Ginpaabot Nila ang Mesias

“Ang mga tawo sadto may ginapaabot kag ang tanan nagpalibog kon si Juan ayhan ang Mesiyas.” —LUC. 3:15, BIBLIA SANG KATILINGBAN SANG MGA KRISTIANO, BKK.

1. Ano ang ginpahayag sang anghel sa mga manugbantay?

GAB-I na. Ang mga manugbantay sang karnero yara sa wayang nga nagabantay sang ila panong. Nakibot sila sang hinali lang ang anghel ni Jehova nagtindog malapit sa ila kag ang himaya sang Dios nagsilak sa palibot nila! Pamati! Ang anghel nagsiling: “Indi kamo magkahadlok, kay, yari karon! ginapahayag ko sa inyo ang maayong balita tuhoy sa daku nga kalipay nga maagom sang tanan nga tawo, bangod natawo sa inyo karon ang isa ka Manluluwas, nga amo ang Cristo nga Ginuo,” ang Mesias. Masapwan sang mga manugbantay ining lapsag sa isa ka pasungan sa malapit nga banwa. Sing hinali, “isa ka kadam-an sang langitnon nga guban” ang nagdayaw kay Jehova, nga nagasiling: “Himaya sa Dios sa kahitaasan, kag sa duta paghidait sa mga tawo nga iya nahamut-an.”—Luc. 2:8-14.

2. Ano ang buot silingon sang “Mesias,” kag paano sia makilala?

² Siempre, nahibaluan sang Judiyo nga mga manugbantay sang karnero nga ang “Mesias,” ukon “Cristo,” nagapatuhoy sa “Isa nga Hinaplas” sang Dios. (Ex. 29:5-7) Pero paano madugangan ang ila ihibalo kag paano nila makumbinsi ang iban nga ang lapsag nga ginsiling sang anghel amo ang gintangdo ni Jehova nga Mesias? Paagi sa pag-usisa sang mga tagna sa Hebreong Kasulatan kag pagkumparar sini sa mangin hilikuton kag pagkabuhi sini nga lapsag.

Ngaa Nagapaabot ang mga Tawo?

3, 4. Paano naton hangpon ang Daniel 9:24, 25?

³ Sang nakilala sang mga tawo si Juan nga Manugbawtismo, nagpalibog sila kon bala sia na  ang Mesias nga nag-abot bangod sang iya mga pinamulong kag buhat. (Basaha ang Lucas 3:15.) Posible nga may pila nga nakahangop sing sibu parte sa tagna sa Mesias nga “kapitoan ka semana.” Kon amo, mahimo nga nakalkular nila kon san-o maabot ang Mesias. Ang tagna nagasiling: “Kutub sa paggowa sang sogo sa pagpahauli kag pagpatindug sang Jerusalem tubtub sa pagkari sang hinaplas, ang principe, mangin pito ka semana. Niyan sa kan-uman kag duha ka semana.” (Dan. 9:24, 25) Madamo nga iskolar ang nagaugyon nga semana ini sang mga tuig. Halimbawa, ang Revised Standard Version nagasiling: “Ini nga sugo kapituan ka semana sang mga tuig.”

⁴ Sa karon, nahibaluan sang mga alagad ni Jehova nga ang 69 ka semana, ukon 483 ka tuig, sa Daniel 9:25 nagsugod sang 455 B.C.E. sang si Hari Artajerjes sang Persia nagpahanugot kay Nehemias nga kay-uhon ang Jerusalem. (Neh. 2:1-8) Ining mga semana natapos pagligad sang 483 ka tuig, sang 29 C.E., sang ginbawtismuhan si Jesus nga Nazaretnon kag ginhaplasan sang balaan nga espiritu, sa amo nangin Mesias.—Mat. 3:13-17. *

5. Ano nga mga tagna ang aton binagbinagon?

⁵ Binagbinagon naton ang pila ka tagna parte sa Mesias nga natuman kay Jesus sang natawo sia, sang bata sia, kag sang nagministeryo sia. Makapabakod gid ini sang aton pagtuo sa tagna sang Dios. Magahatag man ini sing maathag nga pamatuod nga si Jesus gid man ang madugay na ginapaabot nga Mesias.

Mga Tagna Parte sa Iya Pagkatawo

6. Ipaathag kon paano natuman ang Genesis 49:10.

⁶ Ang Mesias matawo sa tribo ni Juda. Sang ginpakamaayo sang nagatagumatayon nga patriarka nga si Jacob ang iya mga anak, nagtagna sia: “Ang cetro indi mahamulag kay Juda, ukon ang sungkud sang manuggahum gikan sa tunga sang iya mga tiil, tubtub nga mag-abut ang [Shilo]; kag ang pagkamasinolondon sang mga katawohan manginsa iya.” (Gen. 49:10) Madamo nga Judiyong iskolar sadto ang nagapati nga ang ginapatuhuyan sini amo ang Mesias. Sugod kay Hari David sang Juda, ang setro (paggahom) kag ang sungkod sang manuggahom (pagmando) nagpabilin sa tribo sang Juda. Ang “Shilo” nagakahulugan sing “Sia nga Tag-iya Sini; Sia nga Nagapanag-iya Sini.” Ang linya sang mga hari sa Juda matapos sa “Shilo” subong ang permanente nga Manunubli sang pagkahari. Ang Dios nagsiling sa katapusan nga hari sang Juda nga si Sedequias, nga ini nga paggahom ihatag sa isa nga may legal nga kinamatarong sa sini. (Ezeq. 21:26, 27) Pagkatapos ni Sedequias, si Jesus amo lamang ang kaliwat ni David nga ginsaaran sang pagkahari. Antes sia matawo, ang anghel nga si Gabriel nagsiling kay Maria: “Ihatag sa iya ni Jehova nga Dios ang trono ni David nga iya amay, kag magahari sia sa panimalay ni Jacob sing dayon, kag ang iya Ginharian wala sing katapusan.” (Luc. 1:32, 33) Ang Shilo amo si Jesucristo, nga kaliwat ni Juda kag ni David.—Mat. 1:1-3, 6; Luc. 3:23, 31-34.

7. Diin natawo ang Mesias, kag ngaa importante ini?

⁷ Ang Mesias matawo sa Betlehem. Si Miqueas nagsiling: “Ikaw, Bet-lehem Efrata, nga diotay nga magpatunga sa mga linibo sang Juda, gikan sa imo magagowa sa akon ang isa nga manginmanugdumala sa Israel, nga ang iya mga gingikanan kutub pa sa dumaan, sa wala sing katapusan.” (Miq. 5:2) Ang Mesias matawo sa banwa sang Betlehem sang Juda, nga gintawag sadto nga Efrata. Bisan pa sanday Jose kag Maria taga-Nazaret, nagkadto sila sa Betlehem bangod sa sugo sang Roma nga magparehistro. Gani didto natawo si Jesus sang 2 B.C.E. (Mat. 2:1, 5, 6) Natuman gid ang tagna!

8, 9. Ano ang gintagna parte sa pagkatawo sang Mesias kag sa mga hitabo pagkatapos sini?

 ⁸ Ang Mesias matawo sa isa ka ulay. (Basaha ang Isaias 7:14.) Ang Hebreo nga tinaga (ʽal·mahʹ) nga gingamit diri para sa “ulay” ginabadbad man nga “dalaga.” Apang gintuytuyan sang Dios si Mateo nga gamiton ang Griegong tinaga para sa “ulay” (par·theʹnos) agod ipakita nga natuman ang Isaias 7:14 sang matawo si Jesus. Ang mga manunulat sang Ebanghelyo nga sanday Mateo kag Lucas nagsiling nga ulay si Maria sang manamkon sia paagi sa espiritu sang Dios.—Mat. 1:18-25; Luc. 1:26-35.

⁹ Pamatyon ang mga bata pagkatawo sang Mesias. Pila ka siglo antes sini, may natabo na nga pagpamatay sang mga bata sang nagmando ang Paraon sang Egipto nga ihaboy ang Hebreong lapsag nga mga lalaki sa Suba Nilo. (Ex. 1:22) Apang ang talalupangdon amo ang Jeremias 31:15, 16, diin nagahibi si Raquel sa iya mga anak nga lalaki nga gindala sa “duta sang kaaway.” Ang iya panalambiton mabatian asta sa malayo nga Rama, ang sakop sang Benjamin sa aminhan sang Jerusalem. Ginpakita ni Mateo nga natuman ang tagna ni Jeremias sang nagmando si Hari Herodes nga pamatyon ang tanan nga bata nga lalaki sa Betlehem kag sa palibot sini. (Basaha ang Mateo 2:16-18.) Grabe gid ang kasubo sa sina nga duog!

10. Ipaathag kon paano natuman kay Jesus ang Oseas 11:1.

¹⁰ Pareho sang mga Israelinhon, ang Mesias tawgon gikan sa Egipto. (Os. 11:1) Antes sang mando ni Herodes nga pagpamatay, ginsugo sang anghel sanday Jose, Maria, kag Jesus nga magpa-Egipto. Nagpabilin sila didto “tubtob napatay si Herodes, agod matuman ang pinamulong ni Jehova paagi sa iya manalagna, nga nagasiling: ‘Gikan sa Egipto gintawag ko ang akon anak.’” (Mat. 2:13-15) Sa pagkamatuod, indi kontrolado ni Jesus ang mga hitabo sang natawo sia kag sang bata pa sia.

Ang Pagpanghikot sang Mesias!

11. Paano ginhanda ang dalan para sa Isa nga Hinaplas ni Jehova?

¹¹ Ihanda ang dalan para sa Isa nga Hinaplas sang Dios. Si Malaquias nagtagna nga ihanda ni “Elias nga manalagna” ang tagipusuon sang mga tawo para sa manug-abot nga Mesias. (Basaha ang Malaquias 4:5, 6.) Ginpakilala mismo ni Jesus nga ining “Elias” amo si Juan nga Manugbawtismo. (Mat. 11:12-14) Suno kay Marcos ang ministeryo ni Juan katumanan sang mga tagna ni Isaias. (Isa. 40:3; Mar. 1:1-4) Wala gindiktahan ni Jesus si Juan nga himuon ang tulad-Elias nga buluhaton bilang paghanda para sa Iya. Ang hilikuton sang gintagna nga “Elias” natuman suno sa kabubut-on sang Dios nga paagi sa sini makilala ang Mesias.

12. Ano nga hilikuton ang makabulig agod makilala ang Mesias?

¹² Ang hatag-Dios nga hilikuton nagbulig nga makilala ang Mesias. Sa sinagoga sang Nazaret, sa banwa nga gindak-an ni Jesus, ginbasa niya ang linukot ni Isaias kag gin-aplikar ini sa iya kaugalingon: “Ang espiritu ni Jehova yari sa akon, bangod ginhaplas niya ako sa pagpahayag sing maayong balita sa mga imol, ginpadala niya ako sa pagbantala sing kahilwayan sa mga bihag kag pagpasag-uli sing panan-aw sa mga bulag, sa paghilway sa mga ginapigos, sa pagbantala sing tuig nga nahamut-an ni Jehova.” Bangod sia ang Mesias, si Jesus makasiling gid: “Karon ining kasulatan nga bag-o lang ninyo nabatian natuman.”—Luc. 4:16-21.

13. Paano gintagna ang pagministeryo ni Jesus sa Galilea?

¹³ Gintagna ang pagministeryo sang Mesias sa Galilea. Tuhoy sa “duta sang [Zebulon] kag ang duta sang [Neptali] . . . Galilea sang mga pungsud,” si Isaias nagsulat: “Ang katawohan nga naglakat sa kadudulman nakakita sing daku nga kapawa; ang mga nagpuyo sa duta sang landong sang kamatayon, ang kapawa nagsilak sa ila.” (Isa. 9:1, 2) Ginsuguran ni  Jesus ang iya ministeryo sa banwa sang Capernaum sa Galilea. Madamo nga pumuluyo sang Zebulon kag Neptali ang gintudluan niya sang espirituwal nga kapawa. (Mat. 4:12-16) Sa Galilea ginhatag ni Jesus ang Sermon sa Bukid, ginpili ang mga apostoles, ginhimo ang iya una nga milagro, kag nagpakita sa mga 500 ka disipulo pagkatapos sia mabanhaw. (Mat. 5:1–7:27; 28:16-20; Mar. 3:13, 14; Juan 2:8-11; 1 Cor. 15:6) Gani natuman niya ang tagna ni Isaias paagi sa pagbantala sa ‘duta sang Zebulon kag Neptali.’ Siempre nagbantala man si Jesus sa iban nga bahin sang Israel.

Gintagna ang Iban Pa nga Hilikuton sang Mesias

14. Paano natuman ni Jesus ang Salmo 78:2?

¹⁴ Ang Mesias magahambal sang mga parabola, ukon mga ilustrasyon. Si salmista Asaf nag-amba: “Magabungat ako sa akon baba sa paanggid.” (Sal. 78:2) Paano naton nahibaluan nga ining tagna naaplikar kay Jesus? Si Mateo ang nagsugid sa aton. Pagkatapos masugid ang mga ilustrasyon diin ginpaanggid ni Jesus ang Ginharian sa nagatubo nga lamigas sang mustasa kag sa lebadura, sia nagsiling: “Kon wala sing ilustrasyon indi [si Jesus] maghambal sa ila; agod matuman ang pinamulong paagi sa manalagna nga nagsiling: ‘Itikab ko ang akon baba agod maghambal sang mga ilustrasyon, ipahayag ko ang mga butang nga natago kutob sa pagtukod sa kalibutan.’” (Mat. 13:31-35) Lakip sa epektibo nga pamaagi ni Jesus sa pagtudlo amo ang paggamit sang ilustrasyon ukon parabola.

15. Paano natuman ang Isaias 53:4?

¹⁵ Pas-anon sang Mesias ang aton mga kasablagan. Si Isaias nagtagna: “Sa pagkamatuud ginpas-an niya ang aton mga kalisud kag gindala ang aton mga kasubo.” (Isa. 53:4) Suno kay Mateo, pagkatapos maayo ang ugangan ni Pedro, gin-ayo man ni Jesus ang iban “agod matuman ang pinamulong paagi kay Isaias nga manalagna, nga nagasiling: ‘Sia mismo ang nagkuha sang aton mga masakit kag nagdala sang aton mga balatian.’” (Mat. 8:14-17) Kag indi lang ini ang higayon nga nagpang-ayo si Jesus.

16. Paano ginpakita ni apostol Juan nga natuman ni Jesus ang Isaias 53:1?

¹⁶ Madamo ang indi magpati sa Mesias bisan pa sang iya maayo nga mga binuhatan. (Basaha ang Isaias 53:1.) Agod ipakita nga natuman ining tagna, si apostol Juan nagsulat: “Bisan pa nakahimo [si Jesus] sang madamo gid nga tanda sa atubangan nila, wala sila magtuo sa iya, agod matuman ang pulong nga ginsiling ni Isaias nga manalagna: ‘Jehova, sin-o ang nagtuo sa butang nga amon nabatian? Kag kon tuhoy sa butkon ni Jehova, kay sin-o ini ginpahayag?’” (Juan 12:37, 38) Diutay man ang nagtuo sa maayong balita tuhoy kay Jesus, ang Mesias, sang magbantala si apostol Pablo.—Roma 10:16, 17.

17. Paano natuman ang Salmo 69:4?

¹⁷ Ang Mesias pagadumtan nga wala sing kabangdanan. (Sal. 69:4) Si Jesus nagsiling: “Kon wala ko paghimua sa tunga [sang katawhan] ang mga buhat nga wala sing iban nga nakahimo, wala sila kuntani sing sala; apang karon nakita nila ini kag gindumtan nila ako subong man ang akon Amay. Apang amo sini agod ang pulong nga nasulat sa ila Kasuguan matuman, ‘Gindumtan nila ako nga wala sing kabangdanan.’” (Juan 15:24, 25) Ang “Kasuguan” nagapatuhoy sa tanan nga Kasulatan nga nagaluntad sadto. (Juan 10:34; 12:34) Ang tulun-an sang Ebanghelyo nagapamatuod nga si Jesus gindumtan ilabi na sang Judiyong relihiosong mga lider. Dugang pa, si Cristo nagsiling: “Ang kalibutan wala sing rason agod dumtan kamo, apang nagadumot ini sa akon, bangod nagapanaksi ako tuhoy sini nga ang mga buhat sini malaut.”—Juan 7:7.

18. Ano pa ang aton usisaon agod mangin kumbinsido pa gid kita nga si Jesus amo ang Mesias?

¹⁸ Ang mga sumulunod ni Jesus sang unang siglo kumbinsido gid nga sia ang Mesias, kay natuman sa iya ang mga tagna parte sa Mesias  sa Hebreong Kasulatan. (Mat. 16:16) Natun-an naton nga ang pila sini natuman sang bata pa si Jesus nga Nazaretnon kag ang iban sa tion sang iya ministeryo. Sa masunod nga artikulo, usisaon naman naton ang dugang nga tagna parte sa Mesias. Kon pamalandungan naton ini, labi kita nga mangin kumbinsido nga si Jesucristo amo ang Mesias nga gintangdo sang aton langitnon nga Amay, si Jehova.

[Nota]

Ano ang Imo Sabat?

• Ano nga mga tagna ang natuman parte sa pagkatawo ni Jesus?

• Paano ginhanda ang dalan para sa Mesias?

• Ano nga mga tagna sa Isaias kapitulo 53 ang natuman kay Jesus?

[Mga Pamangkot sa Pagtinuon]