Maalamon nga Laygay sa mga Di-minyo kag mga Mag-asawa

“Ginasiling ko ini . . . agod pahulagon kamo sa kon ano ang nagakaigo kag sa pag-alagad sing dalayon sa Ginuo nga wala sing tublag.”—1 COR. 7:35.

1, 2. Ngaa dapat hibaluon sang isa ang laygay sang Biblia sa mga di-minyo kag sa mga mag-asawa?

ANG isa sa pinakamabudlay nga aspekto sang kabuhi amo ang pagpakig-angot sa tuhay nga sekso. Mahimo diri naton maeksperiensiahan ang tuman nga kalipay, kapaslawan, ukon kabalaka. Agod maatubang ini nga mga balatyagon, kinahanglan gid naton ang panuytoy sang Dios. Apang indi lang amo sina ang rason. Ang isa ka Cristiano nga kontento na subong di-minyo mahimo ginaipit sang iya pamilya ukon mga abyan nga magminyo. Ang isa naman nga ayhan gusto magminyo wala pa sing makita nga nagakabagay sa iya. May iban naman nga nagakinahanglan sang panuytoy para mahandaan ang responsibilidad kon magminyo na sila. Kag ang di-minyo kag minyo nga mga Cristiano pareho nga nagaatubang sang pagtilaw parte sa seksuwal nga imoralidad.

² Magluwas sa aton kalipay, ini nga mga isyu may epekto sa aton kaangtanan kay Jehova nga Dios. Sa kapitulo 7 sang iya una nga sulat sa mga taga-Corinto, may laygay si Pablo sa mga di-minyo kag mga mag-asawa. Tulumuron niya nga palig-unon ang iya mga bumalasa sa “kon ano ang nagakaigo kag sa pag-alagad sing dalayon sa Ginuo nga wala sing tublag.” (1 Cor. 7:35) Samtang ginabinagbinag mo ang iya laygay sa sining importante nga mga butang, gamita ang imo kahimtangan—di-minyo ka man ukon minyo—agod alagaron sing bug-os si Jehova.

Isa ka Mabug-at nga Desisyon sang Kada Isa

3, 4. (a) Ano nga mga problema ang nagautwas kon kaisa bangod ang pila nabalaka gid sa ila abyan ukon paryente nga indi pa minyo? (b) Paano makabulig ang laygay ni Pablo para mangin balanse ang pagtamod sang isa sa pagminyo?

³ Kaangay sa mga Judiyo sang unang siglo, ginapadaku sang madamo nga kultura subong nga kinahanglan gid magminyo. Kon ang isa yara na sa isa ka partikular nga edad kag indi pa minyo, nabalaka na ang iya mga abyan kag mga paryente. Mahimo sila manugda nga dasigon niya ang pagpangita sing tiayon ukon maghatag sa iya sing ideya kon sin-o ang puede. Posible pa gani nga padihutan nila nga magkitaay ang ila ginatugpo. Kon kaisa, nagaresulta ini sa kahuy-anan, pagkaguba sang pag-abyanay, kag paglainay sing buot.

⁴ Si Pablo wala gid mag-ipit sa iban nga magminyo ukon indi magminyo. (1 Cor. 7:7) Kontento sia nga alagaron si Jehova bisan wala sia sing asawa, apang ginatahod niya ang kinamatarong sang iban nga magminyo. Sa karon, ang kada Cristiano may kinamatarong man sa pagdesisyon kon bala magminyo sia ukon indi. Indi sia dapat pag-ipiton.

Malipayon Bisan Di-minyo

5, 6. Ngaa ginrekomendar ni Pablo ang pagkadiminyo?

⁵ Ang isa sa talalupangdon nga mga pinamulong ni Pablo sa mga taga-Corinto amo ang  iya positibo nga pagtamod parte sa pagkadiminyo. (Basaha ang 1 Corinto 7:8.) Bisan pa si Pablo di-minyo, wala niya ginkabig nga mas maayo sia sangsa mga minyo, subong sang pagtamod sang di-minyo nga klero sang Cristiandad. Sa baylo, ginpadaku ni Pablo ang bentaha sang di-minyo nga mga ministro sang maayong balita. Ano ang ila bentaha?

⁶ Sa masami, mas mahapos sa di-minyo nga Cristiano ang magbaton sing mga asaynment sa pag-alagad kay Jehova nga ayhan mabudlay para sa mga minyo. Nakabaton si Pablo sang pinasahi nga pribilehiyo subong “apostol sa mga pungsod.” (Roma 11:13) Basaha ang Binuhatan kapitulo 13 asta 20, kag sundi sia kag ang iya mga masigkamisyonero sa ila pagsugod sa bag-o nga mga teritoryo kag mga kongregasyon sa nanuhaytuhay nga duog. Madamo nga kabudlayan ang ginbatas ni Pablo sa iya pag-alagad, nga ayhan indi maagihan sang kalabanan subong. (2 Cor. 11:23-27, 32, 33) Apang balewala ini sa iya kalipay bangod nabuligan niya ang madamo nga mangin mga disipulo. (1 Tes. 1:2-7, 9; 2:19) Mahimo ayhan niya ini kon minyo sia ukon may pamilya? Posible nga indi.

7. Maghatag sang halimbawa sang di-minyo nga mga Saksi nga nagkalit sang ila kahimtangan sa pagpauswag sang intereses sang Ginharian.

⁷ Ginakalitan sang madamo nga di-minyo nga Cristiano ang ila kahimtangan agod dugangan ang ila mahimo para sa Ginharian. Sanday Sara kag Limbania, di-minyo nga mga payunir sa Bolivia, nagsaylo sa isa ka lugar nga tinuig na nga wala mabantalaan. Problema bala kay wala sing kuryente didto? Nagsiling sila: “Wala sing radyo ukon TV, gani ang mga tawo may tion gid sa pagbasa.” Ginpakita sa ila sang pila ka pumuluyo didto ang kopya sang mga publikasyon sang mga Saksi ni Jehova nga wala na ginaimprinta subong pero ginabasa nila gihapon. Bangod halos interesado ang tanan nga tagbalay, dugay nila natapos ang ila teritoryo. Ginsilingan sila sang isa ka tigulang nga babayi: “Dali na lang guro ang katapusan kay nakalab-ot na diri ang mga Saksi ni Jehova.” Ang pila sa sina nga lugar nagtambong na dayon sa mga miting.

8, 9. (a) Ano ang ginahunahuna ni Pablo sang nagsiling sia nga mas maayo ang pagkadiminyo? (b) Ano ang mga bentaha sang di-minyo nga mga Cristiano?

⁸ Ang Cristianong mga mag-asawa may maayo man nga eksperiensia sa ila pagbantala sa  mabudlay nga mga teritoryo. Apang may pila ka asaynment para sa di-minyo nga mga payunir nga mahimo mabudlay para sa mga minyo ukon may kabataan. Nakita ni Pablo nga posible pa mapauswag sang mga kongregasyon ang ila pagbantala. Luyag niya nga mabatyagan man nila ang kalipay sa paghimo sing mga disipulo. Gani, nakasiling sia nga mas mahapos mag-alagad kay Jehova kon ang isa di-minyo.

⁹ Ang isa ka di-minyo nga utod nga babayi nga taga-United States nagsulat: “Abi sang iban ang mga di-minyo indi magmalipayon. Pero napamatud-an ko nga ang matuod nga kalipay matigayon lamang sa pagpakig-abyan kay Jehova. Matuod nga ang pagkadiminyo isa ka sakripisyo, pero kon gamiton ini sing maayo, mangin makalilipay ini nga dulot.” Kon parte sa kalipay, sia nagsulat: “Ang pagkadiminyo indi sablag, kundi isa ka kahigayunan nga magmalipayon. Nahibaluan ko nga palangga ni Jehova ang tanan, minyo man ukon di-minyo.” Malipayon sia subong nga nagaalagad sa lugar nga nagakinahanglan sing dugang nga manugbantala. Kon di-minyo ka, magamit mo bala ang imo kahilwayan para mas madamo ang imo matudluan sang kamatuoran? Mahimo mabatyagan mo man nga ang pagkadiminyo isa ka hamili nga dulot halin kay Jehova.

Mga Di-minyo nga Luyag Magminyo

10, 11. Paano ginasakdag ni Jehova ang mga gusto magminyo apang wala pa makakita sing nagakabagay nga milinyuon?

¹⁰ Sa pagligad sang tion, madamo sa matutom nga alagad ni Jehova nga di-minyo ang namat-od nga mangita sing tiayon. Bangod nahibaluan nila nga kinahanglan ang panuytoy sa sini, nangayo sila sing bulig kay Jehova agod makakita sing nagakaigo nga tiayon.—Basaha ang 1 Corinto 7:36.

¹¹ Kon handum mo nga makaminyo sang isa nga nagaalagad kay Jehova sing bug-os tagipusuon, ipangamuyo ini sa Iya. (Fil. 4:6, 7) Bisan daw kadugay sang sabat, indi madulaan sing paglaum. Magsalig nga buligan ka sang aton mahigugmaon nga Dios nga malandas mo ang imo sitwasyon.—Heb. 13:6.

12. Ngaa dapat binagbinagon sing maayo sang isa ka Cristiano kon may maghagad sa iya nga magpakasal?

¹² Ang isa ka Cristiano nga gusto magminyo mahimo hagaron nga magpakasal sang isa nga indi matutom ukon indi pa gani Saksi. Kon matabo ina sa imo, dumduma nga mas masakit ang resulta kon magsayop ka sa pagpili sang tiayon sangsa kasubo nga imo ginabatyag bangod indi ka minyo. Kon makasal na kamo, nahigot ka na sa imo tiayon tubtob buhi ka, sa kalipay man ukon sa kasakit. (1 Cor. 7:27) Gani, indi magpadasudaso sa pagminyo kay basi maghinulsol ka lang.—Basaha ang 1 Corinto 7:39.

Maghanda sa Realidad sang Pag-asawahay

13-15. Ano nga mga butang nga posible tunaan sang kapipit-an sa pag-asawahay ang dapat istoryahan samtang naganobyahanay pa lang?

¹³ Bisan pa ginrekomendar ni Pablo nga alagaron si Jehova bilang di-minyo, wala niya ginpakanubo ang mga nagminyo. Sa baylo, ginabuligan sang iya inspirado nga laygay ang mga mag-asawa nga atubangon ang realidad sang pag-asawahay kag tinguhaan nga indi sila magbulagay.

¹⁴ Dapat bag-uhon sang pila ka mag-asawa ang ila mga ginapaabot sa ila pag-asawahay. Samtang naganobyahanay, daw pamatyag nila pinasahi gid kag tumalagsahon ang ila gugma. Gani nagapati sila nga magamalipayon gid sila. Nagpakasal sila nga nagadalamguhanon kag nagapati nga wala gid sing makaguba sang ila kalipay. Pero indi ina matuod. Ang romantiko nga bahin sang pag-asawahay makalilipay, pero indi lang amo sini ang kinahanglan sang nobyo kag nobya sa pag-atubang sang mga kapipit-an sa pag-asawahay.—Basaha ang 1 Corinto 7:28. *

¹⁵ Madamo sang bag-ong kasal ang nakibot kag nalugaw-an pa gani, sang indi gali sila  mag-ugyunanay sa importante nga mga butang subong sang paggasto, paglingawlingaw, ilistaran, kag kon san-o sila mabisita sa ila mga ugangan. Kag ang kada isa may batasan nga indi masahuan sang isa. Kon naganobyahanay pa lang, mahapos lang ini balewalaon, pero daku gali ini nga butang sang nag-asawahay na sila. Dapat naistoryahan na nila ini antes sila magpakasal.

16. Ngaa dapat mag-ugyunanay ang mag-asawa kon nagaatubang sing mga problema sa pag-asawahay?

¹⁶ Agod magmadinalag-on kag magmalipayon, dapat nahiusa ang mag-asawa sa pag-atubang sa mga kabudlayan. Dapat sila magsugtanay kon paano disiplinahon ang ila kabataan kag kon paano atipanon ang ila nagatigulang nga mga ginikanan. Ang mga kabudlayan sa pamilya indi dapat magpalas-ay sa ila pag-updanay. Paagi sa pag-aplikar sa laygay sang Biblia, masolbar nila ang madamo nga problema, mabatas ang indi masolbar, kag magmalipayon sa ila pag-upod.—1 Cor. 7:10, 11.

17. Ano nga “mga butang sa kalibutan” ang natural lang nga kabalak-an sang mga minyo?

¹⁷ Ginsambit ni Pablo ang isa pa ka kahimtangan sa pag-asawahay sa 1 Corinto 7:32-34. (Basaha.) Natural lang sa mga minyo nga ‘magkabalaka sa mga butang sang kalibutan,’ subong sang pagkaon, panapton, puluy-an, kag iban pa. Ngaa? Kon ang lalaki indi pa minyo, mahimo makakonsentrar gid sia sa ministeryo. Apang subong bana, ang iban niya nga tion kag kusog gamiton na niya sa pag-atipan sa iya asawa agod kahamut-an sia sini. Amo man ang asawa. Subong maalam nga Dios, nahibaluan ni Jehova nga agod magmadinalag-on ang pag-asawahay, dapat buhinan sang mag-asawa ang ila tion kag kusog nga ginagamit nila anay sa pag-alagad sa Iya.

18. Ano nga mga pagbag-o parte sa pagpakig-upod sa ila mga abyan ang dapat himuon sang mag-asawa?

¹⁸ May iban pa nga butang nga dapat himuon sang mag-asawa. Kon ginabuhinan gani nila ang tion nga ginagamit nila sa pag-alagad  sa Dios para atipanon ang kada isa, indi bala nga dapat man nila buhinan ang ila tion para sa ila mga abyan? Ano ayhan ang epekto sa asawa kon ang bana masako gihapon sa sports upod sa iya mga abyan? Ukon ano ayhan ang batyagon sang bana kon ang iya asawa nagakawili gihapon sa ila kalingawan sang iya mga abyan? Mahimo nga masubuan gid ang napabay-an nga tiayon kag magbatyag nga indi na sia palangga. Malikawan ini kon tinguhaan sang mag-asawa nga pabakuron ang ila pag-asawahay.—Efe. 5:31.

Ginapatuman ni Jehova ang Katinlo sa Moral

19, 20. (a) Ngaa ang pagminyo indi garantiya nga maproteksionan na ang isa sa seksuwal nga imoralidad? (b) Ano ang risgo kon ang mag-asawa nagahilayuay sing malawig?

¹⁹ Determinado ang mga alagad ni Jehova nga magpabilin nga matinlo sa moral. Ang pila namat-od nga magminyo agod malikawan ang seksuwal nga imoralidad. Apang ang pagminyo indi garantiya nga maproteksionan na ang isa sa seksuwal nga kahigkuan. Sang tion sang Biblia, maamligan lang ang mga tawo sa napamakuran nga siudad kon magpabilin sila sa sulod sang pader. Pero kon ang isa ka tawo maggua sa pader mahimo sia makawatan ukon mapatay sang nagaluyong nga mga tulisan kag kawatan. Sing kaanggid, mangin proteksion lamang ang pagminyo gikan sa imoral nga mga buhat kon ang mag-asawa magpabilin sa latid nga ginhimo sang Tagtukod sang pag-asawahay.

²⁰ Ginlaragway ni Pablo ini nga latid sa 1 Corinto 7:2-5. Ang seksuwal nga relasyon para lamang sa ila nga mag-asawa. Ang kada isa ginapaabot nga maghatag sang “natungod” sa ila pag-asawahay, ukon seksuwal nga kaangtanan nga kinamatarong sang isa nga minyo. Apang, ang pila ka mag-asawa nagahilayuay sing malawig—ayhan bangod sang bakasyon ukon trabaho, amo nga indi nila mahatag ang “natungod” sa isa kag isa. Handurawa kon ano nga trahedya ang matabo kon bangod sang indi “pagpugong sa kaugalingon,” magpadala ang isa sa paagi ni Satanas kag manghilahi. Ginapakamaayo ni Jehova ang mga ulo sang pamilya nga nagaaman sang mga kinahanglanon sang ila pamilya apang wala nagarisgo sang ila pag-asawahay.—Sal. 37:25.

Mga Benepisyo sa Pagtuman sang Laygay sang Biblia

²¹ Ang isa sa pinakamabudlay nga desisyon amo kon bala magminyo ukon magpabilin nga di-minyo. Diin man sa sini ang aton pilion, may kabudlayan kay tanan kita indi himpit. Bisan ang mga nahamut-an kag ginapakamaayo ni Jehova, di-minyo man sila ukon minyo, indi makalikaw sa kapaslawan. Apang, mas haganhagan ang problema kon iaplikar mo ang maalamon nga laygay sa 1 Corinto kapitulo 7. Mahimo mo ang “maayo” sa panulok ni Jehova, di-minyo ka man ukon minyo. (Basaha ang 1 Corinto 7:37, 38.) Ang pinakadaku nga pagpakamaayo amo ang kahamuot sang Dios. Matigayon naton ini subong kag sa palaabuton kon magpuyo na kita sa ginsaad sang Dios nga bag-ong kalibutan. Didto, madula na ang mga problema nga ginaatubang sang mga lalaki kag mga babayi subong.

[Nota]

Masabat Mo Bala?

• Ngaa indi dapat pag-ipiton ang isa nga magminyo?

• Paano mo magamit sing maayo ang imo tion subong di-minyo nga alagad ni Jehova?

• Paano makahanda ang naganobyahanay sa mga kabudlayan sang pag-asawahay?

• Ngaa ang pagminyo indi garantiya nga maproteksionan na ang isa sa seksuwal nga imoralidad?

[Mga Pamangkot sa Pagtinuon]

21. (a) Ngaa mabudlay magdesisyon kon bala magminyo ukon magpabilin nga di-minyo? (b) Ngaa mapuslanon ang laygay sa 1 Corinto kapitulo 7?

[Mga Retrato sa pahina 14]

Malipayon ang di-minyo nga mga Cristiano nga nagagamit sang ila tion sa pagpasangkad sang ila ministeryo

[Retrato sa pahina 16]

Ano nga mga pagbag-o ang dapat himuon sang pila pagkatapos sang kasal?