Ang Pagsalig sing Bug-os kay Jehova Nagahatag sing Kalig-on

“Ang GINOO magapamati kon ako magtawag sa iya.”—SAL. 4:3.

1, 2. (a) Ano nga katalagman ang gin-atubang ni David? (b) Ano nga mga salmo ang binagbinagon naton?

SI Hari David madugay na nga nagagahom sa Israel, apang karon nagaatubang sia sing katalagman. Gindeklarar sang iya bata nga si Absalom nga sia na ang hari, kag napilitan si David nga magbiya sa Jerusalem. Gintraidoran man sia sang iya ginasaligan nga manuglaygay, kag subong upod sa pila nga nag-unong sa iya, nagahibi sia kag nagatiniil na lang pakadto sa Bukid sang mga Olibo. Dugang pa, ginapakamalaut sia kag ginahaboy sing mga bato kag mga yab-ok ni Simei, nga naghalin sa panimalay ni Hari Saul.—2 Sam. 15:30, 31; 16:5-14.

² Ini bala nga kabudlayan ang magapapanaug kay David sa Sheol sa kasubo kag kahuy-anan? Indi, bangod nagasalig sia kay Jehova. Maathag ini sa ikatlo nga Salmo nga ginkomposo ni David parte sa iya pagpalagyo. Sia man ang nagsulat sang ikap-at nga Salmo. Ginpakita sining duha ka komposisyon ang iya pagsalig nga ginapamatian kag ginasabat sang Dios ang mga pangamuyo. (Sal. 3:4; 4:3) Nagapasalig man ini sa aton nga si Jehova kaupod sang mga matutom, nga nagasuporta kag nagahatag sa ila sing paghidait kag kalig-unan sa adlaw kag gab-i. (Sal. 3:5; 4:8) Gani, binagbinagon naton ini nga mga salmo kag tan-awon kon paano ini nagapalig-on sang aton pagsalig sa Dios.

Kon “Madamu ang mga Nagasumpung sa Akon”

3. Suno sa Salmo 3:1, 2, ano ang kahimtangan ni David?

³ “Ang mga tagiposoon sang mga tawo sang Israel nagasonod kay Absalom,” siling sang isa ka mensahero. (2 Sam. 15:13) Daw indi makapati si David nga madamo ang nagsuporta kay Absalom, gani nakasiling sia: “O GINOO, daw ano nga pagdugang sang akon mga kasumpung! Madamu ang mga nagasumpung sa akon; may madamu nga nagasiling sa akon kalag, wala sing pagtabang tungud sa iya sa Dios.” (Sal. 3:1, 2) Madamo nga Israelinhon ang nagpati nga indi pagluwason ni Jehova si David batok kay Absalom kag sa iya mga kaupod.

4, 5. (a) Sa ano nakasiguro si David? (b) Ano ang buot silingon sang ekspresyon nga “ang manugpatukhayaw sang akon olo”?

⁴ Malig-on si David bangod bug-os ang iya pagsalig sa Dios. Nag-amba sia: “Ikaw, O GINOO, taming sa palibut nakon, akon himaya, kag ang manugpatukhayaw sang akon olo.” (Sal. 3:3) Sigurado gid si David nga amligan sia ni Jehova subong sang taming nga nagaamlig sa isa ka soldado. Huo, nagapalagyo ang tigulang nga hari, nga ginatabunan ang iya ulo kag nagaduko sa kahuy-anan. Apang, himayaon sia sang Labing Mataas. Si Jehova ang magapatiso sa iya, kag magapatukhayaw liwat sang iya ulo. Nagapanawag si David nga may pagsalig nga sabton sia sang Dios. Amo man bala sini ang imo pagsalig kay Jehova?

⁵ Sa ekspresyon nga “ang manugpatukhayaw sang akon olo,” ginapakita ni David nga ginapaabot niya nga buligan sia ni Jehova. Ang Maayong Balita nga Biblia nagasiling: “Pero ikaw, O GINOO, ang nagabantay sa akon sa katalagman; ginahatagan mo ako sang kadalag-an kag ginapabalik mo ang akon kaisog.” Parte sa ekspresyon nga “ang manugpatukhayaw sang akon olo,” ang isa ka reperensia nagasiling: “Kon patukhayawon sang Dios . . . ang ‘ulo’ sang isa, ginahatagan niya ini sing paglaum kag kalig-on.” May rason si David nga magkasubo bangod gin-agaw sa iya ang trono sang Israel. Apang bangod sa  ‘pagpatukhayaw sang iya ulo’ may bag-o sia nga kaisog, kalig-on, kag bug-os nga pagsalig sa Dios.

‘Si Jehova Magasabat!’

6. Ngaa nagsiling si David nga ang iya pangamuyo ginsabat gikan sa balaan nga bukid ni Jehova?

⁶ Puno sing kalig-on kag pagsalig kay Jehova, si David nagpadayon: “Sa akon tingug nagatuaw ako sa GINOO, kag sia nagasabat sa akon gikan sa iya balaan nga bakolod [“bukid,” NW].” (Sal. 3:4) Sa sugo ni David, ang kaban sang katipan nga nagasimbulo sang presensia sang Dios, gindala sa Bukid Sion. (Basaha ang 2 Samuel 15:23-25.) Gani, nagakaigo lang nga nagsiling si David nga ang iya pangamuyo ginsabat gikan sa balaan nga bukid ni Jehova.

7. Ngaa wala nahadlok si David?

⁷ Sigurado si David nga pamatian sang Dios ang iya pangamuyo, gani wala sia nahadlok. Sa baylo, nag-amba sia: “Naghigda ako kag nagtolog; nagmata ako, kay ang GINOO nagaalay-ay sa akon.” (Sal. 3:5) Bisan sa gab-i, nga daku ang katalagman nga salakayon sila, wala si David nahadlok magtulog. Sigurado sia nga makabugtaw pa sia, bangod base sa iya eksperiensia masaligan niya ang wala nagakapaslawan nga pagsakdag sang Dios. Amo man kita kon sundon naton “ang mga dalanon sang GINOO” kag indi magbiya sa iya.—Basaha ang 2 Samuel 22:21, 22.

8. Paano ginapakita sang Salmo 27:1-4 nga nagasalig si David sa Dios?

⁸ Ang kalig-on ni David kag ang iya bug-os nga pagsalig sa Dios makita sa isa pa niya ka salmo, nga nagasiling: “Ang GINOO akon kapawa kag akon kaluwasan; sin-o bala ang kahadlukan ko? Ang GINOO amo ang kalig-onan sang akon kabuhi; sin-o bala ang kahangaw-an ko? . . . Bisan ang kasoldadosan magpa[h]amtang sing dologan batok sa akon, ang akon tagiposoon dili mahadluk; . . . Isa ka butang ang ginpangayo ko sa GINOO, nga pangitaon ko; nga makapuyo ako sa balay sang GINOO sa tanan nga adlaw sang akon kabuhi, sa pagtan-aw sang katahuman sang GINOO, kag sa pagpamalandong sa iya templo.” (Sal. 27:1-4) Kon nagaugyon ka sa sini kag wala ka man lang sing sablag, magatambong ka sing regular sa mga miting upod sa mga kauturan.—Heb. 10:23-25.

9, 10. Ngaa makasiling kita nga wala nagadumot si David, bisan pa sang iya ginsiling sa Salmo 3:6, 7?

 ⁹ Bisan pa ginluiban ni Absalom si David kag madamo ang nagbiya sa iya, nag-amba sia: “Indi ako mahadluk sang mga linaksa sang katawohan nga nagpahamtang sang ila kaugalingon sa palibut batok sa akon. Tindug ka, O GINOO! Luwasa ako, O Dios ko! Kay ginpilas mo sa pisngi ang tanan ko nga kaaway, ginboong mo ang mga ngipon sang mga malauton.”—Sal. 3:6, 7.

¹⁰ Wala nagadumot si David. Kon kinahanglan, ang Dios ang ‘magapilas sa pisngi’ sang iya mga kaaway. Ginkopya ni Hari David ang Kasuguan kag nakahibalo sia sang ginsiling ni Jehova: “Akon ang pagtimalus, kag ang pagtumbas.” (Deut. 17:14, 15, 18; 32:35) Ang Dios man ang ‘magaboong sang mga ngipon sang mga malauton.’ Ang pagbuong sang ila mga ngipon nagapahangop nga indi na sila makapanghalit. Kilala ni Jehova ang mga malauton bangod ‘nagatolok sia sa tagiposoon.’ (1 Sam. 16:7) Daku gid ang aton pasalamat nga ginhatagan kita sang Dios sing pagtuo kag kusog nga mapamatukan si Satanas. Sa dili madugay itagbong sia sa kadadalman kaangay sang nagangurob nga leon nga wala sing ngipon nga takus laglagon!—1 Ped. 5:8, 9; Bug. 20:1, 2, 7-10.

“Ang Kaluwasan Iya sang GINOO”

11. Ngaa dapat naton ipangamuyo ang aton mga kauturan?

¹¹ Nahibaluan ni David nga si Jehova lamang ang makaluwas sa iya. Pero indi lang ang iya kaugalingon ang iya ginapamensar, kundi pati ang pungsod nga ginakahamut-an ni Jehova. Gani, sa katapusan sang iya komposisyon, nagsiling sia: “Ang kaluwasan iya sang GINOO; ang imo pagpakamaayo manginsa imo katawohan!” (Sal. 3:8) Huo, mabug-at ang mga problema ni David, apang ginadumdom niya ang katawhan ni Jehova kag nagasalig sia nga pakamaayuhon sila sang Dios. Gani, indi bala nga dapat man naton dumdumon ang aton mga kauturan? Ilakip naton sila sa pangamuyo kag mangabay kita kay Jehova nga hatagan sila sing balaan nga espiritu agod may kaisog sila kag kalig-on sa pagbantala sang maayong balita.—Efe. 6:17-20.

12, 13. Ano ang natabo kay Absalom, kag ano ang reaksion ni David?

¹² Napatay si Absalom sa makahuluya nga paagi. Isa ini ka paandam sa mga wala nagatahod sa iban, labi na sa mga hinaplas sang Dios, pareho ni David. (Basaha ang Hulubaton 3:31-35.) Sang mag-inaway, napierde ang hangaway ni Absalom. Nagpalagyo si Absalom nga nagasakay sa mula, pero sang mag-agi ang mula sa idalom sang magapa nga kahoy, nasangit ang iya madabong nga buhok sa sanga. Nabitay sia didto nga wala sing mahimo, asta nga nag-abot si Joab kag ginpatay sia paagi sa pagbuno sang tatlo ka bangkaw sa iya tagipusuon.—2 Sam. 18:6-17.

¹³ Nalipay bala si David sang mabalitaan niya ang natabo sa iya anak? Wala. Sa baylo, samtang nagapakadto-pakari, nagahibi sia nga nagasiling: “O anak ko nga Absalom, anak ko, anak ko nga Absalom! Kabay pa kuntani nga ako napatay tungud sa imo, O Absalom, anak ko, anak ko!” (2 Sam. 18:24-33) Nakamarasmas lang sia sa iya tuman nga pagpangasubo bangod sa pinamulong ni Joab. Masubo gid ang nadangatan ni Absalom nga ginbulag sang iya ambisyon. Nakig-away sia sa iya mismo amay—sa hinaplas ni Jehova—nga nagresulta sang iya kamatayon!—2 Sam. 19:1-8; Hulu. 12:21; 24:21, 22.

Ginpabutyag Liwat ni David ang Iya Pagsalig sa Dios

14. Ngaa ginkomposo ang Salmo 4?

¹⁴ Pareho sa ikatlo, ang ikap-at nga Salmo pangamuyo man ni David nga nagapakita sang iya bug-os nga pagsalig kay Jehova. (Sal. 3:4; 4:3) Mahimo nga ginkomposo niya ini para ipabutyag ang kalipay kag pagpasalamat sa Dios sang napaslawan ang pagrebelde ni Absalom. Ukon mahimo nga ginsulat niya ini para sa Levinhon nga mga manug-amba. Ano man ang iya rason, magabakod ang aton pagsalig kay Jehova kon pamalandungan naton ini.

15. Ngaa may pagsalig kita nga makapangamuyo kay Jehova paagi sa iya Anak?

¹⁵ Liwat nga ginpakita ni David ang iya bug-os  nga pagsalig sa Dios kag sa pagkaepektibo sang pangamuyo. Nag-amba sia: “Sabta ako kon magpanawag ako, O Dios sang akon pagkamatarung! Ginhilway mo ako sang yara ako sa kalilisdan. Kalooyi ako, kag pamatii ang akon pangamuyo.” (Sal. 4:1) Makasalig man kita sa sini kon maghimo kita sing pagkamatarong. Bangod nahibaluan naton nga si Jehova, ang ‘matarong nga Dios,’ nagapakamaayo sa iya matarong nga katawhan, makapangamuyo kita nga may pagsalig paagi sa iya Anak kon nagatuo kita sa halad gawad ni Jesus. (Juan 3:16, 36) Nagahatag gid ini sa aton sing kalinong sa panghunahuna!

16. Ngaa ginluyahan sing buot si David?

¹⁶ Kon kaisa, may mga sitwasyon nga makapaluya kag makadula sang aton pagsalig. Mahimo nga natabo man ini kay David, kay nag-amba sia: “O kamo nga mga anak sang mga tawo, tubtub pa bala san-o nga ang akon himaya manginsa kahuluy-an? Tubtub bala san-o magahigugma kamo sang kadayawan, kag magapangita sang pagkadimatuud?” (Sal. 4:2) Ang “mga anak sang mga tawo” nagapatuhoy sa katawhan nga wala nahamut-an sang Dios. Ang mga kaaway ni David ‘nagahigugma sang kadayawan.’ Ang New International Version nagsiling: “Tubtob san-o ninyo higugmaon ang mga butang nga wala sing pulos kag pangitaon ang butig nga mga dios?” Bisan pa maluyahan kita bangod sa ginahimo sang iban, padayon kita nga mangamuyo sing hanuot kag magsalig sing bug-os sa lamang matuod nga Dios.

17. Ipaathag kon paano naton masunod ang Salmo 4:3.

¹⁷ Ang pagsalig ni David sa Dios maathag sa iya pinamulong: “Apang kilalaha nga ang diosnon ginpain sang GINOO nga sa iya kaugalingon; ang GINOO magapamati kon ako magtawag sa iya.” (Sal. 4:3) Kinahanglan ang kaisog kag bug-os nga pagsalig kay Jehova para makapabilin nga mainunungon sa iya. Halimbawa, ini nga mga kinaiya dapat ipakita kon may di-mahinulsulon nga miembro sang pamilya nga madisfellowship. Ginapakamaayo sang Dios ang mga mainunungon sa iya kag sa iya mga dalanon. Gani, malipayon ang katawhan nga nagaunong kag nagasalig sing bug-os kay Jehova.—Sal. 84:11, 12.

18. Suno sa Salmo 4:4, ano ang aton himuon kon ginhambalan kita ukon ginhimuan sing malain?

¹⁸ Ano ang aton himuon kon nasaklaw kita sa ginhambal ukon ginhimo sang iban? Makapabilin kita nga malipayon kon sundon naton ang ginsiling ni David: “Magtindug nga may kahangawa, kag indi magpakasala; magpamalandong kamo sa inyo kaugalingon nga tagiposoon sa inyo higdaan, kag magpahimonong.” (Sal. 4:4) Kon ginhambalan kita ukon ginhimuan sing malain, indi kita magpakasala paagi sa pagbalos. (Roma 12:17-19) Ipangamuyo naton ang aton nabatyagan antes kita magtulog. Kon himuon naton ini, mahimo nga magabag-o ang aton pagtan-aw sa mga butang kag mapahulag kita sang gugma nga magpatawad. (1 Ped. 4:8) Talalupangdon ang laygay ni Pablo nga ginbase niya sa Salmo 4:4: “Kon mangakig kamo, indi kamo magpakasala; indi pagpatunuri sang adlaw nga akig kamo, kag indi paghatagi sing duog ang Yawa.”—Efe. 4:26, 27.

19. Paano kita mabuligan sang Salmo 4:5 kon parte sa aton pagsimba?

¹⁹ Para ipakita nga importante gid ang pagsalig sa Dios, nag-amba si David: “Magdolot sang mga halad sang pagkamatarung, kag magsalig kamo sa GINOO.” (Sal. 4:5) May balor lamang ang mga halad sang mga Israelinhon kon husto ang ila motibo. (Isa. 1:11-17) Para batunon man sang Dios ang aton pagsimba, dapat nga husto  ang aton motibo kag bug-os ang aton pagsalig sa iya.—Basaha ang Hulubaton 3:5, 6; Hebreo 13:15, 16.

20. Ano ang ginapahangop sang ‘kapawa sang nawung ni Jehova’?

²⁰ Si David nagpadayon: “May madamu nga nagasiling, ‘Sin-o bala ang magapahayag sa amon sing maayo! O GINOO, bayawa ang kapawa sang imo nawung sa amon!’” (Sal. 4:6) ‘Ang kapawa sang nawung ni Jehova’ nagapahangop sang iya kahamuot. (Sal. 89:15) Gani sang nangamuyo si David: “Bayawa ang kapawa sang imo nawung sa amon,” buot niya silingon, ‘kahamut-i kami.’ Bangod nagasalig kita kay Jehova, nahamuot sia sa aton kag malipayon kita nga nagahimo sang iya kabubut-on.

21. Ano ang ginapasalig sa aton kon makigbahin kita sing bug-os sa espirituwal nga pagpangani subong?

²¹ Samtang nagahulat si David sang kalipay nga halin sa Dios nga labaw pa sa tig-alani, nag-amba sia kay Jehova: “Ikaw nagbutang sing kalipay sa akon tagiposoon labi pa sa ila kon magdugang ang ila uyas kag ang ila bag-o nga alak.” (Sal. 4:7) Mabatyagan man naton ini nga kalipay kon makigbahin kita sing bug-os sa espirituwal nga pagpangani subong. (Luc. 10:2) Sa pagpanguna sang ‘ginpadamu nga pungsud’ sang mga hinaplas, nagakalipay kita sa pagdugang sang mga ‘mamumugon sang alanyon.’ (Isa. 9:3) Malipayon ka bala nga nagapakigbahin sa sining pagpangani?

Magpadayon Upod ang Bug-os nga Pagsalig sa Dios

22. Suno sa Salmo 4:8, ano ang kahimtangan sang mga Israelinhon sang ginatuman nila ang Kasuguan sang Dios?

²² Gintapos ni David ini nga salmo sa pagsiling: “Sa kalinong magahigda ako kag magatolog; kay ikaw lamang, O GINOO, ang nagapapuyo sa akon sa kalig-onan.” (Sal. 4:8) Sang ginatuman sang mga Israelinhon ang Kasuguan ni Jehova, may kalinong sila kag kalig-unan. Halimbawa, “ang Juda kag Israel nagpuyo sing malig-on” sang tion nga nagagahom si Solomon. (1 Hari 4:25) Ang mga nagasalig sa Dios may kalinong bisan ginapalibutan sila sang magamo nga mga pungsod. Pareho ni David, makatulog kita sing mahamuok bangod ginhatagan kita sang Dios sing kalig-unan.

23. Ano ang maeksperiensiahan naton kon magsalig kita sing bug-os sa Dios?

²³ Gani, may kalig-on nga mag-alagad kita kay Jehova sing padayon. Mangamuyo man kita nga may pagtuo agod maeksperiensiahan naton “ang paghidait sang Dios nga nagalabaw sa tanan nga panghunahuna.” (Fil. 4:6, 7) Nagapahalipay gid ini sa aton! Kag sigurado nga maatubang naton sing malig-on ang palaabuton kon magpabilin kita nga nagasalig sing bug-os kay Jehova.

Ano ang Imo Sabat?

• Ano nga mga problema ang gin-atubang ni David bangod kay Absalom?

• Ngaa makapalig-on ang Salmo 3?

• Sa ano nga mga paagi mapabakod sang Salmo 4 ang aton pagsalig kay Jehova?

• Paano kita makabenepisyo kon magsalig kita sing bug-os sa Dios?

[Mga Pamangkot sa Pagtinuon]

[Retrato sa pahina 29]

Bisan nalagyo sia kay Absalom, malig-on ang pagsalig ni David kay Jehova

[Mga Retrato sa pahina 32]

Nagasalig ka bala sing bug-os kay Jehova?