Mga Cristianong Pamilya—Magpabilin nga Nagamata
Mga Cristianong Pamilya—Magpabilin nga Nagamata
“Magpabilin kita nga nagamata kag nagahupot sang aton kaligdong.”—1 TES. 5:6.
1, 2. Ano ang dapat himuon sang pamilya agod makapabilin sila nga nagamata sa espirituwal?
NAGAPATUHOY sa “daku kag makakulugmat nga adlaw sang GINOO,” si apostol Pablo nagsulat sa mga Cristiano sa Tesalonica: “Mga kauturan, wala kamo sa kadudulman, kag indi kamo kaangay sang mga kawatan nga maabtan sina nga adlaw, kay kamo tanan mga anak sang kapawa kag mga anak sang adlaw. Indi kita iya sang kagab-ihon ukon sang kadudulman.” Nagdugang sia: “Gani, indi kita magtulog subong sang ginahimo sang iban, kundi magpabilin kita nga nagamata kag nagahupot sang aton kaligdong.”—Joel 2:31; 1 Tes. 5:4-6.
2 Ang laygay ni Pablo sa mga taga-Tesalonica praktikal gid para sa mga Cristiano nga nagakabuhi “sa tion sang katapusan.” (Dan. 12:4) Samtang nagahilapit ang katapusan sining malaut nga sistema sang mga butang, determinado gid si Satanas nga madamo sia sing mapatalikod sa matuod nga mga sumilimba sang Dios. Gani, dapat gid naton sundon ang laygay ni Pablo nga magpabilin nga nagamata sa espirituwal. Para mahimo ini sang Cristianong pamilya, dapat tungdan sang kada isa ang iya responsibilidad suno sa Kasulatan. Kon amo, ano ang papel sang mga bana, asawa, kag kabataan agod ‘makapabilin nga nagamata’ ang ila pamilya?
Mga Bana—Iluga “ang Maayo nga Manugbantay”
3. Suno sa 1 Timoteo 5:8, ano ang nalakip sa responsibilidad sang lalaki subong ulo sang panimalay?
3 ‘Ang ulo sang babayi amo ang lalaki,’ siling sang Biblia. (1 Cor. 11:3) Ano ang responsibilidad sang lalaki subong ulo? Nagasambit sang isa ka bahin sang pagkaulo, ang Kasulatan nagasiling: “Kon sin-o man ang wala nagaaman para sa mga natungod sa iya, kag ilabi na para sa mga katapo sang iya panimalay, ginapanghiwala niya ang pagtuo kag malain pa sa tawo nga wala sing pagtuo.” (1 Tim. 5:8) Gani, dapat saguron sang lalaki ang iya pamilya. Apang indi lang materyal ang dapat niya iaman kon gusto niya nga makapabilin sila nga nagamata sa espirituwal. Importante gid nga pabakuron niya ang espirituwalidad sang tagsa ka katapo sang iya pamilya. (Hulu. 24:3, 4) Paano niya ini himuon?
4. Paano magmadinalag-on ang bana sa pagpabakod sang espirituwalidad sang iya pamilya?
4 “Ang bana amo ang ulo sang iya asawa subong nga si Cristo amo man ang ulo sang kongregasyon.” Gani, dapat tun-an kag ilugon sang bana kon ano nga sahi sang ulo si Jesus sa kongregasyon. (Efe. 5:23) Binagbinaga ang paglaragway ni Jesus sang iya kaangtanan sa iya mga sumulunod. (Basaha ang Juan 10:14, 15.) Ano ang sekreto agod magmadinalag-on ang bana sa pagpabakod sang espirituwalidad sang iya pamilya? Amo ini: Tun-i ang ginsiling kag ginhimo ni Jesus subong “ang maayo nga manugbantay,” kag ‘sunda sing maayo ang iya mga tikang.’—1 Ped. 2:21.
5. Daw ano ka kilala sang Maayo nga Manugbantay ang kongregasyon?
5 Ang kaangtanan sang manugbantay sa iya karnero nabase sa ihibalo kag pagsalig. Ang maayo nga manugbantay nakakilala gid sa iya mga karnero. Ang mga karnero naman nagasalig kag nagatuman sa iya, kag kilala nila ang iya tingog. Si Jesus nagsiling: “Kilala ko ang akon mga karnero kag ang akon mga karnero nakakilala sa akon.” Indi lang hapaw ang iya pagkakilala sa kongregasyon. Ang Griegong tinaga para sa “kilala” nagakahulugan sing “personal kag tuman ka suod nga pagkilalahay.” Huo, ang kada karnero kilala gid sang Maayo nga Manugbantay. Nahibaluan niya ang ila mga kinahanglanon, kaluyahon, kag ikasarang. Makita sang aton Huwaran ang tanan nga nagakatabo sa iya mga karnero. Kag kilala gid sia sang iya mga karnero kag nagasalig sila sa iya pagpanguna.
6. Paano mailog sang mga bana ang Maayo nga Manugbantay?
6 Agod mailog ang pagkaulo ni Cristo, dapat kabigon sang bana nga sia ang manugbantay kag ang iya pamilya amo ang mga karnero. Dapat niya kilalahon sing maayo ang iya panimalay. Masarangan gid bala ini sang bana? Huo, kon makigkomunikar sia sing maayo sa tanan nga katapo sang iya panimalay, mamati sa ila mga ginakabalak-an, kag manguna sa mga hilikuton sang pamilya. Dapat man sia magpakita sing konsiderasyon sa ila kon nagadesisyon parte sa ila pangpamilya nga pagsimba, pagtambong sa miting, pag-alagad sa latagon, kag paglingawlingaw. Kon ang bana nagapanguna base sa iya ihibalo sa Pulong sang Dios kag kilala niya sing maayo ang iya panimalay, saligan sang iya pamilya ang iya pagkaulo. Malipay gid sia kon nahiusa sa matuod nga pagsimba ang iya pamilya.
7, 8. Paano mailog sang bana ang Maayo nga Manugbantay sa pagpalangga sa iya ginaatipan?
7 Palangga man sang maayo nga manugbantay ang iya mga karnero. Kon tun-an naton ang rekord sang Ebanghelyo parte sa kabuhi kag ministeryo ni Jesus, maapresyar gid naton ang iya pagpalangga sa iya mga disipulo. ‘Ginhatag pa gani niya ang iya kalag para sa mga karnero.’ Dapat ilugon sang mga bana ang pagpalangga ni Jesus sa ila ginaatipan. Kon gusto sang bana nga kahamut-an sia sang Dios, indi niya pagpintasan ang iya asawa, kundi padayon nga higugmaon ini “subong nga si Cristo naghigugma man sang kongregasyon.” (Efe. 5:25) Mangin malulo sia kag makonsiderasyon kay takus padunggan ang iya asawa.—1 Ped. 3:7.
8 Dapat mangin malig-on ang ulo sang pamilya sa pagsunod sa diosnon nga mga prinsipio kon nagahanas sang iya kabataan. Apang, dapat man nila mabatyagan ang iya pagpalangga. Kinahanglan mahigugmaon ang pagdisiplina. May mga bata nga mas mabudlay paintiendihon. Gani kinahanglan nga malaba ang pasensia sang amay. Kon sundon pirme sang mga bana si Jesus, mangin malinong ang panimalay. Mabatyagan nila ang espirituwal nga kalig-unan pareho sa ginaamba sang salmista.—Basaha ang Salmo 23:1-6.
9. Pareho kay Noe, ano ang responsibilidad sang mga bana, kag ano ang makabulig sa ila nga mahimo ini?
9 Ang patriarka nga si Noe nagkabuhi sang tion nga ginlaglag ang kalibutan. Pero ginluwas sia ni Jehova “kaupod sang pito pa sang gin-anaw niya ang kalibutan sang di-diosnon nga mga tawo.” (2 Ped. 2:5) Responsibilidad niya nga buligan ang iya panimalay nga maluwas sa Anaw. Amo man sini ang responsibilidad sang mga ulo sang pamilya sa sining katapusan nga mga adlaw. (Mat. 24:37) Gani, importante gid nga tun-an nila kag ilugon ang halimbawa sang “maayo nga manugbantay”!
Mga Asawa—‘Patinduga ang Inyo Panimalay’
10. Ano ang buot silingon sang pagpasakop sang asawa sa iya bana?
10 “Ang mga asawa magpasakop sa ila bana subong nga sa Ginuo,” sulat ni Pablo. (Efe. 5:22) Wala ini nagapahangop sang manubo nga posisyon. Antes gintuga si Eva, ang Dios nagsiling: “Indi maayo nga mag-isahanon lamang ang tawo. Himuan ko sia sing kabulig, sing kaupod nga bagay sa iya.” (Gen. 2:18, NW) Ang papel sang “kabulig” kag “kaupod”—ang pagsakdag sa bana samtang ginaatipan sini ang iya mga responsibilidad—isa gid ka kadungganan.
11. Paano ‘ginapatindog sang huwaran nga asawa ang iya panimalay’?
11 Ang huwaran nga asawa nagapanikasog para sa kaayuhan sang iya panimalay. (Basaha ang Hulubaton 14:1.) Indi pareho sa buangbuang nga babayi, ginatahod gid sang maalamon nga asawa ang kahimusan sang pagkaulo. Sa baylo nga magrebelde kag magpinagusto lang subong sang ginahimo sang kalibutan, mapinasakupon sia sa iya bana. (Efe. 2:2) Indi kaangay sang buangbuang nga nagatamay sa iya bana, ginapanikasugan sang maalamon nga asawa nga tahuron sang iya kabataan kag sang iban ang iya bana. Wala sia nagarebelde sa pagkaulo sang iya bana paagi sa pag-ingos pirme ukon pagbais sa iya. Kon parte naman sa pag-uyat sang kuarta, indi sia kaangay sang buangbuang nga nagawaldas sang pinangabudlayan sang ila pamilya. Bilang responsable nga asawa, nagakooperar sia sa iya bana kag kahibalo magkinot. Wala man niya ginapilit nga mag-overtime ang iya bana.
12. Ano ang mahimo sang asawa agod ‘makapabilin nga nagamata’ ang iya pamilya?
12 Ang huwaran nga asawa nagabulig sa iya pamilya nga ‘makapabilin nga nagamata’ paagi sa pagsuporta sa iya bana sa pagtudlo sa ila kabataan parte kay Jehova. (Hulu. 1:8) Daku gid ang iya papel sa ila Pangpamilya nga Pagsimba. Ginasakdag man niya ang iya bana kon ginalaygayan sini kag ginadisiplina ang ila kabataan. Tuhay gid sia sa iresponsable nga asawa nga pabaya sa pisikal kag espirituwal nga kinahanglanon sang iya kabataan.
13. Ngaa dapat sakdagon sang asawa ang iya bana sa mga responsibilidad sini sa kongregasyon?
13 Ano ang ginabatyag sang isa ka maayo nga asawa kon masako ang iya bana sa mga responsibilidad sa kongregasyon? Nalipay gid sia! Ministeryal man nga alagad ang iya bana, gulang, ukon katapo sang Hospital Liaison Committee ukon Regional Building Committee, nalipay sia sa pribilehiyo sang iya bana. Nagakinahanglan sing sakripisyo agod masakdag niya ang iya bana sa pulong man ukon buhat. Apang, nakahibalo sia nga ang mga responsibilidad sang iya bana sa organisasyon nagabulig agod makapabilin nga nagamata sa espirituwal ang ila pamilya.
14. (a) Sa ano mahimo mabudlayan ang maayo nga asawa, kag paano niya ini malandas? (b) Paano makabulig ang asawa nga magmadinalag-on ang iya pamilya?
14 Mabudlay gid sa huwaran nga asawa ang magpasakop kon may desisyon ang iya bana nga indi sia ugyon. Pero, ginapakita niya ang “malinong kag malulo nga espiritu” kag nagakooperar agod magmadinalag-on ang desisyon sang iya bana. (1 Ped. 3:4) Ginatinguhaan sang maayo nga asawa nga sundon ang halimbawa sang diosnon nga mga asawa, subong nanday Sara, Rut, Abigail, kag Maria nga iloy ni Jesus. (1 Ped. 3:5, 6) Ginailog man niya ang tigulang nga mga babayi sa karon nga ‘nagagawi subong mga balaan.’ (Tito 2:3, 4) Daku gid ang mabulig sang gugma kag pagtahod sang maayo nga asawa sa iya bana para magmadinalag-on ang ila pag-asawahay kag ang ila pamilya. Komportable kag malinong ang iya puluy-an. Ang maayo nga asawa bilidhon gid para sa espirituwal nga bana!—Hulu. 18:22.
Mga Pamatan-on—‘Ituon ang Inyo mga Mata sa mga Butang nga Indi Makita’
15. Paano makabulig ang mga pamatan-on sa ila mga ginikanan agod ‘makapabilin nga nagamata’ ang ila pamilya?
15 Mga pamatan-on, paano kamo makabulig sa inyo mga ginikanan agod ‘makapabilin nga nagamata’ sa espirituwal ang inyo pamilya? Binagbinaga ang padya nga ginatigana ni Jehova sa inyo. Mahimo nga halin sang bata pa kamo, ginapakita na sa inyo sang inyo mga ginikanan ang mga piktyur sang Paraiso. Samtang nagadaku kamo, mahimo nga gingamit nila ang Biblia kag ang mga publikasyon agod mahanduraw ninyo kon ano ang kabuhi nga dayon sa bag-ong kalibutan. ‘Makapabilin kamo nga nagamata’ kon ituon ninyo ang inyo mga mata sa pag-alagad kay Jehova kag planuhon ang inyo kabuhi suno sa sini.
16, 17. Ano ang himuon sang mga pamatan-on agod makadalagan sila sing madinalag-on sa palumba para sa kabuhi?
16 Sunda ang ginsiling ni Pablo sa 1 Corinto 9:24. (Basaha.) Magdalagan sa palumba para sa kabuhi kag tinguhai nga magdaug ka. Pilia ang dalanon nga maagom mo ang premyo nga kabuhi nga walay katapusan. Madamo ang wala na magtan-aw sa padya bangod nawili sila sa pagtipon sang materyal nga mga butang. Kabuangan gid ini! Ang pagtinguha sang manggad indi makahatag sing matuod nga kalipay. Umalagi lang ang mga butang nga mabakal sang kuarta. Gani, ituon ang imo mga mata sa “mga butang nga indi makita.” Ngaa? Bangod “ang mga butang nga indi makita wala sing katapusan.”—2 Cor. 4:18.
17 Lakip sa “mga butang nga indi makita” amo ang mga pagpakamaayo sang Ginharian. Planuha ang imo kabuhi agod maagom mo ini. Mabatyagan mo lamang ang matuod nga kalipay kon gamiton mo ang imo kabuhi sa pag-alagad kay Jehova. Nagahatag ini sing madamo nga kahigayunan para malab-ot mo ang simple kag dalagku nga mga tulumuron. * Makabulig ang espirituwal nga mga tulumuron agod makakonsentrar ka sa pag-alagad sa Dios kag matuon ang imo mga mata sa padya nga kabuhi nga walay katapusan.—1 Juan 2:17.
18, 19. Paano mahibaluan sang isa ka pamatan-on kon bala ginbaton na niya ang kamatuoran?
18 Mga pamatan-on, ang una nga tikang sa dalan sang kabuhi amo pagbaton sang kamatuoran. Nahimo mo na bala ini? Pamangkuta ang imo kaugalingon: ‘Espirituwal bala ako nga tawo, ukon nagaalagad lang ako kon yara ang akon mga ginikanan? Ginapalambo ko bala ang mga kinaiya nga ginakahamut-an sang Dios? Nagapanikasog bala ako nga mangin regular sa mga hilikuton para sa matuod nga pagsimba subong sang pagpangamuyo, pagtuon, pagtambong sa miting, kag pag-alagad sa latagon? Ginatinguhaan ko bala nga mapalambo ang akon kaangtanan sa Dios kag mangin suod sa iya?’—Sant. 4:8.
19 Binagbinaga ang halimbawa ni Moises. Bisan pa iban nga kultura ang iya gindak-an, ginpili niya nga mangin sumilimba ni Jehova sangsa mangin anak sang anak nga babayi sang Paraon. (Basaha ang Hebreo 11:24-27.) Mga Cristianong pamatan-on, dapat determinado man kamo nga mangin matutom kay Jehova. Kon himuon ninyo ini, matigayon ninyo ang matuod nga kalipay, ang labing maayo nga kabuhi subong, kag ang paglaum nga ‘makapanguyapot sing hugot sa matuod nga kabuhi.’—1 Tim. 6:19.
20. Sa palumba para sa kabuhi, sin-o ang makabaton sang padya?
20 Sa mga palumba sa dalagan sang una, isa lang ang nagadaug. Indi amo sini sa palumba para sa kabuhi. Kabubut-on sang Dios nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:3, 4) Madamo na ang nakadalagan tubtob sa katapusan, kag madamo ang kadungan mo nga nagadalagan pa. (Heb. 12:1, 2) Ang padya para lamang sa mga indi mag-untat. Gani mangin determinado nga magdaug!
21. Ano ang binagbinagon sa masunod nga artikulo?
21 Indi malikawan ang ‘pag-abut sang daku kag makakulugmat nga adlaw sang GINOO.’ (Mal. 4:5) Dapat handa ang Cristianong mga pamilya kon mag-abot ina nga adlaw. Importante nga abagahon sang kada katapo ang ila pasad sa Biblia nga mga responsibilidad. Ano pa ang mahimo mo agod mapabakod ang imo kaangtanan sa Dios kag makapabilin nga alisto sa espirituwal? Binagbinagon sang masunod nga artikulo ang tatlo ka butang nga makaapektar sa espirituwalidad sang bug-os nga pamilya.
[Nota]
Ano ang Imo Natun-an?
• Ngaa importante nga ‘magpabilin nga nagamata’ ang Cristianong mga pamilya?
• Paano mailog sang bana ang Maayo nga Manugbantay?
• Paano masuportahan sang huwaran nga asawa ang iya bana?
• Paano makabulig ang mga pamatan-on agod makapabilin nga nagamata sa espirituwal ang ila pamilya?
[Mga Pamangkot sa Pagtinuon]
[Retrato sa pahina 9]
Ang maayo nga asawa bilidhon gid para sa espirituwal nga bana
