Sin-o ang Pinakaimportante nga Persona sa Imo Kabuhi?
Sin-o ang Pinakaimportante nga Persona sa Imo Kabuhi?
“Ikaw lamang ang Labing Mataas sa bug-os nga duta.”—SAL. 83:18, NW.
1, 2. Kon parte sa aton kaluwasan, ngaa indi bastante nga makilala lamang ang ngalan ni Jehova?
MAHIMO nga una mo nga nakita ang ngalan ni Jehova sang ginpabasa ini sa imo sa Salmo 83:18. Ayhan nakibot ka sang mabasa mo ini: “Agod mahibaluan sang mga tawo nga ang imo ngalan amo si Jehova, nga ikaw lamang ang Labing Mataas sa bug-os nga duta.” Sugod sadto, ginagamit mo na ini nga teksto agod ipakilala sa iban ang aton mahigugmaon nga Dios, si Jehova.—Roma 10:12, 13.
2 Importante nga makilala sang mga tawo ang ngalan ni Jehova, apang may iban pa sila nga dapat himuon. Talupangda kon paano ginpadaku sang salmista ang isa pa ka kamatuoran nga importante sa kaluwasan sang nagsiling sia: “Ikaw lamang ang Labing Mataas sa bug-os nga duta.” Huo, si Jehova amo ang pinakaimportante nga Persona sa bug-os nga uniberso. Subong ang Manunuga sang tanan nga butang, may kinamatarong sia nga magpaabot nga magpasakop sing bug-os sa iya ang tanan niya nga tinuga. (Bug. 4:11) Gani pamangkuton naton ang aton kaugalingon, ‘Sin-o ang pinakaimportante nga persona sa akon kabuhi?’ Dapat binagbinagon sing maayo sang kada isa ang iya sabat sa sini!
Ang Hulusayon sa Hardin sang Eden
3, 4. Paano nadaya ni Satanas si Eva, kag ano ang resulta?
3 Ang pagkaserioso sini nga pamangkot makita sa hitabo sa hardin sang Eden. Ginsulay sang rebelyuso nga anghel nga nangin si Satanas nga Yawa ang unang babayi nga si Eva, nga unahon ang iya handum sangsa sugo ni Jehova nga indi magkaon sang bunga sang isa ka kahoy. (Gen. 2:17; 2 Cor. 11:3) Nadala sia sa pagsulay kag wala niya gintahod ang pagkasoberano ni Jehova. Wala ginkilala ni Eva nga si Jehova ang pinakaimportante nga Persona sa iya kabuhi. Apang paano nadaya ni Satanas si Eva?
4 Naggamit si Satanas sang malalangon nga mga taktika sang nakighambal sia kay Eva. (Basaha ang Genesis 3:1-5.) Una, wala gingamit ni Satanas ang ngalan ni Jehova kundi “Dios” lamang. Sa kabaliskaran, gingamit sang manunulat sang Genesis ang ngalan ni Jehova sa una pa lang nga bersikulo sini nga kapitulo. * Ikaduha, sa baylo nga mamangkot kon ano ang “sugo” sang Dios, namangkot si Satanas kon ano ang “ginsiling” sang Dios. (Gen. 2:16) Sa sining malalangon nga paagi, mahimo gintinguhaan ni Satanas nga pamag-anon ang sugo. Ikatlo, bisan si Eva lang ang iya kaistorya, naggamit sia sing “kamo.” Sa paghimo sini, ginpabatyag ni Satanas nga importante si Eva, nga daw sia ang nagarepresentar para sa ila sang iya bana. Ano ang resulta? Ginpakita ni Eva nga puede sia makadesisyon para sa ila sang nagsabat sia sa man-ug: “Makakaon kami sang bunga sang kakahoyan sang katamnan.”
5. (a) Sa ano ginliso ni Satanas ang igtalupangod ni Eva? (b) Ano ang ginpakita ni Eva sang ginkaon niya ang gindumilian nga bunga?
5 Ginpatiko man ni Satanas ang kamatuoran. Ginpagua niya nga indi makatarunganon ang Dios sa pagsugo kanday Adan kag Eva nga indi “magkaon sang bisan ano nga kahoy sang katamnan.” Dayon, ginliso ni Satanas ang igtalupangod ni Eva sa iya kaugalingon kag kon paano mag-uswag ang iya pagkabuhi kag “manginkaangay sang Dios.” Amo nga sang ulihi, ginsentro na ni Eva ang iya igtalupangod sa kahoy kag sa bunga sini sangsa iya kaangtanan sa Isa nga naghatag sang tanan nga butang sa iya. (Basaha ang Genesis 3:6.) Sing makapasubo, paagi sa pagkaon sang bunga, ginpakita ni Eva nga indi si Jehova ang pinakaimportante nga Persona sa iya kabuhi.
Ang Hulusayon sang Adlaw ni Job
6. Paano ginduhaduhaan ni Satanas ang integridad ni Job, kag ano nga kahigayunan ang ginhatag kay Job?
6 Siniglo sang ulihi, ginhatagan sing kahigayunan ang matutom nga si Job nga ipakita kon sin-o ang pinakaimportante nga Persona sa iya kabuhi. Sang ginpatalupangod ni Jehova kay Satanas ang integridad ni Job, si Satanas nagsabat: “Nahadluk bala si Job sa Dios sa wala sing pulus?” (Basaha ang Job 1:7-10.) Wala ginpanghiwala ni Satanas ang pagkamatinumanon ni Job sa Dios kundi ang iya motibo. Ginsumbong niya si Job nga nagaalagad kay Jehova bangod sang kakagod, indi sang gugma. Si Job lang ang makasabat sini nga panumbungon, kag ginhatagan sia sing kahigayunan nga masabat ini.
7, 8. Ano nga mga pagtilaw ang naatubang ni Job, kag ano ang ginpakita sang iya katutom?
7 Gintugutan ni Jehova si Satanas nga hatagan sing sunodsunod nga kalamidad si Job. (Job 1:12-19) Ano ang reaksion ni Job sa pagbag-o sang iya kahimtangan? Nahibaluan naton nga “wala makasala si Job ukon nagpabangud sa Dios sing binuang.” (Job 1:22) Apang wala nag-untat si Satanas. Nagsabat pa gid sia: “Panit sa panit! Ang tanan nga iya sang tawo ihatag niya tungud sa iya kabuhi.” * (Job 2:4) Nagsiling si Satanas nga kon si Job na mismo ang mag-antos, kalimtan niya nga si Jehova ang pinakaimportante nga Persona sa iya kabuhi.
8 Nahalitan ang lawas ni Job sang makangilidlis nga balatian kag ginpilit pa sia sang iya asawa nga sumpaon ang Dios kag manginmatay. Sang ulihi, ginpasibangdan sia sang iya tatlo ka di-matuod nga manuglugpay nga may ginahimo sia nga malain. (Job 2:11-13; 8:2-6; 22:2, 3) Bisan pa sining pag-antos, wala ginsikway ni Job ang iya integridad. (Basaha ang Job 2:9, 10.) Ginpakita niya paagi sa iya katutom nga si Jehova ang pinakaimportante nga Persona sa iya kabuhi. Ginpakita man niya, bisan sa limitado lang nga paagi, nga posible masabat sang di-himpit nga tawo ang butig nga panumbungon sang Yawa.—Ipaanggid ang Hulubaton 27:11.
Ang Himpit nga Sabat ni Jesus
9. (a) Paano gingamit ni Satanas sa pagsulay kay Jesus ang kinaandan nga handum sang tawo? (b) Ano ang reaksion ni Jesus sa pagsulay?
9 Wala madugay pagkatapos mabawtismuhan si Jesus, ginsulay sia ni Satanas nga talikdan si Jehova, ang pinakaimportante nga Persona sa iya kabuhi kag unahon ang iya kaugalingon. Tatlo ka pagsulay ang ginhimo sang Yawa. Una, gingamit niya ang kinaandan nga handum sang tawo sa pagkaon. Ginsulay niya si Jesus nga himuon nga tinapay ang mga bato. (Mat. 4:2, 3) Nagpuasa si Jesus sing 40 ka adlaw kag gutom gid sia. Gani ginsulay sia sang Yawa nga gamiton ang iya gahom agod maumpawan ang iya gutom. Ano ang reaksion ni Jesus? Indi pareho ni Eva, ginsentro ni Jesus ang iya igtalupangod sa Pulong ni Jehova kag gilayon nga ginsikway ang pagsulay.—Basaha ang Mateo 4:4.
10. Ngaa ginhangkat ni Satanas si Jesus nga maglukso sa ibabaw sang pamakod sang templo?
10 Gintinguhaan man ni Satanas nga sulayon si Jesus nga magpakaimportante sang iya kaugalingon. Ginhangkat niya si Jesus nga maglukso halin sa ibabaw sang pamakod sang templo. (Mat. 4:5, 6) Ano bala ang gusto ni Satanas? Nangatarungan sia nga kon maglumpat si Jesus nga indi maano, mapamatud-an nga si Jesus ang “anak sang Dios.” Maathag nga gusto sang Yawa nga mabalaka gid si Jesus sa iya reputasyon, tubtob sa punto nga magpadayawdayaw sia. Nahibaluan ni Satanas nga handa ang tawo nga ibutang sa katalagman ang iya kabuhi bangod sa bugal kag agod indi mahuy-an. Gingamit ni Satanas ang kasulatan sa sayop nga paagi, apang ginpakita ni Jesus nga nahangpan gid Niya ang Pulong ni Jehova. (Basaha ang Mateo 4:7.) Paagi sa pagsikway sa hangkat, ginpamatud-an liwat ni Jesus nga si Jehova ang pinakaimportante nga Persona sa iya kabuhi.
11. Ngaa ginsikway ni Jesus ang tanan nga ginharian sang kalibutan nga gintanyag sang Yawa?
11 Sang ulihi, sang desperado na si Satanas, gintanyag niya kay Jesus ang tanan nga ginharian sang kalibutan. (Mat. 4:8, 9) Ginsikway ini gilayon ni Jesus. Nahibaluan niya nga ang pagbaton sini katumbas sa pagsikway sang pagkasoberano ni Jehova—ang kinamatarong sang Dios subong ang Labing Mataas. (Basaha ang Mateo 4:10.) Sa kada pagsulay, ginasabat ni Jesus si Satanas paagi sa pagkutlo sang kasulatan nga may ngalan ni Jehova.
12. Anong mabudlay nga desisyon ang gin-atubang ni Jesus sang dali na lang sia mapatay, kag ano ang matun-an naton sa iya reaksion sa sini?
12 Sang dali na lang mapatay si Jesus, nakaatubang sia sing tuman kabudlay nga desisyon. Sa bug-os niya nga ministeryo, ginpabutyag niya nga handa sia nga ihalad ang iya kabuhi. (Mat. 20:17-19, 28; Luc. 12:50; Juan 16:28) Nahibaluan man niya nga patupatuan sia kag pamatbatan suno sa kasuguan sang mga Judiyo kag silutan sing kamatayon subong manugpasipala. Nabalaka gid sia sa kahuy-anan nga mangin epekto sini sa iya Amay. Nangamuyo sia: “Amay ko, kon mahimo, paligara sa akon ini nga kopa.” Pero nagsiling sia: “Apang, indi suno sa akon kabubut-on, kundi suno sa imo kabubut-on.” (Mat. 26:39) Huo, ginpakita sang katutom ni Jesus tubtob kamatayon kon sin-o gid ang pinakaimportante nga Persona sa iya kabuhi!
Ang Aton Sabat
13. Ano ang natun-an naton kanday Eva, Job, kag Jesucristo?
13 Ano na ang aton natun-an? Natun-an naton kay Eva nga ang mga nagapadala sa kailigbon ukon nagapakaimportante sang ila kaugalingon nagapakita nga indi si Jehova ang pinakaimportante nga Persona sa ila kabuhi. Sa kabaliskaran, natun-an naton sa integridad ni Job nga mauna sang di-himpit nga tawo si Jehova paagi sa matutom nga pagbatas sang mga kabudlayan—bisan wala niya mahangpan ang rason sang iya pag-antos. (Sant. 5:11) Labaw sa tanan, ang halimbawa ni Jesus nagatudlo sa aton nga dapat kita mangin handa sa pag-atubang sing kahuy-anan kag likawan ang pagpakaimportante sang kaugalingon. (Heb. 12:2) Paano naton ini maaplikar?
14, 15. Paano nangin tuhay kay Eva ang reaksion ni Jesus sa pagsulay, kag paano naton mailog si Jesus? (Komentuhi ang ilustrasyon sa pahina 18.)
14 Indi pagtuguti nga malimtan mo si Jehova bangod sa mga pagsulay. Gintugutan ni Eva nga maagaw sang pagsulay ang iya igtalupangod. Nakita niya nga ang bunga “maayo nga kalan-on, kag nga makagalanyat sa mga mata, kag nga ang kahoy tilinguhaon sa pagpaalam.” (Gen. 3:6) Tuhay gid ini sa reaksion ni Jesus sa tatlo ka pagsulay! Sa kada pagsulay, ginahunahuna niya dayon kon ano ang epekto sang iya himuon. Nagsandig sia sa Pulong sang Dios kag naggamit man sang ngalan ni Jehova.
15 Kon ginasulay kita nga maghimo sing butang nga ginakaugtan ni Jehova, sa diin naton ginasentro ang aton igtalupangod? Samtang ginatulok pa gid naton ang pagsulay, labi nga nagabaskog ang aton sayop nga handum. (Sant. 1:14, 15) Importante gid nga dulaon naton gilayon ini nga handum, bisan pa tuman kabudlay ini pareho sa pagkuha sang isa ka bahin sang aton lawas. (Mat. 5:29, 30) Kaangay ni Jesus, hunahunaon naton pirme ang epekto sang aton himuon sa aton kaangtanan kay Jehova. Dapat naton dumdumon ang ginasiling sang iya Pulong, ang Biblia. Sa sini lamang nga paagi mapamatud-an naton nga si Jehova ang pinakaimportante nga Persona sa aton kabuhi.
16-18. (a) Ano ang mahimo magpaluya sang aton buot? (b) Ano ang makabulig sa aton nga malandas ang kabudlayan?
16 Indi maakig kay Jehova bangod sa mga trahedya nga imo naagihan. (Hulu. 19:3) Samtang nagapalapit kita sa katapusan sining malaut nga kalibutan, madamo pa gid nga katawhan ni Jehova ang naapektuhan sang mga kalamidad kag mga trahedya. Indi kita makapaabot nga amligan sing milagruso. Kag kaangay ni Job, mahimo man magluya ang aton buot bangod sa kamatayon sang aton pinalangga ukon sa kabudlayan nga aton ginaantos.
17 Wala mahangpan ni Job kon ngaa gintugutan ni Jehova ang pila ka butang nga natabo sa iya, kag kon kaisa indi man naton mahangpan kon ngaa nagakatabo ang malain nga mga butang. Ayhan nabalitaan naton nga may matutom nga mga utod nga napatay sa linog, subong sang natabo sa Haiti, ukon sa iban pa nga kalamidad. Ukon mahimo may kilala kita nga matutom nga saksi nga nabiktima sang kasingki ukon napatay sa aksidente. Ukon mahimo nga kita mismo nakaeksperiensia sang kabudlayan kag inhustisya. Bangod sini, makapamangkot kita: ‘Jehova, ngaa ako? Ano ang sala ko?’ (Hab. 1:2, 3) Ano ang makabulig sa aton sa sini nga kahimtangan?
18 Indi kita magbatyag nga natabo ini bangod naakig si Jehova. Ginpadaku ini ni Jesus sang ginsambit niya ang duha ka trahedya sadto. (Basaha ang Lucas 13:1-5.) Madamo nga kalamidad ang resulta sang ‘tion kag wala ginapaabot nga hitabo.’ (Man. 9:11, NW) Ano man ang rason sang aton kabudlayan, malandas naton ini kon isentro naton ang aton igtalupangod sa “Dios nga may bug-os nga paglugpay.” Hatagan niya kita sing kusog agod makapabilin kita nga matutom.—2 Cor. 1:3-6.
19, 20. Ano ang nakabulig kay Jesus nga batason ang kahuy-anan, kag ano ang makabulig sa aton nga mahimo man ini?
19 Indi pagtuguti nga madaug ka sang bugal ukon kahadlok nga mahuy-an. Ang pagkamapainubuson ang nagbulig kay Jesus nga ‘ubahon ang iya orihinal nga dagway kag isuklob ang dagway sang ulipon.’ (Fil. 2:5-8) Nabatas niya ang kahuy-anan bangod nagsandig sia kay Jehova. (1 Ped. 2:23, 24) Sa paghimo sini, ginpakita niya nga ginauna niya ang kabubut-on ni Jehova, amo nga ginbayaw sia sa mataas nga posisyon. (Fil. 2:9) Amo man sini nga dalanon ang gusto ni Jesus nga sundon sang iya mga disipulo.—Mat. 23:11, 12; Luc. 9:26.
20 Kon kaisa, makahuluya ang pila ka pagtilaw sa aton pagtuo. Pero dapat may pagsalig kita pareho kay apostol Pablo, nga nagsiling: “Bangod gid sini ginaantos ko man ining mga butang, apang wala ako mahuya. Kay nakilala ko ang isa nga akon ginatuuhan, kag nagasalig ako nga sarang niya mabantayan ang gintugyan ko sa iya tubtob sa amo nga adlaw.”—2 Tim. 1:12.
21. Bisan pa sa maiyaiyahon nga panimuot sang kalibutan subong, ano ang aton determinasyon?
21 Gintagna sang Biblia nga sa aton tion ang mga tawo mangin “mahigugmaon sa kaugalingon.” (2 Tim. 3:2) Gani, indi katingalahan nga napalibutan kita sang henerasyon nga maiyaiyahon. Kabay nga indi kita magpaimpluwensia sa sini nga panimuot! Sa baylo, ano man nga pagsulay, trahedya, ukon pagpakahuya ang aton maatubang, mangin determinado kita nga pamatud-an nga si Jehova ang pinakaimportante nga Persona sa aton kabuhi!
[Mga Nota]
^ par. 4 Ang titulo nga “GINOO” nga ginsulat sa dalagku nga letra pareho sang sa Genesis 3:1, nagapakita nga sa Hebreo, gingamit ang ngalan sang Dios nga Jehova.
^ par. 7 Nagapati ang iban nga iskolar sa Biblia nga ang ekspresyon nga “panit sa panit” nagakahulugan nga tugutan ni Job nga madulaan sing panit ukon sing kabuhi ang iya kabataan kag kasapatan, basta indi lang sia madulaan sing panit, ukon kabuhi. Para naman sa iban, nagakahulugan ini nga handa ang isa ka tawo nga madulaan sing panit basta maluwas ang iya kabuhi. Halimbawa, mahimo niya isagang ang iya kamot para indi maigo ang iya ulo, gani madula ang iban niya nga panit para indi mahalitan ang iban niya nga panit. Ano man ang kahulugan sini nga ekspresyon, ginapahangop lang sini nga handa si Job nga madula ang tanan nga butang basta indi lang sia mapatay.
Ano ang Aton Matun-an . . .
• sa paagi ni Satanas sa paglimbong kay Eva?
• sa reaksion ni Job sa mga trahedya?
• sa kon ano ang pinakaimportante kay Jesus?
[Mga Pamangkot sa Pagtinuon]
[Retrato sa pahina 17]
Wala ginsentro ni Eva ang iya igtalupangod sa iya kaangtanan kay Jehova
[Retrato sa pahina 18]
Ginsikway ni Jesus ang mga pagsulay ni Satanas kag ginsentro ang iya igtalupangod sa paghimo sang kabubut-on ni Jehova
[Mga Retrato sa pahina 20]
Pagpanaksi sa mga tolda pagkatapos sang linog sa Haiti
Sa tion sang kabudlayan isentro naton ang aton igtalupangod sa “Dios nga may bug-os nga paglugpay”
