Buligi ang mga Lalaki nga Mag-uswag sa Espirituwal
Buligi ang mga Lalaki nga Mag-uswag sa Espirituwal
“Kutob karon magapangisda ka sang buhi nga mga tawo.”—LUC. 5:10.
1, 2. (a) Ano ang reaksion sang mga lalaki sa pagbantala ni Jesus? (b) Ano ang hambalan sa sini nga artikulo?
SI Jesus kag ang iya mga disipulo nagabantala sa Galilea. Isa ka adlaw, nagsakay sila sa sakayan agod magpahuway sa malinong nga lugar. Apang madamo ang nagsunod sa ila, “mga lima ka libo ka lalaki, wala labot ang mga babayi kag kabataan.” (Mat. 14:21) Sa isa pa ka okasyon, nagpalapit ang kadam-an kay Jesus kay gusto nila mag-ayo kag mamati sa iya. Lakip sa sini ang “apat ka libo ka lalaki, wala labot ang mga babayi kag kabataan.” (Mat. 15:38) Ginapakita sini nga madamo nga lalaki ang nagpalapit kay Jesus kag interesado sa iya panudlo. Huo, ginapaabot ni Jesus nga madamo pa ang magabaton sang mensahe kay sa tapos makahulik sing madamo ang iya mga disipulo bangod sa milagro, nagsiling sia kay Simon: “Kutob karon magapangisda ka sang buhi nga mga tawo.” (Luc. 5:10) Gani ang iya mga disipulo dapat mangisda sang mga tawo kag mapaabot nila nga lakip sa ila mahulik ang madamo nga lalaki.
2 Sa karon, ang mga lalaki interesado man kag nagabaton sang mensahe nga aton ginabantala. (Mat. 5:3) Pero, madamo sa ila ang nagapangalag-ag kag wala nagauswag sa espirituwal. Paano naton sila mabuligan? Sang panahon ni Jesus wala niya ginhatagan sing espesyal nga atension ang mga lalaki, apang gintalupangod niya ang mga butang nga ginakabalak-an nila. Matun-an naton sa sini nga artikulo kon paano sila ginbuligan ni Jesus kag kon paano naton sia mailog. Hambalan naton ang tatlo ka butang nga ginakabalak-an sang mga lalaki: (1) palangitan-an, (2) kahadlok sa isiling sang iban, kag (3) pagbatyag nga indi kalipikado.
Palangitan-an
3, 4. (a) Ano sa masami ang ginauna sang kalabanan nga lalaki? (b) Ngaa ginauna sang mga lalaki ang materyal sangsa espirituwal nga mga butang?
3 “Manunudlo,” siling sang escriba kay Jesus, “magasunod ako sa imo bisan diin ka makadto.” Apang sang nagsiling si Jesus nga “ang Anak sang tawo wala gid sing maunlan sang iya ulo,” nagduhaduha na sia. Mahimo nga indi mabaton sang escriba ang ideya nga wala sing kasiguruhan ang iya ilistaran ukon kalan-on kay wala ginsambit sa Biblia nga nangin sumulunod sia ni Cristo.—Mat. 8:19, 20.
4 Sa masami, ginauna sang mga lalaki ang materyal sangsa espirituwal nga mga butang. Prioridad nila nga magkuha sang mas mataas nga edukasyon kag mangita sang daku sing sueldo nga trabaho. Para sa ila, mas praktikal nga mangita sang kuarta sangsa magtuon sa Biblia kag makigsuod sa Dios. Mahimo nga nanamian man sila sa ginatudlo sang Biblia, pero “ang mga kabalaka sining sistema sang mga butang kag ang madaya nga gahom sang manggad” nagalumos sang ila interes. (Mar. 4:18, 19) Binagbinagon naton kon paano ginbuligan ni Jesus ang iya mga disipulo nga ipasibu ang ila prioridad.
5, 6. Ano ang nakabulig kanday Andres, Pedro, Santiago, kag Juan nga ipasibu ang ila prioridad kon parte sa pagbantala kag palangitan-an?
5 Magkasosyo sa negosyo nga pagpangisda si Andres kag ang iya utod nga si Simon Pedro. Amo man ang mag-utod nga sanday Juan kag Santiago, kag ang ila amay nga si Zebedeo. Maayo ang ila negosyo kay may mga tinawo sila. (Mar. 1:16-20) Sang nabatian nanday Andres kag Juan kay Juan Bautista ang parte kay Jesus, kumbinsido gid sila nga nasapwan na nila ang Mesias. Ginsugid ni Andres ang balita sa iya utod nga si Simon Pedro kag amo man ang ginhimo ni Juan sa iya utod nga si Santiago. (Juan 1:29, 35-41) Pagkasunod nga mga binulan, nag-upod sila nga apat kay Jesus sang nagbantala sia sa Galilea, Judea, kag Samaria. Dayon nagbalik sila sa ila negosyo nga pagpangisda. Interesado sila sa espirituwal nga mga butang, pero ang pagbantala indi amo ang ila prioridad.
6 Sang ulihi, gin-agda ni Jesus sanday Pedro kag Andres nga mangin “mangingisda sing mga tawo.” Ano ang ila reaksion? “Ginbayaan nila gilayon ang mga pukot kag nagsunod sa iya.” Amo man sanday Santiago kag Juan. “Ginbayaan nila gilayon ang sakayan kag ang ila amay, kag nagsunod sila sa iya.” (Mat. 4:18-22) Ano ang nakabulig sa ila nga batunon ang pag-alagad sing bug-os tion? Nagpadasudaso bala sila sa ila desisyon? Wala. Sang nagligad nga mga binulan, nabatian nila si Jesus, nakita ang iya mga milagro, ang iya kakugi sa pagkamatarong, kag nasaksihan nga madamo ang nagbaton sa iya panudlo. Gani, labi nga naglig-on ang ila pagtuo kag pagsalig kay Jehova.
7. Paano naton mabuligan ang mga estudyante sa Biblia nga magsalig sa ikasarang ni Jehova nga mag-aman para sa iya katawhan?
7 Paano naton mailog si Jesus sa pagbulig sa aton mga estudyante sa Biblia nga magsalig kay Jehova? (Hulu. 3:5, 6) Ang aton paagi sa pagtudlo importante gid. Mahimo naton ipadaku sa iya ang saad sang Dios nga bugana nga pagpakamaayo kon unahon naton ang intereses sang Ginharian. (Basaha ang Malaquias 3:10; Mateo 6:33.) Magamit naton ang mga kasulatan para ipadaku kon paano ginaamanan ni Jehova ang iya katawhan. Pero indi naton pagkalimtan nga daku ang epekto sang aton halimbawa sa ila. Ang pagpaambit sang aton mga eksperiensia makabulig sa ila nga mapalambo ang pagsalig kay Jehova. Masugid man naton sa ila ang makapalig-on nga mga eksperiensia nga nabasahan naton sa aton mga literatura. *
8. (a) Ngaa importante para sa estudyante sa Biblia nga ‘matilawan kag makita nga maayo ang GINOO’? (b) Paano naton mabuligan ang aton estudyante nga maeksperiensiahan ang kaayo ni Jehova?
8 Indi lang pagbasa kag pagpamati sa mga eksperiensia sang iban parte sa pagpakamaayo ni Jehova ang kinahanglan agod maglig-on ang pagtuo sang aton estudyante sa Biblia. Dapat maeksperiensiahan niya mismo ang kaayo ni Jehova. Ang salmista nag-amba: “O tilawi kag tan-awa nga maayo ang GINOO! Bulahan ang tawo nga nagadangup sa iya!” (Sal. 34:8) Paano naton mabuligan ang aton estudyante nga makita nga maayo si Jehova? Ano abi kon may problema sia sa kuarta kag nagatinguha man nga untatan ang iya bisyo subong sang pagpanigarilyo, pagsugal, ukon pagpahubog. (Hulu. 23:20, 21; 2 Cor. 7:1; 1 Tim. 6:10) Tudluan naton sia nga mangamuyo sa Dios nga buligan sia nga mauntat ang iya bisyo. Kon mauntat na niya ini, makita niya nga maayo si Jehova. Dayon palig-unon naton sia nga unahon ang pagsimba kay Jehova. Ipadaku naton sa iya nga importante ang pagtuon sing Biblia kada semana kag paghanda kag pagtambong sa mga miting. Kon maeksperiensiahan niya ang pagpakamaayo ni Jehova, magabakod pa gid ang iya pagtuo kag mabuhinan ang iya kabalaka sa iban nga butang, subong sang kuarta.
Kahadlok sa Isiling sang Iban
9, 10. (a) Ngaa ginsekreto nanday Nicodemo kag Jose nga taga-Arimatea nga mga disipulo sila ni Jesus? (b) Ngaa nagapangalag-ag sa pagsunod kay Cristo ang iban nga mga lalaki subong?
9 Bangod sa pag-ipit sang kaupdanan, mahimo mangalag-ag ang iban nga lalaki nga magsunod sing bug-os kay Cristo. Ginsekreto nanday Nicodemo kag Jose nga taga-Arimatea nga mga disipulo sila ni Jesus kay nahadlok sila sa isiling ukon himuon sang iban nga mga Judiyo kon mahibaluan nila ini. (Juan 3:1, 2; 19:38) May rason sila nga mahadlok. Akig gid ang relihiosong mga lider kay Jesus, gani ang bisan sin-o nga magpahayag nga nagatuo sa iya sikwayon sa sinagoga.—Juan 9:22.
10 Sa pila ka lugar subong, kon ang isa ka lalaki magpakita sang interes sa Dios, sa Biblia, ukon sa relihion, mahimo ipiton sia sang iya mga katrabaho, abyan, ukon mga paryente. Sa iban nga lugar, mahimo nga makatalagam pa gani ang pagsambit parte sa pag-ilis sing relihion. Mas mabudlay pa gid ini kon ang lalaki miembro sang militar, pulitiko, ukon aktibo sa komunidad. Halimbawa, ang lalaki nga taga-Germany nagsiling: “Matuod ang ginabantala ninyo parte sa Biblia. Pero kon mangin Saksi ako subong, buas bal-an na sang tanan. Ano na lang ang isiling sang akon mga katrabaho, mga kaingod, kag sang mga nakakilala sa amon? Indi ko gid ini mabaton.”
11. Paano ginbuligan ni Jesus ang iya mga disipulo nga mabatuan ang kahadlok sa tawo?
11 Maisog ang mga apostoles ni Jesus, pero nakigbato man sila sa kahadlok sa tawo. (Mar. 14:50, 66-72) Paano sila ginbuligan ni Jesus nga mag-uswag bisan pa ginapamatukan sila sang mga tawo? Ginhanda niya sila sa mga pagpamatok nga mahimo nila maatubang. “Malipayon kamo kon ginadumtan kamo sang mga tawo,” siling niya, “kag kon ginasikway nila kamo kag ginapakahuy-an kamo kag ginapakalain ang inyo ngalan subong malaut tungod sa Anak sang tawo.” (Luc. 6:22) Ginpaandaman ni Jesus ang iya mga sumulunod nga makaagi sila sang kahuy-anan kag ini tanan “tungod sa Anak sang tawo.” Ginpasalig man niya sila nga buligan sila sang Dios kon magsalig sila kag mangayo sing bulig kag kusog sa Iya. (Luc. 12:4-12) Dugang pa, gin-agda man ni Jesus ang mga bag-uhan nga makig-upod kag makig-abyan sa iya mga disipulo.—Mar. 10:29, 30.
12. Sa anong mga paagi mabuligan naton ang mga bag-uhan nga mabatuan ang kahadlok sa tawo?
12 Dapat man naton buligan ang mga estudyante sa Biblia nga mabatuan ang kahadlok sa tawo. Mas mahapos atubangon ang kabudlayan kon ginapaabot mo na ini. (Juan 15:19) Halimbawa, buligan naton sia nga maghanda sing simple, makatarunganon kag nabase sa Biblia nga sabat sa mga pamangkot kag pagpamatok nga mahimo niya maatubang sa iya katrabaho ukon sa iban. Luwas sa aton pagpakig-abyan sa iya, ipakilala naton sia sa mga kauturan, ilabi na sa pareho sa iya sing sitwasyon. Labaw sa tanan, tudluan naton sia nga mangamuyo sing regular kag tinagipusuon. Makabulig ini sa iya nga mangin suod kay Jehova kag himuon Sia nga iya Dalangpan kag Igang.—Basaha ang Salmo 94:21-23; Santiago 4:8.
Pagbatyag nga Indi Kalipikado
13. Ngaa ang pila ka lalaki nagapangalag-ag nga makigbahin sa espirituwal nga mga butang?
13 Ang iban nga lalaki nagapangalag-ag sa pagpakigbahin sa espirituwal nga mga butang kay indi sila maayo magbasa, nabudlayan magpabutyag sang ila kaugalingon ukon nahuya sila. Ang pila nasaw-ahan nga ipaambit ang ila pagtamod ukon ginabatyag kon madamo ang tawo. Para sa ila daw indi gid nila masarangan nga magtuon, magkomento sa mga miting, ukon magpaambit sang ila pagtuo sa iban. “Sang bataon pa ako,” siling sang isa ka brother, “madasig ako magpalapit sa puertahan, nagapakunokuno nga gintum-ok ko ang doorbell, kag nagalakat dayon, nagalaum nga tani wala lang sing makakita ukon makabati sa akon. . . . Daw ginahilanat gid ako kon pensaron ko ang parte sa pagpamalaybalay.”
14. Ngaa wala naayo sang mga disipulo ni Jesus ang bata nga lalaki nga ginsudlan sang demonyo?
14 Hunahunaa ang ginbatyag sang mga disipulo ni Jesus sang wala nila mapaayo ang bata nga lalaki nga ginsudlan sang demonyo. Nagpalapit ang amay sang bata kay Jesus kag nagsiling: “Kuyapon [ang akon anak] kag malubha gid, kay pirme sia nagakatumba sa kalayo kag sa tubig; kag gindala ko sia sa imo mga disipulo, apang indi nila sia mapaayo.” Ginpagua ni Jesus ang demonyo kag nag-ayo ang bata nga lalaki. Nian nagpalapit ang mga disipulo kay Jesus kag namangkot: “Ngaa indi namon matabog ini?” Nagsiling sia sa ila: “Bangod sang inyo diutay nga pagtuo. Kay sa pagkamatuod nagasiling ako sa inyo, kon may pagtuo kamo kaangay sa kadakuon sang lamigas sang mustasa, makasiling kamo sa sini nga bukid, ‘Saylo didto,’ kag magasaylo ini, kag wala sing imposible sa inyo.” (Mat. 17:14-20) Kinahanglan ang pagtuo kay Jehova para malandas sang isa ang daw bukid nga mga kabudlayan. Pero indi sia magmadinalag-on kon magsalig lang sia sa iya kaugalingon, gani mahimo magbatyag sia nga indi sia takus mag-alagad kay Jehova.
15, 16. Paano naton mabuligan ang estudyante sa Biblia nga malandas ang pagbatyag nga indi kalipikado?
15 Para mabuligan ang isa nga nagabatyag nga indi kalipikado, palig-unon naton sia nga indi magpokus sa iya kaugalingon kundi magtuo nga buligan sia ni Jehova. Si Pedro nagsulat: “Magpaubos kamo sa idalom sang gamhanan nga kamot sang Dios, agod bayawon niya kamo sa gintalana nga tion; samtang ginatugyan ninyo sa iya ang tanan ninyo nga kabalaka.” (1 Ped. 5:6, 7) Kinahanglan sang aton estudyante sa Biblia ang aton bulig agod mag-uswag sa espirituwal. Ang espirituwal nga tawo nagapabalor gid sa espirituwal nga mga butang. Ginahigugma niya ang Pulong sang Dios kag ginapakita sa iya pagkabuhi “ang mga bunga sang espiritu.” (Gal. 5:22, 23) Importante man sa iya ang pagpangamuyo. (Fil. 4:6, 7) Dugang pa, nagapangayo sia sa Dios sing kaisog kag kusog nga kinahanglan niya para maatubang ang bisan ano nga kahimtangan ukon matungdan sing madinalag-on ang bisan ano nga asaynment.—Basaha ang 2 Timoteo 1:7, 8.
16 Ang pila ka estudyante mahimo nagakinahanglan man sing bulig agod mapauswag ang ila pagbasa, pagpakig-istorya, ukon ikasarang sa paghambal. Ang iban mahimo magbatyag nga indi sila takus mag-alagad sa Dios bangod sang ila malain nga ginhimo antes nila makilala si Jehova. Sa amo sini nga mga kahimtangan, mabuligan naton sila kon ipakita naton ang gugma kag pagkamapinasensiahon. “Ang mga tawo nga mapagros wala nagakinahanglan sang manugbulong,” siling ni Jesus, “kundi ang mga nagamasakit.”—Mat. 9:12.
‘Magpangisda’ sang Mas Madamo Pa nga Lalaki
17, 18. (a) Paano naton maistorya ang mas madamo nga lalaki sa aton ministeryo? (b) Ano ang tun-an naton sa masunod nga artikulo?
17 Gusto gid naton nga mas madamo pa nga lalaki ang magbaton sang makapaumpaw nga mensahe sang Biblia. (2 Tim. 3:16, 17) Gani, paano naton maistorya ang mas madamo nga lalaki sa aton ministeryo? Paagi sa pagbantala sa mga tion nga ang kalabanan sa ila yara sa balay. Halimbawa, sa gab-i, sa Sabado kag Domingo sang hapon, ukon kon piesta opisyal. Kon posible, ang ulo sang panimalay ang aton istoryahon. Puede man naton panaksihan ang aton katrabaho nga mga lalaki kag tinguhaan nga mabuligan ang di-tumuluo nga mga bana sa aton kongregasyon.
18 Sa aton pagbantala, makasalig kita nga magapamati sa aton mensahe ang mga tawo nga nagapangita sing kamatuoran. Mangin mapailubon kita nga buligan sila nga mahangpan ang kamatuoran. Apang paano naton mabuligan ang bawtismado nga mga lalaki sa kongregasyon nga magtinguha kag mangin kalipikado sa responsibilidad sa organisasyon sang Dios? Sabton ini sa masunod nga artikulo.
[Nota]
^ par. 7 Tan-awa ang mga Tuigan nga Libro sang Mga Saksi ni Jehova kag ang mga istorya sang kabuhi nga ginbalhag sa Ang Lalantawan kag Magmata!
Ano ang Imo Sabat?
• Paano mabuligan ang mga lalaki nga unahon ang espirituwal nga mga butang?
• Paano naton mabuligan ang mga bag-uhan nga mabatuan ang kahadlok sa tawo?
• Ano ang mahimo makabulig sa iban nga malandas ang pagbatyag nga indi kalipikado?
[Mga Pamangkot sa Pagtinuon]
[Retrato sa pahina 25]
Nagatinguha ka bala nga makapanaksi sang maayong balita sa mga lalaki?
[Retrato sa pahina 26]
Paano mo mahanda ang imo estudyante sa Biblia nga maatubang ang mga kabudlayan?
