Ngaa Dapat Magpatuytoy sa Espiritu sang Dios?

“Ikaw amo ang akon Dios! Ang imo maayong Espiritu magtuytuy sa akon!”—SAL. 143:10.

1. Iilustrar kon paano ang indi makita nga puersa makagiya sa isa ka tawo.

NAKAGAMIT ka na bala sang kompas? Ang kompas isa ka simple nga instrumento nga makabulig para mahibaluan ang direksion. May dagom (ukon magnetic needle) ini nga pirme nagatudlo sa aminhan nga ginapahulag sang indi makita nga puersa nga ginatawag magnetismo. Siniglo na nga ginagamit sang mga tawo ang kompas agod maggiya sa ila paglakbay sa duta man ukon sa dagat.

2, 3. (a) Anong gamhanan nga puersa ang gingamit ni Jehova sang nagligad nga tuman ka lawig nga tion? (b) Ngaa mapaabot naton subong nga tuytuyan kita sang aktibo nga puersa sang Dios?

² May isa pa ka indi makita nga puersa nga mas kinahanglanon sa paggiya ukon pagtuytoy sa aton. Ano ini? Ginalaragway ini sa una nga mga bersikulo sang Biblia. Parte sa ginhimo ni Jehova sang nagligad nga tuman ka lawig nga tion, ang Genesis nagasiling: “Sa ginsuguran gintuga sang Dios ang mga langit kag ang duta.” Gingamit niya ang iya gamhanan nga puersa sa paghimo sini kay ang rekord sa pagpanuga nagdugang: “Ang Espiritu sang Dios nagagiho.” (Gen. 1:1, 2) Ano ini nga puersa? Ang balaan nga espiritu, ang iya aktibo nga kusog. Nagluntad kita bangod gingamit ni Jehova ini nga espiritu sa pagtuga sang tanan nga butang.—Job 33:4; Sal. 104:30.

³ Pero, mapaabot bala naton nga ang aktibo nga puersa sang Dios may iban pa nga impluwensia sa aton kabuhi? Huo, kay si Jesus nagsiling sa iya mga disipulo: ‘Ang espiritu magatuytoy sa inyo sa bug-os nga kamatuoran.’ (Juan 16:13) Ano ini nga espiritu, kag ngaa luyag naton nga tuytuyan kita sini?

Ano ang Balaan nga Espiritu?

4, 5. (a) Ano ang sayop nga panghunahuna sang pila ka tawo parte sa balaan nga espiritu? (b) Paano mo ipaathag ang kamatuoran parte sa balaan nga espiritu?

⁴ Mahimo nga ang pila ka tawo nga imo maistorya sa ministeryo nagapati sa Trinidad. Amo nga nagahunahuna sila nga ang balaan nga espiritu isa ka espiritu nga persona nga tupong sa Dios nga Amay. (1 Cor. 8:6) Bangod sini, madamo nga manugbadbad sang Biblia ang nagagamit sing dalagku nga letra para sa ekspresyon nga Espiritu Santo. Apang, talupangda kon ano ang ginasiling sang Katoliko nga teologo nga si Edmund Fortman sa iya libro nga The Triune God: “Bisan pa ining espiritu masami nga ginalaragway subong persona, daw maathag gid nga ang balaan nga mga manunulat [sang Hebreong Kasulatan] wala gid maghangop ukon magpresentar sining espiritu subong isa ka tuhay nga persona.”

⁵ Gani ano gid bala ang balaan nga espiritu? Ang footnote sang Genesis 1:2 sa New World Translation of the Holy Scriptures—With References, nagasiling: “Ang ruʹach [Hebreo] wala lamang ginabadbad nga ‘espiritu,’ kundi ginabadbad man nga ‘hangin’ kag iban pa nga tinaga nga nagakahulugan sing indi makita nga aktibo nga puersa.” (Ipaanggid ang mga footnote sang Genesis 3:8; 8:1.) Bisan indi naton makita ang hangin, makita naton ang epekto sini. Sa amo man nga paagi, indi makita ang balaan nga espiritu, pero makita ang epekto sini. Indi ini isa ka persona kundi kusog nga halin sa Dios. Ginagamit niya ini sa mga tawo ukon sa mga butang agod pat-uron nga matuman ang iya luyag. Mabudlay bala patihan nga ining makatilingala nga kusog naghalin sa  labing gamhanan nga Dios? Indi.—Basaha ang Isaias 40:12, 13.

6. Ano ang pangabay ni David kay Jehova?

⁶ Magiyahan bala kita ni Jehova sang iya espiritu sa aton bug-os nga kabuhi? Ginsaaran niya ang salmista nga si David: “Ton-an ko ikaw kag tudloan ikaw sang dalanon nga dapat mo laktan.” (Sal. 32:8) Luyag bala ini ni David? Huo, kay nangabay sia kay Jehova: “Tudloi ako sa paghimo sang imo kabubut-on, kay ikaw amo ang akon Dios! Ang imo maayong Espiritu magtuytuy sa akon!” (Sal. 143:10) Dapat nga luyag man naton magpatuytoy sa espiritu sang Dios. Ngaa? Binagbinaga ang apat ka rason.

Wala Kita sing Ikasarang sa Pagtuytoy sang Aton Kaugalingon

7, 8. (a) Ngaa wala kita sing ikasarang nga tuytuyan ang aton kaugalingon? (b) Iilustrar kon ngaa indi kita dapat maglakbay sing isahanon sa sining malaut nga kalibutan.

⁷ Una, dapat nga luyag naton magpatuytoy sa espiritu sang Dios bangod wala kita sing ikasarang nga tuytuyan ang aton kaugalingon. Ang “pagtuytoy” nagakahulugan sing “paggiya ukon pagtudlo sang husto nga dalan.” Apang, wala kita gintuga ni Jehova nga may ikasarang sa paghimo sina, ilabi na kay indi kita himpit. Ang iya manalagna nga si Jeremias nagsulat: “O GINOO, nahibaloan ko nga ang dalanon sang tawo wala sa iya kaugalingon, wala sa tawo nga nagalakat sa pagmando sang iya mga tikang.” (Jer. 10:23) Ngaa? Paagi kay Jeremias, ginsugid sang Dios sa aton ang rason. Si Jehova nagsiling: “Ang tagiposoon malimbongon labaw sa tanan nga butang, kag lakas gid kadunut; sin-o bala ang makahibalo sini?”—Jer. 17:9; Mat. 15:19.

⁸ Handurawa nga ang isa ka tawo magalakbay sing isahanon sa lugar nga indi niya sunado, subong sang kagulangan ukon desyerto. Delikado gid kon wala sia sing updon nga nakatultol ukon indi sia magdala sing kompas. Kon indi sia makahibalo sang dapat niya himuon sa sini nga mga lugar, mabutang sa katalagman ang iya kabuhi. Sing kaanggid, ginabutang man sang isa sa katalagman ang iya kabuhi kon maghunahuna sia nga indi niya kinahanglan ang panuytoy sang Dios sa sining malaut nga kalibutan. Kaangay ni David, dapat man kita mangamuyo para sa bulig ni Jehova. Sia nagsiling: “Ang akon mga tikang nagpadayon sing malig-on sa imo mga banas, ang akon mga tiil wala makadanlog.” (Sal. 17:5; 23:3) Paano naton matigayon ini nga panuytoy?

9. Subong sang ginapakita sa pahina 17, paano kita matuytuyan sing maayo sang espiritu sang Dios?

⁹ Kon mapainubuson kita kag handa nga magsandig kay Jehova, hatagan niya kita sing balaan nga espiritu agod magtuytoy sa aton. Paano ini makabulig sa aton? Si Jesus nagpaathag sa iya mga disipulo: “Ang manugbulig, ang balaan nga espiritu, nga ipadala sang Amay sa akon ngalan, ini magatudlo sa inyo sang tanan nga butang kag magapahanumdom sa inyo sang tanan nga butang nga ginsiling ko sa inyo.” (Juan 14:26) Samtang regular kag mapinangamuyuon nga ginatun-an naton ang Pulong  sang Dios, lakip ang mga pinamulong ni Cristo, buligan kita sang balaan nga espiritu nga mahangpan ang madalom nga kaalam ni Jehova, agod nga mailog naton sia sing maayo. (1 Cor. 2:10) Dugang pa, sa mga wala ginapaabot nga likuan sa dalanon sang kabuhi, tuytuyan kita sang espiritu kon diin kita maagi. Pahanumdumon kita sini sang mga prinsipio sa Biblia nga aton natun-an kag buligan kita nga mahangpan kon paano ini iaplikar sa paghimo sing maayo nga mga desisyon.

Si Jesus Gintuytuyan sang Espiritu sang Dios

10, 11. Ano ang ginapaabot ni Jesus nga himuon sang balaan nga espiritu, kag ano ang iya naeksperiensiahan?

¹⁰ Ikaduha, dapat nga luyag naton magpatuytoy sa balaan nga espiritu bangod amo ini ang gingamit sang Dios sa pagtuytoy sa iya Anak. Antes magkari sa duta, ang bugtong nga Anak sang Dios nakahibalo sang tagna: “Magadolog sa iya ang Espiritu sang GINOO, ang espiritu sang kaalam kag paghangup, ang espiritu sang laygay kag kusug, ang espiritu sang ihibalo kag sang kahadluk sa GINOO.” (Isa. 11:2) Mabudlay para kay Jesus ang kabuhi diri sa duta, gani nalipay sia sa pagpaabot sang bulig sang espiritu sang Dios.

¹¹ Natuman ang tagna ni Jehova. Pagkatapos sang bawtismo ni Jesus, ginsugiran kita sang Ebanghelyo kon ano ang natabo: “Si Jesus, nga puno sang balaan nga espiritu, nagbalik gikan sa Jordan, kag gintuytuyan sia sang espiritu sa kahanayakan.” (Luc. 4:1) Samtang nagapuasa si Jesus, nagapangamuyo, kag nagapamalandong, mahimo nga gin-instruksionan sia ni Jehova kag ginhanda sa kon ano ang matabo sa iya. Nagapanghikot ang aktibo nga puersa sang Dios sa hunahuna kag tagipusuon ni Jesus kag nagatuytoy sa iya panghunahuna kag mga desisyon. Gani, nahibaluan ni Jesus ang iya himuon sa kada sitwasyon, kag ginahimo gid niya ang luyag sang iya Amay.

12. Ngaa importante nga pangayuon ang espiritu sang Dios sa pagtuytoy sa aton?

¹² Nahibaluan ni Jesus ang importansia sang espiritu sang Dios sa iya kabuhi, gani ginpalig-on gid niya ang iya mga disipulo nga pangayuon ang balaan nga espiritu kag magpatuytoy sa sini. (Basaha ang Lucas 11:9-13.) Ngaa importante gid nga pangayuon ini? Bangod sarang sini mabag-o ang aton panghunahuna kag matigayon ang “hunahuna ni Cristo.” (Roma 12:2; 1 Cor. 2:16) Kon tugutan naton nga tuytuyan kita sang espiritu sang Dios, mailog naton ang panghunahuna kag halimbawa ni Cristo.—1 Ped. 2:21.

Mapatalang Kita sang Espiritu sang Kalibutan

13. Ano ang espiritu sang kalibutan, kag ano ang ginapatubas sini?

¹³ Ikatlo, dapat nga luyag naton magpatuytoy sa espiritu sang Dios bangod kon wala ini mapatalang kita sang di-balaan nga espiritu nga yara sa kalabanan nga katawhan subong. Ang kalibutan may gamhanan nga puersa nga nagapasanyog sang dalanon nga nagasumpakil  sa balaan nga espiritu. Sa baylo nga palambuon sa mga tawo ang panghunahuna ni Cristo, ginapalambo sang espiritu sang kalibutan ang panghunahuna kag mga buhat sang gumalahom sini nga si Satanas. (Basaha ang Efeso 2:1-3; Tito 3:3.) Kon ang isa magsunod sa espiritu sang kalibutan kag maghimo sang mga buhat sang unod, makatalagam ang resulta kay indi sia makapanubli sang Ginharian sang Dios.—Gal. 5:19-21.

14, 15. Paano kita magamadinalag-on sa pagpakigbato sa espiritu sang kalibutan?

¹⁴ Ginasangkapan kita ni Jehova nga mabatuan ang espiritu sang kalibutan. Si apostol Pablo nagsiling nga ‘padayon nga magbakod may kaangtanan sa Ginuo kag sa gahom sang iya kusog agod kon mag-abot ang malaut nga adlaw makabato kamo.’ (Efe. 6:10, 13) Paagi sa espiritu ni Jehova, ginapabakod niya kita nga mabatuan ang mga panikasog ni Satanas nga patalangon kita. (Bug. 12:9) Mabaskog ang espiritu sang kalibutan, kag indi naton ini malikawan sing bug-os. Apang mabatuan naton ini. Mas mabaskog ang balaan nga espiritu, kag buligan kita sini!

¹⁵ Parte sa mga nagsikway sang Cristianismo sang unang siglo, si apostol Pedro nagsiling: “Bangod sang pagbiya sa matadlong nga banas, nagtalang sila.” (2 Ped. 2:15) Nalipay gid kita nga nabaton naton, “indi ang espiritu sang kalibutan, kundi ang espiritu nga gikan sa Dios”! (1 Cor. 2:12) Paagi sa bulig sini kag sa pagpanginpulos sa tanan nga aman ni Jehova agod makapabilin nga suod sa iya, magamadinalag-on kita sa pagpakigbato sa espiritu ni Satanas sa sining malaut nga kalibutan.—Gal. 5:16.

Ang Balaan nga Espiritu Nagapatubas sang Maayong mga Bunga

16. Ano nga mga bunga ang mapatubas sang balaan nga espiritu sa aton?

¹⁶ Ikap-at, dapat nga luyag naton magpatuytoy sa espiritu sang Dios bangod nagapatubas ini sang maayo nga mga bunga sa mga nagapatuytoy sa sini. (Basaha ang Galacia 5:22, 23.) Sin-o bala sa aton ang indi luyag nga mangin mas mahigugmaon, malipayon, kag mahidaiton? Sin-o bala ang indi luyag nga labi pa gid nga mangin mabinatason, malulo, kag mainayuhon? Sin-o bala ang indi luyag magpalambo sing mas mabakod nga pagtuo, kaayo, kag pagpugong sa kaugalingon? Ginabuligan kita sang espiritu sang Dios nga mapatubas ang maayo nga mga kinaiya nga mapuslanon para sa aton kag sa iban. Ang pagpalambo sini nga mga bunga nagapadayon, kay wala sing limitasyon ang kadamuon sang bunga sang espiritu nga kinahanglan naton kag puede mapatubas.

17. Paano naton mapalambo ang isa ka bunga sang espiritu tubtob sa aton masarangan?

¹⁷ Maayo nga usisaon naton kon bala ginapakita sang aton mga pulong kag buhat nga ginatuytuyan kita sang balaan nga espiritu kag nagapatubas sang mga bunga sini. (2 Cor. 13:5a; Gal. 5:25) Kon matalupangdan naton nga may dapat pa kita palambuon sa pila ka bunga sini, makakooperar kita sa balaan nga espiritu agod mapatubas ini nga mga kinaiya. Ginahimo naton ini paagi sa pagtuon sa Biblia kag sa aton mga publikasyon, pagpamalandong kon paano ini ipakita sa aton matag-adlaw nga pagkabuhi, kag pagtinguha nga palambuon ini tubtob sa aton masarangan. * Kon makita naton ang maayo nga epekto sang panuytoy sang espiritu sang Dios sa aton kabuhi kag sa aton masigka-Cristiano, labi pa gid nga mahangpan naton kon ngaa dapat kita magpatuytoy sa sini.

Nagapatuytoy Ka Bala sa Espiritu sang Dios?

18. Paano nangin halimbawa si Jesus para sa aton sa pagsunod sa espiritu sang Dios?

¹⁸ Subong ang “pangolo nga manugpangabudlay” sa pagtuga sang uniberso, nahibaluan ni Jesus ang parte sa magnetismo sang duta, ang puersa nga nagabulig sa mga tawo kon maggamit sila sang kompas. (Hulu. 8:30; Juan  1:3) Apang wala kita sang mabasa sa Biblia nga gingamit ini ni Jesus agod maggiya sa iya sang yari sia sa duta. Pero, ginsambit sa Biblia nga subong tawo, ang balaan nga espiritu amo ang gamhanan nga puersa sa iya kabuhi. Nalipay sia nga magpatuytoy kag magsunod sa paggiya sini. (Mar. 1:12, 13; Luc. 4:14) Pareho ka man bala sa iya?

19. Ano ang himuon naton para matuytuyan kita sang balaan nga espiritu?

¹⁹ Ang aktibo nga puersa sang Dios nagapanghikot gihapon sa mga hunahuna kag tagipusuon agod pahulagon ang mga luyag magpatuytoy sa sini. Paano ka matuytuyan sini sa husto nga dalanon? Padayon nga mangamuyo kay Jehova nga hatagan ka niya sang iya espiritu kag buligan ka nga sundon ang impluwensia sini. (Basaha ang Efeso 3:14-16.) Manghikot suno sa imo mga pangamuyo paagi sa pagtuon sa Biblia, nga gin-inspirar sang Dios paagi sa balaan nga espiritu. (2 Tim. 3:16, 17) Tumana ang maalamon nga mga laygay sini kag sunda sing maayo ang panuytoy sang balaan nga espiritu. Manghikot nga may pagtuo sa ikasarang ni Jehova nga tuytuyan ka sa husto nga dalanon sa sining malaut nga kalibutan.

[Nota]

Nahangpan Mo Bala ang Panguna nga mga Punto?

• Paano makaapektar sa aton kabuhi ang balaan nga espiritu?

• Ano ang apat ka rason kon ngaa dapat luyag naton magpatuytoy sa espiritu sang Dios?

• Ano ang aton himuon agod makabenepisyo sing bug-os sa panuytoy sang balaan nga espiritu?

[Mga Pamangkot sa Pagtinuon]

[Retrato sa pahina 15]

Ang espiritu sang Dios amo ang gamhanan nga puersa sa kabuhi ni Jesus

[Retrato sa pahina 17]

Ang espiritu sang Dios nagapanghikot sa mga hunahuna kag tagipusuon sang mga tawo agod magpahulag kag magtuytoy sa ila