Kapahuwayan sang Dios—Ano Ini?
Kapahuwayan sang Dios—Ano Ini?
“May nabilin pa nga kapahuwayan subong sa adlaw nga inugpahuway para sa katawhan sang Dios.”—HEB. 4:9.
1, 2. Ano ang aton mahinakop sa ginsiling sang Genesis 2:2 parte sa ikapito nga adlaw, kag ano ang nag-utwas nga mga pamangkot?
SA UNA nga kapitulo sang Genesis, natun-an naton nga sa sulod sang malaragwayon nga anom ka adlaw, ginhanda sang Dios ang duta para puy-an sang tawo. Sa katapusan sang kada adlaw, amo sini ang ginasiling: “May kagab-ihon kag kaagahon.” (Gen. 1:5, 8, 13, 19, 23, 31) Apang, kon tuhoy sa ikapito nga adlaw, ang Biblia nagsiling: “Sa ikapito nga adlaw natapos sang Dios ang tanan niya nga buluhaton, kag nagsugod sia sa pagpahuway sa ikapito nga adlaw sa tanan niya nga binuhatan.”—Gen. 2:2, NW.
2 Talupangda ang ekspresyon nga “nagsugod sia sa pagpahuway.” Ginapahangop sini nga ang ikapito nga adlaw—ang “adlaw” sang kapahuwayan sang Dios—nagapadayon gihapon sang ginsulat ni Moises ang tulun-an sang Genesis sang 1513 B.C.E. Nagapahuway pa bala ang Dios asta subong? Kon amo, paano kita makasulod sa iya kapahuwayan? Importante gid sa aton ang sabat sa sini.
Nagapahuway Bala Gihapon si Jehova?
3. Paano ginapakita sang ginsiling ni Jesus sa Juan 5:16, 17, nga ang ikapito nga adlaw nagapadayon gihapon sang unang siglo?
3 May duha ka pamatuod nga ang ikapito nga adlaw nagapadayon gihapon sang unang siglo C.E. Una, binagbinaga ang ginsiling ni Jesus sa mga naghingabot sa iya sang nagpang-ayo sia sa Adlaw nga Inugpahuway, kay ginkabig nila ini nga pag-obra. Nagsiling sia: “Ang akon Amay padayon nga nagapangabudlay tubtob karon, kag padayon ako nga nagapangabudlay.” (Juan 5:16, 17) Ano ang iya buot silingon? Ginsumbong si Jesus nga nagpangabudlay sa Adlaw nga Inugpahuway. Nasabat ini sang nagsiling sia: “Ang akon Amay padayon nga nagapangabudlay.” Daw pareho lang nga nagsiling si Jesus: ‘Pareho ang hilikuton namon sang akon Amay. Kon ang akon Amay padayon nga nagapangabudlay sa iya linibo ka tuig nga Adlaw nga Inugpahuway, wala sing rason nga indi ako magpangabudlay, bisan sa Adlaw nga Inugpahuway.’ Gani ginapakita sini nga kon tuhoy sa duta, nagapadayon pa ang dakung Adlaw nga Inugpahuway sang Dios, sang unang siglo. *
4. Ano pa nga pamatuod ang ginhatag ni Pablo nga ang ikapito nga adlaw nagapadayon pa sang iya panahon?
4 Ang ikaduha nga pamatuod ginhatag ni apostol Pablo sang ginkutlo niya ang Genesis 2:2 tuhoy sa kapahuwayan sang Dios. Sia nagsulat: “Kita nga nagtuo nagasulod sa kapahuwayan.” (Heb. 4:3, 4, 6, 9) Gani, ang ikapito nga adlaw nagapadayon pa sang panahon ni Pablo. Daw ano pa kalawig ining adlaw sang kapahuwayan?
5. Ano ang katuyuan sang ikapito nga adlaw, kag san-o matuman ina nga katuyuan?
5 Agod masabat ina nga pamangkot, dapat naton dumdumon ang katuyuan sang ikapito nga adlaw. Ginapaathag ini sang Genesis 2:3: “Ang Dios nagpakamaayo sang adlaw nga ikapito kag nagpakabalaan sini.” Ini nga adlaw ‘ginpakabalaan’ ukon ginpain ni Jehova para sa katumanan sang iya katuyuan. Ina nga katuyuan amo nga ang duta pagapuy-an sang matinumanon nga katawhan nga magaatipan sa sini kag sa tagsa ka buhi nga butang. (Gen. 1:28) Para sa katumanan sini nga katuyuan, si Jehova nga Dios kag si Jesucristo, ang “Ginuo sang adlaw nga inugpahuway,” “padayon nga nagapangabudlay tubtob karon.” (Mat. 12:8) Gani ang adlaw sang kapahuwayan sang Dios matapos kon matuman na ang iya katuyuan, sa katapusan sang Isa ka Libo ka Tuig nga Paggahom ni Cristo.
Indi “Mapukan sa Amo Man nga Sahi sang Pagkadimatinumanon”
6. Ano nga mga halimbawa ang nangin paandam sa aton, kag ano nga leksion ang matun-an naton sa sini?
6 Ginpaathag sang Dios kanday Adan kag Eva ang iya katuyuan para sa duta, apang wala sila magtuman. Indi lamang sila ang naghimo sini kundi minilyon pa sugod sadto. Bisan ang katawhan nga ginpili sang Dios, ang pungsod sang Israel, napukan man sa pagkadimatinumanon. Gani, ginpaandaman ni Pablo ang mga Cristiano sang unang siglo nga bisan sila mahimo man magsunod sa mga Israelinhon sadto. Sia nagsulat: “Busa himuon naton ang aton bug-os nga masarangan sa pagsulod sa sina nga kapahuwayan, kay basi may isa nga mapukan sa amo man nga sahi sang pagkadimatinumanon.” (Heb. 4:11) Talupangda nga suno kay Pablo indi makasulod sa kapahuwayan sang Dios ang mga di-matinumanon. Ano ang ginapahangop sini? Posible bala nga indi kita makasulod sa kapahuwayan sang Dios kon sa pila ka paagi ginapamatukan naton ang iya katuyuan? Importante gid sa aton ang sabat sa sini kag amo sina ang binagbinagon naton sa sini nga artikulo. Pero, tun-an anay naton ang tuhoy sa pagsulod sa kapahuwayan sang Dios paagi sa pagbinagbinag sang malain nga halimbawa sang mga Israelinhon.
“Indi Sila Makasulod sa Akon Kapahuwayan”
7. Ano ang katuyuan ni Jehova sa pagluwas sa mga Israelinhon gikan sa pagkaulipon sa Egipto, kag ano ang iya ginapaabot sa ila?
7 Sang 1513 B.C.E., ginpahayag ni Jehova kay Moises ang iya katuyuan para sa mga Israelinhon. Ang Dios nagsiling: “Nagapanaug ako sa pagluwas sa ila gikan sa kamut sang mga Egiptohanon, kag sa pagpagowa sa ila gikan sinang duta [Egipto] sa pagpataklad sa ila sa isa ka dutang maayo kag malapad, sa duta nga nagailig sing gatas kag dugus.” (Ex. 3:8) Subong sang ginsaad ni Jehova sa ila katigulangan, kay Abraham, ang iya katuyuan sa pagluwas sa mga Israelinhon “gikan sa kamut sang mga Egiptohanon” amo ang pagpili sa ila subong iya katawhan. (Gen. 22:17) Ginhatagan sang Dios ang mga Israelinhon sing kasuguan agod mangin maayo ang ila kaangtanan sa iya. (Isa. 48:17, 18) Ginsilingan niya sila: “Kon magtuman kamo sang akon tingug kag magbantay sang akon katipan [suno sa Kasuguan], manginkaugalingon kamo nakon sa tunga sang tanan nga mga katawohan; kay ang bug-os nga duta akon.” (Ex. 19:5, 6) Gani, ang pinasahi nga kaangtanan sang mga Israelinhon sa Dios nagadepende sa ila pagkamatinumanon.
8. Ano nga kabuhi ang natigayon kuntani sang mga Israelinhon kon gintuman lamang nila ang Dios?
8 Hunahunaa kon daw ano kaayo sang kahimtangan sang mga Israelinhon kon gintuman lamang nila ang Dios! Pakamaayuhon ni Jehova ang ila mga latagon, ulubasan, kasapatan, kag mga panong. Indi sila madaug sang ila mga kaaway. (Basaha ang 1 Hari 10:23-27.) Naabtan kuntani sila sang Mesias subong isa ka pungsod nga indi kontrolado sang mga Romano. Sila kuntani ang modelo nga ginharian sa palibot nga mga pungsod, kag mangin pamatuod nga ang nagatuman sa matuod nga Dios ginapakamaayo sa espirituwal kag materyal.
9, 10. (a) Ngaa sayop gid ang paghandum sang mga Israelinhon nga magbalik sa Egipto? (b) Paano maapektuhan ang pagsimba sang mga Israelinhon kon magbalik sila sa Egipto?
9 Matahom gid ang pribilehiyo sang mga Israelinhon. Gamiton sila ni Jehova sa pagtuman sang iya katuyuan nga magaresulta sing mga pagpakamaayo, indi lamang sa ila, kundi sa ulihi, sa tanan man nga pamilya sa duta! (Gen. 22:18) Apang subong pungsod, ining rebelyuso nga katawhan indi interesado nga mangin modelo nga pungsod nga ginagamhan sang Dios. Luyag pa gani nila magbalik sa Egipto! (Basaha ang Numeros 14:2-4.) Apang kon magbalik sila, indi na nila masimba si Jehova sa paagi nga luyag niya kag indi na sila mangin modelo nga pungsod. Kon magpaulipon sila liwat sa Egipto, indi nila matuman ang Mosaikong Kasuguan kag indi na sila makabenepisyo sa aman ni Jehova para sa kapatawaran sang mga sala. Daw ano kakitid nga panghunahuna! Gani tuhoy sa ila, si Jehova nagsiling: “Naakig ako sa sini nga kaliwatan kag nagsiling, ‘Pirme sila nagatalang sa ila tagipusuon, kag wala nila mahibaluan ang akon mga dalanon.’ Gani sa akon kaakig nagpanumpa ako, ‘Indi sila makasulod sa akon kapahuwayan.’”—Heb. 3:10, 11; Sal. 95:10, 11.
10 Sa paghandum nila nga magbalik sa Egipto, ginpakadiutay sining rebelyuso nga pungsod ang balor sang espirituwal nga pagpakamaayo nga nabaton nila, kag mas ginpabaloran nila ang mga sibuyas kag ang mga ahos. (Num. 11:5) Pareho sa indi mapinasalamaton nga si Esau, handa nga ibaylo sining mga rebelde ang ila espirituwal nga palanublion sa manamit nga pagkaon.—Gen. 25:30-32; Heb. 12:16.
11. Nagbag-o bala ang katuyuan sang Dios kay wala sing pagtuo ang mga Israelinhon sang panahon ni Moises?
11 Bisan pa wala sing pagtuo ang mga Israelinhon nga naggua sa Egipto, “padayon nga nagapangabudlay” si Jehova sing mapailubon agod matuman ang iya katuyuan. Nagkonsentrar sia sa masunod nga henerasyon. Ining bag-o nga henerasyon mas matinumanon sangsa ila ginikanan. Ginsunod nila ang sugo ni Jehova nga magsulod sa Ginsaad nga Duta kag ginsakop ini. Sa Josue 24:31, mabasa naton: “Nag-alagad ang Israel sa GINOO sa tanan nga adlaw ni Josue, kag sa tanan nga adlaw sang mga tigulang nga naglawig pa kay Josue kag nakakilala sang tanan nga binuhatan sang GINOO nga ginhimo niya tungud sa Israel.”
12. Paano naton nahibaluan nga posible makasulod sa kapahuwayan sang Dios subong?
12 Amat-amat nga nagkalamatay ining matinumanon nga henerasyon kag ginbuslan ini sang isa ka henerasyon “nga wala makakilala sa GINOO ukon sang buhat nga iya nahimo tungud sa Israel.” Sang ulihi, “ang katawohan sang Israel naghimo sang malaut sa itololok sang GINOO kag nag-alagad sa mga Baal.” (Huk. 2:10, 11) Para sa ila, ang Ginsaad nga Duta indi “duog sang kapahuwayan.” Bangod nangin di-matinumanon sila, nadula nila ang ila maayo nga kaangtanan sa Dios. Parte sa ila, si Pablo nagsulat: “Kon gintuytuyan sila [ang mga Israelinhon] ni Josue pasulod sa isa ka duog sang kapahuwayan, wala na kuntani maghambal sang ulihi ang Dios tuhoy sa iban pa nga adlaw. Gani may nabilin pa nga kapahuwayan subong sa adlaw nga inugpahuway para sa katawhan sang Dios.” (Heb. 4:8, 9) Ang ginapatuhuyan ni Pablo nga “katawhan sang Dios” amo ang mga Cristiano. Buot bala silingon nga ang mga Cristiano makasulod sa kapahuwayan sang Dios? Huo—Judiyo man ukon di-Judiyo nga mga Cristiano!
Ang Iban Wala Makasulod sa Kapahuwayan sang Dios
13, 14. Ano ang koneksion sang pagtuman sa Mosaikong Kasuguan kag pagsulod sa kapahuwayan sang Dios (a) sang panahon ni Moises? (b) sang unang siglo?
13 Ginsulatan ni Pablo ang Hebreo nga mga Cristiano bangod nabalaka sia sa pila nga wala nagakooperar sa katuyuan sang Dios. (Basaha ang Hebreo 4:1.) Sa ano nga paagi? Daw indi mapatihan, pero parte pa ini sa pagsunod sa Mosaikong Kasuguan. Sa sulod sang mga 1,500 ka tuig, ang tanan nga luyag magkabuhi suno sa katuyuan sang Dios dapat magsunod sa Kasuguan. Apang ini nga Kasuguan gindula paagi sa kamatayon ni Jesus. Wala ini ginakilala sang pila ka Cristiano, kag ginapilit nila nga dapat tumanon gihapon ang pila ka bahin sang Kasuguan. *
14 Ginpaathag ni Pablo sa mga Cristiano nga panatiko sa Kasuguan, nga ang mataas nga pagkasaserdote ni Jesus, ang bag-o nga katipan, kag ang espirituwal nga templo, mas superyor sangsa mga katumbas sini sadto. (Heb. 7:26-28; 8:7-10; 9:11, 12) Gingamit ni Pablo ang halimbawa sang Adlaw nga Inugpahuway agod ipaathag kon paano makasulod ang mga Cristiano sa adlaw sang kapahuwayan ni Jehova. Sia nagsulat: “May nabilin pa nga kapahuwayan subong sa adlaw nga inugpahuway para sa katawhan sang Dios. Kay ang tawo nga nakasulod sa kapahuwayan sang Dios nakapahuway man gikan sa iya kaugalingon nga mga buhat, subong nga ang Dios nagpahuway man gikan sa iya mga buhat.” (Heb. 4:8-10) Dapat untatan sining Hebreo nga mga Cristiano ang paghunahuna nga kahamut-an sila ni Jehova kon sundon nila ang Mosaikong Kasuguan. Sugod sang Pentecostes 33 C.E., ginliton na sang Dios ang iya kahamuot sa mga nagatuo kay Jesucristo.
15. Ngaa importante gid ang pagkamatinumanon kon luyag naton makasulod sa kapahuwayan sang Dios?
15 Ngaa wala makasulod ang mga Israelinhon sang panahon ni Moises sa Ginsaad nga Duta? Bangod sang pagkadimatinumanon. Ngaa wala makasulod sa kapahuwayan sang Dios ang pila ka Cristiano sang panahon ni Pablo? Bangod man gihapon sa pagkadimatinumanon. Wala nila ginbaton nga natapos na ang katuyuan sang Kasuguan kag lain na nga paagi ang ginagamit ni Jehova sa paggiya sa iya katawhan.
Pagsulod sa Kapahuwayan sang Dios Subong
16, 17. (a) Ano ang buot silingon sang pagsulod sa kapahuwayan sang Dios subong? (b) Ano ang binagbinagon sa masunod nga artikulo?
16 May pila ka Cristiano subong nga nagapati gihapon nga ang kaluwasan matigayon paagi sa pagsunod sa Mosaikong Kasuguan. Maathag gid ang ginsiling ni Pablo sa mga taga-Efeso: “Paagi sa sining wala tupong nga kaayo ginluwas kamo paagi sa pagtuo; kag indi ini bangod sa inyo, dulot ini sang Dios. Indi, indi ini bangod sa mga buhat, agod wala sang tawo nga may rason sa pagpabugal.” (Efe. 2:8, 9) Gani, ano ang buot silingon sang pagsulod sang mga Cristiano sa kapahuwayan sang Dios? Ginpain ni Jehova ang ikapito nga adlaw—ang iya kapahuwayan—agod tumanon sing bug-os ang iya katuyuan sa duta. Makasulod kita sa kapahuwayan ni Jehova—ukon makaupod sa iya pagpahuway—kon manghikot kita suno sa iya katuyuan nga ginapahayag sa aton paagi sa iya organisasyon.
17 Sa pihak nga bahin, kon balewalaon naton ang laygay sang Biblia paagi sa matutom kag mainandamon nga ulipon, kag sundon ang aton gusto, ginapamatukan naton ang katumanan sang katuyuan sang Dios. Ginabutang naton sa katalagman ang aton maayo nga kaangtanan kay Jehova. Sa masunod nga artikulo, binagbinagon naton ang mga kahimtangan nga masami ginaatubang sang katawhan sang Dios kag kon paano ginapakita sang aton mga desisyon kon bala nakasulod na kita sa kapahuwayan sang Dios.
[Mga Nota]
^ par. 3 Ang mga saserdote kag mga Levita nagapangabudlay sa templo sa Adlaw nga Inugpahuway apang ‘wala sila nakasala.’ Bilang mataas nga saserdote sang dakung espirituwal nga templo sang Dios, mahimo man ni Jesus ang iya espirituwal nga mga hilikuton nga wala ginalapas ang Adlaw nga Inugpahuway.—Mat. 12:5, 6.
^ par. 13 Wala mahibaluan kon bala may Cristianong mga Judiyo nga nagsaulog gihapon sang Adlaw sang Katumbasan pagkatapos sang Pentecostes 33 C.E. Ang paghimo sini nagapakita nga wala sila sing respeto sa halad ni Jesus. Apang may pila ka Cristianong mga Judiyo nga nagasunod gihapon sang mga tradisyon nga ginapatuman sang Kasuguan.—Gal. 4:9-11.
Pamangkot Para sa Pagpamalandong
• Ano ang katuyuan sang kapahuwayan sang Dios sa ikapito nga adlaw?
• Paano naton nahibaluan nga tubtob subong nagapadayon gihapon ang ikapito nga adlaw?
• Ngaa wala makasulod sa kapahuwayan sang Dios ang mga Israelinhon sang panahon ni Moises kag ang pila ka Cristiano sang unang siglo?
• Ano ang buot silingon sang pagsulod sa kapahuwayan sang Dios subong?
[Mga Pamangkot sa Pagtinuon]
[Blurb sa pahina 27]
Makasulod kita sa kapahuwayan ni Jehova subong kon manghikot kita suno sa iya katuyuan nga ginapahayag sa aton paagi sa iya organisasyon
[Mga Retrato sa pahina 26, 27]
Ano ang padayon nga himuon sang katawhan sang Dios para makasulod sa iya kapahuwayan?
