Para sa Kabuhi kag Paghidait, Maglakat Suno sa Espiritu

“Nagalakat, indi suno sa unod, kundi suno sa espiritu.”—ROMA 8:4.

1, 2. (a) Ano ang katalagman kon wala nagakonsentrar ang drayber? (b) Ano ang katalagman kon ang isa wala nagakonsentrar sa espirituwal?

“ANG paghimo sang iban nga butang samtang nagadrayb nangin problema na gid, kag daw labi ini nga nagalala kada tuig.” Amo sini ang ginsiling sang sekretaryo sang transportasyon sa Estados Unidos. Ang isa sa makaagaw sang atension sang drayber amo ang cell phone. Suno sa isa ka surbe, masobra sa 30 porsiento sang mga gin-interbyu ang nagsiling nga nabungguan sila ukon diutayan lang mabungguan sang drayber nga nagagamit sing cell phone. Abi sang mga tawo, makakinot sila sing tion kon himuon nila ang pila ka butang samtang nagadrayb, pero delikado gid ini.

² Mahimo man ini matabo sa aton kaangtanan sa Dios. Pareho sang drayber nga indi makatalupangod sang mga palatandaan sang katalagman bangod wala sia nagakonsentrar, madali man mahulog sa katalagman ang isa nga wala nagakonsentrar sa espirituwal. Kon tugutan naton nga maanod kita palayo sa  aton dalanon kag mga hilikuton subong Cristiano, mahimo maguba ang aton pagtuo. (1 Tim. 1:18, 19) Si apostol Pablo nagpaandam sa iya mga masigka-Cristiano sa Roma: “Ang paghunahuna sa unod nagakahulugan sang kamatayon, apang ang paghunahuna sa espiritu nagakahulugan sang kabuhi kag paghidait.” (Roma 8:6) Ano ang buot silingon ni Pablo? Paano naton malikawan “ang paghunahuna sa unod” kag ‘maghunahuna sa espiritu’?

Wala Sila sing Pagpakamalaut

3, 4. (a) Ano nga pagpakigbato ang ginsugid ni Pablo? (b) Ngaa dapat kita mangin interesado sa sini?

³ Sa iya sulat sa mga taga-Roma, ginsugid ni Pablo ang iya mismo pagpakigbato sa pagsumpakilay sang iya lawas kag hunahuna. (Basaha ang Roma 7:21-23.) Wala niya ini ginhambal agod pakamatarungon ukon kaluuyan ang iya kaugalingon. Indi man niya buot silingon nga imposible na niya mahimo ang husto. Hamtong sia kag hinaplas nga Cristiano, nga ginpili nga mangin “apostol sa mga pungsod.” (Roma 1:1; 11:13) Gani ngaa ginsugid niya ang iya pagpakigbato?

⁴ Ginbaton ni Pablo nga kon sia lang, indi gid niya mahimo ang kabubut-on sang Dios nga gusto niya himuon. Ngaa? “Ang tanan nakasala kag wala makalab-ot sa himaya sang Dios,” siling niya. (Roma 3:23) Subong kaliwat ni Adan, si Pablo indi man himpit. Mahangpan naton ang iya ginabatyag, kay indi man kita himpit kag pareho sa iya ang aton ginapakigbatuan adlaw-adlaw. Isa pa, madamo ang makaagaw sang aton atension kag makapalisa sa aton sa ‘masipot nga dalan nga nagapadulong sa kabuhi.’ (Mat. 7:14) Apang may nahimo si Pablo, kag amo man kita.

5. Ano ang nakabulig kag nakapaumpaw kay Pablo?

⁵ Si Pablo nagsulat: “Sin-o ang magaluwas sa akon . . . ? Salamat sa Dios paagi kay Jesucristo nga aton Ginuo!” (Roma 7:24, 25) Dayon, ginpatuhuyan niya ang mga “nahiusa kay Cristo Jesus”—ang hinaplas nga mga Cristiano. (Basaha ang Roma 8:1, 2.) Paagi sa iya balaan nga espiritu, gin-adoptar sila ni Jehova bilang mga anak kag gintawag sila agod mangin “kaupod nga mga manunubli ni Cristo.” (Roma 8:14-17) Sa bulig sang espiritu sang Dios kag sang ila pagtuo sa halad-gawad ni Cristo, nagdaug sila sa pagpakigbato nga ginsambit ni Pablo kag gani ‘wala sila sing pagpakamalaut.’ Nahilway sila sa “kasuguan sang sala kag sang kamatayon.”

6. Ngaa dapat talupangdon sang tanan nga alagad sang Dios ang ginsiling ni Pablo?

⁶ Bisan pa ang hinaplas nga mga Cristiano ang ginpatuhuyan ni Pablo, ang iya ginsiling parte sa espiritu sang Dios kag sa halad-gawad ni Cristo makabulig gihapon sa tanan nga alagad ni Jehova bisan diin man ang ila paglaum. Gintuytuyan si Pablo sa pagsulat sini nga laygay sa mga hinaplas, gani dapat mahangpan ini sang tanan nga alagad sang Dios agod makabenepisyo man sila.

Kon Paano “Ginpakamalaut sang Dios ang Sala sa Unod”

7, 8. (a) Ngaa ang Kasuguan ‘maluya tungod sa unod’? (b) Ano ang nahimo sang Dios paagi sa iya espiritu kag sa gawad?

⁷ Sa kapitulo 7 sang Roma, ginsambit ni Pablo ang gahom sang sala sa di-himpit nga unod. Sa kapitulo 8, nagkomento sia parte sa gahom sang balaan nga espiritu. Ginpaathag sang apostol kon paano ang espiritu sang Dios makabulig sa mga Cristiano nga mabatuan ang gahom sang sala. Sa amo, mapahisuno nila ang ila kabuhi sa kabubut-on ni Jehova kag matigayon ang iya kahamuot. Ginpadaku ni Pablo nga paagi sa espiritu sang Dios kag sa halad-gawad sang iya Anak, nahimo sang Dios ang wala mahimo sang Mosaikong Kasuguan.

⁸ Ang madamo nga sugo sang Kasuguan nagapakamalaut sa mga makasasala. Dugang pa, ang mataas nga mga saserdote sang Israel nga nagaalagad sa idalom sang Kasuguan indi  himpit kag indi makadulot sang nagakaigo nga halad para sa sala. Gani, ang Kasuguan ‘maluya tungod sa unod.’ Apang, “paagi sa pagpadala sang iya Anak sa dagway nga kaangay sa makasasala nga unod” kag sa paghalad sa iya subong gawad, “ginpakamalaut sang Dios ang sala sa unod,” kag gindaug ang ‘wala sing mahimo nga Kasuguan.’ Bilang resulta, ang hinaplas nga mga Cristiano makabig nga matarong suno sa ila pagtuo sa halad-gawad ni Jesus. Ginsugo sila nga ‘maglakat, indi suno sa unod, kundi suno sa espiritu.’ (Basaha ang Roma 8:3, 4.) Huo, dapat sila magpabilin nga matutom tubtob matapos nila ang ila dutan-on nga kabuhi agod mabaton nila ang “korona sang kabuhi.”—Bug. 2:10.

9. Ano ang kahulugan sang tinaga nga “kasuguan” sa Roma 8:2?

⁹ Magluwas sa “Kasuguan,” ginsambit pa gid ni Pablo “ang kasuguan sang espiritu” kag ang “kasuguan sang sala kag kamatayon.” (Roma 8:2) Ano ini? Ang tinaga diri nga “kasuguan” wala nagapatuhoy sa pila ka pagsulundan, subong sang yara sa Mosaikong Kasuguan. Suno sa isa ka reperensia ang Griego nga termino diri para sa kasuguan nagapatuhoy sa maayo ukon malain nga mga butang nga ginahimo sang mga tawo nga daw kasuguan nga nagakontrol sa ila. Nagapatuhoy man ini sa mga talaksan nga ginasunod nila.

10. Paano kita napaidalom sa kasuguan sang sala kag kamatayon?

¹⁰ Si apostol Pablo nagsulat: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.” (Roma 5:12) Bilang kaliwat ni Adan, tanan kita napaidalom sa kasuguan sang sala kag kamatayon. Ang aton makasasala nga unod masami nga nagasugo sa aton nga supakon ang Dios, kag nagaresulta ini sang kamatayon. Sa iya sulat sa mga taga-Galacia, gintawag ni Pablo ini nga mga buhat kag kinaiya nga “mga buhat sang unod.” Nagdugang pa sia: “Ang mga nagabuhat sini nga mga butang indi makapanubli sang ginharian sang Dios.” (Gal. 5:19-21) Ini sila pareho sa mga tawo nga nagalakat suno sa unod. (Roma 8:4) Ang mga butang nga ginahimo nila nga daw kasuguan nga nagakontrol sa ila kag ang mga talaksan nga ginasunod nila suno tanan sa unod. Apang ang mga nagahimo lang bala sang pagpakighilawas, idolatriya, espiritismo, kag iban pa mabug-at nga mga sala ang nagalakat suno sa unod? Indi, kay ang mga buhat sang unod nagalakip man sang ginakabig  sang iban nga kaluyahon lang pareho sang kaimon, pagsilabo sang kaakig, pagbaisay, kag paghinisaay. Gani, sin-o ang makasiling nga wala na gid sia nagalakat suno sa unod?

11, 12. Ano ang gin-aman ni Jehova para buligan kita nga madaug ang kasuguan sang sala kag kamatayon, kag ano ang dapat naton himuon para kahamut-an kita sang Dios?

¹¹ Maayo lang kay may ginhimo si Jehova para madaug naton ang kasuguan sang sala kag kamatayon! Si Jesus nagsiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16-18) Gani, kabay nga mapahulag kita nga magpabutyag pareho ni Pablo: “Salamat sa Dios paagi kay Jesucristo nga aton Ginuo!”

¹² Ang aton kahimtangan pareho sang isa nga ginabulong sa malubha nga balatian. Kon gusto naton nga mag-ayo sing bug-os, dapat sundon naton ang ginasiling sang doktor. Ang pagtuo sa gawad makahilway sa aton sa kasuguan sang sala kag kamatayon, pero indi pa kita himpit kag makasasala gihapon. May dapat pa kita himuon para mangin suod sa Dios kag matigayon ang iya kahamuot kag pagpakamaayo. Agod mahimo naton ang “matarong nga ginapatuman sang Kasuguan,” nagsiling man si Pablo nga dapat kita maglakat suno sa espiritu.

Paglakat Suno sa Espiritu—Paano?

13. Ano ang buot silingon sang paglakat suno sa espiritu?

¹³ Kon nagalakat kita, nagapadulong kita sa isa ka destinasyon ukon tulumuron. Gani ang paglakat suno sa espiritu nagakahulugan nga padayon kita nga nagauswag sa espirituwal. Pero wala ini nagakahulugan nga indi na gid kita makasala. (1 Tim. 4:15) Tubtob sa aton masarangan dapat naton tinguhaan nga maglakat ukon magkabuhi suno sa panuytoy sang espiritu adlaw-adlaw. Ang “paglakat suno sa espiritu” nagapahamuot sa Dios.—Gal. 5:16.

14. Ano ang huyog sang mga “suno sa unod”?

¹⁴ Sa sulat ni Pablo sa mga taga-Roma, ginsambit niya ang duha ka sahi sang tawo nga may nagasumpakilay nga panghunahuna. (Basaha ang Roma 8:5.) Ang unod nga ginapatuhuyan diri indi ang pisikal nga lawas. Sa Biblia, ang tinaga nga “unod” ginagamit kon kaisa sa pagkamakasasala kag pagkadihimpit. Amo ini ang ginabangdan sang pagsumpakilay sang lawas kag hunahuna nga ginsambit ni Pablo kaina. Apang indi pareho sa iya, “ang mga suno sa unod” wala  nagapakigbato. Sa baylo nga binagbinagon ang ginapatuman sang Dios kag batunon ang iya bulig, ‘ginapahamtang nila ang ila hunahuna sa mga butang sang unod.’ Sa masami, mas importante sa ila ang pagpaayaw sang ila undanon kag pisikal nga mga handum. Sa pihak nga bahin, ang mga “suno sa espiritu” nagapahamtang sang ila hunahuna sa “mga butang sang espiritu”—sa espirituwal nga mga aman kag hilikuton.

15, 16. (a) Paano makaapektar sa isa ang pagpahamtang sang iya hunahuna sa isa ka butang? (b) Ano ang masiling naton sa ginahunahuna sang kalabanan subong?

¹⁵ Basaha ang Roma 8:6. Agod mahimo ang isa ka butang—maayo man ini ukon malain—dapat ipahamtang sang isa ang iya hunahuna sa sini. Ang mga tawo nga pirme nagapahamtang sang ila hunahuna sa mga butang sang unod magapalambo sang hunahuna ukon huyog nga nasentro sa sini. Sa masami, diri na lang nakapokus ang ila pagtamod, interes, kag balatyagon.

¹⁶ Ano ang ginakawilihan sang kalabanan subong? Si apostol Juan nagsulat: “Ang tanan nga butang sa kalibutan—ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa—indi gikan sa Amay, kundi gikan sa kalibutan.” (1 Juan 2:16) Lakip sa sini ang imoralidad, kabantugan, kag mga pagkabutang. Ang mga libro, magasin, pamantalaan, pelikula, programa sa TV, kag Internet puno sini nga mga butang bangod diri ginapahamtang sang mga tawo ang ila hunahuna kag amo ini ang ila gusto. Apang, ang “paghunahuna sa unod nagakahulugan sang kamatayon”—sa espirituwal subong kag sa pisikal sa dili madugay. Ngaa? “Bangod ang paghunahuna sa unod nagakahulugan sang kaawayon sa Dios, kay wala ini napasakop sa kasuguan sang Dios, sa katunayan, indi gid ini mapasakop. Gani ang mga nahisuno sa unod indi makapahamuot sa Dios.”—Roma 8:7, 8.

17, 18. Paano naton matinguhaan ang paghunahuna sa espiritu, kag ano ang resulta kon himuon naton ini?

¹⁷ Sa pihak nga bahin, “ang paghunahuna sa espiritu nagakahulugan sing kabuhi kag paghidait”—kabuhi nga dayon sa palaabuton kag paghidait sa hunahuna kag sa Dios subong. Paano naton matinguhaan “ang paghunahuna sa espiritu”? Paagi sa regular nga pagpahamtang sang aton hunahuna sa mga butang sang espiritu kag sa pagpalambo sang huyog kag panimuot sa espirituwal. Samtang ginahimo naton ini, ang aton hunahuna “napasakop sa kasuguan sang Dios” kag “nahisuno” sa iya panghunahuna. Kon ginasulay kita, indi kita magduhaduha sang aton himuon. Mapahulag kita nga himuon ang husto, ang suno sa espiritu.

¹⁸ Gani, importante nga hunahunaon naton ang mga butang sang espiritu. Mahimo naton ini paagi sa ‘paghanda sang aton hunahuna para sa hilikuton,’ nga ginasentro ang aton pagkabuhi sa espirituwal nga rutina, subong sang regular nga pangamuyo, pagbasa kag pagtuon sang Biblia, pagtambong sa miting, kag Cristianong ministeryo. (1 Ped. 1:13) Sa baylo nga tugutan naton nga agawon sang mga butang sang unod ang aton hunahuna, ipahamtang naton ini sa mga butang sang espiritu, kag sa amo makalakat kita suno sa espiritu. Kon himuon naton ini, pakamaayuhon kita, kay ang paghunahuna sa espiritu nagakahulugan sang kabuhi kag paghidait.—Gal. 6:7, 8.

Mapaathag Mo Bala?

• Ano ang ‘indi mahimo sang Kasuguan,’ kag paano ini gindaug sang Dios?

• Ano ang “kasuguan sang sala kag sang kamatayon,” kag paano kita mahilway sa sini?

• Paano naton mapalambo ang “paghunahuna sa espiritu”?

[Mga Pamangkot sa Pagtinuon]

[Mga Retrato sa pahina 12, 13]

Nagalakat ka bala suno sa unod ukon suno sa espiritu?