Natingala gid ang mga tawo sang ang payunir nga si Charlotte White, nag-abot sa Louisville, Kentucky, U.S.A., nga nagaguyod sang de-kareto nga maleta.

TUIG 1908 sadto, kag nakuha gid ni Sister White ang atension sang mga tawo bangod sang bag-o nga imbension—ang Dawn-Mobile. “Ginamuno gid ini sang mga tawo,” siling niya, “kag natalupangdan gid ako.”

Nahibaluan gid sang mga Estudyante sang Biblia, ang pagtawag sa mga Saksi ni Jehova sadto, nga dapat ipaambit ang hamili nga mga kamatuoran nga ila natun-an halin sa ila mapisan nga pagtuon sang Kasulatan. Madamo ang nakakuha sing ihibalo sa Biblia paagi sa mga serye sang libro nga Millennial Dawn (sang ulihi gintawag man nga Studies in the Scriptures). Ining mga Cristiano nga handa magkadto sa malayo nga mga duog, banwa, baryo, kag mga uma, nagatanyag sining mga libro nga ginlaragway subong “Mga Bulig Para sa mga Estudyante sang Biblia” sa mga luyag magbasa sini.

Sang 1908, gintanyag nanday Sister White kag sang iban nga matutom nga manugbantala ang isa ka set sining anom ka libro nga nahapinan sing panapton sa $1.65 (U.S.). Sa baylo nga ibilin dayon ang Dawns, ginapaorder nila ini kag ginadul-ong na lang, kalabanan kon inugsueldo na, kag kuhaon ang diutay nga amot para sa pag-imprinta. Ang isa ka manugpamatok nagsiling nga puerte kagamay ang ginaamot sang mga tawo sa sini nga mga libro!

Madumduman ni Malinda Keefer nga mga duha asta tatlo ka gatos ka libro kada semana ang order sa iya. Apang ang interes sa Dawns nagtuga man  sing problema. Ang ikan-um lang nga libro sini nga set may 740 na ka pahina! “Ang 50 ka libro nagabug-at sing 40 libras,” (18 ka kilo) siling sang The Watch Tower, amo nga ang pagdul-ong sini “puerte kabug-at,” ilabi na sa mga sister.

Agod maghapos ang pagdul-ong sang Dawn, nag-imbento si Utod James Cole sing bulutangan sing maleta nga mapilopilo kag may duha ka karito. Puede ini matakod paagi sa screw. Bangod wala na nagapas-an sang kinarton nga libro, ang nag-imbento sini nagsiling: “Wala na ako ginakibitan.” Ginpahibalo niya ini sa nalipay nga tumalambong sa kombension sang mga Estudyante sang Biblia sang 1908 sa Cincinnati, Ohio. Sa duha ka punta sang kalaptan may ngalan nga Dawn-Mobile, kay para gid ini sa mga libro nga Millennial Dawn. Kon praktison sing maayo, puede isa lang ka kamot ang pagdala sini bisan pila pa ka dosena nga libro ang unod sini. Ang kataason puede ma-adjust, kag puede paagyon bisan sa batsihon nga mga dalan. Kon magpauli na sila, nagalakat man ukon nagasakay sa bagon, puede piluon ang mga karito sa kilid sang maleta.

Ang mga sister nga payunir ginahatagan sing libre nga Dawn-Mobile, kay ang isa sini nagabili sing $2.50 (U.S.). Si Sister Keefer, nga ara sa piktyur, nangin eksperto gid sa paggamit sang Dawn-Mobile. Ginapuno niya ini sing libro kag ginaguyod sa isa niya ka kamot, kag ang pihak nga kamot may ginabitbit nga isa pa ka bulutangan sang mga libro. Sang madamo ang interesado sa isa ka minahan sa Pennsylvania, U.S.A., masami nga tatlo ukon apat ka beses sia nga nagatabok sa taytay, kon adlaw sang iya pagpangdul-ong.

Sang katuigan 1980, gin-imbento sang isa ka piloto ang de-karito nga kalargahan sang mga gamit nga kinaandan nga makita sa mga erport kag mga kalye subong. Apang sang nagligad nga mga isa ka gatos ka tuig, mahimo nalipay gid ang makugi nga mga Estudyante sang Biblia kon ginatan-aw sila sang mga tawo samtang ginaguyod nila ang ila Dawn-Mobile agod isab-ug ang hamili nga mga binhi sang kamatuoran halin sa Biblia.

[Blurb sa pahina 32]

Sa masami, tatlo ukon apat ka beses nga nagatabok sa taytay si Sister Keefer agod idul-ong ang mga libro

[Blurb sa pahina 32]

Mahapos na magdul-ong sang mga libro