Mga Pamangkot Gikan sa mga Bumalasa

Ano ang akon himuon kon may pamangkot ako sa akon nabasa sa Biblia ukon kon kinahanglan ko mangayo sing laygay sa akon problema?

Ginapalig-on ang kada isa sa aton sa Hulubaton 2:1-5 nga “pangitaon” ang paghangop kag paghantop pareho sa pagpangita sang “mga bahandi nga natago.” Nagapahangop ini nga dapat manikasog kita sa pagpangita sing sabat sa mga pamangkot naton sa Biblia kag sing solusyon sa aton mga problema. Paano?

Ang Magbenepisyo sa Pagpanudlo Sang Teokratikong Eskwelahan Para sa Ministeryo, pahina 33 asta 38, nagabinagbinag sang “Kon Paano Himuon ang Pagpanalawsaw” nga nagagamit sing mga kasangkapan nga gin-aman sang “matutom kag mainandamon nga ulipon.” (Mat. 24:45) Ginapaathag sang pahina 36 kon paano gamiton ang Watch Tower Publications Index. Ang kada edisyon sini gintunga sa indese sang mga topiko kag indese sang mga teksto. Gani makapili ka kon ang reperensia nga pangitaon mo base sa tinaga ukon sa teksto. Makita mo man ang listahan sang mga reperensia nga puede mo tun-an. Mangin mapailubon sa pagpangita sang sabat ukon panuytoy nga kinahanglan mo. Dumduma, daw pareho lang ini sa pagpangita sing “mga bahandi nga natago,” nga nagakinahanglan sing tion kag panikasog.

Siempre, may mga topiko kag teksto nga wala mapaathag sing espesipiko sa aton mga publikasyon. Bisan may mga paathag sa isa ka partikular nga teksto sa Biblia, mahimo nga indi ini ang sabat sa imo pamangkot. May pila man ka kasaysayan sa Biblia nga nagapautwas sang mga pamangkot bangod indi detalyado ang ginasiling sang Biblia. Gani indi dayon naton makita ang mga sabat sa kada pamangkot. Sa sini nga kahimtangan, dapat naton likawan nga maghaumhaum lang, kay basi malakip kita sa mga nagabinaisay parte sa “mga pamangkot para sa pagpanalawsaw” sa baylo nga magtudlo sang mga butang halin sa Dios may kaangtanan sa aton pagtuo. (1 Tim. 1:4; 2 Tim. 2:23; Tito 3:9) Indi obligasyon sang sanga talatapan ukon sang ulong talatapan nga analisahon kag sabton ang tanan nga pamangkot nga wala mabinagbinag sa aton literatura. Makasalig kita nga bastante na ang impormasyon sa Biblia nga magtuytoy sa aton kabuhi. Ang mga detalye naman nga wala malakip, nagakinahanglan sang aton mabakod nga pagtuo sa Awtor sini.—Tan-awa ang pahina 185 asta 187 sang libro nga Mangin Suod kay Jehova.

Ano abi kon nahimo mo na ang imo bug-os nga masarangan sa pagpangita sing sabat apang wala ka gihapon sing makita nga panuytoy ukon solusyon? Indi mangalag-ag sa pagpalapit sa isa ka hamtong nga utod ukon ayhan sa isa ka gulang. Madalom ang ila ihibalo sa Biblia kag madamo sila sing eksperiensia sa kabuhi. Mahimo ka nila mabuligan sa imo problema ukon desisyon, kay kilala ka nila kag nahibaluan nila ang imo kahimtangan. Indi man pagkalimti nga mangamuyo sing espesipiko kay Jehova parte sa imo ginakabalak-an kag mangabay nga tuytuyan ka sang iya balaan nga espiritu, “kay ang GINOO nagahatag sing kaalam . . . kag paghangup.”—Hulu. 2:6; Luc. 11:13.