Pagtuytoy sang Espiritu sang Dios sang Unang Siglo kag Subong

“Ini tanan nga pagpanghikot ginahimo sang isa lang ka espiritu.”—1 COR. 12:11.

1. Ano ang binagbinagon naton sa sini nga artikulo?

PENTECOSTES 33 C.E., isa ka hitabo nga indi gid malipatan! (Binu. 2:1-4) Amo ini ang tion nga ginbubo ang balaan nga espiritu sang unang siglo nga nangin tanda sang daku nga pagbag-o sa pagpakig-angot sang Dios sa iya mga alagad. Ginbinagbinag naton sang nagligad nga artikulo kon paano ginbuligan sang espiritu sang Dios ang mga matutom sang una sa pagtuman sang ila mabudlay nga mga asaynment. Apang ano ang kinatuhayan sang pagpanghikot sang espiritu sang Dios antes gintukod ang Cristianong kongregasyon kag pagkatapos sini? Kag paano makabenepisyo ang mga Cristiano sa pagpanghikot sang balaan nga espiritu sang Dios subong? Tan-awon naton.

“Yari Karon! Ang Ulipon nga Babayi ni Jehova!”

2. Paano nakita ni Maria ang pagpanghikot sang balaan nga espiritu?

² Yara si Maria sa isa ka daku nga hulot sa ibabaw sang balay sa Jerusalem sang ginbubo ang  balaan nga espiritu. (Binu. 1:13, 14) Apang, sobra 30 ka tuig antes sini, nakita na niya ang pagpanghikot sang espiritu sang Dios sa makatilingala nga paagi. Ginsaylo ni Jehova ang kabuhi sang iya Anak halin sa langit pakadto sa duta, gani nanamkon si Maria bisan ulay pa sia. Nagpanamkon sia “paagi sa balaan nga espiritu.”—Mat. 1:20.

3, 4. Ano nga kinaiya ang ginpakita ni Maria, kag paano naton sia mailog?

³ Ngaa ginpili si Maria sa sining pinasahi nga pribilehiyo? Pagkatapos mapaathag sang anghel kay Maria ang parte sa kabubut-on ni Jehova, nagsiling: “Yari karon! Ang ulipon nga babayi ni Jehova! Kabay nga matabo ini sa akon suno sa imo ginpahayag.” (Luc. 1:38) Ang sabat ni Maria nagpahayag sang kinaiya nga nakita na nga daan sang Dios sa iya. Ang pagsabat niya dayon nagpakita nga handa sia magbaton sang kabubut-on sang Dios. Wala sia namangkot sa anghel parte sa hunahunaon sang mga tawo sa ila lugar kon magbusong sia ukon nahadlok nga basi indi na sia pagpakaslan sang iya nobyo. Paagi sa pagsiling nga pinakamanubo sia sa tanan nga ulipon, ginpakita ni Maria nga nagasalig sia sing bug-os kay Jehova subong iya Agalon.

⁴ Nagabatyag ka man bala kon kaisa nga indi mo masarangan ang mga kabudlayan kag mga responsibilidad sa pag-alagad sa Dios? Kada isa sa aton dapat mamangkot sa aton kaugalingon: ‘Nagasalig bala ako sing bug-os nga himuon ni Jehova ang mga butang suno sa iya kabubut-on? Handa bala ako nga tumanon si Jehova?’ Mapat-od mo nga hatagan sang Dios sang iya espiritu ang mga nagasalig gid sa iya kag nagakilala sang iya pagkasoberano.—Binu. 5:32.

Ginbuligan sang Balaan nga Espiritu si Pedro

5. Paano naeksperiensiahan ni Pedro ang pagpanghikot sang balaan nga espiritu antes sang Pentecostes 33 C.E.?

⁵ Kaangay ni Maria, naeksperiensiahan man ni apostol Pedro ang pagpanghikot sang balaan nga espiritu sang Dios antes sang Pentecostes 33 C.E. Ginhatagan sia ni Jesus kag ang iban pa nga apostoles sing awtoridad nga magpagua sang mga demonyo. (Mar. 3:14-16) Bisan pa diutay lang ang ginsambit sang Biblia parte sa sini, posible nga gingamit ni Pedro ini nga awtoridad. Nanghikot man sa iya ang gahom sang Dios sang gin-agda sia ni Jesus nga maglakat sa ibabaw sang Dagat sang Galilea, kag nahimo niya ini. (Basaha ang Mateo 14:25-29.) Maathag nga nagsalig sia nga buligan sia sang balaan nga espiritu nga mahimo ang gamhanan nga mga butang. Sa dili madugay, ini nga espiritu magabulig man kay Pedro kag sa iban pa nga disipulo sa lain naman nga paagi.

6. Paagi sa balaan nga espiritu, ano ang nahimo ni Pedro sang Pentecostes 33 C.E. kag pagkatapos sini?

⁶ Sang Kapiestahan sang Pentecostes 33 C.E., si Pedro kag ang iban pa nakahambal sang lainlain nga lenguahe sang mga dumuluong nga nagakadto sa Jerusalem sa bulig sang balaan nga espiritu. Pagkatapos sini, nagtindog si Pedro kag naghambal sa kadam-an. (Binu. 2:14-36) Huo, ining tawo nga nahadlok sadto nangin maisog sa pagpanaksi bisan pa ginapahog kag ginahingabot. (Binu. 4:18-20, 31) Gingamit sang Dios ang iya espiritu agod hatagan si Pedro sang kaalam. (Binu. 5:8, 9) Ginhatagan man sia sing gahom nga magbanhaw.—Binu. 9:40.

7. Anong mga panudlo ni Jesus ang nahangpan lang ni Pedro pagkatapos sia ginhaplasan?

⁷ Antes pa sang Pentecostes, nahangpan na ni Pedro ang madamo nga kamatuoran nga gintudlo ni Jesus. (Mat. 16:16, 17; Juan 6:68) Apang may mga panudlo pa si Jesus nga wala niya mahangpan antes sang Pentecostes. Halimbawa, wala niya mahangpan nga pagabanhawon si Cristo subong espiritu sa ikatlo nga adlaw ukon nga ang Ginharian yara sa langit. (Juan 20:6-10; Binu. 1:6) Wala man niya mahangpan nga ang tawo mahimo mangin espiritu kag magagahom sa langitnon nga Ginharian. Nahangpan lang niya ini sang ginhaplasan na sia sang espiritu kag ginhatagan sing langitnon nga paglaum.

8. Anong ihibalo ang ginaaman sa mga hinaplas kag sa “iban nga mga karnero”?

⁸ Sang mabaton sang mga disipulo ni Jesus  ang balaan nga espiritu, nahangpan nila ang mga butang nga wala nila nahangpan sang una. Gin-inspirar sang espiritu ang mga manunulat sang Cristianong Griegong Kasulatan agod ipaathag ang kamatuoran parte sa katuyuan ni Jehova. (Efe. 3:8-11, 18) Sa karon, ang mga hinaplas kag ang “iban nga mga karnero” dungan nga ginapakaon sa espirituwal kag nagabaton sang pareho nga mga kamatuoran. (Juan 10:16) Ginaapresyar mo bala ang ihibalo kag paghangop sa Pulong sang Dios nga ginaaman sa imo paagi sa balaan nga espiritu?

“Napuno sing Balaan nga Espiritu” si Pablo

9. Ano ang nahimo ni Pablo sa bulig sang balaan nga espiritu?

⁹ Mga isa ka tuig pagkatapos sang Pentecostes 33 C.E., si Saulo nga sang ulihi nangin si Pablo, ginhaplasan sang balaan nga espiritu. Ang iya nahimo sadto sa bulig sang espiritu sang Dios makabulig man sa aton subong. Gin-inspirar sia sa pagsulat sang 14 ka tulun-an sang Biblia. Pareho kay Pedro, ang espiritu sang Dios nagbulig man kay Pablo nga mahangpan kag masulat sing maathag ang parte sa paglaum nga di-mamalatyon kag di-madinulunton nga kabuhi sa langit. Sa bulig sini, nang-ayo sia, nagpagua sang mga demonyo, kag nagbanhaw pa gani. Apang, ang gahom gikan sa balaan nga espiritu may mas importante nga katuyuan. Naeksperiensiahan ini karon sang mga alagad sang Dios, apang indi paagi sa milagro.

10. Paano ginbuligan sang balaan nga espiritu si Pablo sa paghambal?

¹⁰ Si Pablo, nga “napuno sing balaan nga espiritu,” maisugon nga nakighambal batok sa salamangkero. Daku gid ang epekto sini sa proconsul sang Cipre, nga nagpamati sa ila bug-os nga paghambalanay! Ginbaton sang proconsul ang kamatuoran, “kay nahayanghag sia sa panudlo ni Jehova.” (Binu. 13:8-12) Maathag nga nahibaluan ni Pablo ang importansia sang espiritu sang Dios sa paghambal sang kamatuoran. (Mat. 10:20) Sang ulihi, nangabay sia sa kongregasyon sang Efeso nga ipangamuyo sia agod ihatag sa iya ang “ikasarang sa paghambal.”—Efe. 6:18-20.

11. Paano gintuytuyan sang balaan nga espiritu si Pablo?

¹¹ Ang balaan nga espiritu wala lamang nagbulig kay Pablo sa paghambal. Nagdumili man ini sa iya nga maghambal sa pila ka duog. Sa iya paglakbay subong misyonero, gintuytuyan sia sang espiritu sang Dios. (Binu. 13:2; basaha ang Binuhatan 16:6-10.) Sa karon, ang pagbantala nga hilikuton ginatuytuyan man ni Jehova paagi sa iya espiritu. Kaangay ni Pablo, ang tanan nga matinumanon nga alagad ni Jehova nagatinguha nga ipahayag ang kamatuoran nga may kaisog kag kakugi. Bisan pa tuhay na ang paagi sang pagtuytoy sang Dios sa karon, makasalig kita nga ginagamit ni Jehova ang iya balaan nga espiritu agod pat-uron nga mabaton sang mga takus ang kamatuoran.—Juan 6:44.

“Nanuhaytuhay nga Pagpanghikot”

12-14. Pareho bala ang pagpanghikot sang espiritu sang Dios sa tanan niya nga mga alagad? Ipaathag.

¹² Ang pagbasa parte sa pagpakamaayo ni Jehova sa unang siglo nga kongregasyon sang mga hinaplas makapalig-on gid sa aton. Dumduma ang gin-inspirar nga mga pinamulong ni Pablo sa kongregasyon sang Corinto parte sa  milagruso nga mga dulot sang espiritu sadto: “Karon may nanuhaytuhay nga dulot, apang may isa lang ka espiritu; kag may nanuhaytuhay nga ministeryo, apang may isa lang ka Ginuo; kag may nanuhaytuhay nga pagpanghikot, apang may isa lang ka Dios nga nagahimo sang tanan nga pagpanghikot sa tanan nga tawo.” (1 Cor. 12:4-6) Huo, ang balaan nga espiritu makapanghikot sa lainlain nga paagi sa kada alagad sang Dios para sa isa ka katuyuan. Ang “diutay nga panong” kag ang “iban nga mga karnero” pareho nga ginatuytuyan sang balaan nga espiritu. (Luc. 12:32; Juan 10:16) Pero, ang pagpanghikot sini indi pirme pareho sa kada miembro sang kongregasyon.

¹³ Halimbawa, ang mga gulang gintangdo sang balaan nga espiritu. (Binu. 20:28) Apang indi tanan nga hinaplas sang espiritu nagaalagad subong gulang sa kongregasyon. Ano ang buot silingon sini? Nagakahulugan ini nga ang espiritu sang Dios nagapanghikot sa lainlain nga paagi sa kada miembro sang kongregasyon.

¹⁴ Ang espiritu nga nagapat-od sa mga hinaplas nga gin-adoptar sila sang Dios, amo man ang espiritu nga gingamit ni Jehova sa pagbanhaw kay Jesus sa langit. (Basaha ang Roma 8:11, 15) Amo man ini ang gingamit ni Jehova sa pagtuga sang bug-os nga uniberso. (Gen. 1:1-3) Paagi man sa sini, gintangdo ni Jehova si Bezalel sa isa ka pinasahi nga ulubrahon sa tabernakulo, ginhatagan sing pinasahi nga kusog si Samson sa paghimo sing butang nga indi masarangan sang iban, kag ginpaposible nga makalakat si Pedro sa ibabaw sang tubig. Gani ang pagtuytoy sang balaan nga espiritu lain sangsa paghaplas sini. Ang paghaplas isa ka pinasahi nga pagpanghikot sang espiritu. Ang Dios mismo ang nagapili kon sin-o ang iya haplasan.

15. Magapadayon bala ang pagpanghaplas sang balaan nga espiritu tubtob san-o? Ipaathag.

¹⁵ Ang espiritu sang Dios nagpanghikot sa iya matutom nga mga alagad sa nagkalainlain nga paagi sa sulod sang linibo ka tuig antes pa sang pagpanghaplas sang balaan nga espiritu. Sang Pentecostes 33 C.E., nagsugod ang pagpanghaplas, apang indi ini magpadayon tubtob san-o. Bisan pa matapos ang pagpanghaplas, magapadayon ang pagpanghikot sang balaan nga espiritu sa mga alagad sang Dios para buligan sila nga mahimo ang iya kabubut-on sing walay katubtuban.

16. Ano ang ginahimo subong sang mga alagad sang Dios sa bulig sang iya espiritu?

¹⁶ Ano ang ginahimo subong sang mga alagad ni Jehova sa bulig sang iya balaan nga espiritu? Ang Bugna 22:17 nagasabat: “Ang espiritu kag ang nobya padayon nga nagasiling: ‘Kari!’ Kag ang bisan sin-o nga nagapamati magsiling: ‘Kari!’ Kag ang bisan sin-o nga ginauhaw magkari; ang bisan sin-o nga luyag magkuha sang tubig sang kabuhi nga wala sing bayad.” Ginapahulag sang espiritu ang mga Cristiano karon nga padayon nga agdahon “ang bisan sin-o nga luyag” magbaton sang tubig sang kabuhi. Ginapangunahan ini sang hinaplas nga mga Cristiano kag ang iban nga mga karnero nagapakigbahin man sa pagpangagda. Ining duha ka grupo ginatuytuyan sang amo man nga espiritu. Ginsimbuluhan sining duha ka grupo ang ila dedikasyon kay Jehova paagi sa pagpabawtismo “sa ngalan sang Amay kag sang Anak kag sang balaan nga espiritu.” (Mateo 28:19) Nagapatuytoy sila tanan sa espiritu paagi sa pagpakita sang bunga sini. (Galacia 5:22, 23) Kaangay sang mga hinaplas, ang iban nga mga karnero nagabaton man sang bulig sang balaan nga espiritu. Paagi sa sini, ginahimo nila ang ila bug-os nga masarangan agod matigayon ang matinlo nga pagkabuhi nga nagapahamuot sa Dios.—2 Cor. 7:1; Bug. 7:9, 14.

Padayon nga Pangayua ang Balaan nga Espiritu

17. Paano naton mapakita nga yara sa aton ang espiritu sang Dios?

¹⁷ Gani, bisan diin man ang imo paglaum—kabuhi man ini nga walay katapusan sa langit ukon sa duta, si Jehova makahatag sa imo sang “gahom nga labaw sa kinaandan” agod makapabilin ka nga matutom kag mabaton ang  imo padya. (2 Cor. 4:7) Mahimo yagutaon ka bangod sang imo padayon nga pagbantala sang maayong balita sang Ginharian. Apang dumduma nga ‘kon ginapakahuy-an ka tungod sa ngalan ni Cristo, malipayon ka, bangod ang espiritu sang himaya, ang espiritu mismo sang Dios, yara sa imo.’—1 Ped. 4:14.

18, 19. Paano ka buligan ni Jehova paagi sa iya balaan nga espiritu, kag ano ang padayon mo nga himuon?

¹⁸ Ang balaan nga espiritu dulot sang Dios sa mga hanuot nga nagapangayo sini. Mapauswag sini indi lang ang imo ikasarang kundi ang imo man handum nga himuon ang imo labi nga masarangan sa pag-alagad. “Ang Dios amo ang isa nga tungod sa iya nahamut-an nagapanghikot sa sulod ninyo agod magbuot kamo kag manghikot.” Ang bilidhon nga dulot sang balaan nga espiritu, upod ang aton panikasog nga makapadayon nga “nagapanguyapot sing hugot sa pulong sang kabuhi” makabulig sa aton nga ‘padayon nga magpanikasog sa aton kaugalingon nga kaluwasan nga may kahadlok kag pagkurog.’—Fil. 2:12, 13, 16.

¹⁹ Magpanikasog gid nga himuon ang ginapahimo ni Jehova sa imo, mangin maayo sa sini, kag magpangayo sing bulig sa iya upod ang bug-os nga pagsalig. (Sant. 1:5) Buligan ka niya nga mahangpan ang iya Pulong, mabatas ang mga problema, kag mawali ang maayong balita. “Padayon sa pagpangayo, kag hatagan kamo; padayon sa pagpangita, kag inyo makita; padayon sa pagpanuktok, kag pagabuksan kamo,” kag lakip sa sini ang pagpangayo sang balaan nga espiritu. (Luc. 11:9, 13) Sa pagkamatuod, padayon nga mangamuyo kay Jehova agod mangin kaangay ka sa mga matutom—sadto kag subong—nga gintuytuyan sang balaan nga espiritu sang Dios.

Mapaathag Mo Bala?

• Kaangay ni Maria, ano nga kinaiya ang ipakita naton agod pakamaayuhon kita?

• Paano gintuytuyan sang espiritu sang Dios si Pablo?

• Paano ginatuytuyan sang espiritu sang Dios ang mga Cristiano subong?

[Mga Pamangkot sa Pagtinuon]

[Retrato sa pahina 24]

Ang espiritu sang Dios nagbulig kay Pablo nga mabatuan ang impluwensia sang malaut nga espiritu

[Retrato sa pahina 26]

Ang balaan nga espiritu nagabulig sa mga Cristiano subong, bisan ano man ang ila paglaum