“Puede Mo Kami Kodakan?”

Pagkatapos sang ikaduha nga adlaw sang distrito nga kombension, si Josué nga isa ka Bethelite sa Mexico, nag-tour sa siudad sang Querétaro. Ginpangabay sia sang mag-asawa nga turista halin sa Colombia nga sanday Javier kag Maru nga kodakan sila. Pormal ang pamayo nanday Josué kag sang iya mga abyan kag may mga badge sila para sa kombension. Gani, namangkot ang mag-asawa kon bala nagtambong sila sa isa ka gradwasyon ukon espesyal nga okasyon. Ginpaathag ni Josué nga nagatambong sila sa isa ka kombension sang mga Saksi ni Jehova kag gin-agda niya ang mag-asawa nga magtambong sa sesyon sa Domingo.

Nahuya magtambong ang mag-asawa kay wala sila sing pormal nga bayo para sa kombension. Pero, ginhatag sa ila ni Josué ang iya ngalan kag ang numero sang telepono sang sanga talatapan sa Mexico.

Pagligad sang apat ka bulan, nakibot gid si Josué sang iya nabalitaan parte kay Javier. Nagtambong gali ang mag-asawa sa kombension kag gusto nila nga kadtuan sila sang mga Saksi ni Jehova sa ila ginaistaran sadto sa Mexico City. Ginsugdan ang pagtuon sing Biblia sa ila, kag nagtambong dayon sila sa mga miting. Pagligad sang napulo ka bulan, mga manugbantala na sila. Bisan pa nga nagsaylo sila sa Toronto, Canada, padayon sila nga nag-uswag sa espirituwal kag nabawtismuhan.

Sang ulihi, nakabaton si Josué sang sulat halin kay Javier nga nagasugid kon ano ang nagpahulag sa iya nga batunon ang kamatuoran. “Antes pa kami nagtambong sa kombension, ginaistoryahan na namon nga mag-asawa nga kinahanglan namon ang panuytoy sa espirituwal. Sang nakita namon ang inyo maayo nga pamayo, nakasiling kami nga halin kamo sa isa ka espesyal gid nga pagtilipon. Sang magtambong kami, nagdayaw gid kami sang may mahigugmaon nga nagbulig sa amon nga makakita sing pulungkuan, sang may nagbulig sa amon nga masundan ang mga teksto sa Biblia, kag sa paggawi sang mga nagtambong. Wala kaso sa ila bisan pa lain ang amon pamayo.”

Napamatud-an ni Josué nga matuod gid ang ginsiling sang maalam nga si Hari Solomon: “Sa kaagahon isab-ug ang imo binhi, kag sa kahaponon dili pagpunggi ang imo kamut; kay wala ka makahibalo kon diin ang magauswag, kon ini ukon ina, ukon kon sila nga duha mangin-alangay nga maayo.” (Man. 11:6) Makasab-ug ka bala sing binhi paagi sa paghingalit sang mga kahigayunan nga masugid sa iban ang parte sa nagapakari nga kombension ukon pamulongpulong publiko? Mahimo ka gamiton ni Jehova agod ganyaton ang mga ginagutom kag ginauhaw sa espirituwal, kaangay nanday Javier kag Maru.—Isa. 55:1.

[Retrato sa pahina 32]

Halin sa wala patuo: Alejandro Voeguelin, Maru Pineda, Alejandro Pineda, Javier Pineda, kag Josué Ramírez sa sanga talatapan sa Mexico