Nalipay Ako sa Pag-alagad kay Jehova

Panugiron ni Fred Rusk

Sugod sang bata pa ako, naeksperiensiahan ko na ang ginsiling ni David sa Salmo 27:10: “Kon magbiya sa akon ang akon amay kag akon iloy, niyan ang GINOO magasapopo sa akon.” Sugiran ko kamo kon paano ini nangin matuod sa akon.

NAGDAKU ako sa uma ni Lolo nga talamnan sang algodon sa Georgia, U.S.A., sang tion sang Great Depression sang katuigan 1930. Napatay si Nanay kag ang akon utod nga bag-o lang nabun-ag. Grabe gid ang kasubo ni Tatay, gani ginbilin niya ako kay Lolo nga balo naman kag nagkadto sia sa malayo nga siudad agod mag-obra. Sang ulihi, pila ka beses nga gintinguhaan niya nga kuhaon ako, pero wala gid ini madayon.

Ang mga tiya ko ang nagapalakat sang panimalay. Bisan indi relihioso si Lolo, debotado katama ang akon mga tiya sa ila relihion nga Southern Baptists. Ginapahog nila ako nga bakulon kon indi ako magsimba kada Domingo. Gani sugod sang bata pa ako, wala na ako sing gana sa relihion. Apang nanamian ako mag-eskwela kag sa sports.

Ang Pagduaw nga Nagpabag-o sang Akon Kabuhi

Isa ka hapon sang 1941, sang 15 anyos ako, may nagkadto sa balay nga tigulang nga mag-asawa. Sia kuno si Tiyoy Talmadge Rusk. Amo ko pa lang sia makita, pero nabal-an ko nga mga Saksi ni Jehova sila. Ang paathag niya parte sa katuyuan sang Dios nga mapuyo sing dayon ang mga tawo sa duta tuhay gid sa akon nabatian sa simbahan. Ang kalabanan sa amon pamilya wala nagpati sa ila ginasugid, kag ginatamay pa gani sila. Wala na sila ginpabalik sa balay. Apang ang akon tiya nga si Mary, nga tatlo lang ka tuig ang namagulangan sa akon, nagbaton sing Biblia kag sing mga publikasyon nga nagapaathag sini.

Nakumbinse dayon ang akon tiya nga nakita na niya ang kamatuoran kag sang 1942 nagpabawtismo sia subong isa sa mga Saksi ni Jehova. Naeksperiensiahan gid niya ang ginsiling ni Jesus nga “ang mga kaaway sang tawo amo ang mga katapo mismo sang iya panimalay.” (Mat. 10:34-36) Grabe gid ang pagpamatok sang amon pamilya. Ang mas magulang ko nga tiya nga kilala sang mga pulitiko sa amon lugar, nakigkunsabo sa meyor kag ginpadakop si Tiyoy Talmadge. Ginsumbong sia nga nagabaligya nga wala sing lisensia kag nadutlan sia sang kaso.

Ang pamantalaan sa amon lugar nagreport nga ang meyor, nga amo man ang hukom, nagsiling sa mga nagtambong sa bista: “Ang literatura nga ginapanagtag sini nga tawo . . .  makatalagam subong sang hilo.” Nag-apelar ang akon tiyo kag nagdaug sia, apang napriso na sia sing napulo ka adlaw.

Kon Paano Nakabulig sa Akon si Tiyay Mary

Indi lang ako ang ginasugiran sang akon tiya sang iya bag-o nga pagpati, kundi pati man ang amon mga kaingod. Ginaupdan ko sia kon mag-Bible study sia sa tawo nga nagbaton sing libro nga The New World. * Siling sang asawa sang tawo, ginpulawan ini basa sang iya bana. Bisan nagapaganot ako kon parte sa relihion, nanamian ako sa akon natun-an. Pero indi ang panudlo sang Biblia ang una nga nagkumbinse sa akon nga ang mga Saksi amo ang katawhan sang Dios kundi ang pagtratar sa ila.

Halimbawa sang isa ka adlaw, samtang nagapauli kami halin sa pagpanadol sang kamatisan, nakita namon ni Tiyay Mary ang nabilin sang mga literatura nga ginsunog sang iban ko nga tiya, lakip ang radyo pono kag mga plaka nga nagaunod sang mensahe sang Biblia. Grabe ang akon kaakig, apang akig man nga nagsiling ang akon isa ka tiya, “Pasalamatan mo gid sa ulihi ang amon ginhimo.”

Sang 1943, napilitan si Tiyay Mary nga maghalin sa balay kay indi sia magbiya sa iya pagtuo kag indi mag-untat sa pagbantala. Nalipay ako nga mahibaluan nga magluwas nga may ngalan ang Dios, nga amo si Jehova, mahigugmaon kag maluluy-on gid sia nga Dios, kag indi matuod nga ginasunog niya ang mga tawo sa kalayuhon nga impierno. Natun-an ko man nga may mahigugmaon sia nga organisasyon, bisan wala pa ako makatambong sa miting.

Sang ulihi, samtang nagapanghilamon ako, may salakyan nga nag-agi kag ginpamangkot ako sang isa sa nagasakay kon bala ako si Fred. Sang nahibaluan ko nga mga Saksi sila, nagsiling ako, “Pasakya ako, kay makadto kita sa duog nga puede kita makaistorya.” Ginpakadto gali sila sa akon ni Tiyay Mary. Isa sa ila si Shield Toutjian, isa ka nagalakbay nga ministro, nga nagpalig-on sa akon kag naghatag sing espirituwal nga panuytoy nga kinahanglanon ko gid. Subong, ako naman ang ginahingabot kay ginadepensahan ko ang mga pagpati sang mga Saksi ni Jehova.

Ginsulatan ako ni Tiyay Mary halin sa Virginia nga iya ginsayluhan, kag nagsiling sia nga kon luyag ko gid mag-alagad kay Jehova, puede ako makaapas sa iya. Namat-od dayon ako nga maglakat. Sang Biernes sang gab-i, Oktubre 1943, ginbutang ko sa karton ang akon mga gamit kag ginhigot ini sa isa ka kahoy nga medyo malayo sa balay. Pagkaaga, ginkuha ko ang karton kag nag-agi sa likod-balay sang amon kaingod, kag nagsakay pakadto sa banwa. Nagkadto ako sa siudad sang Roanoke, kag  nagkitaay kami ni Tiyay sa balay ni Edna Fowlkes.

Pag-uswag sa Espirituwal, Bawtismo, kag Bethel

Ang isa ka mainayuhon nga hinaplas nga Saksi nga si Edna nag-arkila sang daku nga balay. Masiling nga sia ang moderno nga Lidia. Magluwas kay Tiyay Mary, ginpaistar man niya diri ang iya bayaw kag ang iya mga hinablos nga sanday Gladys kag Grace Gregory nga sang ulihi nangin mga misyonera. Nobentahon na si Gladys subong apang matutom gihapon nga nagaalagad sa sanga sa Japan.

Sang didto kami sa balay ni Edna, regular ako nga nagatambong sa mga miting kag ginahanas sa ministeryo. Pirme ako busog sa espirituwal kay hilway ako nga magtuon sa Pulong sang Dios kag magtambong sa Cristianong mga miting. Sang Hunyo 14, 1944, nabawtismuhan ako. Sanday Tiyay Mary kag ang mag-utod nga Gregory nagpayunir kag gin-asayn sila sa naaminhan sang Virginia. Sila ang nanguna didto sa pagtukod sang kongregasyon sa Leesburg. Sang una nga binulan sang 1946, nagpayunir ako malapit sa ila asaynment. Sina nga tingadlaw, nagtambong kami sa halandumon nga internasyonal nga kombension sa Cleveland, Ohio, sang Agosto 4-11.

Sa sina nga kombension, si Nathan Knorr, nga nagapanguna sa organisasyon, naghatag sing mga plano sa pagpasangkad sang Brooklyn Bethel. Lakip sa sini ang pagpatindog sing bag-o nga ilistaran kag pagpasangkad sang imprintahan. Madamo nga lamharon nga lalaki ang kinahanglanon. Gusto ko man mag-alagad kay Jehova didto. Gani nag-aplay ako, kag pila lang ka bulan, sang Disiembre 1, 1946, nangin Bethelite ako.

Mga isa ka tuig sang ulihi, nagkadto si Max Larson nga manugtatap sang imprintahan sa akon opisina sa Mailing Department. Ginsugiran niya ako nga isaylo ako sa Service Department. Sa sini nga asaynment, madamo ako sing natun-an sa pag-aplikar sang mga prinsipio sang Biblia kag sa pagpalakat sang organisasyon sang Dios, labi na sang nakaupod ko sa obra si T. J. (Bud) Sullivan, ang manugtatap sang departamento.

Nangin relihioso si Tatay sang nagtigulang na sia, kag pila ka beses niya ako nga ginkadtuan sa Bethel. Sa iya katapusan nga pagkadto sang 1965, nagsiling sia, “Puede mo ako kadtuan, pero indi na gid ako magbalik diri.” Pila ka beses ko sia nga nabisitahan antes sia napatay. Nagalaum gid sia nga mapalangit. Nagalaum naman ako nga yara sia sa memorya ni Jehova, kag kon yara gid man, banhawon sia indi sa iya ginalauman, kundi diri sa duta nga may paglaum nga mabuhi sing dayon sa napasag-uli nga Paraiso.

 Iban Pa nga Halandumon nga Kombension kag Pagpatindog

Importante gid ang mga kombension sa espirituwal nga pag-uswag. Ilabi na gid ang mga internasyonal nga kombension sa Yankee Stadium sa New York sang katuigan 1950. Sa isa ka sesyon sang 1958, napuno ang Yankee Stadium kag ang Polo Grounds sang 253,922 ka tumalambong halin sa 123 ka kadutaan. May isa ka hitabo sina nga kombension nga indi ko gid malipatan. Samtang nagabulig ako sa opisina sang kombension, dalidali nga nagpalapit sa akon si Utod Knorr. Sia nagsiling: “Fred, nalipat gid ko mag-asayn sing utod nga mamiting sa mga payunir. Gatipon na ‘to sila sa gin-arkilahan nga kalan-an nga malapit lang diri. Puede mo bala sila kadtuan dayon kag maghatag sing pamulongpulong nga makapalig-on sa ila? Ang bisan ano lang nga madumduman mo samtang nagapakadto ka didto.” Grabe ang akon pangamuyo kag nagahapohapo pa ako pag-abot ko didto.

Samtang nagadamo ang kongregasyon sa New York City sang katuigan 1950 kag 1960, kulang na ang ginaarkilahan nga mga bilding nga ginahimo nga mga Kingdom Hall. Gani halin sang 1970 asta 1990, tatlo ka bilding sa Manhattan ang ginbakal, ginkay-o, kag ginhimo nga matahom nga mga tilipunan. Ako ang tsirman sang building committee sini nga mga proyekto kag indi ko gid malipatan kon paano ginpakamaayo ni Jehova ang mga kongregasyon nga nagbuligay sa paggasto kag pagtapos sining mga bilding nga ginagamit sa matuod nga pagsimba asta subong.

Mga Pagbag-o sa Kabuhi

Isa ka adlaw sang 1957, samtang nagalakat ako pakadto sa imprintahan gulpi lang nag-ulan. Nakita ko sa unahan ko ang isa ka matahom kag bag-o nga Bethelite. Wala sia sing payong, gani ginpayungan ko sia. Amo sini kon paano kami nagkilalahay ni Marjorie. Sugod sang ginkasal kami sang 1960, nalipay kami nga mag-updanay sa paglakat samtang nagaalagad kay Jehova, nagaulan man ukon nagainit. Ginsaulog namon ang amon ika-50 nga anibersaryo sang Septiembre 2010.

Wala pa kami makapanghimos sang amon dala halin sa amon honeymoon sang ginsilingan kami ni Utod Knorr nga gin-asayn ako nga mangin instruktor sang Gilead School. Pinasahi gid ini nga pribilehiyo! Sugod sang 1961 asta 1965, may lima ka mas malawig nga mga klase. Ang mga estudyante sini halos mga katapo sang sanga nga ginahanas para sa pagpalakat sang sanga. Sang tigragas sang 1965, ginbalik ang normal nga lima ka bulan nga klase nga paghanas sa mga misyonero.

Sang 1972, halin sa Gilead School ginsaylo ako sa Writing Correspondence Department kag gin-asayn ako subong manugtatap. Ang  pag-research sang nanuhaytuhay nga mga pamangkot kag mga problema nakabulig sa akon nga mahangpan sing maayo ang mga panudlo sang Pulong sang Dios kag kon paano iaplikar ang mataas nga mga prinsipio sang aton Dios sa pagbulig sa iban.

Nian sang 1987, gin-asayn ako sa bag-o nga departamento nga gintawag Hospital Information Services. May mga seminar nga ginahiwat agod tudluan ang mga gulang sa mga Hospital Liaison Committee kon paano magpalapit sa mga doktor, mga hukom, kag mga social worker kag hinun-anunan ang aton base sa Biblia nga tindog parte sa dugo. Ang isa ka daku nga problema amo nga ginatughungan sang mga doktor ang kabataan sang mga Saksi bisan wala sing pahanugot sang ginikanan, basta may pahanugot sila sang korte.

Kon may ginapanugda sa mga doktor nga mga alternatibo sa dugo, masami nga nagasiling sila nga wala sing mabaklan sini ukon tuman ini ka mahal. Kon amo sini ang ginasiling sang doktor, masami ako nga nagasabat, “Palihug, patan-awa ako sang imo kamot.” Kon himuon niya ini, masiling ako dayon, “Kabalo ka, yara sa imo ang isa sa labing maayo nga alternatibo sa dugo.” Ini nga pagdayaw nagapahanumdom sa iya sang iya ikasarang sa paggamit sing mahalungon sang scalpel para mapahaganhagan ang pagdugo.

Sa sulod sang sobra na 20 ka tuig, ginpakamaayo gid ni Jehova ining mga panikasog nga tudluan ang mga doktor kag mga hukom. Kon mahangpan na nila sing maayo ang aton panindugan, nagabag-o ang ila panimuot. Natun-an nila paagi sa mga research sa medisina nga ang mga alternatibo sa dugo epektibo kag madamo sing nagakooperar nga doktor kag mga ospital ang puede masayluhan sang pasyente.

Sugod sang 1996, nag-alagad kami ni Marjorie sa Watchtower Educational Center sa Patterson, New York, nga mga 110 kilometros sa naaminhan sang Brooklyn. Nakatrabaho ako diri sing malip-ot sa Service Department kag nakabulig sa pagtudlo sa mga katapo sang sanga kag mga nagalakbay nga manugtatap. Sang nagligad nga 12 ka tuig, nag-alagad ako liwat sa Writing Correspondence, nga halin sa Brooklyn ginsaylo sa Patterson.

Mga Kabudlayan sang Pagtigulang

Nangin mabudlay pa gid ang pag-atipan sang akon pribilehiyo sa Bethel sang sobra na otsenta ang akon edad. Sobra na napulo ka tuig nga may kanser ako. Pamatyag ko daw si Ezequias ako nga gindugangan ni Jehova ang kabuhi. (Isa. 38:5) May Alzheimer’s disease ang akon asawa, kag nagabuligay kami sa pag-atubang niya sini. Sangkol gid sia nga ministro ni Jehova, mabinuligon sa mga lamharon, kag matutom kag mainunungon nga kaupod. Maayo gid sia nga estudyante kag manunudlo sang Biblia, kag madamo nga espirituwal nga anak ang nagapakig-angot pirme sa amon.

Napatay si Tiyay Mary sang Marso 2010 sa edad nga 87. Maayo gid sia nga manunudlo sang Pulong sang Dios kag madamo sia sing nabuligan nga manindugan sa matuod nga pagsimba. Madamo nga tinuig nga yara sia sa bug-os tion nga pag-alagad. Nalipay gid ako sa pagbulig niya sa akon nga matun-an ang Pulong sang Dios kag mangin kaangay niya, isa ka alagad sang aton mahigugmaon nga Dios, si Jehova. Ginlubong si Tiyay sa ingod sang iya bana, nga nagmisyonero sadto sa Israel. Nagasalig ako nga yara sila sa memorya ni Jehova kag nagahulat sing pagkabanhaw.

Kon dumdumon ko ang 67 ka tuig nga pag-alagad kay Jehova, nagapasalamat gid ako sa bugana nga mga pagpakamaayo nga nabaton ko. Nalipay gid ako nga himuon ang kabubut-on ni Jehova! Nagasalig sa iya wala tupong nga kaayo, ginalauman ko gid ang ginsaad sang iya Anak: “Ang tagsatagsa nga nagbiya sang mga balay ukon mga utod nga lalaki ukon mga utod nga babayi ukon amay ukon iloy ukon mga anak ukon mga duta tungod sa akon ngalan magabaton sang mas madamo pa kag magapanubli sang kabuhi nga walay katapusan.”—Mat. 19:29.

[Nota]

[Retrato sa pahina 19]

Sa uma ni Lolo sa Georgia, U.S.A., 1928

[Retrato sa pahina 19]

Sanday Tiyay Mary kag Tiyoy Talmadge

[Retrato sa pahina 20]

Sanday Mary, Gladys, kag Grace

[Retrato sa pahina 20]

Sang ginbawtismuhan ako sang Hunyo 14, 1944

[Retrato sa pahina 20]

Sa Service Department sa Bethel

[Retrato sa pahina 21]

Upod kay Tiyay Mary sang 1958 sa internasyonal nga kombension sa Yankee Stadium

[Retrato sa pahina 21]

Sang ginkasal kami ni Marjorie

[Retrato sa pahina 21]

Sang 2008