Sundon Mo Bala ang Mahigugmaon nga Panuytoy ni Jehova?
Sundon Mo Bala ang Mahigugmaon nga Panuytoy ni Jehova?
“Ginadumtan ko ang tagsa ka dalanon nga dimatuud.”—SAL. 119:128.
1, 2. (a) Ano nga paandam ang imo pamatian agod makalab-ot ka sa imo kaladtuan, kag ngaa? (b) Sa ano ginapaandaman ni Jehova ang iya mga alagad, kag ngaa?
HANDURAWA nga kinahanglan mo magkadto sa isa ka lugar. Para matultulan ang imo kaladtuan, namangkot ka sa imo masaligan nga abyan. Samtang ginatudluan ka niya sang direksion, mahimo sia magsiling: “Maghalong ka sa sunod nga likuan. Madamo ang nagtalang dira bangod sala ang karatula.” Apresyahon mo bala ang iya kabalaka kag sundon ang iya paandam? Si Jehova kaangay sina nga abyan. Ginahatagan niya kita sing maathag nga direksion kon paano makalab-ot sa aton kaladtuan, ang kabuhi nga wala sing katapusan. Pero nagapaandam man sia sa mga katalagman nga magapatalang sa aton.—Deut. 5:32; Isa. 30:21.
2 Sa sini kag sa masunod nga artikulo, binagbinagon naton ang mga katalagman nga ginapaandam sa aton sang aton Abyan, si Jehova nga Dios. Dumdumon naton nga ginahimo ini ni Jehova bangod sang iya gugma kag kabalaka sa aton. Luyag niya nga makalab-ot kita sa aton kaladtuan. Wala sia nalipay kon ang mga tawo nagasunod sa malain nga dalanon kag nagatalang. (Ezeq. 33:11) Sa sini nga artikulo, binagbinagon naton ang tatlo ka katalagman. Ang una amo ang impluwensia sang iban, ikaduha ang aton kaugalingon, kag ikatlo, ang di-matuod nga mga butang. Hibaluon naton kon ano ini nga mga katalagman kag kon paano kita ginatudluan sang aton langitnon nga Amay nga mapamatukan ini. Ang salmista nagsiling kay Jehova: “Ginadumtan ko ang tagsa ka dalanon nga dimatuud.” (Sal. 119:128) Amo man bala sina ang ginabatyag mo? Tan-awon naton kon paano naton mapabaskog ang aton determinasyon nga mahimo ini.
Indi Magsunod “sa Kadam-an”
3. (a) Ngaa delikado gid nga magsunod sa iban kon indi ka sigurado sang alagyan? (b) Anong importante nga prinsipio ang mabasa naton sa Exodo 23:2?
3 Kon malayo ang imo kadtuan kag indi ka sigurado sang alagyan, ano ang himuon mo? Mahimo maganyat ka nga magsunod na lang sa ginaagyan sang iban, ilabi na gid kon makita mo nga madamo ang nagaagi dira. Delikado gid ini. Basi lain ang ila kaladtuan ukon nagtalang man sila. Parte sa sini, binagbinaga ang prinsipio nga ginbasihan sang isa ka sugo nga ginhatag sa Israel. Ang mga hukom kag mga saksi sa kaso ginpaandaman tuhoy sa katalagman sang ‘pagsunod sa kadam-an.’ (Basaha ang Exodo 23:2.) Mahapos lang sa di-himpit nga mga tawo nga magsunod sa kadam-an kag patikuon ang katarungan. Pero, ang prinsipio bala tuhoy sa pagsunod sa kadam-an naaplikar lamang sa hudisyal nga mga kaso? Indi.
4, 5. Paano gin-ipit sanday Josue kag Caleb nga magsunod sa kadam-an, kag ano ang nakabulig sa ila nga mapamatukan ini?
4 Pirme kita ginaipit nga “magsonod sa kadam-an.” Kon kaisa, wala naton ini ginapaabot kag mabudlay gid pamatukan. Binagbinaga ang pag-ipit kanday Josue kag Caleb. Upod sila sa 12 ka espiya nga ginpadala sa Ginsaad nga Duta. Pagpauli nila, ang napulo may tuman ka negatibo kag makapahadlok nga report. Nagsiling pa sila nga ang pila ka pumuluyo didto mga kaliwat sang Nefilim. (Gen. 6:4) Indi ini mapatihan kay yadtong mga higante nalaglag tanan sa Anaw ginatos na ka tuig ang nagligad. Apang bisan ang wala sing basihan nga report may epekto sa mga maluya sing pagtuo. Ang report sang napulo ka espiya nagpahadlok sa mga tawo. Gani, ang kalabanan sa ila nagpati nga sayop ang pagsunod sa sugo ni Jehova nga magsulod sa Ginsaad nga Duta. Ano ang himuon nanday Josue kag Caleb sa sining mabudlay nga kahimtangan?—Num. 13:25-33.
5 Wala sila nagsunod sa kadam-an. Ginsugid nila ang matuod bisan pa naakig ang mga tawo kag ginpahog sila nga batuhon tubtob mapatay. Ngaa may kaisog sila? Pat-od gid nga bangod ini sa ila pagtuo. Maathag nga makita sang mga may pagtuo ang kinatuhayan sang wala sing basihan nga report kag sang masaligan nga mga saad ni Jehova nga Dios. Sang ulihi, ginpabutyag nanday Josue kag Caleb ang ila nabatyagan sa katumanan sang tanan nga saad ni Jehova. (Basaha ang Josue 14:6, 8; 23:2, 14.) Suod gid sanday Josue kag Caleb sa ila matutom nga Dios, kag indi nila gusto nga maglain ang iya buot paagi sa pagsunod sa wala sing pagtuo nga mga tawo. Wala sila nagsunod sa kadam-an, kag maayo gid sila nga halimbawa sa aton.—Num. 14:1-10.
6. Sa ano nga mga paagi mahimo kita magsunod sa kadam-an?
6 Ginaipit ka man bala nga magsunod sa kadam-an? Sa karon, madamo nga tawo ang napahilayo kay Jehova kag wala nagasunod sa iya mga talaksan sa moral. Masami nga nagapinagusto lang sila kon parte sa mga kalingawan kag pagliwaliwa. Suno sa ila, wala sing malain sa imoralidad, kapintas, kag espiritismo nga lapnag sa mga programa sa TV, pelikula, kag mga video game. (2 Tim. 3:1-5) Kon parte sa pagpili sing kalingawan kag pagliwaliwa para sa imo kag sa imo pamilya, nagapaimpluwensia ka bala sa iban? Kon amo ka sina, indi bala nga ginasunod mo ang kadam-an?
7, 8. (a) Paano mahanas ang aton “ikasarang sa paghantop,” kag ngaa mas maayo nga hanason ini sangsa magsunod lang sa listahan sang mga kasuguan? (b) Ngaa ang halimbawa sang Cristianong mga pamatan-on nakapalig-on sa imo?
7 May hamili nga regalo si Jehova nga makabulig sa aton sa pagdesisyon—ang aton “ikasarang sa paghantop.” Pero, ini nga ikasarang dapat hanason “paagi sa paggamit” sini. (Heb. 5:14) Indi gid mahanas ang aton ikasarang sa paghantop kon magsunod lang kita sa kadam-an, kag indi man mahanas ang aton konsiensia kon magsunod lang kita sa listahan sang mga kasuguan. Gani, ang mga alagad ni Jehova wala sing listahan sang mga pelikula, libro, ukon mga site sa Internet nga dapat likawan. Kay man, madasig nga nagabag-o ang kalibutan, kag kon amo sina, dapat nga islan pirme ang listahan. (1 Cor. 7:31) Labaw sa tanan, makaupang ini sa aton nga gamiton ang aton ikasarang sa paghantop kag magdesisyon base sa mga prinsipio sa Biblia.—Efe. 5:10.
8 Kon kaisa, mahimo nga indi manamian sa aton ang iban bangod sang aton base sa Biblia nga mga desisyon. Ang mga pamatan-on nga nagaeskwela mahimo ginaipit nga ilugon ang ginatan-aw kag ginahimo sang kalabanan. (1 Ped. 4:4) Gani, makapalig-on makita ang Cristianong mga pamatan-on kag mga may edad na nga nagailog sang pagtuo nanday Josue kag Caleb, nga wala magsunod sa kadam-an.
Indi Magsunod sa “Inyo mga Tagiposoon kag sa Inyo mga Mata”
9. (a) Kon nagalakbay, ngaa makatalagam nga sundon lang kon ano ang sa pamatyag naton nga eksakto? (b) Ngaa importante sa mga Israelinhon ang sugo sa Numeros 15:37-39?
9 Ang ikaduha nga katalagman nga aton binagbinagon yara mismo sa aton. Ibutang ta nga nagalakbay ka pakadto sa isa ka lugar. Ano ayhan ang matabo kon indi mo paggamiton ang mapa kag sundon lang kon ano ang sa pamatyag mo nga eksakto, ayhan nagaliko sa tagsa ka dalan nga manamian mo? Indi ka gid makalab-ot sa imo kaladtuan. Tuhoy sini, binagbinaga ang isa pa ka sugo ni Jehova sa Israel. Mahimo nga madamo sa karon ang indi makaintiende sang sugo sadto nga butangan ang plekos sa tagsa ka sidsid sing lubid nga asul. (Basaha ang Numeros 15:37-39.) Nahangpan mo bala ang importansia sini? Ang pagtuman sa sini nagbulig sa mga Israelinhon nga mangin tuhay sa pagano nga mga pungsod sa ila palibot. Importante gid ini para padayon sila nga kahamut-an ni Jehova. (Lev. 18:24, 25) Pero, ginapakita man sini nga sugo ang katalagman nga mahimo mag-upang sa aton nga makalab-ot sa aton kaladtuan, ang kabuhi nga wala sing katapusan. Paano?
10. Daw ano ka kilala ni Jehova ang pagkahuman sang tawo?
10 Talupangda ang rason ni Jehova sa paghatag sini nga sugo: “Indi kamo magsonod sono sa inyo mga tagiposoon kag sa inyo mga mata, nga ginpakihilawasan ninyo anay.” Kilala gid ni Jehova ang pagkahuman sang tawo. Nakahibalo gid sia nga madali lang masulay ang aton tagipusuon paagi sa aton mga mata. Ginpaandaman kita sang Biblia: “Ang tagiposoon malimbongon labaw sa tanan nga butang, kag lakas gid kadunut; sin-o bala ang makahibalo sini?” (Jer. 17:9) Nahangpan mo na bala kon ngaa ginpaandaman ni Jehova ang mga Israelinhon? Nakahibalo gid sia nga may posibilidad nga magtan-aw sila sa mga pagano sa palibot nila kag maganyat sa ila makita. Mahimo sila masulay nga ilugon ang panghunahuna, balatyagon, kag paggawi sang mga di-tumuluo.—Hulu. 13:20.
11. Paano kita masulay sang aton mga igbalatyag?
11 Sa karon, mas madali maganyat ang aton malimbungon nga tagipusuon paagi sa aton mga igbalatyag. Nagakabuhi kita sa kalibutan nga may huyog nga pagustuhan ang handum sang unod. Gani, paano naton maaplikar ang prinsipio sa Numeros 15:39? Binagbinaga ini: Naimpluwensiahan ka bala sang pamayo sang imo mga klasmeyt, katrabaho, ukon mga kaingod, nga samtang nagadugay labi nga nagaseksi? Mahimo ka bala masulay nga ‘sundon ang imo tagipusuon kag ang imo mga mata’? Maganyat ka bala nga panubuon ang imo talaksan paagi sa pag-ilog sang ila pamayo kag magpaseksi man?—Roma 12:1, 2.
12, 13. (a) Ano ang himuon naton kon daw masulay kita nga magpasiplat sa mga butang nga indi dapat tulukon? (b) Ano ang magapahulag sa aton nga likawan nga mangin pagsulay sa iban?
12 Dapat gid naton palambuon ang pagpugong sa kaugalingon. Kon ang aton mata daw masulay nga magpasiplat sa mga butang nga indi dapat tulukon, dumdumon naton ang pamat-od sang matutom nga si Job. Nagpakigkatipan sia sa iya mga mata nga indi magkaibog sa babayi nga indi niya asawa. (Job 31:1) Sing kaanggid, si David nagsiling: “Wala ako nagatulok sa butang nga walay pulos.” (Sal. 101:3, NW) Ang bisan ano nga makahalit sang aton konsiensia kag kaangtanan kay Jehova, kabigon naton nga “butang nga walay pulos.” Lakip sa sini ang mga butang nga makagalanyat sa aton mga mata kag makasulay sa aton tagipusuon sa paghimo sang sala.
13 Sa pihak nga bahin, indi naton luyag nga kita ang mangin “butang nga walay pulos” sa iban paagi sa pagsulay sa ila nga maghimo sang sala. Gani, ginatuman gid naton ang laygay sang Biblia nga magpamayo sing mahipid kag maugdang. (1 Tim. 2:9) Ang kaugdang wala nabase sa kon ano lang ang aton gusto. Dapat man naton dumdumon ang konsiensia kag kaayuhan sang iban. (Roma 15:1, 2) Sa mga Cristianong kongregasyon, linibo ka pamatan-on ang maayo gid nga halimbawa sa sini. Nalipay gid kita nga wala nila ‘ginasunod ang ila tagipusuon kag ang ila mga mata.’ Sa baylo, ginapahamut-an nila si Jehova sa tanan nila nga ginahimo, bisan sa ila pagpamayo.
Indi Magsunod sa “mga Kadayawan”
14. Ano ang ginpaandam ni Samuel tuhoy sa pagsunod sa “mga kadayawan”?
14 Ibutang ta nga nagalakbay ka sa malapad nga desyerto kag namatamata ka nga may tubig sa unhan. Ano ang matabo kon maglisa ka sa dalan kag kadtuan mo ini? Mabutang sa katalagman ang imo kabuhi! Nahibaluan gid ina ni Jehova. Binagbinaga ang halimbawa sang mga Israelinhon. Gusto nila nga may tawhanon man sila nga hari pareho sang mga pungsod sa palibot nila. Ini nga handum mabug-at gid nga sala bangod katumbas ini sa pagsikway kay Jehova subong ila Hari. Bisan pa gintugutan ni Jehova ang ila luyag, ginpaandaman niya sila paagi kay Samuel tuhoy sa katalagman sang pagsunod sa “mga kadayawan” ukon wala sing pulos nga mga butang.—Basaha ang 1 Samuel 12:21.
15. Paano ginsunod sang mga Israelinhon ang mga kadayawan?
15 Ginahunahuna bala sang mga Israelinhon nga mas masaligan nila ang tawhanon nga hari sangsa kay Jehova? Kon amo, nagasunod sila sa kadayawan! Kag mahimo nga sundon man nila ang iban pa nga ilusyon nga ginatanyag ni Satanas. Mahimo sila pasimbahon sang ila hari sa mga diosdios. Nagsala gid ang mga nagasimba sa idolo sa paghunahuna nga ang makita nga mga butang kaangay sang mga diosdios nga human sa kahoy ukon bato, mas matuod kag masaligan sangsa di-makita nga Dios, si Jehova, nga nagtuga sang tanan nga butang. Pero suno kay Pablo, ini nga mga idolo “wala sing kabilinggan.” (1 Cor. 8:4) Indi sila makakita, makabati, makahambal, ukon makahulag. Makita mo sila kag matandog, pero kon simbahon mo sila, nagasunod ikaw sa kadayawan—sa ilusyon nga magadul-ong sa imo sa kalaglagan.—Sal. 115:4-8.
16. (a) Paano ginakumbinsi ni Satanas ang mga tawo nga magsunod sa mga kadayawan? (b) Ngaa makasiling kita nga kadayawan ang materyal nga mga butang, ilabi na kon ikumparar kay Jehova nga Dios?
16 Eksperto gid si Satanas sa pagkumbinsi sa mga tawo nga sundon ang mga kadayawan. Halimbawa, nasulay niya ang madamo nga maghunahuna nga ang materyal nga mga butang makahatag sing proteksion. Daw bentaha gid kon ang isa may kuarta, pagkabutang, kag daku nga sueldo. Pero ano gid bala ang mabulig sini kon may balatian kita, kon malusod ang ekonomiya, kag kon may kalamidad? Ano ang mahimo sini kon ang mga tawo nagabatyag nga wala sila sing pulos ukon nagapangita sang katuyuan ukon sabat sa ila mga pamangkot tuhoy sa kabuhi? Makaluwas bala ini sa ila sa kamatayon? Mapaslawan lang kita kon paabuton naton nga mahatag sang materyal nga mga butang ang aton espirituwal nga kinahanglanon. Indi kita makasalig sa materyal nga mga butang kay indi ini makaamlig sa aton. Indi ini makapalawig sang kabuhi ukon makapugong sang balatian kag kamatayon. (Hulu. 23:4, 5) Pero ang aton Dios nga si Jehova matuod gid! Ang mabakod nga kaangtanan sa iya amo lamang ang makaamlig sa aton. Hamili gid ini nga pagpakamaayo! Kabay nga indi naton sia pagsikwayon paagi sa pagsunod sa mga kadayawan.
17. Ano ang imo determinasyon parte sa mga katalagman nga aton ginbinagbinag?
17 Indi bala pagpakamaayo gid nga si Jehova aton Abyan kag Giya sa aton kabuhi? Kon padayon naton nga pamatian ang iya mahigugmaon nga paandam batok sa tatlo ka katalagman—ang kadam-an, ang aton tagipusuon, kag ang mga kadayawan—makalab-ot gid kita sa aton kaladtuan nga kabuhi nga wala sing katapusan. Sa masunod nga artikulo, binagbinagon naton ang tatlo pa ka paandam ni Jehova nga makabulig sa aton nga dumtan kag likawan ang sayop nga dalanon nga nagpatalang sa madamo.—Sal. 119:128.
Ipaathag
Paano mo maaplikar ang mga prinsipio sa masunod nga mga teksto?
[Mga Pamangkot sa Pagtinuon]
[Retrato sa pahina 11]
Nasulay ka man bala nga magsunod sa kadam-an?
[Retrato sa pahina 13]
Ngaa makatalagam nga sundon ang imo tagipusuon kag ang imo mga mata?
[Retrato sa pahina 14]
Nagasunod ka bala sa mga kadayawan?
