Pagtuytoy sang Espiritu sang Dios sa mga Matutom Sadto
Pagtuytoy sang Espiritu sang Dios sa mga Matutom Sadto
“Ang Ginoong DIOS nagpadala sa akon kag sang iya Espiritu.”—ISA. 48:16.
1, 2. Ano ang kinahanglan agod mapakita ang pagtuo, kag paano kita mapalig-on sa pagbinagbinag sa kabuhi sang mga matutom sadto?
BISAN pa madamo ang nagpakita sing pagtuo sugod sang panahon ni Abel, “indi tanan nga tawo may pagtuo.” (2 Tes. 3:2) Gani ngaa may mga tawo nga may amo sini nga kinaiya, kag ano ang nakabulig sa ila nga mangin matutom? Sa masami ang tawo nagatuo lang pagkatapos niya mabatian ang Pulong sang Dios. (Roma 10:17) Ang pagtuo isa ka bunga sang balaan nga espiritu sang Dios. (Gal. 5:22, 23) Gani, agod mapakita ini, kinahanglan naton ang balaan nga espiritu.
2 Sayop gid maghinakop nga ang mga tawo sadto awtomatik nga may pagtuo. Ang matutom nga mga alagad nga aton mabasa sa Biblia mga tawo “nga may balatyagon kaangay sang aton.” (Sant. 5:17) Nagaduhaduha sila, nagakabalaka, kag may mga kaluyahon man. Pero paagi sa espiritu sang Dios “nangin mabakod” sila sa pag-atubang sang mga problema. (Heb. 11:34) Kon binagbinagon naton ang pagpanghikot sang espiritu ni Jehova sa ila, mapalig-on kita nga magpadayon nga matutom bisan pa ginatilawan ang aton pagtuo.
Ginpabakod sang Espiritu sang Dios si Moises
3-5. (a) Paano naton nahibaluan nga nanghikot si Moises sa bulig sang balaan nga espiritu? (b) Ano ang ginatudlo sa aton sang halimbawa ni Moises parte sa paghatag ni Jehova sang iya espiritu?
3 Sa tanan nga tawo nga nagkabuhi sang 1513 B.C.E., si Moises amo ang “tama gid kamapainubuson.” (Num. 12:3) Ining malulo nga alagad gintugyanan sing tuman kadaku nga responsibilidad sa pungsod sang Israel. Ginpabakod sang espiritu sang Dios si Moises agod magtagna, maghukom, magsulat, manguna, kag maghimo sing mga milagro. (Basaha ang Isaias 63:11-14.) Apang isa ka bes, nagreklamo si Moises nga nabug-atan na gid sia. (Num. 11:14, 15) Gani nagkuha sa iya si Jehova sang “espiritu” kag ginhatag ini sa 70 ka lalaki nga magabulig sa iya. (Num. 11:16, 17) Bisan daw tuman kabug-at ang iya responsibilidad, indi lang sia ang nagadala sini ukon ang 70 nga gintangdo sa pagbulig sa iya.
4 Ginhatagan si Moises sang balaan nga espiritu nga bastante para sa iya responsibilidad. Bisan ginbuhinan na ini sang ginhatag sa 70, bastante gihapon ang espiritu nga yara kay Moises. Wala magkulang ang sa iya, kag wala man magsobra ang sa 70 ka lalaki. Ginahatagan man kita ni Jehova sing espiritu suno sa aton kinahanglanon kag sirkunstansia. “Indi sia hawothawot sa paghatag sang iya espiritu” kundi nagahatag “gikan sa iya kabuganaan.”—Juan 1:16; 3:34.
5 May ginabatas ka bala nga mga pagtilaw? Nagadugang bala ang imo mga responsibilidad kag nagakinahanglan sang mas madamo nga tion? Nagapanikasog ka bala nga maamanan sa espirituwal kag pisikal ang imo pamilya bisan pa nagamahal ang mga balaklon ukon nagadugang ang problema sa panglawas? May mabug-at ka bala nga responsibilidad sa kongregasyon? Magsalig nga paagi sa iya espiritu, ang Dios makahatag sang kusog nga kinahanglanon mo sa pag-atubang sang bisan ano nga kahimtangan.—Roma 15:13.
Nangin Sampaton si Bezalel Bangod sang Balaan nga Espiritu
6-8. (a) Ano ang nahimo nanday Bezalel kag Oholiab sa bulig sang espiritu sang Dios? (b) Ano ang pamatuod nga sanday Bezalel kag Oholiab gintuytuyan sang espiritu sang Dios? (c) Ngaa makapalig-on gid ang eksperiensia ni Bezalel?
6 Madamo kita sing matun-an parte sa pagpanghikot sang espiritu sang Dios sa eksperiensia sang kadungan ni Moises nga si Bezalel. (Basaha ang Exodo 35:30-35.) Gintangdo si Bezalel nga manguna sa paghimo sang mga kagamitan para sa tabernakulo. May eksperiensia na bala sia sa sini antes ining daku nga proyekto? Posible, apang mahimo nga ang iya katapusan nga trabaho amo ang paghimo sing mga tisa didto sa Egipto. (Ex. 1:13, 14) Paano matuman ni Bezalel ining mabudlay nga hilikuton? Ginpuno sia ni Jehova “sang Espiritu sang Dios, sa kaalam, sa paghangup kag sa ihibalo, kag sa tanan nga bagay sang buluhaton, sa pagpadugi sang buluhaton nga sinampaton.” Kon may natural nga ikasarang gid man si Bezalel mahimo nga nag-uswag pa ini sa bulig sang balaan nga espiritu. Amo man si Oholiab. Mahimo nga nangin eksperto gid sanday Bezalel kag Oholiab kay luwas nga natapos nila ang hilikuton, gintudluan pa nila ang iban. Huo, ginpahulag sila sang Dios nga tudluan ang iban.
7 Ang isa pa ka pamatuod nga sanday Bezalel kag Oholiab gintuytuyan sang espiritu sang Dios amo ang kabakod sang ila mga hinimuan. Ginagamit pa gihapon ini mga 500 ka tuig sang ulihi. (2 Cron. 1:2-6) Indi kaangay sang kalabanan subong, sanday Bezalel kag Oholiab wala sing handum nga padunggan sa ila hinimuan. Ang tanan nga kadayawan para kay Jehova.—Ex. 36:1, 2.
8 Sa karon, madamo man sing hilikuton nga nagakinahanglan sing pinasahi nga mga ikasarang subong sang pagpatindog, pag-imprinta, pag-organisar sang mga kombension, pagbulig pagkatapos sang kalamidad, kag pagpaathag sa mga doktor kag mga nagatrabaho sa ospital sang aton panindugan parte sa dugo. Kon kaisa, ining mga hilikuton ginahimo sang sagad nga mga utod, apang sa masami ginahimo ini sang mga boluntaryo nga diutay lang ang eksperiensia. Pero sa bulig sang espiritu sang Dios nagmadinalag-on sila. Nagapangalag-ag ka bala nga batunon ang asaynment sa pag-alagad kay Jehova kay pamatyag mo mas kalipikado ang iban sangsa imo? Dumduma nga ang espiritu ni Jehova makabulig sa imo nga mapalambo ang ihibalo kag ikasarang para matuman mo ang asaynment nga ginhatag niya sa imo.
Nagmadinalag-on si Josue sa Bulig sang Balaan nga Espiritu
9. Ano ang natabo sa mga Israelinhon wala madugay nga nakagua sila sa Egipto, kag ano nga pamangkot ang nag-utwas?
9 Gintuytuyan man sang balaan nga espiritu ang isa pa ka kontemporaryo nanday Moises kag Bezalel. Wala madugay nga nakagua sila sa Egipto, ginsalakay sang mga Amaleknon ang katawhan sang Dios. Wala sila sing eksperiensia sa pagpakig-away, kag ini ang una nga tion nga makig-away sila subong hilway nga katawhan. (Ex. 13:17; 17:8) Kinahanglan nga may manguna sa ila sa pagpakig-away, pero sin-o?
10. Ngaa nagdaug ang mga Israelinhon sa pagpanguna ni Josue?
10 Si Josue ang napili. Pero kon interbyuhon sia kon ano ang iya kalipikasyon para sa sini nga misyon, ano ang iya isabat? Nga ulipon sia? Manugmiskla sang dagami? Manugpamulot sang manna? Matuod nga ang lolo ni Josue nga si Elisama pangulo sang tribo ni Efraim kag mahimo nagapanguna sa 108,100 ka soldado sa isa sang tigtatlo-ka-tribo nga dibisyon sang Israel. (Num. 2:18, 24; 1 Cron. 7:26, 27) Pero paagi kay Moises, nagsiling si Jehova nga indi si Elisama ukon ang iya anak nga si Nun ang manguna sa paglutos sa mga kaaway, kundi si Josue. Halos bug-os nga adlaw ang ila pagpakig-away. Bangod sa pagkamatinumanon ni Josue kag sa iya pagpasakop sa panuytoy sang espiritu sang Dios, nagdaug ang Israel.—Ex. 17:9-13.
11. Paano kita magamadinalag-on sa pag-alagad pareho ni Josue?
11 Sang ulihi, si Josue nga “puno sang espiritu sang kaalam,” amo ang nagbulos kay Moises. (Deut. 34:9) Wala sia ginbuligan sang balaan nga espiritu para makapanagna ukon maghimo sing mga milagro pareho ni Moises. Pero, ginbuligan sia sini nga pangunahan ang Israel sa pagpakig-away para malutos ang mga Canaanhon. Subong, mahimo nagabatyag man kita nga indi eksperiensiado ukon indi kalipikado sa pila ka bahin sang aton pag-alagad. Apang pareho ni Josue, magamadinalag-on kita kon sundon naton ang panuytoy sang Dios.—Jos. 1:7-9.
“Ang Espiritu sang GINOO Nag-abut kay Gideon”
12-14. (a) Ano ang matun-an naton sa paglutos sang 300 ka soldado sa tuman kadamo nga Midianhon? (b) Paano ginpasalig ni Jehova si Gideon? (c) Ano ang pasalig sa aton sang Dios?
12 Sang mapatay na si Josue, padayon nga gingamit ni Jehova ang iya gahom sa pagpabakod sa mga matutom. Ang tulun-an sang Hukom nagasugid sang inagihan sang mga tawo nga “nangin mabakod halin sa maluya nga kahimtangan.” (Heb. 11:34) Paagi sa balaan nga espiritu ginpahulag sang Dios si Gideon nga makig-away para sa Iya katawhan. (Huk. 6:34) Apang diutay lang ang hangaway ni Gideon, isa kontra sa apat ka Midianhon. Pero para kay Jehova madamo gihapon sila. Gani, kaduha niya ginsugo si Gideon nga buhinan ang iya hangaway asta nga 1 kontra 450 na. (Huk. 7:2-8; 8:10) Amo ini ang kadamuon nga gusto ni Jehova. Kon magdaug sila, sin-o ang makapabugal nga bangod ini sa kusog kag kaalam sang tawo?
13 Handa na si Gideon kag ang iya mga soldado. Kon upod ka sa ila, mangin kampante ka bala kay ginpapauli na ang mga talawan kag mga indi alisto? Ukon mahadlok ka bala sa posible nga matabo? Masiguro naton nga nagsalig si Gideon kay Jehova bangod gintuman niya ang ginsugo sa iya! (Basaha ang Hukom 7:9-14.) Wala gin-akigan ni Jehova si Gideon sang nangayo sia sing tanda subong pamatuod nga nagaupod sa iya ang Dios. (Huk. 6:36-40) Sa baylo, ginpabakod niya ang pagtuo ni Gideon.
14 Ang gahom ni Jehova sa pagluwas wala sing tupong. Maluwas niya ang iya katawhan sa bisan ano nga katalagman, bisan ang gamiton niya daw maluya ukon daw wala sing mahimo. Ayhan kon kaisa nagabatyag kita nga daw kadamo sang nagakontra sa aton ukon daw indi na gid kita makasarang. Wala kita nagapaabot nga hatagan sang tanda paagi sa milagro pareho kay Gideon, apang may bugana kita nga panuytoy kag pasalig gikan sa Pulong sang Dios kag paagi sa kongregasyon nga ginatuytuyan sang iya espiritu. (Roma 8:31, 32) Ang mahigugmaon nga mga saad ni Jehova nagapalig-on sang aton pagtuo kag nagakumbinsi sa aton nga sia gid ang aton Manugbulig!
“Niyan ang Espiritu sang GINOO Nag-abut kay Jefte”
15, 16. Ngaa may maayo nga panimuot ang anak ni Jefte, kag paano ini makapalig-on sa mga ginikanan?
15 Binagbinaga ang isa pa ka halimbawa. Sang kinahanglan makig-away ang mga Israelinhon sa mga Amonhon, ang espiritu ni Jehova “nag-abut kay Jefte.” Gusto gid ni Jefte nga magdaug para sa kadayawan ni Jehova. Gani, nagsaad sia nga kon ihatag sang Dios sa iya ang mga Amonhon, ang una nga magsugata sa iya halin sa ila balay mangin iya ni Jehova. Sang nagpauli si Jefte pagkatapos malutos ang Amon, nagadalagan nga ginsugata sia sang iya anak nga babayi. (Huk. 11:29-31, 34) Nakibot bala si Jefte? Posible nga wala kay bugtong lamang ang iya anak. Gintuman niya ang iya saad kag ginpaalagad ang iya anak sa santuaryo ni Jehova sa Shilo. Matutom kay Jehova ang anak ni Jefte, gani nakahibalo gid sia nga dapat tumanon ang saad sang iya amay. (Basaha ang Hukom 11:36.) Ginhatagan sila sang espiritu ni Jehova sang kusog nga ila kinahanglan.
16 Ngaa handa magsakripisyo ang anak ni Jefte? Pat-od nga napalig-on gid sia sang kakugi kag katutom sa Dios sang iya amay. Mga ginikanan, ginatan-aw kamo sang inyo mga anak. Ang inyo mga desisyon nagapakita nga ginapatihan ninyo ang inyo ginasiling. Ginapamatian nila ang inyo mga pangamuyo kag epektibo nga panudlo. Makita man nila ang inyo halimbawa sang bug-os tagipusuon nga pag-alagad kay Jehova. Ini tanan mahimo makabulig sa ila nga handumon man ang pag-alagad kay Jehova. Makapahalipay gid ini sa inyo.
“Ang Espiritu sang GINOO Nag-abut” kay Samson
17. Ano ang ginhimo ni Samson sa bulig sang espiritu sang Dios?
17 Binagbinaga ang isa pa ka halimbawa. Sang nabihag sang mga Filistinhon ang Israel, “ang Espiritu sang GINOO nagpamuno sa pagdaldal [“pagpahulag,” NW]” kay Samson sa pagluwas sa Israel. (Huk. 13:24, 25) Ginhatagan sia sing pinasahi nga kusog sa paghimo sing makatilingala nga mga buhat. Sang ginpilit sang mga Filistinhon ang iya mga masigka-Israelinhon nga dakpon sia, “ang Espiritu sang GINOO nag-abut sing gamhanan sa iya, kag ang mga lubid nga yara sa iya mga butkon nanginsubong sang lino nga nasonog sa kalayo, kag ang iya mga gapus nataktak gikan sa iya mga kamut.” (Huk. 15:14) Bisan nagluya si Samson bangod sang iya sayop nga desisyon, napabakod sia “paagi sa pagtuo.” (Heb. 11:32-34; Huk. 16:18-21, 28-30) Sa sining pinasahi nga mga sitwasyon, ang espiritu ni Jehova nagpanghikot kay Samson sa tumalagsahon nga paagi. Pero makapalig-on gihapon sa aton ini nga mga hitabo. Paano?
18, 19. (a) Ano ang ginapasalig sa aton sang eksperiensia ni Samson? (b) Paano ka nakabenepisyo sa pagbinagbinag sang halimbawa sang mga matutom sa sini nga artikulo?
18 Ang balaan nga espiritu nga nagbulig kay Samson amo man ang ginasaligan naton samtang nagatuman kita sa sugo ni Jesus sa iya mga sumulunod nga “magbantala sa mga tawo kag magpanaksi sing maid-id.” (Binu. 10:42) Mahimo nga mabudlay ini para sa aton. Pero nalipay kita nga ginagamit ni Jehova ang iya espiritu agod matuman naton ang madamo nga hilikuton nga ginsalig niya sa aton! Samtang ginahimo naton ini, makasiling kita pareho sang manalagna nga si Isaias: “Ang Ginoong DIOS nagpadala sa akon kag sang iya Espiritu.” (Isa. 48:16) Huo, ang espiritu sang Dios amo ang nagsugo sa aton! Nagapanghikot kita nga may pagsalig nga palambuon ni Jehova ang aton mga ikasarang subong nanday Moises, Bezalel, kag Josue. Ginagamit naton ang “espada sang espiritu, nga amo, ang pulong sang Dios,” kag nagasalig nga pabakuron niya kita pareho kanday Gideon, Jefte, kag Samson. (Efe. 6:17, 18) Kon magsalig kita sa bulig ni Jehova, hatagan niya kita sing kusog para mahimo naton ang iya hilikuton pareho sang ginhimo niya kay Samson.
19 Ginapakamaayo gid ni Jehova ang mga wala sing kahadlok nga nagasakdag sang matuod nga pagsimba. Samtang ginasunod naton ang pagpanghikot sang balaan nga espiritu sang Dios, magabakod ang aton pagtuo. Sa Cristianong Griegong Kasulatan may mga halimbawa man sang mga gintuytuyan sang espiritu sang Dios. Sa masunod nga artikulo binagbinagon naton kon paano nagapanghikot ang espiritu ni Jehova sa iya matutom nga mga alagad sang unang siglo, antes kag pagkatapos sang Pentecostes 33 C.E.
Ngaa napalig-on ka sang nahibaluan mo kon paano nagpanghikot ang espiritu sang Dios kanday . . .
• Moises?
• Bezalel?
• Josue?
• Gideon?
• Jefte?
• Samson?
[Mga Pamangkot sa Pagtinuon]
[Blurb sa pahina 22]
Pareho kay Samson, ang espiritu sang Dios makahatag sa aton sing kusog para mahimo ang Iya hilikuton
[Retrato sa pahina 21]
Mga ginikanan, may epekto sa inyo kabataan ang inyo makugi nga halimbawa
