Dapat Na Bala Magpabawtismo ang mga Bata?

“NALIPAY gid ako nga ang akon bata nga babayi alagad na ni Jehova, kag kabalo ako nga nalipay man sia,” siling ni Carlos, * nga isa ka amay diri sa Pilipinas. Ang isa ka amay sa Gresya nagsulat: “Nalipay gid kami nga mag-asawa kay lamharon pa nabawtismuhan ang amon tatlo ka bata. Nagauswag sila sa espirituwal subong kag malipayon sa pag-alagad kay Jehova.”

Nalipay gid ang Cristianong mga ginikanan kon mabawtismuhan na ang ila kabataan, apang indi malikawan nga magkabalaka sila. “Nagasamo ang akon kalipay kag kabalaka,” siling sang isa ka iloy. Ngaa amo sina ang iya ginabatyag? “Kabalo ako nga bug-os na gid ang iya salabton kay Jehova.”

Dapat mangin tulumuron sang tanan nga bata nga mangin bawtismado nga alagad ni Jehova. Apang mahimo maghunahuna ang diosnon nga mga ginikanan, ‘Nakita ko nga nagauswag ang akon bata, pero masarangan na gid bala niya nga pamatukan ang imoralidad kag magpabilin nga matinlo sa atubangan ni Jehova?’ Ang iban mahimo mamangkot, ‘Makapabilin ayhan nga matutom kag malipayon sa pag-alagad sa Dios ang akon bata kon sulayon sia sang materyalismo?’ Gani, ano nga mga panuytoy sa Biblia ang makabulig sa mga ginikanan nga mahibaluan kon bala handa na nga magpabawtismo ang ila mga bata?

Pagkadisipulo—Ang Panguna nga Kinahanglanon

Sa Biblia, indi ang edad ang basihan para mabawtismuhan kundi ang espirituwalidad. Si Jesus nagsugo sa iya mga sumulunod: “Maghimo sang mga disipulo sa mga tawo sang tanan nga pungsod, nga nagabawtismo sa ila.” (Mat. 28:19) Gani ang bawtismo para lamang sa mga disipulo na ni Cristo.

Ano ang buot silingon sang disipulo? Ang Insight on the Scriptures nagapaathag: “Ini nga termino panguna nga ginagamit indi lamang sa mga nagapati na kundi sa mga nagasunod sing bug-os sa mga panudlo ni Cristo.” Masarangan na bala sang mga bata nga mangin matutom  nga disipulo ni Cristo? Isa ka utod nga sobra na 40 ka tuig nga misyonera sa Latin Amerika ang nagsulat parte sa ila nga mag-ulutod: “Bisan bata pa kami sadto, gusto na namon mag-alagad kay Jehova kag magpuyo sa Paraiso. Nabuligan kami sang amon dedikasyon nga mapamatukan ang mga pagsulay sang pamatan-on kami. Wala gid kami maghinulsol nga bata pa kami nagdedikar sa Dios.”

Paano mo mahibaluan kon bala ang imo bata disipulo na ni Cristo? Ang Biblia nagasiling: “Bisan ang bata nagapakilala paagi sa iya mga binuhatan, kon putli ang iya buhat kag kon matarung ini.” (Hulu. 20:11) Binagbinaga ang mga pamatuod nga ang bata ‘nagapadayag sang pag-uswag’ subong isa ka disipulo.—1 Tim. 4:15.

Pamatuod sang Pagkadisipulo

Ginatuman ka bala sang imo bata? (Col. 3:20) Ginahimo bala niya ang iya mga ulubrahon sa balay? Parte sa 12 anyos nga si Jesus, ang Biblia nagasiling: “Padayon sia nga nagpasakop sa [iya mga ginikanan].” (Luc. 2:51) Huo, wala sing bata nga makatuman sing bug-os sa iya mga ginikanan. Apang ang matuod nga mga Cristiano dapat ‘magsunod sing maayo sa mga tikang ni Jesus.’ Gani, ang mga bata nga gusto magpabawtismo dapat kilala nga matinumanon sa ila mga ginikanan.—1 Ped. 2:21.

Binagbinaga ang masunod nga mga pamangkot: Kon parte sa ministeryo, ginapakita bala sang imo bata nga ‘ginapangita niya anay ang Ginharian’? (Mat. 6:33) Nanamian bala sia magsugid sang maayong balita sa iban, ukon ginapilit mo pa sia nga mag-upod sa imo kag makighambal sa mga tawo? Ginatungdan bala niya ang iya mga responsibilidad subong di-bawtismado nga manugbantala? Ginabalikan bala niya ang mga interesado nga makita niya sa teritoryo? Nagapakilala bala sia sa iya mga klasmeyt kag manunudlo nga isa sia ka Saksi ni Jehova?

Importante bala sa iya ang pagtambong sa mga miting? (Sal. 122:1) Nanamian bala sia magkomento sa Pagtinuon sa Ang Lalantawan kag sa Pagtinuon sang Kongregasyon sa Biblia? Nalipay bala sia maghatag sang iya bahin sa Teokratikong Eskwelahan Para sa Ministeryo?—Heb. 10:24, 25.

Ginatinguhaan bala niya nga mangin matinlo sa moral paagi sa paglikaw sa malain nga mga kaupod sa eskwelahan kag bisan diin? (Hulu. 13:20) Ano ang iya ginapili nga mga kanta, pelikula, palaguaon sa TV, video game, kag mga site sa Internet? Makita bala sa iya hambal kag buhat nga gusto niya tumanon ang mga talaksan sang Biblia?

Daw ano kadamo ang iya nahibaluan sa Biblia? Mahambal bala niya sa iya kaugalingon nga tinaga ang iya natun-an sa inyo Pangpamilya nga Pagsimba? Mapaathag bala niya ang panguna nga mga kamatuoran sa Biblia? (Hulu. 2:6-9) Ginabasa bala niya ang Biblia kag ginatun-an ang mga publikasyon sang matutom kag mainandamon  nga ulipon? (Mat. 24:45) Nagapamangkot bala sia parte sa mga panudlo kag mga teksto sa Biblia?

Ini nga mga pamangkot makabulig sa imo nga mahibaluan ang espirituwal nga pag-uswag sang imo bata. Pagkatapos ini mabinagbinag, mahimo may makita ka pa nga dapat niya pauswagon antes sia bawtismuhan. Apang kon ang iya pagkabuhi nagapamatuod sang pagkadisipulo kag nakadedikar na sia sa Dios, mahimo mo na sia tugutan nga magpabawtismo.

Ang mga Bata Makadayaw kay Jehova

Madamo nga alagad sang Dios ang matutom kag mainunungon halin sang bata pa sila pareho nanday Jose, Samuel, Josias, kag Jesus. (Gen. 37:2; 39:1-3; 1 Sam. 1:24-28; 2:18-20; 2 Cron. 34:1-3; Luc. 2:42-49) Ang nagpanagna nga apat ka bata nga babayi ni Felipe mahimo nga ginhanas man sang bata pa sila.—Binu. 21:8, 9.

Ang isa ka Saksi sa Gresya nagsiling: “Dose anyos ako sang ginbawtismuhan. Wala gid ako maghinulsol. Nagligad na ang 24 ka tuig, kag 23 sini ang gingamit ko subong payunir. Nabuligan ako sang gugma kay Jehova nga maatubang ang mga kabudlayan sang tin-edyer ako. Sang 12 anyos ako diutay pa lang ang akon nahibaluan sa Kasulatan apang ginahigugma ko si Jehova kag luyag ko sia alagaron asta san-o. Nalipay ako nga sa bulig niya nakapadayon ako sa pag-alagad.”

Bata man ukon tigulang, kon makita na sa iya ang pamatuod sang pagkadisipulo, dapat na sia magpabawtismo. Si apostol Pablo nagsulat: “Paagi sa tagipusuon ang isa nagatuo para sa pagkamatarong, apang paagi sa baba ang isa nagapahayag sing dayag para sa kaluwasan.” (Roma 10:10) Ang pagpabawtismo sang bata pa nga disipulo ni Cristo importante gid nga tikang para sa iya kag sa iya mga ginikanan. Kabay nga wala sing magpugong sa imo kag sa imo kabataan nga mabatyagan ini nga kalipay.

[Nota]

[Kahon sa pahina 5]

Ang Husto nga Pagtamod sa Bawtismo

Para sa pila ka ginikanan, ang pagpabawtismo sang ila bata importante nga tikang pero may upod nga risgo. Daw pareho ini sa pagkuha sing lisensia sa pagmaneho. Matuod bala nga ginarisgo sang isa ang iya palaabuton kon magpabawtismo sia kag mag-alagad sa Dios? Suno sa Biblia, indi. Ang Hulubaton 10:22 nagasiling: “Ang pagpakamaayo sang GINOO nagapamanggad, kag wala sia nagadugang sing kasubo sa sini.” Kag si Pablo nagsulat kay Timoteo: “Ang matuod, isa ini ka paagi nga makaganar sing daku, ining diosnon nga debosyon nga may pagkakontento.”—1 Tim. 6:6.

Huo, ang pag-alagad kay Jehova indi mahapos. Bilang manalagna, madamo sing kabudlayan si Jeremias. Pero nagsulat sia parte sa iya pagsimba sa Dios: “Ang imo mga polong kalipay sa akon kag kasadya sang akon tagiposoon; kay ginatawag ako sa imo ngalan, O GINOO, Dios sang mga kasoldadosan.” (Jer. 15:16) Nahibaluan niya nga ang pag-alagad sa Dios amo ang nagapahalipay sa iya. Ang kalibutan ni Satanas amo ang ginahalinan sang mga kabudlayan. Gani, dapat buligan sang mga ginikanan ang ila kabataan nga makita ining kinatuhayan.—Jer. 1:19.

 [Kahon sa pahina 6]

Indi Lang Bala Anay Magpabawtismo ang Akon Bata?

Kon kaisa, bisan puede na bawtismuhan ang ila bata, ginapunggan ini sang mga ginikanan. Ano ang ila mga rason?

Nahadlok ako nga kon mabawtismuhan na ang akon bata, basi sa ulihi makasala sia kag ma-disfellowship. Matuod bala nga kon indi magpabawtismo ang bata wala pa sia sing salabton sa Dios? Si Solomon nagsiling sa mga bata: “Kilalahon mo nga tungud [sa tanan mo nga ginahimo] ang Dios magadala sa imo sa hukmanan.” (Man. 11:9) Kag ginpahanumdom ni Pablo ang tanan: “Ang kada isa sa aton manabat sang iya kaugalingon sa Dios.”—Roma 14:12.

Ang bawtismado kag di-bawtismado nga mga sumilimba pareho nga manabat sa Dios. Indi pagkalimti nga ginaamligan ni Jehova ang iya mga alagad paagi sa ‘indi pagtugot nga sulayon sila labaw sa ila masarangan.’ (1 Cor. 10:13) Basta ‘nagapabilin sila nga maligdong’ kag nagabato sa pagsulay, buligan sila sang Dios. (1 Ped. 5:6-9) Ang isa ka Cristianong iloy nagsulat: “Ang bawtismado nga bata mas madamo sing rason nga likawan ang malain nga mga butang. Ang akon bata nga nabawtismuhan sang 15 anyos sia, nagapati nga nangin proteksion ini sa iya. ‘Wala sa pensar mo nga supakon si Jehova,’ siling sang akon bata. Determinado ka nga himuon ang matarong kon bawtismado ka na.”

Kon ginahanas mo ang imo mga bata nga sundon si Jehova paagi sa imo ginahambal kag ginahimo, makasalig ka nga padayon nila ini nga himuon kon bawtismado na sila. Ang Hulubaton 20:7 nagasiling: “Ang matarung nga tawo nga nagalakat sa iya pagkadungganon—bulahan ang iya mga anak sa olihi niya!”

Luyag ko nga malab-ot anay sang akon bata ang pila ka tulumuron. Dapat may mahibal-an sila nga obra agod masakdag nila ang ila kaugalingon sa ulihi. Apang may katalagman kon palig-unon sila nga unahon ang pag-eskwela kag mangita sing estable nga trabaho sangsa ila pag-alagad. Parte sa “binhi,” ukon sa pulong sang Ginharian nga wala magtubo, si Jesus nagsiling: “Nahanungod sa ginsab-ug sa tunga sang tunukon nga mga tanom, amo ini ang nagapamati sa pulong, apang ang kabalaka sining sistema sang mga butang kag ang madaya nga gahom sang manggad nagalumos sang pulong, kag sia nangin di-mabungahon.” (Mat. 13:22) Ang pag-una sang kalibutanon nga mga tulumuron makadula sang handum sang isa nga alagaron ang Dios.

Parte sa mga pamatan-on nga kalipikado na magpabawtismo pero wala ginapasugtan sang ila mga ginikanan, ang isa ka gulang nagkomento: “Kon punggan mo ang bata, madula ang iya gana kag sa ulihi indi na lang sia magpabawtismo.” Kag ang isa ka nagalakbay nga manugtatap nagsulat: “Ang bata mahimo madulaan sing pagsalig sa iya kaugalingon kag mangita sa kalibutan sang makapabatyag sa iya nga importante sia.”

[Retrato]

Dapat bala unahon ang pag-eskwela?

[Retrato sa pahina 3]

Mapakita na sang bata ang mga pamatuod sang pagkadisipulo

[Retrato sa pahina 3]

Paghanda kag pagpakigbahin sa mga miting

[Retrato sa pahina 4]

Pagtuman sa mga ginikanan

[Retrato sa pahina 4]

Pagpakigbahin sa ministeryo

[Retrato sa pahina 4]

Pagpangamuyo