“Isa Ka Maayo nga Manugtatap kag Pinalangga nga Abyan”
“Isa Ka Maayo nga Manugtatap kag Pinalangga nga Abyan”
SI John Barr, nga katapo sang Nagadumala nga Hubon sang mga Saksi ni Jehova, napatay sang Sabado sang aga, Disiembre 4, 2010, sa edad nga 97. Kilala sia subong “isa ka maayo nga manugtatap kag pinalangga nga abyan.”
Si Utod John Barr nga kilala man sa hayo nga Jack, natawo sa Aberdeen, Scotland, kag kamanghuran sa tatlo ka kabataan. Nanamian gid sia mag-istorya parte sa iya kabuhi sang bata pa sia. Ginapasalamatan gid niya ang maayo nga halimbawa sang iya pinalangga nga amay kag iloy, nga mga hinaplas man.
Sang tin-edyer si Jack, nabudlayan sia makighambal sa mga estranghero, apang ginpakigbatuan niya ini. Isa ka bes, sang Domingo sang hapon sang 1927, sang 14 anyos sia, ginsilingan niya ang iya amay nga gusto na niya mag-upod sa pagpamalaybalay. Sugod sadto asta nga napatay sia, si Utod Barr makugi gid nga manugbantala sang maayong balita.
Bangod sa aksidente nga diutayan lang magpatay sa iya iloy, nakapamensar ang bataon nga si Jack kon ano gid ang katuyuan sang kabuhi. Gani sang 1929, nagdedikar sia sang iya kabuhi kay Jehova, kag sang 1934 nagpabawtismo sia. Sang 1939, nangin katapo sia sang pamilya Bethel sa London, England. Diri nagsugod ang iya 71 ka tuig sa bug-os tion nga pag-alagad.
Sang Oktubre 29, 1960, si Utod Barr nagsulod sa ginatawag niya nga “bilidhon gid nga relasyon” sang ginpakaslan niya si Mildred Willett, isa ka madugay na nga payunir kag misyonera. Maayo gid sila nga halimbawa subong mag-asawa, asta nga natapos ni Mildred ang iya dutan-on nga kabuhi sang Oktubre 2004. Sa bug-os nila nga pag-asawahay, nagabasa gid sila sing Biblia kada adlaw.
Sa mga nakakilala sa iya, kon sambiton ang Jack Barr, madumduman nila ang isa ka tawo nga maayo gid maghatag sing laygay—balanse, mainayuhon, kag base sa Biblia. Mapisan sia, may konsiderasyon, mahigugmaon nga manugtatap, kag mainunungon nga abyan. Ginapakita sang iya mga komento, pamulongpulong, kag pangamuyo ang kadalumon sang iya espirituwalidad kag kasuod kay Jehova.
Bisan nga mahidlaw kita kay Utod Barr, malipayon gid kita nga nabaton na niya ang dulot nga imortalidad—ang pribilehiyo nga pirme niya ginasambit kag ginalauman. Ginapabaloran gid niya ini.—1 Cor. 15:53, 54. *
[Nota]
^ par. 8 Ang istorya sang kabuhi ni John E. Barr, mabasa sa Hulyo 1, 1987, nga Ang Lalantawan, pahina 26-31.
