Mga Pamangkot Gikan sa mga Bumalasa

Posible bala mahibaluan kon pila gid tanan ang tagna parte sa Mesias sa Hebreong Kasulatan?

Paagi sa maid-id nga pagtuon sa Hebreong Kasulatan makita naton ang mga tagna nga natuman kay Jesucristo. Ginasugid sini nga mga tagna ang ginhalinan sang Mesias, ang tion nga magaabot sia, ang iya himuon, ang pagtratar sa iya, kag ang iya papel sa kahimusan ni Jehova. Ini nga mga detalye makabulig sa aton nga makilala si Jesus subong ang Mesias. Pero, dapat kita maghalong kon gusto naton isipon kon pila gid ang tagna parte sa Mesias sa Hebreong Kasulatan.

Lainlain ang pagtamod sang kada isa kon ano ang tagna parte sa Mesias kag kon ano ang indi. Ang libro ni Alfred Edersheim nga The Life and Times of Jesus the Messiah, nagsiling nga suno sa rabiniko nga mga sinulatan sadto, may 456 ka teksto sa Hebreong Kasulatan parte sa Mesias bisan pa indi tanan direkta nga nagasambit sa iya. Ang maid-id nga pag-usisa sining 456 ka teksto nagapautwas sang mga pamangkot kon bala ini tanan matuod nga tagna parte kay Jesucristo. Halimbawa, si Edersheim nagsiling nga nagapati ang mga Judiyo nga ang Genesis 8:11 tagna parte sa Mesias. Siling nila ang “dahon kuno sang olibo nga gindala sang pating, naghalin sa Bukid sang Mesias.” Ginsambit man sang awtor ang Exodo 12:42. Nagapaathag kon paano nagsayop ang paghangop sang mga Judiyo sa sini nga teksto, sia nagsulat: “Subong nga si Moises naggikan sa desyerto, ang Mesias magagikan man sa Roma.” Madamo nga iskolar kag iban pa ang indi makahangop sa koneksion sining duha ka teksto kag sa sala nga pagpaathag parte kay Jesucristo.

Bisan ang mga tagna lang nga natuman mismo kay Jesucristo ang isipon naton, mabudlayan gihapon kita nga mahibaluan kon pila gid ini tanan. Halimbawa, ang Isaias kapitulo 53 may pila ka tagna parte sa Mesias. Ang Isaias 53:2-7 nagtagna: “Wala sia sing dagway . . . Gintamay sia kag ginsikway sang mga tawo . . . Ginpas-an niya ang aton mga kalisud . . . Sia ginpilas tungud sang aton mga paglalis . . . Subong sang cordero nga ginadul-ong sa ihawan.” Dapat bala isipon nga isa lang ka tagna ining mga teksto sa Isaias kapitulo 53 parte sa Mesias, ukon isipon ini base sa kada diskripsion?

Binagbinaga man ang Isaias 11:1, nga nagasiling: “May magagowa nga salingsing gikan sa tuud ni Jesse, kag isa ka sanga gikan sa iya mga gamut magapamunga.” Ginsulit ini sa bersikulo 10. Dapat bala naton isipon ining duha ka bersikulo nga duha ka tagna ukon isa ka tagna nga ginsulit lang? Ano man ang aton konklusion sa Isaias kapitulo 53 kag Isaias kapitulo 11 makaapektar sa kadamuon sang mga tagna parte sa Mesias.

Gani, mas maayo nga indi na lang kita mangin espesipiko kon pila gid tanan ang tagna parte sa Mesias sa Hebreong Kasulatan. Ang organisasyon ni Jehova naglista sing madamo nga tagna parte kay Jesus kag ang katumanan sini. * Ini nga listahan makapalig-on kag makabulig sa aton personal kag pangpamilya nga pagtuon kag pagbantala. Dugang pa, ang madamo nga tagna parte sa Mesias, bisan pila man ini tanan, nagahatag sa aton sing mabakod nga pamatuod nga si Jesus amo ang Cristo, ukon Mesias.

[Nota]