Madumduman Mo Bala?

Nabasa mo bala sing maayo ang ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Ano ang tatlo ka butang nga makabulig sa aton nga mangin bunayag?

Ini ang: (1) Pagpalambo sing kahadlok sa Dios. (1 Ped. 3:12) (2) Pagpalambo sang nahanas sa Biblia nga konsiensia. (3) Pagtinguha nga mangin kontento.—4/15, pahina 6-7.

• Paano naton mahibaluan nga ang pag-alagad sa Dios upod ang pagkaserioso wala nagakahulugan nga mangin tuman ka estrikto ukon indi na puede magrelaks?

Binagbinaga ang halimbawa ni Jesus. Nalipay sia nga magkaon upod sa iban. Natun-an naton nga indi sia tuman ka estrikto ukon tuman ka serioso. Kay kon amo sia sina, mahimo nga ginpalayuan sia sang mga tawo. Apang, bisan pa ang mga bata wala natahap sa iya.—4/15, pahina 10.

• Ano ang himuon sang mag-asawa kon daw nagaluya na ang ila relasyon bangod may kabataan na sila?

Pabakuron nila ang ila gugma sa isa kag isa. Dapat ihambal sang bana sa iya asawa nga palangga niya sia kag ipakita niya ini. Ipabatyag niya sa iya nga tampad sia. Dapat nga nagaistoryahanay sila sing maayo parte sa ila mga balatyagon kag pisikal nga mga kinahanglanon.—5/1, pahina 12-13.

• Ano ang ginailustrar paagi sa kahoy nga olibo sa Roma kapitulo 11?

Ang kahoy nga olibo may kahilabtanan sa ikaduha nga bahin sang binhi ni Abraham, ang espirituwal nga Israel. Ang gamot sang simbuliko nga olibo nagarepresentar kay Jehova kag ang puno nagarepresentar kay Jesus. Sang ginsikway sang kalabanan nga Judiyo si Jesus, ang mga tumuluo nga Gentil ginsumpay, amo nga nakompleto ang ikaduha nga bahin sang binhi ni Abraham.—5/15, pahina 22-25.

• Ano ang maayong balita nga mapahayag naton sa mga imol?

Amo ini ang maayong balita: Ginhimo sang Dios si Jesus nga Hari. Sia ang Manuggahom nga makadula sang kaimulon. Ngaa? Bangod gamhan niya ang tanan nga tawo kag may gahom sia sa paghimo sini; maluluy-on sia sa mga imol; kag masarangan niya dulaon ang kabangdanan sang kaimulon, ang aton maiyaiyahon nga huyog.—6/1, pahina 7.

• Ano ang buot silingon sang sabat ni Jesus kay Caifas: “Ikaw mismo ang nagsiling sini”?—Mat. 26:63, 64.

Ang ekspresyon nga “ikaw mismo ang nagsiling sini” masami nga ginahambal sang mga Judiyo bilang pag-ugyon sa ginasiling sang isa. Ginpamangkot ni Caifas, nga mataas nga saserdote, kon bala si Jesus amo ang Cristo, ang Anak sang Dios. Ang sabat ni Jesus nga “ikaw mismo ang nagsiling sini” nagapakita nga ugyon sia.—6/1, pahina 18.

• Mahimo bala nga mangin bahin sang gawad ang posible nga mangin kaliwatan sang himpit nga si Jesus?

Indi. Bisan pa si Jesus puede mangin amay sang binilyon ka himpit nga kaliwatan, indi puede nga mangin bahin sila sang gawad. Ang himpit nga kabuhi ni Jesus amo lamang ang katumbas sang kay Adan. (1 Tim. 2:6)—6/15, pahina 13.

• Paano mapakita sang mga Cristiano nga ginasunod nila ang paandam parte sa butig nga mga manunudlo sa Binuhatan 20:29, 30?

Wala nila sila ginabaton sa ila puluy-an ukon ginabugno. (Roma 16:17; 2 Juan 9-11) Wala man nila ginabasa ang mga literatura sang mga apostata, ginatan-aw ang ila mga programa sa TV, kag mga Web site nga may mga panudlo nila.—7/15, pahina 15-16.

• Sin-o ang dapat magtudlo sa mga kabataan parte sa Dios?

Suno sa Biblia, ang amay kag iloy dapat magbuligay sa pagtudlo sang ila kabataan. (Hulu. 1:8; Efe. 6:4) Natukiban sang mga researcher nga mas maayo ang epekto sa kabataan kon ang duha mismo ka ginikanan ang magtudlo sa ila.—8/1, pahina 6-7.