mga prinsipio sa Kasulatan ang makabulig sa aton nga indi mangin tuman ka serioso?
Mangin Serioso sa Kalibutan nga Mahigugmaon sa Kinasadya
3, 4. Paano kita ginabuligan sang Kasulatan nga makita nga importante ang pagkaserioso?
3 Indi naton mapanghiwala nga ining kalibutan “mahigugmaon sa kinasadya.” (2 Tim. 3:4) Ang pag-una sa mga kalingawan mahimo maghalit sa aton espirituwalidad. (Hulu. 21:17) Gani, may rason gid si apostol Pablo nga ilakip sa iya mga sulat kanday Timoteo kag Tito ang laygay tuhoy sa pagkaserioso. Kon iaplikar naton ini nga laygay, malikawan naton nga tamdon sing di-serioso ang kabuhi.—Basaha ang 1 Timoteo 2:1, 2; Tito 2:2-8.
4 Mga siniglo na ang nagligad, nagsulat si Solomon nga mas maayo nga hatagan sing tion ang paghunahuna tuhoy sa serioso nga mga butang sangsa mangalipay lang pirme. (Man. 3:4; 7:2-4) Bangod malip-ot lamang ang aton kabuhi, kinahanglan gid kita ‘magpanikasog sing lakas’ agod maagom ang kaluwasan. (Luc. 13:24) Bangod sini, dapat naton hunahunaon ang mga “butang nga serioso.” (Fil. 4:8, 9) Buot silingon nga hatagan naton sing serioso nga igtalupangod ang tanan nga aspekto sang aton Cristianong pagkabuhi.
5. Sa ano nga aspekto sang kabuhi dapat kita mangin serioso?
5 Halimbawa, bilang pag-ilog kay Jehova kag kay Jesus, ginatamod sing serioso sang mga Cristiano ang ila salabton nga magtrabaho sing lakas. (Juan 5:17) Subong resulta, masami sila ginadayaw bangod responsable sila kag masaligan sa trabaho. Ang ulo sang pamilya amo ang ilabi na nga magpanikasog sing lakas nga amanan ang iya pamilya. Kay kon indi niya ini paghimuon, ‘ginapanghiwala niya ang iya pagtuo’ kag kaangay lang nga ginapanghiwala niya si Jehova!—1 Tim. 5:8.
Serioso Apang Makalilipay nga Pagsimba
6. Ngaa dapat naton tamdon sing serioso ang aton pagsimba kay Jehova?
6 Importante gid para kay Jehova nga simbahon sia sa husto nga paagi. Halimbawa, naeksperiensiahan sang mga Israelinhon ang malain nga mga resulta sang wala nila ginsimba si Jehova suno sa Mosaikong Kasuguan. (Jos. 23:12, 13) Sang unang siglo C.E., kinahanglan gid manikasog sing lakas ang mga sumulunod ni Cristo agod ang matuod nga pagsimba indi madagtaan sang sayop nga mga panudlo kag panimuot. (2 Juan 7-11; Bug. 2:14-16) Sa karon, dapat man padayon nga tamdon sing serioso sang matuod nga mga Cristiano ang ila pagsimba.—1 Tim. 6:20.
7. Paano naghanda si Pablo sa iya ministeryo?
7 Ang aton pag-alagad sa latagon isa ka tuburan sang kalipay. Apang, agod mahuptan ini nga kalipay, dapat kita mangin serioso sa sini kag maghanda sing maayo. Si Pablo nagsiling nga ginahatagan niya sing konsiderasyon ang mga tawo nga iya ginatudluan. Nagsulat sia: “Nangin tanan nga butang ako sa tanan nga sahi sang mga tawo, agod maluwas ko sa bisan ano man nga paagi ang iban. Apang ginahimo ko ang tanan nga butang tungod sa maayong balita, agod mapaambit ko ini sa iban.” (1 Cor. 9:22, 23) Nalipay si Pablo sa pagbulig sa mga tawo sa espirituwal, kag gintinguhaan gid niya nga magpasibu sa kinahanglanon sang iya mga tagpalamati. Sa amo, napahulag niya sila nga simbahon si Jehova.
8. (a) Ano dapat ang aton panimuot sa mga tawo nga aton ginatudluan? (b) Paano ang pagdumala sing pagtuon sa Biblia nagahatag sing kalipay?
8 Daw ano ka importante kay Pablo ang iya ministeryo? Handa sia nga “magpaulipon” kay Jehova kag sa mga magapamati sa mensahe sang kamatuoran. (Roma 12:11; 1 Cor. 9:19) Kon nagatudlo kita sang Pulong sang Dios—sa aton mga ginatun-an sa Biblia, sa Cristianong miting, ukon sa aton Pangpamilya nga Pagsimba—nagabatyag bala kita nga may yara kita salabton sa aton mga ginatudluan? Ayhan nagabatyag kita nga tuman ka budlay ang pagdumala sing regular nga pagtuon sa Biblia. Huo, nagakinahanglan ini nga buhinan naton ang aton tion sa personal nga mga hilikuton agod mabuligan ang iban. Apang indi bala nga nahisuno ina sa ginsiling ni Jesus nga “may kapin nga kalipay sa paghatag sangsa pagbaton”? (Binu. 20:35) Wala na sang iban pa nga butang nga makahatag sa aton sing kapin nga kalipay sangsa pagtudlo sa iban padulong sa kaluwasan.
9, 10. (a) Ang pagkaserioso bala nagakahulugan nga indi na kita makarelaks kag magkasadya upod sa iban? Ipaathag. (b) Ano ang makabulig sa isa ka gulang nga mangin makapalig-on kag madali palapitan?
9 Ang pagkaserioso wala nagakahulugan nga indi na kita puede magrelaks kag magkasadya upod sa iban. Si Jesus nagpakita sing himpit nga halimbawa indi lamang sa pagpanudlo kundi sa paghatag man sing tion sa pagrelaks kag pagpakigsuod sa iban. (Luc. 5:27-29; Juan 12:1, 2) Ang pagkaserioso wala man nagakahulugan sang sobra nga pagkaestrikto. Kon si Jesus estrikto katama ukon tuman ka serioso, mahimo nga ginpalayuan sia sang mga tawo. Apang, bisan pa ang mga bata wala natahap sa iya. (Mar. 10:13-16) Paano naton mailog si Jesus?
10 Ang isa ka utod nagsiling tuhoy sa isa ka gulang, “Estrikto sia sa iya kaugalingon apang wala sia nagapangita sing kahimpitan sa iban.” Amo ka man bala sina? Nagakaigo lamang nga mangin makatarunganon kita sa aton ginapaabot sa iban. Halimbawa, ang kabataan madali mag-uswag kon ang ila mga ginikanan magpahamtang sing makatarunganon nga mga tulumuron sa ila kag buligan sila nga malab-ot ini. Sing kaanggid, mahimo man palig-unon sang mga gulang ang pila ka utod nga mag-uswag sa espirituwal kag hatagan sila sing espesipiko nga mga panugda kon paano nila ini himuon. Dugang pa, kon ang isa ka gulang may balanse nga pagtamod sa iya kaugalingon, mangin makapalig-on sia kag makapaumpaw sa iban. (Roma 12:3) Ang isa ka utod nga babayi nagsiling: “Wala ako nanamian sa gulang nga yamuhat. Apang kon tuman naman sia ka serioso, mabudlay magpalapit sa iya.” Ang isa pa ka utod nagsiling nga ‘natahap sia magpalapit sa pila ka gulang bangod tuman sa ila ka serioso.’ Dapat likawan sang mga gulang nga sila ang mangin rason nga madula ang kalipay sang mga kauturan sa ila pagsimba kay Jehova, ang “malipayon nga Dios.”—1 Tim. 1:11.
Paglab-ot sang Katungdanan sa Kongregasyon
11. Ano ang buot silingon sang ‘pagtinguha’ sa sulod sang kongregasyon?
11 Sang ginpalig-on ni Pablo ang mga lalaki sa kongregasyon nga magpanikasog nga mangin kalipikado sa mabug-at nga katungdanan, wala niya sila ginpalig-on nga himuon ini bangod sa ila personal nga ambisyon. Sa baylo, nagsulat sia: “Kon ang bisan sin-o nga lalaki nagatinguha sa palangakuan sang manugtatap, nagahandum sia sang maayo nga buhat.” (1 Tim. 3:1, 4) Ang ‘pagtinguha’ nagakahulugan nga ang Cristianong mga lalaki magpalambo sing handum nga magpangabudlay sing lakas agod matigayon ang espirituwal nga mga kinaiya nga kinahanglan nila sa pag-alagad sa ila mga kauturan. Kon ang utod nga lalaki isa ka tuig na nga nabawtismuhan kag nalab-ot niya sa makatarunganon nga paagi ang Makasulatanhon nga mga kalipikasyon para sa mga ministeryal nga alagad nga mabasa sa 1 Timoteo 3:8-13, mahimo na sia irekomendar. Talupangda nga ang bersikulo 8 espesipiko nga nagasiling: “Ang mga ministeryal nga alagad dapat man mangin serioso.”
12, 13. Paano matinguhaan sang mga pamatan-on nga lalaki ang paglab-ot sang mga katungdanan?
12 Bawtismado ka bala nga utod nga lalaki nga beintehon ang edad kag serioso sa imo pag-alagad kay Jehova? Madamo sing paagi nga makatinguha ka sa paglab-ot sang mga katungdanan. Ang isa ka paagi amo ang pagpauswag sang imo pagpakigbahin sa ministeryo sa latagon. Nalipay ka bala sa pagministeryo upod sa mga kauturan nga nanuhaytuhay ang edad? Nagatinguha ka bala nga makakita sang matun-an sa Biblia? Kon ginasunod mo ang mga panugda sa Cristianong mga miting sa imo pagdumala sang pagtuon sa Biblia, mapauswag mo ang imo ikasarang sa pagtudlo. Isa pa, matun-an mo nga magpakita sing empatiya sa mga nagatuon pa lang sa mga dalanon ni Jehova. Samtang amat-amat nga ginatinguhaan sang imo estudyante nga iaplikar ang iya mga natun-an, makatuon ka man nga mangin mapinasensiahon kag mataktikanhon sa pagbulig sa iya.
13 Kamo nga mga pamatan-on nga utod nga lalaki sarang gid makabulig sa mga tigulang sa kongregasyon. Dapat interesado man kamo sa itsura sang Kingdom Hall kag nagabulig nga mahuptan ini nga matinlo kag mahipid. Kon handa ka nga himuon ang imo masarangan sa pagbulig, ginapakita mo nga serioso ka sa imo ministeryo. Kaangay ni Timoteo, matun-an mo kon paano ka mangin responsable sa pag-atipan sa mga kinahanglanon sang kongregasyon.—Basaha ang Filipos 2:19-22.
14. Paano ang mga pamatan-on nga lalaki ‘matilawan kon bala takus sila’ sa pag-alagad sa kongregasyon?
14 Mga gulang, hatagi sing asaynment sa kongregasyon ang mga pamatan-on nga lalaki nga nagatinguha nga ‘magpalagyo gikan sa mga kailigbon nga kinaandan sa pagkapamatan-on kag nagapakita sang pagkamatarong, pagtuo, gugma, paghidait,’ kag iban pa nga maayo nga mga kinaiya. (2 Tim. 2:22) Paagi sa sini, ‘matilawan sila kon bala takus sila’ sa pag-abaga sang mga katungdanan, sa amo ang ila “pag-uswag madayag sa tanan nga tawo.”—1 Tim. 3:10; 4:15.
Mangin Serioso sa Kongregasyon kag sa Pamilya
15. Suno sa 1 Timoteo 5:1, 2, paano naton mapakita nga ginatamod naton sing serioso ang iban?
15 Nalakip sa pagkaserioso ang pagpadungog sa aton mga kauturan nga lalaki kag babayi. Sa iya laygay kay Timoteo, ginpadaku ni Pablo nga kinahanglan tahuron ang iban. (Basaha ang 1 Timoteo 5:1, 2.) Importante ini ilabi na kon nagapakig-angot sa tuhay nga sekso. Ang halimbawa ni Job sa pagpadungog sa mga babayi, ilabi na sa iya asawa, takus gid ilugon. Ginlikawan gid niya ang pagtulok sa iban nga babayi nga may malisya. (Job 31:1) Kon ginatamod naton sing serioso ang aton mga utod nga lalaki kag babayi, indi kita magpakiat sa ila ukon maghimo sing bisan ano nga masaw-ahan sila makig-upod sa aton. Ang ilabi na nga dapat magpakita sing pagpadungog sa isa kag isa amo ang mga magnobyahanay nga nagaplano na sa pagminyo. Indi gid paghampangan sang isa ka serioso nga Cristiano ang balatyagon sang tuhay nga sekso.—Hulu. 12:22.
16. Paano ginatamod sang kalibutan ang papel sang bana kag amay, apang paano ini ginalaragway sang Biblia?
16 Dapat man naton tamdon sing serioso ang aton hatag-Dios nga papel sa pamilya. Masami nga ginapakanubo sa kalibutan ni Satanas ang papel sang bana kag amay. Makita sa industriya sang kalingawan nga ang ulo sang pamilya ginahimo nga kaladlawan kag wala ginatahod. Apang, sa Kasulatan ginahatagan gid sing daku nga importansia ang katungdanan sang bana, gintangdo sia subong “ulo sang iya asawa.”—Efe. 5:23; 1 Cor. 11:3.
17. Ipaathag kon paano ang aton pagpakigbahin sa pangpamilya nga pagsimba nagapakita nga serioso kita sa aton mga salabton.
17 Masami nga ginaamanan sang bana sang materyal nga kinahanglanon ang iya pamilya. Apang kon wala sia nagaaman sang espirituwal nga panuytoy, ginapakita niya nga nakulangan sia sing paghantop kag kaalam. (Deut. 6:6, 7) Amo kon ngaa ang 1 Timoteo 3:4 nagasiling nga kon ikaw isa ka ulo sang pamilya kag nagatinguha sang dugang nga mga pribilehiyo sa kongregasyon, dapat ikaw isa ka lalaki “nga nagadumala sang [imo] panimalay sa maayo nga paagi, may mga anak nga nagapasakop upod ang bug-os nga pagkaserioso.” Sa sini nga bahin, pamangkuta ang imo kaugalingon, ‘Regular ko bala nga ginadumalahan ang pangpamilya nga pagsimba sang akon panimalay?’ May pila ka Cristianong asawa nga nagapakitluoy pa sa ila mga bana nga pangunahan sila sa espirituwal. Dapat usisaon gid sing serioso sang tagsa ka bana ang iya salabton sa sini nga bahin. Siempre, dapat suportahan sang Cristianong asawa ang kahimusan sang Pangpamilya nga Pagsimba kag magkooperar sa iya bana agod magmadinalag-on ini.
18. Paano makatuon ang mga kabataan nga mangin serioso?
18 Ang mga kabataan ginapalig-on man nga tamdon sing serioso ang ila kabuhi. (Man. 12:1) Indi malain nga tudluan ang mga kabataan nga mangin mapisan kag magbulig sa mga ulubrahon sa balay suno sa ila masarangan. (Pan. 3:27) Sang bata pa si Hari David, natun-an niya kon paano mangin isa ka maayo nga manugbantay sang karnero. Nangin maayo man sia nga musikero kag manugkomposo, amo nga nakaalagad sia sa hari sang Israel. (1 Sam. 16:11, 12, 18-21) Wala sing duhaduha nga sang bata pa si David nagahampang sia, apang nagtuon man sia sing mapuslanon nga mga abilidad nga nagamit niya sang ulihi sa pagdayaw kay Jehova. Ang iya ikasarang sa pagbantay sang karnero nakabulig sa iya sa pagpanguna sing mapailubon sa pungsod sang Israel. Kamo nga mga pamatan-on, daw ano kadamo nga mapuslanon nga butang ang inyo natun-an—mga butang nga magabulig sa inyo sa pag-alagad sa inyo Manunuga kag sa paghanda sa mga katungdanan sa palaabuton?
Mangin Balanse
19, 20. Anong balanse nga panimuot ang determinado mo nga huptan sa imo kaugalingon kag sa imo pagsimba?
19 Mahimo naton tanan mapanikasugan nga mangin balanse kag indi mangin tuman ka serioso. Indi kita luyag nga “maglakas katarung.” (Man. 7:16) Ang diutay nga pagtinarso mahimo makapahaganhagan sang mabudlay nga mga sitwasyon, sa balay man, sa trabaho, ukon sa pagpakig-angot sa aton mga kauturan. Dapat gid likawan sang kada miembro sang pamilya nga mangin mabinantayon sa kakulangan sang kada isa agod indi maguba ang paghidait sa puluy-an. Sa kongregasyon, dapat matun-an sang tanan nga magkadlaw kag masadyahan sa pagpakig-upod sa kada isa, nga ginahuptan nga makapalig-on kag positibo ang aton pagpakigsugilanon kag pagtudlo.—2 Cor. 13:10; Efe. 4:29.
20 Nagakabuhi kita sa kalibutan nga nagabalewala kay Jehova kag sa iya mga kasuguan. Sa kabaliskaran, ginatamod gid sing serioso sang katawhan ni Jehova ang pagkamatinumanon kag pagkamainunungon sa iya. Daw ano ka makalilipay nga mangin bahin sinang daku nga katilingban sang katawhan nga nagasimba kay Jehova “upod ang bug-os nga pagkaserioso”! Kabay nga mangin determinado kita nga tamdon sing serioso ang aton kabuhi kag pagsimba.
Ano ang Imo Sabat?
• Ngaa dapat naton pamatukan ang indi serioso nga pagtamod sang kalibutan sa kabuhi?
• Paano kita mangin malipayon apang serioso sa aton ministeryo?
• Paano ang aton pagtamod sa pagtinguha sa mga katungdanan nagapakita kon bala serioso kita ukon indi?
• Ipaathag kon ngaa isa ka serioso nga butang ang pagpadungog sa aton kauturan kag sa mga katapo sang aton pamilya.
[Mga Pamangkot sa Pagtinuon]
[Mga Retrato sa pahina 12]
Dapat amanan sang bana ang iya pamilya sa materyal kag sa espirituwal
