Pahibalo Parte sa Ginpasimple nga Edisyon

NALIPAY kami nga ipahibalo sa inyo nga sugod sini nga bulan, ang tulun-an nga edisyon may yara na ginpasimple nga edisyon sa Ingles lamang. Ipagua ini sing dungan sa regular nga edisyon kag tilawan sa sulod sang isa ka tuig. Magaunod ini sing tulun-an nga mga artikulo, kag kon may lugar pa, sing iban pa nga artikulo. Nagalaum kami nga makabulig ini para mapun-an ang espirituwal nga kinahanglanon sang madamo nga Saksi ni Jehova nga nagahambal sing Ingles. Paano?

Sa mga pungsod pareho sang Fiji, Ghana, Kenya, Liberia, Nigeria, Papua New Guinea, kag Solomon Islands, kinaandan na nga Ingles ang ginagamit sang mga kauturan. Bisan pa may kaugalingon sila nga mga lenguahe, ukon dialekto, masami nga Ingles ang ila ginahambal kon nagaistoryahanay, kon nagatambong sa mga miting, kag kon nagabantala. Pero ang ila Ingles mas simple sangsa ginagamit sa aton mga publikasyon. Isa pa, madamo nga kauturan ang nagsaylo sa iban nga pungsod, kag para mag-intiendihanay sila sang mga tawo didto dapat sila mag-Ingles bisan pa nabudlayan sila. Dugang pa, wala sing kongregasyon didto sa ila lenguahe.

Ang mga artikulo nga ginatun-an naton kada semana sa Pagtinuon sa Ang Lalantawan amo ang panguna nga paagi para maamanan kita sing bastante kag suno sa tion nga espirituwal nga pagkaon. Gani, para makabenepisyo sing bug-os ang tanan, ginbalhag ang ginpasimple nga edisyon. Ini nga edisyon nagagamit sang simple kag madali hangpon nga Ingles. Lain man ang panghapin sining bag-o nga edisyon. Pero pareho man sa regular nga edisyon ang kadamuon sang mga subtitulo, parapo, pamangkot, kag mga piktyur sini. Gani, makapili ang mga kauturan kon diin sa duha ang ila gamiton agod makapakigbahin sa pagtinuon. Makita sa ubos ang kinatuhayan sining duha ka edisyon. Halin ini sa parapo 2 sang una nga tulun-an nga artikulo sa sini nga gua.

Nagalaum kami nga ining bag-o nga aman amo ang sabat sa ginapangamuyo sang madamo kay Jehova: “Hatagi ako sing paghangup agud nga makatoon ako sang imo mga sogo.” (Sal. 119:73) Nagapati kami nga sa bulig sang ginpasimple nga edisyon makahanda na sing maayo ang mga nabudlayan sang madalom nga Ingles, subong man ang mga bata, para sa pagtinuon kada semana. Nagapasalamat gid kita kay Jehova nga bangod sa iya ‘gugma sa bug-os nga paghiliutod,’ ginagamit niya ang “matutom kag mainandamon nga ulipon” sa pag-aman sa aton sang bugana nga pagkaon sa espirituwal.—1 Ped. 2:17; Mat. 24:45.

Nagadumala nga Hubon sang mga Saksi ni Jehova