Buligi ang mga Tawo nga ‘Magbugtaw sa Katulugon’
Buligi ang mga Tawo nga ‘Magbugtaw sa Katulugon’
“Nahibaluan ninyo ang panag-on, nga oras na nga magbugtaw kamo gikan sa katulugon.”—ROMA 13:11.
MAPAATHAG MO BALA?
Ngaa importante nga magpabilin nga nagabugtaw sa espirituwal ang mga Cristiano?
Ngaa dapat mamati kag mangin mapanilagon ang nagabugtaw nga mga ministro?
Ano ang papel sang kaayo kag kalulo sa aton ministeryo?
1, 2. Sa ano nga kahulugan dapat magbugtaw ang madamo subong?
KADA tuig, linibo ang nagakapatay bangod gintuyo sila ukon natulugan samtang nagadrayb. Ang iban naman nadulaan sang obra bangod naburaw sila ukon bangod natulugan sa obra. Apang sobra pa sa sini ang epekto sang espirituwal nga katuyo. Gani parte sa sini, ang Biblia nagsiling: “Malipayon ang isa nga nagapabilin nga nagamata.”—Bug. 16:14-16.
2 Samtang nagahilapit ang dakung adlaw ni Jehova, ang katawhan sa kabilugan nagakatulog sa espirituwal. Suno gani sa iban nga lider sang Cristiandad ang ila mga miembro nagatulog sing mahamuok. Ano ang kahulugan sang pagtulog sa espirituwal? Ngaa importante nga magpabilin nga nagabugtaw ang matuod nga mga Cristiano? Paano naton mabuligan ang iban nga magbugtaw sa sini nga sahi sang katulugon?
ANO ANG KAHULUGAN SANG PAGTULOG SA ESPIRITUWAL?
3. Ilaragway ang tawo nga nagakatulog sa espirituwal.
3 Sa masami, ang nagakatulog wala sing ginahimo. Pero, ang nagakatulog sa espirituwal mahimo nga tuman kasako—apang indi sa espirituwal nga mga butang. Mahimo nga masako gid sila sa ila ginakabalak-an kada adlaw ukon sa pagpangita sang kalipay, kadungganan, ukon manggad. Bangod sini, napabay-an na nila ang ila espirituwal nga mga kinahanglanon. Apang ang mga nagabugtaw sa espirituwal nakahibalo nga nagakabuhi na kita sa “katapusan nga mga adlaw,” gani aktibo gid sila sa paghimo sang kabubut-on sang Dios.—2 Ped. 3:3, 4; Luc. 21:34-36.
4. Ano ang buot silingon sang laygay nga: “Indi kita magtulog subong sang ginahimo sang iban”?
4 Basaha ang 1 Tesalonica 5:4-8. Ginalaygayan diri ni Pablo ang iya mga masigkatumuluo nga indi “magtulog subong sang ginahimo sang iban.” Ano ang iya buot silingon? Ang isa ka paagi nga ‘makatulog’ kita amo ang pagbalewala sang mga talaksan ni Jehova sa moral. Ang isa pa amo ang indi pagsapak sang kamatuoran nga malapit na lang laglagon ni Jehova ang mga di-diosnon. Dapat naton siguraduhon nga indi kita maimpluwensiahan sang mga ginahimo kag pamatasan sang mga di-diosnon.
5. Ano nga mga panimuot ang ginapakita sang mga nagakatulog sa espirituwal?
5 Nagapati ang iban nga wala sang Dios kag wala sila sing salabton sa iya. (Sal. 53:1) Nagapati man ang iban nga indi interesado ang Dios sa mga tawo, gani wala sing pulos nga mangin interesado sila sa Iya. May iban pa gid nga nagasiling nga dapat may relihion sila para mangin abyan sila sang Dios. Ini nga mga tawo nagakatulog sa espirituwal kag kinahanglan gid pukawon. Paano naton sila mabuligan?
DAPAT KITA MAGPABILIN NGA NAGABUGTAW
6. Ngaa dapat tinguhaan gid sang mga Cristiano nga magpabilin nga nagabugtaw sa espirituwal?
6 Para mapukaw naton ang iban, dapat nagabugtaw kita. Ano ang nadalahig sa sini? Sa Biblia, ang espirituwal nga pagtulog may labot sa “mga buhat nga iya sang kadudulman”—magansal nga kinalipay, pagpahubog, ginadumili nga paghuliray, lugak nga paggawi, ginamo, kag kaimon. (Basaha ang Roma 13:11-14.) Mabudlay gid ang paglikaw sa sini nga mga paggawi. Importante gid ang pagkaalisto. Dapat dumdumon sang drayber nga kon matulugan sia samtang nagadrayb, mahimo sia mapatay. Gani dapat mahibaluan sang isa ka Cristiano nga makamamatay ang pagtulog sa espirituwal.
7. Ano ang mahimo nga epekto kon indi husto ang pagtamod naton sa mga tawo?
7 Halimbawa, mahimo hunahunaon sang isa ka Cristiano nga wala na gid sing nagapamati sa maayong balita sa iya teritoryo. (Hulu. 6:10, 11) Mahimo magsiling sia, ‘Ti kon indi sila mamati, ngaa tinguhaan gid naton nga mabuligan sila?’ Ibutang ta nga madamo gid man subong ang nagakatulog sa espirituwal apang mahimo magbag-o ang ila mga kahimtangan kag mga pagtamod. Ang iban nagbugtaw sang ulihi kag nagpamati. Mabuligan naton sila kon kita mismo nagapabilin nga nagabugtaw paagi sa paggamit sing bag-o nga mga pamaagi agod mangin mas makagalanyat ang mensahe sang Ginharian. Agod makapabilin pa gid nga nagabugtaw, dapat tamdon naton nga importante ang aton ministeryo.
NGAA IMPORTANTE ANG ATON MINISTERYO?
8. Ngaa importante gid ang aton ministeryo?
8 Dumduma nga bisan ano man ang reaksion sang mga tawo subong, ang aton pagbantala nagapadungog kay Jehova kag may papel sa pagtuman sang iya katuyuan. Sa dili madugay ang mga wala nagapamati sang maayong balita pagalaglagon. Ang reaksion sang mga tawo sa aton pagbantala amo ang basihan sang paghukom. (2 Tes. 1:8, 9) Dugang pa, sayop kon hunahunaon naton nga indi kinahanglan ang makugi nga pagbantala kay ‘may pagkabanhaw man sang mga matarong kag mga di-matarong.’ (Binu. 24:15) Nahangpan naton suno sa Pulong sang Dios nga ang mga ginhukman subong “mga kanding” makaagom sang “kamatayon nga walay katapusan.” Ang pagbantala naton nagapakita sang kaluoy sang Dios, agod may kahigayunan ang mga tawo nga magbag-o kag makatigayon sing “kabuhi nga walay katapusan.” (Mat. 25:32, 41, 46; Roma 10:13-15) Kon indi kita magbantala, paano sila makatigayon sing kahigayunan nga mabatian ang mensahe nga magaresulta sang kabuhi?
9. Paano ikaw kag ang iban nakabenepisyo sa pagbantala sang maayong balita?
9 Makabenepisyo man kita sa pagbantala sang maayong balita. (Basaha ang 1 Timoteo 4:16.) Indi bala nga napalig-on ang imo pagtuo kag gugma kay Jehova kon nagaistorya ka parte sa iya kag sa iya Ginharian? Indi bala nga napauswag mo ang Cristianong mga kinaiya bangod sini? Indi bala nga mas malipayon ka kon ginapabutyag mo ang imo debosyon sa Dios paagi sa ministeryo? Madamo ang nalipay sang nabuligan nila ang iban kag nakita ang pagpanghikot sang espiritu sang Dios para mapauswag sining mga tawo ang ila pagkabuhi.
MANGIN MAPANILAGON
10, 11. (a) Paano ginpakita nanday Jesus kag Pablo ang pagkaalisto kag pagkamapanilagon? (b) Iilustrar kon paano mag-uswag ang aton ministeryo kon mangin alisto kita kag mapanilagon.
10 Ang interes sang indibiduwal mahimo mapukaw sa nagkalainlain nga paagi. Gani dapat mangin mapanilagon ang Cristianong mga ministro. Si Jesus ang aton halimbawa. Bangod himpit sia, mahantop niya ang ginatago nga kaakig sang mga Fariseo, ang matuod nga paghinulsol sang makasasala nga babayi, kag ang pagkamasinakripisyuhon sang isa ka balo. (Luc. 7:37-50; 21:1-4) Mahatag ni Jesus ang espirituwal nga kinahanglanon sang kada isa. Indi man kinahanglan nga mangin himpit gid ang alagad sang Dios agod mangin mapanilagon. Ginpakita ini ni apostol Pablo. Ginpasibu niya ang iya presentasyon agod maengganyo ang nagkalainlain nga grupo kag ang sarisari nga mga tawo.—Binu. 17:22, 23, 34; 1 Cor. 9:19-23.
11 Kon tinguhaan naton nga mangin alisto kag mapanilagon pareho nanday Jesus kag Pablo, mahimo naton mahantop ang pinakamaayo nga paagi agod mapukaw ang interes sang aton maistorya. Halimbawa, samtang nagapalapit ka sa mga indibiduwal, mangita sing mga palatandaan sang ila kultura, interes, ukon kahimtangan sang pamilya. Mahimo matalupangdan mo kon ano ang ila ginahimo sa sina nga tion kag komentuhan ini sing matinahuron para masugdan ang paghambalanay.
12. Samtang nagapamalaybalay, ngaa dapat kita maghalong kon nagaistoryahanay kita sang aton partner?
12 Ang alisto nga manugpanilag nagatinguha nga likawan ang mga upang. Kon nagabantala, mahimo makapalig-on ang pag-istoryahanay upod sa aton partner. Apang dapat naton dumdumon nga nagabantala kita agod makig-istorya sa mga tawo. (Man. 3:1, 7) Gani dapat kita maghalong nga ang aton pag-istoryahanay samtang nagapakadto sa masunod nga balay indi makaupang sa aton ministeryo. Maayo man kon ang aton istoryahan sang aton partner amo ang parte sa gusto naton ihambal sa mga interesado agod mahuptan ang igtalupangod sa aton tulumuron. Subong man, bisan pa nga makabulig kon kaisa ang cell phone sa aton ministeryo, dapat pat-uron naton nga indi ini makaisturbo sa aton pagpakighambal sa tagbalay.
IPAKITA ANG PERSONAL NGA INTERES
13, 14. (a) Paano naton mahantop kon ano ang nagapainteres sa isa ka tawo? (b) Ano ang mahimo nga makapukaw sa interes sang isa sa espirituwal nga mga butang?
13 Ang mga ministro nga nagabugtaw kag alisto nagapamati sing maayo sa ila kaistorya. Ano ang puede mo mapamangkot para ipabutyag sang imo kaistorya ang iya pagtamod? Nagakabalaka bala sia sa nagadamo nga relihion, krimen sa ila lugar, ukon sa kapaslawan sang gobierno? Mapukaw mo bala ang iya interes sa espirituwal nga mga butang paagi sa pagsambit sang dalayawon nga desinyo sang buhi nga mga butang ukon pagpakita kon daw ano ka praktikal ang laygay sang Biblia? Ang mga tawo sa halos tanan nga kultura, lakip ang pila ka ateista, interesado sa pangamuyo. Madamo ang nagapalibog kon bala may nagapamati sa pangamuyo. Ang iban naman nagapamangkot: Ginapamatian bala sang Dios ang tanan nga pangamuyo? Kon wala, ano ang aton himuon agod pamatian kita sang Dios?
14 Kon panilagan naton ang eksperiensiado nga mga manugbantala, mahimo gid nga madamo kita sing matun-an nga epektibo nga pamaagi sa pagsugod sang paghambalanay. Mahimo matalupangdan mo nga wala sila nagapaningadtingad ukon nagapanghilabot sa kabuhi sang tagbalay. Paano nila ginapakita sa ila panghambal ukon pangguyahon ang ila interes sa pagtamod sang tagbalay?—Hulu. 15:13.
KAAYO KAG KALANTIP
15. Ngaa dapat naton ipakita ang kaayo sa aton pagbantala?
15 Gusto mo bala nga pukawon ka kon mahamuok ang imo tulog? Madamo ang nagapanginit kon madisturbo ang ila tulog. Gusto sang iban nga pukawon sila sing hinayhinay. Amo man sini sa aton pagpukaw sa mga nagakatulog sa espirituwal. Halimbawa, kon akigan ka sang tagbalay, ano ang pinakamaayo nga himuon? Respetuha ang iya reaksion, pasalamati ang iya pagkaprangka, kag kalmado nga maghalin na lang. (Hulu. 15:1; 17:14; 2 Tim. 2:24) Ang imo kaayo mahimo magpabag-o sa reaksion sang tagbalay kon may magkadto liwat nga mga Saksi.
16, 17. Paano naton mapakita ang paghangop sa aton ministeryo?
16 Sa pila ka kahimtangan, mahimo nga malutsan mo man ang negatibo nga mga reaksion. Ayhan may magsiling, “May relihion na ako” ukon, “Indi ako interesado” bangod ginatamaran lang sia makig-istorya. Pero, mahimo gihapon naton mapakita ang kaayo kag kalantip paagi sa pagbangon sang mga pamangkot nga magapukaw sang interes sang tagbalay sa espirituwal nga mga butang.—Basaha ang Colosas 4:6.
17 Kon kaisa, mahimo nga tuman kasako sang tagbalay, gani mas maayo nga hangpon ang iya sitwasyon kag maglakat na lang. Pero sa pila ka okasyon, ayhan mahantop mo nga puede mo gihapon mahambal sing malip-ot ang imo mensahe. Ang pila ka kauturan makabukas sing Biblia, makabasa sing makapahunahuna nga teksto, kag makabilin sing pamangkot sa tagbalay—nga wala gani kalab-ot isa ka minutos. May mga bes nga ang ila malip-ot nga presentasyon nagpainteres gid sa tagbalay amo nga gusto niya makig-istorya sing makadali. Mas maayo nga tilawan ini kon ginatugot sang kahimtangan.
18. Ano ang mahimo naton para mangin mas epektibo kita sa di-pormal nga pagpanaksi?
18 Mahimo man naton mapukaw ang interes sang mga masumalang naton sa matag-adlaw naton nga hilikuton kon handa kita magpanaksi sing di-pormal. Madamo nga kauturan ang may literatura sa ila bulsa ukon bag. Mahimo may nahanda na sila nga teksto nga ipaambit engkaso may maistorya sila. Puede ka magpabulig sa manugtatap sang pag-alagad ukon sa mga payunir sa inyo kongregasyon kon paano mo ini himuon.
HINAYHINAY NGA PAGPUKAW SA ATON MGA PARYENTE
19. Ngaa indi kita magpangampo sa pagbulig sa aton mga paryente?
19 Natural lang nga gusto naton nga batunon sang aton mga paryente ang maayong balita. (Jos. 2:13; Binu. 10:24, 48; 16:31, 32) Kon sa una naton nga pagtinguha indi sila magbaton, mahimo nga indi na kita magliwat. Ayhan nagahunahuna kita nga indi na sila magbag-o bisan ano man ang aton isiling ukon himuon. Pero, may mga hitabo nga makapabag-o sang ila kabuhi ukon pagtamod. Ukon ayhan mapauswag mo ang imo ikasarang sa pagpaathag sang kamatuoran kag mangin positibo na ang resulta.
20. Ano dapat ang aton paagi sa pagpakighambal sa mga paryente?
20 Indi gid naton pagbalewalaon ang pagtamod sang aton mga paryente. (Roma 2:4) Indi bala dapat nga malulo man kita sa ila, pareho sa aton pagpakighambal kon nagabantala kita? Mangin malulo kita kag matinahuron. Indi naton sila pagsermonan, kundi ipakita naton ang positibo nga epekto sa aton sang kamatuoran. (Efe. 4:23, 24) Ipaathag sa ila kon paano ginpakamaayo ni Jehova ang imo kabuhi, nga “nagatudlo sa imo sa kapuslanan.” (Isa. 48:17) Dapat makita ka nila nga maayo nga halimbawa subong Cristiano.
21, 22. Magsugid sang isa ka eksperiensia nga nagapakita kon daw ano ka importante nga magpadayon sa pagbulig sa mga paryente sa espirituwal.
21 Sining karon lang, ang isa ka sister nagsulat: “Pirme ko gid ginatinguhaan nga makapanaksi sa akon 13 ka utod paagi sa akon hambal kag buhat. Ginasulatan ko gid sila kada tuig. Apang sa sulod sang 30 ka tuig, ako lang ang Saksi sa pamilya.”
22 Ang sister nagpadayon: “Isa ka adlaw, gintawgan ko ang isa ko ka magulang nga babayi nga ato sa malayo. Ginsilingan niya ako nga ginpangabay niya ang lider sang ila relihion nga tun-an sia sang Biblia, apang wala gid ini nagkadto. Sang ginsilingan ko sia nga ako na lang ang matuon sa iya, sia nagsiling; ‘Sige, basta prangkahon ta ka: Indi gid ko ya mag-Saksi.’ Pagkatapos nga ipadala sa iya ang libro nga Ano Gid ang Ginatudlo sang Biblia?, ginatawgan ko sia kada semana. Apang wala pa gid niya mabasa ang libro. Isa ka bes, ginsilingan ko sia nga kuhaon ang iya libro, kag sa sulod sang 15 minutos paagi sa telepono, ginbasa namon kag ginhinun-anunan ang mga teksto nga ginkutlo. Kapila pa ini nasulit kag sang ulihi gusto na niya magtuon sing sobra pa sa 15 minutos. Dayon, sia na ang nagatawag sa akon agod magtuon, kon kaisa bisan wala pa ako makabangon sa aga kag kon kaisa duha ka beses pa sa isa ka adlaw. Pagkadason nga tuig, ginbawtismuhan sia, kag pagkasunod nga tuig nagpayunir na sia.”
23. Ngaa indi kita dapat mangampo sa pagtinguha nga pabugtawon ang mga tawo sa espirituwal?
23 Ang pagbulig sa mga tawo nga magbugtaw sa espirituwal nagakinahanglan gid sing pagpanikasog kag kalantip. Apang, nagapamati gihapon ang mga mapainubuson sa aton mga panikasog nga pabugtawon sila. Sa aberids, masobra 20,000 ka tawo kada bulan ang nangin Saksi ni Jehova. Gani sundon naton ang laygay ni Pablo kay Arquipo sang unang siglo: “Padayon ka nga magbantay nga ginatuman mo ang ministeryo, nga ginbaton mo sa Ginuo.” (Col. 4:17) Ang masunod nga artikulo magabulig sa aton tanan nga mahangpan kon paano magbantala nga may pagkahilingagawon.
[Mga Pamangkot sa Pagtinuon]
[Kahon sa pahina 13]
KON PAANO KA MAKAPABILIN NGA NAGABUGTAW
▪ Mangin masako sa paghimo sang kabubut-on sang Dios
▪ Likawi ang mga buhat nga iya sang kadulom
▪ Maghalong sa katalagman sang pagtulog sa espirituwal
▪ Hupti ang positibo nga pagtamod sa mga tawo sa inyo teritoryo
▪ Tilawi ang bag-o nga mga pamaagi sa pagbantala
▪ Dumduma ang importansia sang imo ministeryo
