Hupti ang Himpit nga Tagipusuon kay Jehova
Hupti ang Himpit nga Tagipusuon kay Jehova
“Anak ko, kilalahon mo ang Dios sang imo amay, kag alagdon sia sa himpit nga tagiposoon.”—1 CRON. 28:9.
PANGITAA ANG MGA SABAT SA SINING MGA PAMANGKOT:
Ano ang malaragwayon nga tagipusuon?
Ano nga mga pamaagi ang himuon naton agod mausisa ang aton tagipusuon?
Paano naton mahuptan nga bug-os ang aton tagipusuon kay Jehova?
1, 2. (a) Ano nga bahin sang lawas ang pirme gid ginagamit sing malaragwayon sa Biblia? (b) Ngaa importante nga mahangpan naton ang kahulugan sang malaragwayon nga tagipusuon?
ANG Biblia masami nga nagasambit sang mga bahin sang lawas sang tawo sing malaragwayon. Halimbawa, si patriarka Job nagsiling: “Wala sing panlugus sa akon mga kamut.” Si Hari Solomon nagsiling: “Ang maayo nga mga balita nagapatambok sang mga tul-an.” Ginpasalig ni Jehova si Ezequiel: “Ginhimo ko ang imo agtang subong sang diamante nga matig-a pa sa santikan.” Kag si apostol Pablo nagsulat kay Timoteo: “Ipalayo nila ang ila mga dulunggan sa kamatuoran.”—Job 16:17; Hulu. 15:30; Ezeq. 3:9; 2 Tim. 4:4.
2 Apang may isa ka bahin sang lawas sang tawo nga pirme gid ginagamit sing malaragwayon sa Biblia. Ginsambit ini sa isa ka pangamuyo sang matutom nga si Ana: “Ang akon tagiposoon nagakasadya sa GINOO.” (1 Sam. 2:1) Ang matuod, ginsambit sang mga manunulat sang Biblia ang tagipusuon sing halos isa ka libo ka beses, kag ang kalabanan sini malaragwayon. Importante gid nga mahangpan naton ang ginarepresentar sang tagipusuon kay suno sa Biblia dapat naton ini amligan.—Basaha ang Hulubaton 4:23.
ANG MALARAGWAYON NGA TAGIPUSUON—ANO INI?
3. Paano naton mahangpan ang kahulugan sang “tagipusuon” sa Biblia? Iilustrar.
3 Sa Biblia, ang tinaga nga “tagipusuon” wala sing direkta nga kahulugan, pero mahangpan gihapon naton ang kahulugan sini. Paano? Sa pag-ilustrar, imadyina ang isa ka larawan sa dingding nga ginhimo paagi sa pag-iping sang linibo ka magagmay nga mga bato. Para makita mo ang kabug-usan sining larawan nga human sa mga bato, dapat ka mag-antad anay. Sing kaanggid, kon usisaon naton sa Biblia ang lainlain nga paggamit sang tinaga nga “tagipusuon,” makita naton nga may ginahuman ini nga laragway. Ano ini nga laragway?
4. (a) Ano ang ginarepresentar sang “tagipusuon”? (b) Ano ang kahulugan sang mga pinamulong ni Jesus sa Mateo 22:37?
4 Ang mga manunulat sang Biblia naggamit sang “tagipusuon” sa paglaragway sang nasulod nga pagkatawo sang isa. Nagalakip ini sang aton mga handum, panghunahuna, disposisyon, panimuot, ikasarang, motibasyon, kag mga tulumuron. (Basaha ang Deuteronomio 15:7; Hulubaton 16:9; Binuhatan 2:26.) Subong sang ginsiling sang isa ka reperensia, ini ang “kabug-usan sang nasulod nga pagkatawo.” Sa pila ka kahimtangan, ang “tagipusuon” may mas direkta nga kahulugan. Halimbawa, si Jesus nagsiling: “Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mat. 22:37) Sa sini nga kahimtangan ang “tagipusuon” nagapatuhoy sa matuod nga emosyon, handum, kag balatyagon. Sa pagsambit sing isaisa sang tagipusuon, kalag, kag hunahuna, ginpadaku ni Jesus nga dapat naton ipakita ang aton gugma sa Dios sa aton balatyagon subong man sa aton pagkabuhi kag paggamit sang aton hunahuna. (Juan 17:3; Efe. 6:6) Apang kon ang “tagipusuon” ginsambit mismo, nagapatuhoy ini sa aton matuod nga pagkatawo.
KON NGAA DAPAT NATON AMLIGAN ANG ATON TAGIPUSUON
5. Ngaa gusto naton nga himuon ang aton bug-os nga masarangan sa pag-alagad kay Jehova nga may himpit nga tagipusuon?
5 Ginpahanumdom ni Hari David si Solomon: “Anak ko, kilalahon mo ang Dios sang imo amay, kag alagdon sia sa himpit nga tagiposoon kag sa handa nga hunahuna; kay ang GINOO nagausisa sang tanan nga tagiposoon, kag nagahangup sang tanan nga painoino sang mga hunahuna.” (1 Cron. 28:9) Sa pagkamatuod, si Jehova amo ang nagausisa sang tanan nga tagipusuon, lakip ang sa aton. (Hulu. 17:3; 21:2) Ang bisan ano nga makita niya sa aton tagipusuon may labot gid sa aton kaangtanan sa iya kag sa aton palaabuton. Gani, may rason gid nga sundon naton ang laygay ni David paagi sa paghimo sang aton bug-os nga masarangan sa pag-alagad kay Jehova nga may himpit ukon bug-os nga tagipusuon.
6. Ano ang dapat naton mahibaluan parte sa aton determinasyon nga alagaron si Jehova?
6 Ginapakita sang aton kakugi sa mga hilikuton bilang katawhan ni Jehova nga gusto naton sia alagaron sing bug-os tagipusuon. Pero, nakahibalo man kita nga ang malaut nga kalibutan ni Satanas kag ang aton makasasala nga mga huyog may mabaskog nga impluwensia sa aton. Makapaluya ini sang aton determinasyon nga alagaron si Jehova sing bug-os tagipusuon. (Jer. 17:9; Efe. 2:2) Gani, agod indi ini matabo, dapat naton pirme usisaon ang aton tagipusuon. Paano?
7. Ano ang nagapakita sang kondisyon sang aton tagipusuon?
7 Wala sing tawo nga makakita kon ano ang sa sulod naton, subong nga wala man sing makakita sang tugas ukon alibutod sang isa ka kahoy. Pero, sa Sermon sa Bukid ni Jesus ginsambit niya nga ang kondisyon sang isa ka kahoy makita sa mga bunga sini. Sing kaanggid, makita man sa aton mga ginahimo ang matuod nga kondisyon sang aton tagipusuon. (Mat. 7:17-20) Binagbinagon naton ang isa sini.
ISA KA PAAGI SANG PAG-USISA SA ATON TAGIPUSUON
8. Suno sa ginsiling ni Jesus sa Mateo 6:33, paano naton mapakita kon ano ang yara sa aton tagipusuon?
8 Sa iya Sermon sa Bukid, ginsilingan ni Jesus ang iya mga tagpalamati kon ano ang ila himuon para mapakita nga gusto nila alagaron si Jehova sing bug-os tagipusuon. Nagsiling sia: “Gani, padayon nga pangitaa anay ang ginharian kag ang iya pagkamatarong, kag ini tanan iban pa nga butang idugang sa inyo.” (Mat. 6:33) Huo, ang aton mga handum, panghunahuna, kag mga plano, makita sa aton prioridad. Ang pag-usisa sa aton mga prioridad isa ka paagi agod mahibaluan kon bala nagaalagad gid kita sa Dios sing bug-os tagipusuon.
9. Ano ang pangagda ni Jesus sa pila ka tawo, kag ano ang ginpakita sang ila mga reaksion?
9 Wala madugay nga ginsugo ni Jesus ang iya mga sumulunod nga “padayon nga pangitaa anay ang ginharian,” may isa ka sitwasyon nga nag-ilustrar kon paano makita ang kondisyon sang tagipusuon sang isa ka tawo paagi sa kon ano ang iya prioridad. Gin-umpisahan sang manunulat sang Ebanghelyo nga si Lucas ini nga hitabo paagi sa pagsiling nga “determinado [si Jesus] nga magkadto sa Jerusalem” bisan pa nakahibalo gid sia sang matabo sa iya didto. Samtang sila sang iya mga disipulo ‘nagapanglakaton sa dalan,’ may mga nasumalang si Jesus kag gin-agda niya nga: “Mangin sumulunod ko.” Handa ining mga tawo nga batunon ang pangagda, apang sa isa ka kondisyon. Ang isa sa ila nagsiling: “Tuguti ako anay nga maglakat kag ilubong ang akon amay.” Ang isa pa gid nagsiling: “Magasunod ako sa imo, Ginuo; apang tuguti ako anay nga magpaalam sa akon panimalay.” (Luc. 9:51, 57-61) Baliskad gid ini sa malig-on kag tinagipusuon nga pamat-od ni Jesus! Gin-una nila ang ila mga ginakabalak-an, kag ginpakita sini nga indi bug-os ang ila tagipusuon nga alagaron ang Dios.
10. (a) Ano ang reaksion sang mga sumulunod ni Cristo sa iya pangagda? (b) Anong malip-ot nga ilustrasyon ang ginsaysay ni Jesus?
10 Tuhay ang aton reaksion sa sining mga tawo. Ginbaton naton ang pangagda ni Jesus nga mangin iya mga sumulunod kag ginaalagad naton si Jehova adlaw-adlaw. Sa sining paagi ginapakita naton kon ano ang yara sa aton tagipusuon parte kay Jehova. Apang bisan masako kita sa pag-alagad kay Jehova, dapat naton dumdumon nga yara gihapon sa katalagman ang aton tagipusuon. Ngaa? Sa sugpon sang iya pagpakighambal sa sadtong mga tawo, ginpakita ni Jesus ang katalagman sang nagsiling sia: “Wala sing tawo nga nagaarado kag nagabalikid ang takus sa ginharian sang Dios.” (Luc. 9:62) Ano ang aton matun-an sa sini?
NAGAPANGUYAPOT BALA KITA SING MALIG-ON SA MAAYO?
11. Ano ang natabo sa obra sang mangunguma sa ilustrasyon ni Jesus, kag ngaa?
11 Agod mag-athag ang leksion sa malip-ot nga ilustrasyon ni Jesus, dugangan naton ini sing mga detalye. Masako nga nagaarado ang isa ka mangunguma. Apang samtang nagaarado sia, ang iya pensar yara sa ila balay kay ato didto ang iya pamilya, mga abyan, pagkaon, musika, kinalipay, kag palasilungan. Daw mapauli na gid sia. Sang malapad na ang iya naarado, indi na gid niya mapunggan ang paghandum sining maayong mga butang amo nga ‘nagbalikid sia.’ Bisan madamo pa ang hilimuon sang mangunguma tubtob makasab-ug sia, wala na sia nagkonsentrar sa sini amo nga napabay-an niya ang iya obra. Siempre nasubuan ang iya agalon kay wala sia magpadayon sa pag-obra.
12. Sa anong paagi magkaanggid ang mangunguma sa ilustrasyon ni Jesus kag ang pila ka Cristiano subong?
12 Binagbinagon naton ang kaanggid nga sitwasyon subong. Ang mangunguma nagarepresentar sa isa ka Cristiano nga daw maayo man ang kahimtangan pero yara gali sa espirituwal nga katalagman. Bilang pagpaanggid, imadyinon naton ang isa ka brother nga masako sa ministeryo. Apang bisan nagatambong sia sa mga miting kag nagabantala, indi niya mapunggan ang iya kaugalingon nga magpamensar sang mga butang sa sining kalibutan nga naluyagan kag ginahandum gid niya. Pagligad sang pila ka tuig nga pag-alagad sa Dios, indi na gid niya mapunggan ang iya handum amo nga ‘nagbalikid sia.’ Madamo pa kuntani ang iya hilikuton sa ministeryo, pero wala sia “nagapanguyapot sing hugot sa pulong sang kabuhi,” kag gani napabay-an niya ang mga hilikuton para sa Dios. (Fil. 2:16) Si Jehova, ang “Agalon sang alanyon,” nasubuan gid kay wala magpadayon ang brother.—Luc. 10:2.
13. Ano ang nalakip sa pag-alagad kay Jehova sing bug-os tagipusuon?
13 Maathag ang leksion. Ang pag-alagad kay Jehova sing bug-os tagipusuon wala lamang nagakahulugan sing regular nga pagtambong sa mga miting kag pagministeryo. (2 Cron. 25:1, 2, 27) Kon sa iya tagipusuon padayon nga ginahigugma sang isa ka Cristiano ang pila ka pamaagi sang pagkabuhi sang kalibutan, may katalagman sia nga madula ang iya maayo nga kaangtanan sa Dios. (Luc 17:32) Gani, agod maalagad naton sing bug-os ang Dios, dapat naton ‘kangil-aran ang malaut, kag magpanguyapot sing malig-on sa maayo.’ (Roma 12:9; Luc. 9:62) Kon amo, bisan pa nga ang pila ka butang sa kalibutan ni Satanas daw mapuslanon kag maayo, dapat naton pat-uron nga indi ini magpauntat sa aton pag-alagad sa Dios sing bug-os tagipusuon.—2 Cor. 11:14; basaha ang Filipos 3:13, 14.
MAGPABILIN NGA ALISTO!
14, 15. (a) Paano ginatinguhaan ni Satanas nga bag-uhon ang aton tagipusuon? (b) Iilustrar kon ngaa makatalagam ang pamaagi ni Satanas.
14 Gindedikar naton ang aton kabuhi kay Jehova bangod ginahigugma naton sia. Sa sulod sang mga tinuig sugod sadto, ginpamatud-an sang madamo sa aton nga determinado gid kita nga alagaron si Jehova sing bug-os. Pero wala gid nagauntat si Satanas sa pagpuntariya sang aton tagipusuon. (Efe. 6:12) Nakahibalo sia nga indi insigida nga biyaan naton si Jehova. Gani, ginalimbungan niya kita paagi “sining sistema sang mga butang” agod amat-amat nga paluyahon ang aton katutom sa Dios. (Basaha ang Marcos 4:18, 19.) Ngaa epektibo gid ini nga pamaagi ni Satanas?
15 Sa pagsabat, handurawa nga nagabasa ka nga ang imo suga 100-watt nga bombilya, kag hinali lang nga naponder ini. Bangod gulpi lang nagdulom, natalupangdan mo gid ini kag gin-islan mo ang bombilya. Gani nagsanag liwat. Sang masunod nga gab-i, nagbasa ka naman. Wala ka kabalo nga gin-islan na gali ang bombilya sing 95-watt. Matalupangdan mo bala ang kinatuhayan? Mahimo indi. Apang ano abi kon pagkasunod nga adlaw gin-islan naman ini sing 90-watt? Ayhan indi mo gihapon ini matalupangdan. Ngaa? Kay amat-amat lang ang pagdulom sang suga. Sing kaanggid, ang mga impluwensia sang kalibutan ni Satanas mahimo nga amat-amat nga magapaluya sa imo. Kon matabo ini, daw pareho lang nga nagmadinalag-on si Satanas nga islan ang 100-watt mo nga katutom kay Jehova sing mas manubo. Kon indi alisto ang isa ka Cristiano, mahimo indi niya matalupangdan ining amat-amat nga pagbag-o.—Mat. 24:42; 1 Ped. 5:8.
IMPORTANTE ANG PANGAMUYO
16. Paano naton maamligan ang aton kaugalingon batok sa mga pahito ni Satanas?
16 Paano naton maamligan ang aton kaugalingon sa mga pahito ni Satanas kag mahuptan ang himpit nga tagipusuon kay Jehova? (2 Cor. 2:11) Importante ang pangamuyo. Ginpalig-on ni Pablo ang mga masigkatumuluo nga ‘magtindog sing malig-on batok sa mga pahito sang Yawa.’ Nian ginsugo niya sila: “Sa tanan nga sahi sang pangamuyo kag pag-ampo padayon . . . nga magpangamuyo sa tagsa ka higayon.”—Efe. 6:11, 18; 1 Ped. 4:7.
17. Ano ang matun-an naton sa mga pangamuyo ni Jesus?
17 Agod makapabilin nga matutom, dapat naton ilugon si Jesus kag ang iya handum nga alagaron si Jehova sing bug-os tagipusuon. Si Lucas nagsulat parte sa paagi sang pagpangamuyo ni Jesus sang gab-i antes sia ginpatay: “Sa kasakit padayon sia nga nagpangamuyo sing hanuot pa gid.” (Luc. 22:44) Nakapangamuyo na si Jesus antes sini, apang sa sining okasyon, bangod nagaatubang sang pinakamabudlay nga pagtilaw sa iya pagkabuhi sa duta, nangamuyo sia “sing hanuot pa gid,” kag ginsabat ang iya pangamuyo. Ginapakita sang halimbawa ni Jesus nga ang mga pangamuyo may nanuhaytuhay nga kadalumon. Gani, samtang nagabudlay pa gid ang aton mga pagtilaw kag labi nga nagabaskog ang impluwensia ni Satanas, dapat “hanuot pa gid” ang aton pagpangamuyo para sa pangamlig ni Jehova.
18. (a) Ano ang dapat naton ipamangkot sa aton kaugalingon parte sa pangamuyo, kag ngaa? (b) Ano nga mga butang ang may epekto sa aton tagipusuon, kag sa anong mga paagi? (Tan-awa ang kahon sa pahina 16.)
18 Ano ang epekto sa aton sini nga mga pangamuyo? Si Pablo nagsiling: “Sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sang inyo tagipusuon.” (Fil. 4:6, 7) Huo, dapat gid kita mangamuyo sing hanuot kag masunson agod mahuptan naton nga himpit ang aton tagipusuon kay Jehova. (Luc. 6:12) Gani, pamangkuta ang imo kaugalingon, ‘Daw ano kahanuot kag kasunson ang akon mga pangamuyo?’ (Mat. 7:7; Roma 12:12) Ang imo sabat nagapakita kon daw ano kadalom ang imo handum nga alagaron ang Dios.
19. Ano ang imo himuon agod mahuptan ang bug-os nga tagipusuon kay Jehova?
19 Suno sa aton nabinagbinag, ang mga prioridad nga ginapahamtang naton sa aton kabuhi nagasugid kon ano ang kahimtangan sang aton tagipusuon. Luyag naton pat-uron nga ang mga butang nga aton gintalikdan ukon ang tuso nga mga pahito ni Satanas indi makadula sang aton handum nga alagaron si Jehova sing bug-os tagipusuon. (Basaha ang Lucas 21:19, 34-36.) Gani, kaangay ni David, dapat padayon kita nga makitluoy kay Jehova: “Bug-usa ang akon tagipusuon.”—Sal. 86:11.
[Mga Pamangkot sa Pagtinuon]
[Kahon sa pahina 16]
TATLO KA BUTANG NGA MAY EPEKTO SA ATON TAGIPUSUON
May ginahimo kita agod mangin mapagros ang aton literal nga tagipusuon. Gani, may dapat man kita himuon agod mangin mapagros ang aton malaragwayon nga tagipusuon. Binagbinaga ang tatlo ka butang:
1 Pagkaon: Kinahanglan sang aton literal nga tagipusuon ang masustansia nga pagkaon agod mangin mapagros ini. Sing kaanggid, dapat naton pat-uron nga bastante man ang aton espirituwal nga pagkaon paagi sa regular nga personal nga pagtuon, pagpamalandong, kag pagtambong sa mga miting.—Sal. 1:1, 2; Hulu. 15:28; Heb. 10:24, 25.
Ehersisyo: Agod mangin mapagros, dapat nga magpitik sing mabaskog ang aton literal nga tagipusuon. Sing kaanggid, ang makugi nga pagpakigbahin sa ministeryo, subong sang pagpanikasog nga mag-uswag sa aton mga hilikuton, makabulig sa aton malaragwayon nga tagipusuon.—Luc. 13:24; Fil. 3:12.
Palibot: Nagatrabaho kita kag nagapuyo sa di-diosnon nga palibot nga makapa-stress gid sa aton literal kag malaragwayon nga tagipusuon. Apang mabuhinan ang stress kon makig-upod kita pirme sa mga kauturan nga may himpit nga tagipusuon sa Dios kag nagaulikid gid sa aton.—Sal. 119:63; Hulu. 13:20.
