Kapahuwayan sang Dios—Nakasulod Ka Na Bala sa Sini?

“Ang pulong sang Dios buhi kag gamhanan.”—HEB. 4:12.

1. Paano kita makasulod sa kapahuwayan sang Dios subong, kag ngaa mahapos ini ihambal sangsa himuon?

SA NAGLIGAD nga artikulo, natun-an naton nga makasulod lang kita sa kapahuwayan sang Dios kon manghikot kita suno sa iya mga katuyuan. Mahapos ini ihambal sangsa himuon. Halimbawa, sang natun-an naton nga may mga ginahimo kita nga wala ginakahamut-an ni Jehova, nabudlayan kita nga untatan ini dayon. Kon amo sini ang aton ginabatyag, kinahanglan naton tun-an nga mangin “handa sa pagtuman.” (Sant. 3:17) Sa sini nga artikulo, binagbinagon naton ang pila ka kahimtangan nga magatilaw sang aton kahanda—tinagipusuon nga pagtuman—nga magpahisuno sa katuyuan sang Dios.

2, 3. Ano nga mga panikasog ang padayon naton nga himuon para makapabilin nga bilidhon sa pagtamod ni Jehova?

 ² Kon natun-an mo sa Biblia nga may dapat ka bag-uhon sa imo kabuhi, handa ka bala nga himuon ini? Suno sa Biblia, kabubut-on sang Dios nga tipunon ang “bilidhon nga mga butang sang tanan nga pungsud.” (Hag. 2:7) Huo, ang kalabanan sa aton indi makabig nga bilidhon sang una pa lang naton natun-an ang kamatuoran. Pero, napahulag kita sang gugma sa Dios kag sa iya pinalangga nga Anak, nga bag-uhon ang aton mga kinaiya kag pamatasan agod kahamut-an sang Dios. Pagkatapos sang aton mga pangamuyo kag mga panikasog, nag-abot gid man ang adlaw nga kalipikado na kita para sa Cristianong bawtismo.—Basaha ang Colosas 1:9, 10.

³ Pero wala natapos sa bawtismo ang aton pagpakig-away. Magapadayon ini bangod indi pa kita himpit. Apang ginapasalig kita nga kon indi kita mangampo kag determinado nga mangin bilidhon pa gid sa pagtamod sang Dios, pakamaayuhon ni Jehova ang aton mga panikasog.

Kon Kinahanglan Laygayan

4. Ano ang tatlo ka paagi nga mahimo kita laygayan sang Biblia?

⁴ Antes naton mabatuan ang aton pagkadi-himpit, dapat naton mahibaluan kon ano ang aton mga kaluyahon. Mahimo ini ipatalupangod sa aton sang isa ka pamulongpulong sa Kingdom Hall ukon sang isa ka artikulo sa aton mga publikasyon. Pero, kon wala naton marealisar ang punto sa pamulongpulong ukon wala maaplikar ang aton nabasahan, mahimo gamiton ni Jehova ang aton kauturan agod ipatalupangod ini sa aton.—Basaha ang Galacia 6:1.

5. Magsambit sing pila ka negatibo nga reaksion kon ginalaygayan kita, kag ipaathag kon ngaa indi dapat mangampo ang mga gulang sa pagbulig sa aton.

⁵ Indi mahapos batunon ang laygay halin sa di-himpit nga tawo, bisan mataktikanhon pa ini ukon mahigugmaon. Apang subong sang ginapadaku sang Galacia 6:1, si Jehova nagasugo sa mga may espirituwal nga kalipikasyon nga “magtinguha” nga ipasibu kita kag himuon ini “sa espiritu sang kalulo.” Kon sundon naton ini, mangin bilidhon pa gid kita sa pagtamod sang Dios. Makatilingala nga kon nagapangamuyo kita, ginabaton naton nga indi kita himpit. Pero kon may isa gani nga magpatalupangod sang aton mga sayop, nagarason kita dayon, ginapakadiutay ang problema, ginaduhaduhaan ang motibo sang nagalaygay, ukon indi komporme sa paagi sang paglaygay. (2 Hari 5:11) Kag kon maigo naman kita sang laygay—parte sa ginahimo sang mga katapo sang pamilya, pagpanapot kag pamustura, personal nga katinlo, ukon mga kalingawan nga nanamian naton pero ginakaugtan ni Jehova—nagapangakig dayon kita. Ang aton negatibo nga reaksion nagapasubo sa aton kag amo man sa nagalaygay! Pero kon maumpawan na kita, ginabaton man naton nga husto ang laygay.

6. Paano ginapadayag sang pulong sang Dios ang “mga panghunahuna kag mga tinutuyo sang tagipusuon”?

⁶ Ang tema nga teksto sini nga artikulo nagapahanumdom sa aton nga ang pulong sang Dios “gamhanan.” Huo, ang pulong sang Dios may gahom sa pagpabag-o sang kabuhi. Ini ang nagbulig sa aton nga magbag-o antes kita nabawtismuhan kag bisan subong nga bawtismado na kita. Sa iya sulat sa mga Hebreo, nagsiling man si Pablo nga ang pulong sang Dios “nagadulot tubtob sa paghamulag sang kalag kag espiritu, kag sang mga lutalutahan kag utok sa tul-an sini, kag sarang makahantop sang mga panghunahuna kag mga tinutuyo sang tagipusuon.” (Heb. 4:12) Buot silingon, kon nahangpan na naton ang katuyuan sang Dios para sa aton, ang aton reaksion sa sini magapakita sang aton matuod nga pagkatawo. Tuhay bala kon kaisa ang aton ginapakita sa gua (ang “kalag”) sangsa nasulod naton nga pagkatawo (ang “espiritu”)? (Basaha ang Mateo 23:27, 28.) Binagbinaga kon ano ang imo reaksion sa masunod nga mga kahimtangan.

 Magdungan sa Organisasyon ni Jehova

7, 8. (a) Ano ang mahimo nagpahulag sa pila ka Judiyong Cristiano nga sundon gihapon ang pila ka bahin sang Mosaikong Kasuguan? (b) Ngaa ang ila ginahimo supak sa katuyuan ni Jehova?

⁷ Madamo sa aton ang makasaulo sang Hulubaton 4:18: “Ang banas sang matarung subong sang nagapamanagbanag nga kapawa, nga nagasilak sing labi kag labi tubtub sa himpit nga adlaw.” Buot silingon nga samtang nagaligad ang tion, magauswag ang aton paggawi kag magaathag ang aton paghangop sa mga katuyuan sang Dios.

⁸ Natun-an naton sa nagligad nga artikulo nga sang napatay si Jesus, madamo nga Judiyong Cristiano ang nabudlayan magbiya sa Mosaikong Kasuguan. (Binu. 21:20) Bisan ginpaathag pa sing maayo ni Pablo nga wala na napaidalom sa Kasuguan ang mga Cristiano, ang pila wala magpati sa iya. (Col. 2:13-15) Naghunahuna sila nga malikawan nila ang paghingabot kon sundon nila gihapon ang pila ka bahin sang Kasuguan. Ano man ang ila rason, si Pablo nagsulat sa Hebreo nga mga Cristiano nga indi sila makasulod sa kapahuwayan sang Dios kon indi sila manghikot suno sa Iya katuyuan nga ginapahayag sing amat-amat. * (Heb. 4:1, 2, 6; basaha ang Hebreo 4:11.) Agod kahamut-an ni Jehova, dapat nila batunon nga ginatuytuyan niya ang iya katawhan sa tuhay nga direksion.

9. Ano dapat ang aton panimuot kon may mga pagbag-o sa aton paghangop sa Kasulatan?

⁹ Sa karon, may mga pagbag-o sa aton paghangop sa pila ka panudlo sang Biblia. Indi kita dapat mabalaka; sa baylo, dapat magbakod ang aton pagsalig sa matutom kag mainandamon nga ulipon. Kon mahantop sang mga tiglawas sang “ulipon” nga may dapat ipaathag ukon tadlungon sa aton pagtamod sa pila ka kamatuoran, wala sila nagaduhaduha sa pagtadlong sini. Mahimo nga maakig ang iban sa mga pagbag-o sa paghangop, apang mas importante sa ulipon nga klase ang pagkooperar sa amat-amat nga katumanan sang katuyuan sang Dios. Ano ang imo reaksion kon may pagbag-o sa aton paghangop sa Kasulatan?—Basaha ang Lucas 5:39.

10, 11. Ano ang aton matun-an sa reaksion sang pila sang ginpahibalo ang bag-o nga pamaagi sa pagbantala?

¹⁰ Binagbinagon naton ang isa pa ka halimbawa. Sang hingapusan sang ika-19 kag sa panugod sang ika-20 nga siglo, ang pila ka Estudyante sang Biblia nga maayo mamulongpulong nagapati nga makapanaksi sila sing epektibo paagi sa ila nahanda nga mga pamulongpulong. Nanamian sila sa sini, kag ang iban sa ila gusto gid nga dayawon sang mga tagpalamati. Apang nag-athag sang ulihi nga luyag ni Jehova nga mangin masako ang iya katawhan sa nanuhaytuhay nga paagi sang pagbantala, lakip ang pagpamalaybalay. Indi komporme sa sini ang pila ka maayo nga manugpamulongpulong. Kon tan-awon, daw matutom sila sa Dios pero nadayag ang ila matuod nga mga panghunahuna, huyog, kag mga motibo sang nangin maathag na ang katuyuan sang Dios parte sa pagbantala. Wala sila ginpakamaayo ni Jehova. Nagbiya sila sa organisasyon.—Mat. 10:1-6; Binu. 5:42; 20:20.

¹¹ Sang primero, ang mga nagpabilin sa organisasyon ginbudlayan man sa pagbantala primero. Apang nangin matinumanon sila. Sang ulihi nalandas nila ang mga pagpangalag-ag, kag ginpakamaayo sila ni Jehova. Ano ang imo reaksion kon ginaagda ka nga tilawan ang iban nga pamaagi sa pagbantala? Handa ka bala nga himuon ini?

Kon Biyaan sang Aton Pinalangga si Jehova

12, 13. (a) Ano ang katuyuan ni Jehova sa pag-disfellowship sa mga indi mahinulsulon? (b) Ano nga pagtilaw ang ginaatubang sang pila ka ginikanan, kag ngaa mabudlay gid ini?

¹² Pat-od nga kita tanan nagaugyon nga dapat kita mangin matinlo sa pisikal, moral,  kag espirituwal agod mapahamut-an ang Dios. (Basaha ang Tito 2:14.) Apang may mga sitwasyon nga matilawan gid ang aton katutom. Halimbawa, ano abi kon ang bugtong nga anak sang huwaran nga mag-asawa magbiya sa kamatuoran. Na-disfellowship sia bangod ginpili niya ang “umalagi nga pagpangalipay sa sala” sa baylo sang iya kaangtanan kay Jehova kag sa iya mga ginikanan.—Heb. 11:25.

¹³ Daw malupok ang dughan sang mga ginikanan! Kon parte sa pag-disfellowship, nahibaluan nila nga suno sa Biblia ‘untatan ang pagpakig-upod kay bisan sin-o nga ginatawag nga utod nga isa ka makihilawason ukon makagod nga tawo ukon nagasimba sa mga idolo ukon nagatamay sa iban ukon palahubog ukon manugkilkil, nga indi gani magkaon upod sa sini nga tawo.’ (1 Cor. 5:11, 13) Nahangpan nila nga nalakip sa “bisan sin-o” ang mga katapo sang pamilya nga indi nila upod sa balay. Pero palangga gid nila ang ila bata! Bangod sang ila balatyagon, basi mangatarungan sila: ‘Paano namon mabuligan ang amon bugtong nga bata nga makabalik kay Jehova kon indi kami makig-upod sa iya? Indi bala nga mas daku ang amon mabulig kon upod namon sia pirme?’ *

14, 15. Ano ang dapat dumdumon sang mga ginikanan kon pilion nila nga makig-angot sa ila na-disfellowship nga bata?

¹⁴ Nasubuan kita nga makita nga nagaantos ini nga mga ginikanan. Puede pilion sang ila bata nga mag-upod sa iya mga ginikanan kag sa kauturan apang ginpasulabi niya ang kalibutan. Luyag sang mga ginikanan nga buligan ang ila bata, pero indi nila kontrolado ang iya mga desisyon. Gani indi katingalahan nga magbatyag sila nga wala sing mahimo!

¹⁵ Ano ang dapat himuon sang mga ginikanan? Sundon bala nila ang maathag nga panuytoy ni Jehova? Ukon marason bala sila nga ang pag-upod pirme sa ila na-disfellowship nga bata “pinamilya nga butang” kag kinahanglan gid? Kon nagadesisyon, dapat nila dumdumon kon ano ang ginabatyag ni Jehova sa ila ginahimo. Katuyuan ni Jehova nga huptan nga matinlo ang organisasyon kag buligan nga makamarasmas ang mga nakasala. Paano masakdag sang Cristianong mga ginikanan ini nga katuyuan sang Dios?

16, 17. Ano ang matun-an naton kon pamalandungan naton ang halimbawa ni Aaron?

¹⁶ Si Aaron, nga utod ni Moises nakaatubang sing mabudlay nga kahimtangan parte sa iya duha ka bata. Handurawa kon ano ang iya ginbatyag sang ginpatay ni Jehova sanday Nadab kag Abihu bangod sa paghalad sing di-balaan nga kalayo. Indi na niya sila maistorya bangod patay na sila. Apang indi lang amo sini. Ginsugo ni Jehova si Aaron kag ang iya matutom nga mga anak: “Dili ninyo pagbunghayon ang inyo buhok, ukon kusniton ang inyo mga panapton [bangod sa paglalaw], agud nga indi kamo mapatay, kag indi [si Jehova] magsingkal batok sa bug-os nga katilingban.” (Lev. 10:1-6) Maathag  ang mensahe sini. Dapat nga mas mabaskog ang aton gugma kay Jehova sangsa indi matutom nga mga katapo sang aton pamilya.

¹⁷ Sa karon, wala dayon ginapatay ni Jehova ang nagasupak sang iya mga kasuguan. Mahigugmaon nga ginahatagan niya sing kahigayunan ang mga mahinulsulon nga makasasala. Apang ano ang batyagon ni Jehova kon pirme sia ginabutang sang mga ginikanan sa pagtilaw paagi sa pagpakig-angot sa ila na-disfellowship nga bata bisan indi man kinahanglanon?

18, 19. Ano nga mga pagpakamaayo ang mabaton sang mga katapo sang pamilya nga nagasunod sa mga panuytoy ni Jehova parte sa pag-disfellowship?

¹⁸ Madamo sang na-disfellowship anay ang nagbaton nga nakamarasmas sila bangod sa malig-on nga panindugan sang ila mga abyan kag mga katapo sang pamilya. Sang ginrekomendar sang mga gulang nga ibalik ang isa ka lamharon nga utod nga babayi, nagsulat sila nga ‘ang isa ka rason nga ginbag-o sining utod ang iya kabuhi amo ang pagtahod sang iya magulang sa kahimusan sang pag-disfellowship.’ Nagsiling sia nga “ang pagkamainunungon sang iya magulang sa mga prinsipio sang Kasulatan amo ang nagbulig sa iya nga manumbalik.”

¹⁹ Ano ang aton matun-an sa sini? Nga dapat naton batuan ang huyog sang aton di-himpit nga tagipusuon nga magsupak sa laygay sang Biblia. Dapat kita mangin kumbinsido nga ang pamaagi sang Dios sa paglubad sang aton mga problema amo ang labing maayo.

“Ang Pulong sang Dios Buhi”

20. Ano ang duha ka paagi nga maaplikar ang Hebreo 4:12? (Tan-awa ang footnote.)

²⁰ Sang nagsulat si Pablo nga “ang pulong sang Dios buhi,” indi lamang ang nasulat nga Pulong sang Dios, ang Biblia, ang iya ginapatuhuyan. * Ginapakita sang konteksto nga ginapatuhuyan man niya ang saad sang Dios. Ginapadaku ni Pablo nga wala nagasaad ang Dios kag dayon kalimtan ini. Ginkompirmar ini ni Jehova paagi kay propeta Isaias: “Ang akon polong . . . indi magbalik ini sa akon sa wala sing pulus, kondi . . . magauswag ini sa butang nga akon ginpadal-an sini.” (Isa. 55:11) Gani indi kita dapat matak-an kon wala dayon nagakatabo ang luyag naton. Si Jehova ‘padayon nga nagapanghikot’ agod magmadinalag-on ang iya katuyuan.—Juan 5:17.

21. Ngaa makapalig-on sa tigulang na nga mga katapo sang “dakung kadam-an” ang Hebreo 4:12?

²¹ Ang tigulang na kag matutom nga mga katapo sang “dakung kadam-an” padayon gihapon nga nagaalagad kay Jehova sa sulod sang mga tinuig. (Bug. 7:9) Madamo ang wala naghunahuna nga matigulang pa sila sa sining daan nga sistema. Apang, wala magluya ang ila buot. (Sal. 92:14) Narealisar nila nga ang saad sang Dios matuod—buhi ini, kag nagapanghikot si Jehova agod matuman ini. Bangod importante sa Dios ang iya katuyuan, ginapahalipay naton sia kon dumdumon naton ini pirme. Sa sining ikapito nga adlaw, wala sing makapugong kay Jehova sa pagtuman sang iya katuyuan. Kag nakahibalo sia nga ang iya katawhan subong grupo padayon nga magakooperar sa iya katuyuan. Kamusta ikaw? Nakasulod ka na bala sa kapahuwayan sang Dios?

[Mga Nota]

Madumduman Mo Bala?

• Ano ang kinahanglan agod makasulod kita sa kapahuwayan sang Dios subong?

• Ano ang kaangtanan sang aton kahanda nga batunon ang laygay sang Biblia sa katuyuan sang Dios?

• Sa ano nga mga sitwasyon nga mahimo mabudlay tumanon ang mga panuytoy sang Biblia, pero ngaa dapat gid kita magtuman?

• Anong duha ka aplikasyon sang Hebreo 4:12?

[Mga Pamangkot sa Pagtinuon]

[Retrato sa pahina 31]

Daw malupok ang dughan sang mga ginikanan!