Hanasa ang Iban nga Magtinguha

“Ang tagsatagsa nga natudluan sing himpit mangin subong sang iya manunudlo.”—LUC. 6:40.

1. Sa tion sang iya pagministeryo sa duta, paano nagpasad si Jesus sang isa ka tumalagsahon nga kongregasyon?

SA PAGHINAKOP sang iya Ebanghelyo, si apostol Juan nagsulat: “Sa katunayan, madamo pa nga butang ang ginhimo ni Jesus, nga kon isulat ini sing detalyado, sa banta ko indi makaigo sa kalibutan ang mga linukot nga ginsulat.” (Juan 21:25) Lakip sa mga nahimo ni Jesus sa iya malip-ot apang makugi nga pagministeryo amo ang pagpangita, paghanas, kag pag-organisar sang mga lalaki nga magapanguna kon makahalin na sia. Antes magbalik si Jesus sa langit sang 33 C.E., may napasad na sia nga sadsaran sang isa ka tumalagsahon nga kongregasyon nga madasig nga nagdamo sing linibo.—Binu. 2:41, 42; 4:4; 6:7.

2, 3. (a) Ngaa kinahanglan gid magtinguha ang bawtismado nga mga lalaki? (b) Ano ang binagbinagon sa sini nga artikulo?

² Sa karon, kapin na sa pito ka milyon ang nagabantala sang maayong balita sa sobra 100,000 ka kongregasyon sa bug-os nga kalibutan, amo nga kinahanglan ang mga lalaki nga manguna. Halimbawa, madamo nga gulang ang kinahanglan para manguna sa kongregasyon. Dapat gid hatagan sing komendasyon ang nagatinguha sini nga pribilehiyo sa pag-alagad, kay “nagahandum sia sang maayo nga buhat.”—1 Tim. 3:1.

³ Apang indi awtomatiko nga mangin kalipikado ang mga lalaki para sa pribilehiyo sa kongregasyon. Ang ineskwelahan ukon eksperiensia  sang isa indi makahanda sa iya sa sini nga sahi sang hilikuton. Kinahanglan niya ang espirituwal nga kalipikasyon agod matungdan ang iya pribilehiyo. Luwas sa ikasarang ukon mga hinimuan, dapat may espirituwal sia nga mga kinaiya. Paano mabuligan ang mga lalaki nga mangin kalipikado sa kongregasyon? Si Jesus nagsiling: “Ang tagsatagsa nga natudluan sing himpit mangin subong sang iya manunudlo.” (Luc. 6:40) Sa sini nga artikulo, binagbinagon naton kon paano ginbuligan sang Batid nga Manunudlo nga si Jesucristo ang iya mga disipulo agod makalipikar para sa mas dalagku nga mga responsibilidad, kag hibaluon naton kon ano ang aton matun-an sa sini.

“Ginatawag Ko Kamo nga mga Abyan”

4. Paano ginpakita ni Jesus nga matuod sia nga abyan sa iya mga disipulo?

⁴ Wala gintratar ni Jesus nga manubo sa iya ang iya mga disipulo kundi ginkabig sila subong iya mga abyan. Nakig-upod sia, nagsalig, kag ‘ang tanan nga butang nga nabatian niya sa iya Amay ginpahibalo niya sa ila.’ (Basaha ang Juan 15:15.) Handurawa ang ila kalangkag sang ginsabat ni Jesus ang ila pamangkot: “Ano ang mangin tanda sang imo presensia kag sang katapusan sang sistema sang mga butang?” (Mat. 24:3, 4) Ginsugiran man niya sila sang iya mga panghunahuna kag balatyagon. Halimbawa, sang gab-i nga ginluiban sia, gindala ni Jesus sanday Pedro, Santiago, kag Juan sa hardin sang Getsemane, diin nagpangamuyo sia sing hanuot bangod sang iya nalisang nga tagipusuon. Mahimo wala mabatian sang tatlo ka apostoles ang iya ginpangamuyo, apang mabatyagan nila ang kabudlay sang kahimtangan. (Mar. 14:33-38) Antes sini, hunahunaa man ang epekto sang pagbaylo-dagway ni Jesus sa ila nga tatlo. (Mar. 9:2-8; 2 Ped. 1:16-18) Ang suod nga pagpakig-abyan ni Jesus sa iya mga disipulo amo ang nagpalig-on sa ila nga maatipan ang mabug-at nga mga asaynment sang ulihi.

5. Ano ang pila ka paagi nga makabulig ang mga gulang sa iban?

⁵ Kaangay ni Jesus, ang mga gulang subong nagapakig-abyan man kag nagabulig sa iban. Nangin suod sila sa ila mga masigkatumuluo paagi sa pagpakita sing personal nga interes sa ila. Nahibaluan nila kon ano ang puede kag indi puede isugid. Ang mga gulang nagasalig sa ila mga kauturan kag nagapaambit sang ila natun-an sa Biblia. Wala nila ginakabig nga mas manubo sa ila ang ministeryal nga alagad nga bataon pa. Sa baylo, ginakabig nila sia nga espirituwal nga tawo nga may potensial kag ang iya pag-alagad importante sa kongregasyon.

“Naghatag Ako sa Inyo sang Sulundan”

6, 7. Ilaragway ang ginpahamtang nga huwaran ni Jesus sa iya mga disipulo kag kon ano ang epekto sini sa ila.

⁶ Bisan pa ginaapresyar sang mga disipulo ni Jesus ang espirituwal nga mga butang, ang ila pagtamod naimpluwensiahan man kon kaisa sang ila gindak-an kag kultura. (Mat. 19:9, 10; Luc. 9:46-48; Juan 4:27) Apang wala gid sila ginpakamalaut ukon gin-akigan ni Jesus. Wala man niya sila ginpabug-atan sang di-makatarunganon nga mga sugo ukon ginatulod nga maghimo sang butang nga wala niya ginahimo. Sa baylo, gintudluan sila ni Jesus paagi sa huwaran.—Basaha ang Juan 13:15.

⁷ Ano nga sahi sang huwaran ang ginbilin ni Jesus sa iya mga disipulo? (1 Ped. 2:21) Ginpasimple niya ang iya kabuhi agod hilway sia sa pagbantala. (Luc. 9:58) Mapainubuson sia kag ang iya ginatudlo base gid sa Kasulatan. (Juan 5:19; 17:14, 17) Madali sia palapitan kag mainayuhon. Makita sa iya ginahimo ang iya gugma sa iban. (Mat. 19:13-15; Juan 15:12) Ang iya huwaran may positibo nga epekto sa iya mga apostoles. Halimbawa, nakabulig ini kay Santiago nga mangin maisog kag mag-alagad sing matutom sa Dios asta nga ginpatay sia. (Binu. 12:1, 2) Matutom man nga ginsunod ni Juan ang mga tikang ni Jesus sa masobra 60 ka tuig.—Bug. 1:1, 2, 9.

8. Paano mangin huwaran ang mga gulang sa mas lamharon nga mga lalaki kag sa iban?

⁸ Ang mga gulang nga masinakripisyuhon, mapainubuson, kag mahigugmaon maayo gid nga huwaran para sa mas lamharon nga mga lalaki. (1 Ped. 5:2, 3) Dugang pa, ang mga gulang  nga huwaran sa pagtuo, pagtudlo, pagkabuhi, kag sa ministeryo nalipay gid kon mahibaluan nila nga ginailog sang iban ang ila pagtuo.—Heb. 13:7.

‘Ginpadala Sila ni Jesus, kag Ginsugo Sila’

9. Paano naton nahibaluan nga ginhanas ni Jesus ang iya mga disipulo sa pagbantala?

⁹ Pagkatapos magbantala sing makugi sa sulod sang halos duha ka tuig, ginpasangkad ni Jesus ang hilikuton paagi sa pagpadala sang iya 12 ka apostoles. Apang gin-instruksionan niya anay sila. (Mat. 10:5-14) Sang buot niya pakaunon sing milagruso ang linibo, naghatag sia sang instruksion sa iya mga disipulo kon paano organisahon ang mga tawo kag ipanagtag ang pagkaon. (Luc. 9:12-17) Ginapakita sini nga ginhanas ni Jesus ang iya mga disipulo paagi sa paghatag sa ila sing maathag kag espesipiko nga instruksion. Ini nga paghanas upod ang panuytoy sang balaan nga espiritu, amo ang nagbulig sa mga apostoles sang ulihi nga organisahon ang masangkad nga pagbantala sugod sang 33 C.E. kag pagkatapos sini.

10, 11. Paano mahanas sa progresibo nga paagi ang mga bag-uhan?

¹⁰ Sa karon, nagasugod ang aton pagtudlo sa isa ka lalaki kon magbaton sia sang pagtuon sa Biblia. Basi kinahanglan pa naton sia tudluan nga magbasa sing maayo. Sa padayon niya nga pagtuon mabuligan pa naton sia sa iban nga paagi. Kon regular na sia nga magtambong sa mga miting, matun-an pa niya ang iya dapat himuon para makapakigbahin sa Teokratikong Eskwelahan Para sa Ministeryo kag mangin di-bawtismado nga manugbantala. Kon mabawtismuhan na sia, mahimo pa gid sia hanason sang iban nga brother sa pila ka butang subong sang pagmentinar sang Kingdom Hall. Sa ulihi, mahimo mapaathag sa iya kon ano ang himuon agod mangin ministeryal sia nga alagad.

¹¹ Kon hatagan sing asaynment ang bawtismado nga utod nga lalaki, ginapaathag sa iya sang gulang ang pila ka panuytoy sang organisasyon parte sa sini kag kon paano niya ini himuon. Dapat mahangpan niya kon ano ang ginapaabot sa iya. Kon ginabudlayan sia sa ginapahimo sa iya, indi dayon maghinakop ang gulang nga indi na sia kalipikado. Sa baylo, mainayuhon nga ipaathag liwat sa iya kon ano ang dapat niya himuon kag kon paano niya ini himuon. Nalipay ang mga gulang kon makita nila nga nagauswag ang utod kag nalipay sa asaynment nga ginahatag sa iya.—Binu. 20:35.

“Ang Maalam Nagapamati sa Laygay”

12. Ngaa epektibo ang laygay ni Jesus?

¹² Ginhanas ni Jesus ang iya mga disipulo paagi sa paglaygay sa kada isa sa ila suno sa ila mga kinahanglanon. Halimbawa, ginsabdong niya sanday Santiago kag Juan kay luyag nila magpanaug ang kalayo gikan sa langit agod laglagon ang mga Samaritano nga wala magbaton kay Jesus. (Luc. 9:52-55) Sang ginpalapitan sia sang iloy nanday Santiago kag Juan agod mangabay nga hatagan sila sing maayo nga posisyon sa Ginharian, ginprangka sila ni Jesus: “Ining paglingkod sa akon tuo kag sa akon wala indi ako ang magahatag, kundi ila ini sang mga gin-amanan sini sang akon Amay.” (Mat. 20:20-23) Ang tanan nga laygay ni Jesus maathag, praktikal, kag napasad gid sa mga prinsipio sang Dios. Gintudluan niya ang iya mga disipulo nga mangatarungan suno sa sini nga mga prinsipio. (Mat. 17:24-27) Nahibaluan man niya ang limitasyon sang iya mga sumulunod kag wala sia magpaabot sang kahimpitan sa ila. Ginlaygayan niya sila bangod ginahigugma gid niya sila.—Juan 13:1.

13, 14. (a) Sin-o ang nagakinahanglan sing laygay? (b) Maghatag sing mga halimbawa kon paano laygayan sang gulang ang isa nga wala nagauswag sa espirituwal.

¹³ Ang tagsa ka lalaki nga nagatinguha sang responsibilidad sa Cristianong kongregasyon nagakinahanglan kon kaisa sing laygay base sa Kasulatan. “Ang maalam nagapamati sa laygay,” siling sang Hulubaton 12:15. “Ang pinakamabudlay nga hangkat para sa akon amo ang pagkadihimpit,” siling sang isa ka utod nga lalaki. “Ginbuligan ako sang isa ka gulang nga maintiendihan nga indi ko kinahanglan nga mangin himpit agod makaalagad.”

 ¹⁴ Kon matalupangdan sang mga gulang nga wala nagauswag sa espirituwal ang isa ka utod nga lalaki bangod sang iya kwestionable nga paggawi, ginatinguhaan nila nga ipasibu sia sa espiritu sang kalulo. (Gal. 6:1) Kon kaisa, kinahanglan ang laygay bangod sang pila ka batasan. Halimbawa, kon ang isa ka utod uyaya, makabulig sa gulang kon ipadaku niya nga si Jesus makugi nga manugbantala sang Ginharian kag nagsugo sa iya mga sumulunod nga maghimo sing mga disipulo. (Mat. 28:19, 20; Luc. 8:1) Kon ang utod daw ambisyuso, mahimo ipatalupangod sa iya sang gulang kon paano ginbuligan ni Jesus ang Iya mga disipulo nga mahangpan ang katalagman sang paghandum sang kabantugan. (Luc. 22:24-27) Paano kon indi mapinatawaron ang utod nga lalaki? Makabulig sa iya ang ilustrasyon sang ulipon nga wala magpatawad sa diutay nga utang sang iya masigkaulipon bisan sia mismo ginpatawad sang iya daku nga utang. (Mat. 18:21-35) Kon kinahanglanon ang laygay, maayo nga himuon ini gilayon sang mga gulang.—Basaha ang Hulubaton 27:9.

“Hanasa ang Imo Kaugalingon”

15. Paano makabulig sa isa ka lalaki ang iya pamilya sa pag-alagad niya sa iban?

¹⁵ Ang mga gulang amo ang nagapanguna sa paghanas sang mga lalaki nga nagatinguha, pero may mabulig man ang iban. Halimbawa, makabulig sa iya ang iya pamilya. Kag kon gulang na sia, masakdag sia sang iya pamilya samtang nagapangabudlay sia sing lakas para sa kongregasyon. Naintiendihan sang iya pamilya nga dapat niya hatagan sing tion kag kusog ang iban. Nalipay sia kon ginabuligan sia sang iya pamilya agod maatipan niya sing maayo ang iya mga responsibilidad. Ginaapresyar gid naton ang mga sakripisyo nga ginahimo sang pamilya sang mga gulang.—Hulu. 15:20; 31:10, 23.

16. (a) Sin-o ang may panguna nga responsibilidad sa pagtinguha? (b) Paano matinguhaan sang isa ka lalaki ang mga pribilehiyo sa kongregasyon?

¹⁶ Bisan pa mabuligan sia kag masuportahan sang iban, sia mismo ang may panguna nga responsibilidad sa paglab-ot sang pribilehiyo. (Basaha ang Galacia 6:5.) Siempre indi na kinahanglan nga mangin ministeryal nga alagad pa ukon gulang ang isa agod makabulig sa iban kag makapakigbahin sing bug-os sa ministeryo. Apang, ang pagtinguha sang mga pribilehiyo sa kongregasyon nagakahulugan sang paglab-ot sang mga kalipikasyon nga yara sa Kasulatan. (1 Tim. 3:1-13; Tito 1:5-9; 1 Ped. 5:1-3) Gani kon luyag sang isa nga mangin ministeryal nga alagad ukon gulang pero wala pa sia matangdo, dapat talupangdon niya kon diin ang iya palauswagon sa espirituwal. Nagakinahanglan ini sang regular nga pagbasa sang Biblia, maukod nga pagtuon sing personal, serioso nga pagpamalandong, tinagipusuon nga pangamuyo, kag makugi nga pagpakigbahin sa ministeryo. Sa sini nga paagi, maaplikar niya ang laygay ni Pablo kay Timoteo: “Hanasa ang imo  kaugalingon nga ang imo tulumuron amo ang diosnon nga debosyon.”—1 Tim. 4:7.

17, 18. Ano ang himuon sang isa ka bawtismado nga brother kon ginapunggan sia sang kabalaka, pagbatyag nga indi kalipikado, ukon sang kakulang sing motibasyon nga magtinguha?

¹⁷ Apang ano abi kon ang isa ka lalaki wala nagatinguha kay para sa iya indi sia kalipikado? Maayo nga binagbinagon niya ang ginhimo ni Jehova nga Dios kag ni Jesucristo para sa aton. Sa pagkamatuod, si Jehova “nagadala adlawadlaw sang aton lulan.” (Sal. 68:19) Gani ang aton langitnon nga Amay makabulig sa isa nga magtigayon sing responsibilidad sa kongregasyon. Makabulig sa isa nga indi pa ministeryal nga alagad ukon gulang kon pensaron niya nga madamo pa nga hamtong nga lalaki ang kinahanglan para sa mga pribilehiyo sa pag-alagad sa organisasyon sang Dios. Ang pagbinagbinag sini makapahulag sa isa nga manikasog nga malandas ang negatibo nga mga panimuot. Makapangamuyo sia sang balaan nga espiritu, nga ginadumdom nga lakip sa bunga sini ang paghidait kag pagpugong sa kaugalingon—mga kinaiya nga kinahanglanon para madula ang kabalaka ukon pagbatyag nga indi kalipikado. (Luc. 11:13; Gal. 5:22, 23) Kag makasalig ang isa nga ginapakamaayo ni Jehova ang tanan nga nagatinguha nga may nagakaigo nga motibo.

¹⁸ Indi ayhan ang kakulang sang motibasyon ang nagapugong sa isa ka lalaki nga magtinguha? Ano ang makabulig sa iya kon wala sia sing handum nga mag-alagad? Si apostol Pablo nagsulat: “Ang Dios amo ang isa nga tungod sa iya nahamut-an nagapanghikot sa sulod ninyo agod magbuot kamo kag manghikot.” (Fil. 2:13) Halin sa Dios ang handum nga mag-alagad, kag ang espiritu ni Jehova makapabakod sa isa nga nagaalagad. (Fil. 4:13) Dugang pa, makapangamuyo ang isa ka Cristiano nga buligan sia sang Dios nga himuon ang maayo.—Sal. 25:4, 5.

19. Ano ang ginapasalig sa aton sang pagbangon sang “pito ka manugpahalab kag walo ka principe”?

¹⁹ Ginapakamaayo gid ni Jehova ang panikasog sang mga gulang sa paghanas sa iban. Ini nga pagpakamaayo maeksperiensiahan man sang mga nagahandum kag nagatinguha sang mga pribilehiyo sa kongregasyon. Ang Kasulatan nagapasalig sa aton nga ang Dios magabangon sang “pito ka manugpahalab kag walo ka principe”—ang husto nga kadamuon sang responsable nga mga lalaki—nga magapanguna sa organisasyon ni Jehova. (Miq. 5:5) Daku gid nga pagpakamaayo nga madamo nga Cristianong lalaki ang ginahanas kag mapainubuson nga nagatinguha sang mga pribilehiyo sa pag-alagad para sa kadayawan ni Jehova!

Ano ang Imo Sabat?

• Paano ginbuligan ni Jesus ang iya mga disipulo nga mangin kalipikado para sa mas dalagku nga mga responsibilidad?

• Paano mailog sang mga gulang si Jesus samtang ginahanas nila ang iban nga lalaki nga manguna sa kongregasyon?

• Ano ang papel sang pamilya sang isa ka lalaki sa pagbulig sa iya nga magtinguha sang mga pribilehiyo?

• Ano ang himuon sang isa ka lalaki kon nagatinguha sia sang mga pribilehiyo?

[Mga Pamangkot sa Pagtinuon]

[Mga Retrato sa pahina 31]

Ano nga paghanas ang mahatag mo sa imo estudyante sa Biblia samtang nagatinguha sia nga mag-uswag?

[Retrato sa pahina 32]

Paano mapakita sang mga lalaki nga nagatinguha sila?