Indi Pagtuguti nga Dulaon sang Balatian ang Imo Kalipay

HANDURAWA nga pagbugtaw mo pa lang gusto mo na matapos ang adlaw. Atubangon mo naman ang pisikal ukon emosyonal nga kasakit. Ayhan pareho ni Job, makasiling ka: “Maayo pa ang kamatayon sang sa pag-antus.” (Job 7:15, Biblia sang Katilingban sang mga Kristiano) Kamusta kon ang imo balatian nagapadayon sing tinuig?

Amo ini ang kahimtangan ni Mefiboset nga anak ni Jonathan nga abyan ni Hari David. Sang lima ka tuig sia, “naholog [sia], kag napiang.” (2 Sam. 4:4) Nadugangan pa gid ang iya kasakit sang gin-akusahan sia nga nagluib sa hari amo nga nadula niya ang iya mga pagkabutang. Apang padayon sia nga nangin maayong halimbawa sa pag-atubang sang balatian, pagpasipala, kag kalugaw-an. Wala niya gintugutan nga dulaon sini ang iya kalipay.—2 Sam. 9:6-10; 16:1-4; 19:24-30.

Ang isa pa ka halimbawa amo si apostol Pablo. Nagsulat sia parte sa “tunok sa unod” nga iya gin-antos. (2 Cor. 12:7) Ang tunok nga iya ginsambit mahimo nga amo ang iya madugay na nga balatian ukon ang mga tawo nga nagapamatok sa iya pagkaapostol. Bisan diin man sa sini, nagpadayon ang problema, kag kinahanglan niya atubangon ang pisikal kag emosyonal nga kasakit nga resulta sini.—2 Cor. 12:9, 10.

May mga alagad man ang Dios subong nga nagaantos sang malala nga balatian ukon problema sa emosyon. Si Magdalena nga 18 anyos, may systemic lupus erythematosus, isa ka balatian nga ginaguba sang immune system ang mga organo sang lawas. “Nahadlok gid ako,” siling niya. “Samtang nagadugay, nagabudlay pa gid ang akon kahimtangan kag naglala ang akon balatian kay indi ako matunawan, madamo sing sungaw sa baba, kag may problema sa thyroid.” Si Izabela naman, nagaantos sang balatian nga indi madali matalupangdan. Nagsiling sia: “Bata pa ako sang nagsugod ang akon depresyon. Bangod sini ginanerbyos ako, nabudlayan magginhawa, kag ginasakitan sang tiyan. Gani, pirme ako ginakapoy.”

Pag-atubang sa Kamatuoran

Ang balatian kag kasablagan mabudlay gid. Kon matabo ina, makabulig ang pag-usisa sing maayo sa imo sitwasyon. Indi mahapos batunon nga madamo ka na sang indi mahimo. Si Magdalena nagsiling: “Nagalala ang akon balatian. Ginakapoy ako bisan magbangon lang. Indi ako makaplano sing abanse kay indi ko mabal-an kon san-o ako atakehon. Nasubuan gid ako kay indi ko na mahimo ang mahimo ko sadto sa pag-alagad kay Jehova.”

Si Zbigniew nagpaathag: “Sa pagligad sang tinuig, nagluya ako bangod sang rheumatoid arthritis nga amat-amat nga naghalit sa akon mga lutalutahan. Kon grabe ang  pagpalamanog, wala ako sing bisan ano nga mahimo. Nasubuan gid ako.”

Mga pila ka tuig ang nagligad, natukiban nga may tumor sa utok si Barbara. “Nabatyagan ko dayon ang pagbag-o sa akon lawas,” siling niya. “Pirme ako ginakapoy kag ginasakitan sang ulo, kag indi ako makakonsentrar. Bangod sini, kinahanglan ko bag-uhon ang akon pagkabuhi.”

Sila tanan mga dedikado nga alagad ni Jehova. Ang ila prioridad amo ang paghimo sang kabubut-on sang Dios. Nagasalig sila sing bug-os sa Dios kag nabatyagan nila ang iya bulig.—Hulu. 3:5, 6.

Paano Nagabulig si Jehova?

Indi gid naton paghunahunaon nga ginapiutan kita kay wala nahamuot sa aton ang Dios. (Pan. 3:33) Binagbinaga ang gin-atubang ni Job bisan sia “himpit kag matarung.” (Job 1:8) Ang Dios wala nagatilaw kay bisan sin-o sang malaut nga mga butang. (Sant. 1:13) Ang tanan nga balatian—lakip ang malala na nga balatian kag problema sa emosyon—ginpanubli naton sa aton unang mga ginikanan nga sanday Adan kag Eva.—Roma 5:12.

Apang indi pagpabay-an ni Jehova kag ni Jesus ang mga matarong. (Sal. 34:15) Sa mabudlay nga mga kahimtangan sang aton kabuhi, labi naton nga mabatyagan nga ang Dios amo ang ‘aton dalangpan kag aton kuta.’ (Sal. 91:2) Gani, kon may kabudlayan, ano ang makabulig sa aton nga makapabilin nga malipayon?

Pangamuyo: Pareho sa mga matutom nga alagad sang Dios sadto, mahimo naton itugyan ang aton lulan sa aton langitnon nga Amay paagi sa pangamuyo. (Sal. 55:22) Paagi sa sini, maeksperiensiahan naton “ang paghidait sang Dios nga nagalabaw sa tanan nga panghunahuna.” Ini nga paghidait “magabantay sang inyo tagipusuon kag sang inyo ikasarang sa paghunahuna.” (Fil. 4:6, 7) Ang pagsalig sa Dios paagi sa pangamuyo, nakabulig kay Magdalena nga maatubang ang iya nagalala nga balatian. Nagsiling sia: “Sang ginbubo ko ang akon ginabatyag kay Jehova, naumpawan ako kag nagbalik ang akon kalipay. Naintiendihan  ko na subong kon ngaa dapat magsalig sa Dios adlaw-adlaw.”—2 Cor. 1:3, 4.

Bilang sabat sa imo mga pangamuyo, ginahatagan ka ni Jehova sing kusog paagi sa balaan nga espiritu, sa iya Pulong, kag mga kauturan. Indi pagpaabuta nga dulaon sang Dios ang imo balatian paagi sa milagro. Pero, makapangayo ka sa iya sang kaalam kag kusog nga kinahanglan mo para maatubang ang tagsa ka kabudlayan. (Hulu. 2:7) Palig-unon ka niya kag hatagan sang “gahom nga labaw sa kinaandan.”—2 Cor. 4:7.

Pamilya: Ang mahigugmaon kag mapinalanggaon nga mga kaupod sa balay makabulig sa imo nga mabatas ang balatian. Pero dumduma nga nagaantos man ang imo mga hinigugma. Ayhan nagabatyag sila nga wala man sila sing mahimo. Pero, wala ka nila ginapabay-an bisan sa mabudlay nga mga tion. Ang pagpangamuyo sing ululupod makabulig sa inyo nga makapabilin nga kalmado.—Hulu. 14:30.

Si Barbara nagsiling parte sa iya bata nga babayi kag sa mga pamatan-on sa kongregasyon: “Ginabuligan nila ako nga makabantala. Ang ila kakugi nagapalig-on kag nagapahalipay sa akon.” Ginpabaloran gid ni Zbigniew ang suporta sang iya asawa. “Sia ang nagaobra sang tanan nga ulubrahon sa balay. Sia pa ang nagapailis sa akon kag nagadala sang akon bag sa mga miting kag pagbantala.”

Kauturan: Kon upod naton ang mga kauturan, mapalig-on kita kag malugpayan. Pero kamusta naman kon indi ka makatambong sa mga miting bangod sa balatian? Si Magdalena nagsiling: “Ginasigurado gid sang kongregasyon nga makabenepisyo ako sa mga miting paagi sa pagrekord sini. Ginatawgan ako sang mga kauturan para mahibaluan kon ano pa ang puede nila mabulig. Ginapalig-on man nila ako paagi sa mga sulat. Ang ila pagdumdom kag kabalaka nakabulig gid sa akon nga magbatas.”

Si Izabela nga may depresyon, nagsiling: “Sa sulod sang kongregasyon, madamo ako sang ‘amay’ kag ‘iloy,’ nga nagapamati kag nagaintiendi sa akon. Ang kongregasyon ang akon pamilya—diri ko naeksperiensiahan ang paghidait kag kalipay.”

 Mas maayo nga indi ‘magpain sang ila kaugalingon’ ang mga may problema. Sa baylo, dapat sila makig-upod sa kongregasyon. (Hulu. 18:1) Mahimo pa gani sila makapalig-on sa iban. Natural lang nga daw nahuya ka nga isugid sa mga kauturan ang imo kinahanglan. Pero, luyag nila ini mahibaluan agod mapakita nila ang “di-salimpapaw nga utudnon nga pagpalangga.” (1 Ped. 1:22) Ngaa indi mo sila pagpahibaluon nga kinahanglan mo sang masakyan pakadto sa mga miting, nga luyag mo makig-upod sa ila sa pagbantala, ukon makig-istorya sa ila? Siempre, indi kita dapat mamilit kundi mangin mapinasalamaton sa ila bulig.

Mangin positibo: Ang pag-atubang sang imo balatian kag pagpabilin nga malipayon nagadepende sa imo. Ang pagkamasinulub-on magaresulta sa negatibo nga panghunahuna. Ang Biblia nagsiling: “Ang espiritu sang tawo magasakdag sang iya kaluyahon; apang ang espiritu nga boong sin-o bala ang makabatas?”—Hulu. 18:14.

Si Magdalena nagsiling: “Ginatinguhaan ko nga indi magpokus sa akon mga problema. Ginakalitan ko kon maayo ang akon pamatyag. Napalig-on ako sang mga nabasahan ko nga eksperiensia sang mga kauturan nga nagpabilin nga matutom bisan nagabalatian.” Napabakod si Izabela bangod nahibaluan niya nga ginahigugma kag ginapabaloran sia ni Jehova. Nagsiling sia: “Nabatyagan ko nga may pulos ako kag may rason para mabuhi. May makalilipay man ako nga palaabuton.”

Si Zbigniew nagsiling: “Bangod sang akon balatian, nakatuon ako nga mangin mapainubuson, matinumanon, mahinantupon, magpatawad sing tinagipusuon, kag magdesisyon sing husto. Natun-an ko man nga mangin malipayon sa pag-alagad kay Jehova kag indi pagkaluoyan ang akon kaugalingon. Gani, napalig-on ako nga magpadayon sa pag-uswag sa espirituwal.”

Dumduma nga nakita ni Jehova ang imo pagbatas. Nahibaluan niya ang imo pag-antos kag nagakabalaka sia sa imo. Indi niya “kalimtan ang inyo binuhatan kag ang gugma nga ginpakita ninyo para sa iya ngalan.” (Heb. 6:10) Hunahunaa pirme ang iya saad sa mga nagakahadlok sa iya: “Indi ko gid kamo pagbayaan ukon pagpatumbayaan.”—Heb. 13:5.

Kon ginaluyahan ka, hunahunaa ang makalilipay nga paglaum sa bag-ong kalibutan. Sa dili madugay, makita mo mismo ang pagpakamaayo sang Ginharian sang Dios sa duta!

[Kahon/Mga Retrato sa pahina 28, 29]

Padayon Sila nga Nagabantala Bisan May Malala nga Balatian

“Indi ko na masarangan maglakat, gani ginaupdan ako sang akon asawa ukon sang pila ka utod kon magbantala. Ginasaulo ko ang akon inughambal kag ang mga teksto sa Biblia.”—Jerzy, isa ka bulag.

“Luwas sa pagpanaksi sa telepono, nagapanaksi man ako paagi sa sulat kag regular nga ginabalusan ang mga interesado. Kon sa ospital ako, ginatupad ko ang Biblia kag ang mga publikasyon. Nakabulig ini sa akon nga makasugod sang mga paghambalanay.”—Magdalena, may systemic lupus erythematosus.

“Nanamian ako mamalaybalay, apang kon indi maayo ang akon pamatyag, nagapanaksi na lang ako paagi sa telepono.”—Izabela, may malubha nga depresyon.

“Nanamian ako magduaw liwat kag magdumala sing mga pagtuon sa Biblia. Sang maayo pa ako, nanamian ako mamalaybalay.”—Barbara, may tumor sa utok.

“Mamag-an lang nga suludlan sang magasin ang akon ginadala. Nagabantala ako basta maagwanta ko lang ang kasakit sang akon mga lutalutahan.”—Zbigniew, may rheumatoid arthritis.

[Retrato sa pahina 30]

Bata man ukon tigulang, puede mangin makapalig-on