‘Luyag sang Anak nga Ipahayag ang Amay’
‘Luyag sang Anak nga Ipahayag ang Amay’
“Kon sin-o ang Amay, wala sang nakakilala kundi ang Anak, kag sia nga sa iya luyag sang Anak nga ipahayag sia.”—LUC. 10:22.
ANO ANG IMO SABAT?
Ngaa mapahayag ni Jesus ang Amay sa pinasahi gid nga paagi?
Paano ginpahayag ni Jesus ang Amay sa iban?
Paano mo mailog si Jesus sa pagpahayag sang Amay?
1, 2. Ano nga pamangkot ang ginapaligban gid sang madamo, kag ngaa?
‘SIN-O ang Dios?’ Ini nga pamangkot ginapaligban gid sang madamo. Halimbawa, bisan pa madamo sa nagapangangkon nga mga Cristiano ang nagapati nga ang Dios Trinidad, ginabaton nila nga imposible mahangpan ini nga doktrina. Ang isa ka awtor kag klerigo nagsiling: “Ini nga doktrina indi matungkad sang hunahuna sang tawo. Indi na ini sakop sang kinaandan nga pangatarungan kag paghangop sang tawo.” Sa pihak nga bahin, ang mga nagapati sa teoriya sang ebolusyon nagasiling nga wala sang Dios. Suno sa ila ang tanan nga dalayawon nga mga tinuga natabuan lang. Pero sa baylo nga ipanghiwala ang pagluntad sang Dios, si Charles Darwin nagsiling: “Para sa akon, ang pinakamaayo nga konklusion amo nga ini nga topiko indi matungkad sang kaalam sang tawo.”
2 Bisan ano man ang pagpati sang mga tawo, madamo gihapon ang nagapalibog parte sa pagluntad sang Dios. Pero bangod wala man nila makita ang sabat, nag-untat na lang sila sa pagpangita sa Dios. Matuod gid nga ‘ginbulag ni Satanas ang mga hunahuna sang mga di-tumuluo.’ (2 Cor. 4:4) Gani, ang kalabanan subong wala sing hinalung-ong kag naligban kon ano gid ang kamatuoran parte sa Amay, ang Manunuga sang uniberso!—Isa. 45:18.
3. (a) Sin-o ang nagpahayag sang Manunuga sa aton? (b) Ano nga mga pamangkot ang aton sabton?
3 Importante gid nga matun-an sang mga tawo ang kamatuoran parte sa Dios. Ngaa? Bangod ang nagatawag “sa ngalan ni Jehova” maluwas. (Roma 10:13) Ang pagtawag sa ngalan sang Dios nagakahulugan nga dapat kilala naton kag nahibaluan kon ano nga sahi sang Persona si Jehova. Ginsugid ni Jesucristo ining importante nga ihibalo sa iya mga disipulo. Ginpahayag niya sa ila ang Amay. (Basaha ang Lucas 10:22.) Ngaa mapahayag ni Jesus ang Amay sa pinasahi gid nga paagi? Paano niya ini ginhimo? Kag paano naton sia mailog sa pagpahayag sang Amay? Sabton naton ini nga mga pamangkot.
SI JESUCRISTO —KALIPIKADO GID
4, 5. Ngaa mapahayag ni Jesus ang Amay sa pinasahi gid nga paagi?
4 Kalipikado gid si Jesus sa pagpahayag sa Amay. Ngaa? Bangod antes pa matuga ang iban, si Jesus isa na ka espiritu nga tinuga nga nagaluntad sa langit subong ang “bugtong nga Anak sang Dios.” (Juan 1:14; 3:18) Isa gid ini ka pinasahi nga posisyon! Si Jesus lang ang kaupod sang Amay sang wala pa ang iban nga tinuga, kag sa iya lang nakapokus ang atension sang Amay. Bangod sang ila tuman kalawig nga pag-updanay, madamo sia sing natun-an sa Amay kag sa Iya mga kinaiya. Nagbakod man ang ila kaangtanan kag gugma sa isa kag isa. (Juan 5:20; 14:31) Handurawa kon daw ano kadamo ang natun-an niya sa personalidad sang iya Amay.—Basaha ang Colosas 1:15-17.
5 Ginpili sang Amay ang Anak nga mangin Iya humalambal, “Ang Pulong sang Dios.” (Bug. 19:13) Gani, may pinasahi nga asaynment si Jesus nga ipahayag ang iya Amay. Nagakaigo lamang nga ang manunulat sang Ebanghelyo nga si Juan nagsulat nga “ang Pulong” nga si Jesus “yara sa luyo sang Amay.” (Juan 1:1, 18) Mahimo nga ginahunahuna ni Juan ang kustombre sadto kon tigkalaon. Ang isa ka bisita ginapasaliay malapit sa isa pa ka bisita agod nga makaistoryahanay sila. Gani, bangod ang Anak “yara sa luyo” sang Amay makaistoryahanay gid sila sing maayo.
6, 7. Paano labi nga nagsuod ang Amay kag ang Anak?
6 Labi nga nagsuod ang Amay kag ang Anak. Ang Anak amo ang ‘kalipay sang Dios sa adlaw-adlaw.’ (Basaha ang Hulubaton 8:22, 23, 30, 31.) Natural lang nga nagbakod ang ila kaangtanan samtang nagabuligay sila kag samtang ginatun-an sang Anak nga ilugon ang mga kinaiya sang Amay. Sang gintuga na ang iban nga intelihente nga mga tinuga, nakita sang Anak kon paano nagapakig-angot si Jehova sa kada isa sa ila, kag nagtudok pa gid ang iya gugma kag pagtahod sa iya Amay.
7 Sang ginhangkat ni Satanas ang kinamatarong sa paggahom ni Jehova, natun-an sang Anak kon paano ni Jehova ginpakita ang gugma, hustisya, kaalam, kag gahom sa mabudlay nga mga kahimtangan. Pat-od gid nga nakabulig ini nga mahandaan ni Jesus ang mga kabudlayan nga maeksperiensiahan niya sa iya ministeryo sa duta.—Juan 5:19.
8. Paano kita mabuligan sang Ebanghelyo nga matun-an ang mga kinaiya sang Amay?
8 Suod gid ang Anak kay Jehova, gani sia lang ang makapaathag sing detalyado parte sa iya Amay. Makilala gid naton sing maayo ang Amay kon tun-an naton ang gintudlo kag ginhimo sang bugtong nga Anak. Halimbawa, kabudlay gid hangpon sang tinaga nga “gugma” kon basahon lang ang kahulugan sini sa diksionaryo. Pero, kon binagbinagon naton sa Ebanghelyo ang ministeryo ni Jesus kag ang iya pag-ulikid sa iban, mahangpan naton ang kahulugan sang “ang Dios gugma.” (1 Juan 4:8, 16) Magluwas sa gugma, ginpahayag man ni Jesus ang iban pa nga kinaiya sang Dios sa iya mga disipulo sang ari sia diri sa duta.
KON PAANO GINPAHAYAG NI JESUS ANG IYA AMAY
9. (a) Ano ang duha ka paagi sang pagpahayag ni Jesus sa iya Amay? (b) Maghatag sing halimbawa nga ginpahayag ni Jesus ang iya Amay paagi sa iya mga panudlo.
9 Paano ginpahayag ni Jesus ang Amay sa iya mga disipulo sadto kag sa iya mangin mga sumulunod sa ulihi? Ginhimo niya ini sa duha ka paagi: sa iya mga panudlo kag sa iya mga ginhimo. Binagbinagon anay naton ang iya mga panudlo. Matun-an naton sa mga panudlo ni Jesus sa iya mga disipulo ang parte sa mga dalanon, panghunahuna, kag balatyagon sang iya Amay. Halimbawa, ginpaanggid niya ang iya Amay sa isa ka mahigugmaon nga manugbantay nga nagpangita sa isa ka nagtalang nga karnero. Suno sa iya, kon makita sang manugbantay ang karnero, “magakasadya sia sa sini sing labi pa sangsa kasiaman kag siam nga wala magtalang.” Ngaa gingamit niya ini nga ilustrasyon? Si Jesus nagpaathag: “Subong man indi luyag sang akon Amay nga yara sa langit nga ang isa sining mga kubos malaglag.” (Mat. 18:12-14) Ano ang matun-an mo kay Jehova sa sini nga ilustrasyon? Bisan nagabatyag ka kon kaisa nga wala sing pulos kag daw nalipatan na, ang imo Amay sa langit nagakabalaka kag nagaulikid gid sa imo. Para sa iya, isa ka sang “mga kubos.”
10. Paano ginpahayag ni Jesus ang Amay paagi sa iya mga ginhimo?
10 Ginpahayag man ni Jesus ang iya Amay sa iya mga disipulo paagi sa iya mga ginhimo. Sang ginpangabay ni Felipe si Jesus: “Ipakita sa amon ang Amay,” si Jesus nagsiling: “Sia nga nakakita sa akon nakakita man sa Amay.” (Juan 14:8, 9) Binagbinaga ang pila ka halimbawa kon paano niya ginpakita ang mga kinaiya sang iya Amay. Sang may tawo nga “puno sang aro” nga nagpakitluoy nga ayuhon niya, gintandog niya ang tawo kag ginsilingan: “Luyag ko. Mangin matinlo ka.” Sang mag-ayo ang aruon, pat-od gid nga nahibaluan niya nga si Jehova ang naghatag sang gahom kay Jesus para mapaayo sia. (Luc. 5:12, 13) Dugang pa, sang mapatay si Lazaro, mahimo gid nga nabatyagan sang mga disipulo ang kahanuklog sang Amay sang nakita nila si Jesus nga ‘natandog gid ang tagipusuon kag nalisang’ kag “nagtulo ang luha.” Bisan pa nahibaluan ni Jesus nga banhawon niya si Lazaro, nabatyagan niya ang kasakit nga ginabatyag sang pamilya kag mga abyan ni Lazaro. (Juan 11:32-35, 40-43) Ayhan may paborito ka man nga mga sugilanon sa Biblia parte kay Jesus nga nakabulig sa imo nga makita ang kaluoy sang Amay.
11. (a) Sang gintinluan ni Jesus ang templo, ano ang ginpahayag niya parte sa iya Amay? (b) Ngaa makalugpay sa aton ang rekord parte sa pagpaninlo ni Jesus sang templo?
11 Ano ang matun-an mo sa pagpaninlo ni Jesus sang templo? Handurawa ang natabo: Naghimo si Jesus sang latigo nga lubid kag gintabog ang mga nagabaligya sang mga baka kag mga karnero. Ginpang-ula niya ang mga sensilyo sang mga manugbaylo sang kuarta kag ginpamaliskad ang ila mga lamesa. (Juan 2:13-17) Bangod sini, nadumduman sang mga disipulo ang tagna ni Hari David: “Ang kakugi sa imo balay naglamon sa akon.” (Sal. 69:9) Ang ginhimo ni Jesus nagpakita nga luyag gid niya pangapinan ang matuod nga pagsimba. Makita mo bala ang personalidad ni Jehova samtang ginabasa mo ini? Nagapahanumdom ini sa aton nga ang Dios may gahom gid sa pagpapas sang kalautan sa duta kag luyag gid niya nga himuon ini. Ginapakita sang reaksion ni Jesus kon ano ang ginabatyag ni Jehova sa kalautan nga lapnag subong. Makalugpay gid ini sa aton kon nagaatubang kita sang mga inhustisya.
12, 13. Ano ang matun-an mo parte kay Jehova sa pagpakig-angot ni Jesus sa iya mga disipulo?
12 Ang isa pa ka halimbawa amo ang pagpakig-angot ni Jesus sa iya mga disipulo sang nagabinaisay sila kon sin-o ang labing daku sa ila. (Mar. 9:33-35; 10:43; Luc. 9:46) Sa iya malawig nga pagpakig-upod sa iya Amay, nahibaluan niya ang pagtamod ni Jehova sa bugal. (2 Sam. 22:28; Sal. 138:6) Isa pa, nakita niya ini nga huyog kay Satanas nga Yawa nga bugalon kag luyag magpaimportante. Gani, mahimo nga nasubuan gid si Jesus nga makita ang pagkaambisyuso sang mga disipulo nga ginhanas niya kag sang 12 ka apostoles nga ginpili niya. Ginpakita nila ini nga kinaiya asta sa katapusan niya nga adlaw diri sa duta. (Luc. 22:24-27) Pero, padayon sila nga ginsaway sing mainayuhon ni Jesus. Nagsalig gid sia nga sa ulihi mailog man nila ang iya pagkamapainubuson.—Fil. 2:5-8.
13 Makita mo bala ang personalidad ni Jehova sa mainayuhon nga pagsaway ni Jesus sa sayop nga mga huyog sang iya mga disipulo? Nakita mo bala sa mga ginhambal kag ginhimo ni Jesus ang personalidad sang Amay, nga wala gid nagbiya sa iya katawhan bisan pa pirme sila nagasayop? Ang aton ihibalo sa mga kinaiya sang Dios, nagapahulag sa aton nga maghinulsol kag mangamuyo sing kapatawaran kon makasala kita.
LUYAG SANG ANAK NGA IPAHAYAG ANG IYA AMAY
14. Paano ginpakita ni Jesus nga luyag niya nga ipahayag ang Amay?
14 Madamo nga diktador ang nagakontrol sang mga tawo paagi sa paglikom sa ila sang mga impormasyon nga dapat nila mahibaluan. Pero indi amo sini si Jesus. Luyag niya nga isugid ang iya nahibaluan parte sa Amay, kag bug-os nga ipahayag Sia sa iban. (Basaha ang Mateo 11:27.) Dugang pa, ginhatagan niya ang iya mga disipulo sang “paghangop agod may ihibalo [sila] tuhoy sa isa nga matuod,” si Jehova nga Dios. (1 Juan 5:20) Ano ang buot silingon sini? Ginbuligan niya ang iya mga sumulunod nga mahangpan ang iya ginatudlo parte sa Amay. Wala niya gintago ang iya Amay sa isa ka misteryo subong sang panudlo sang Trinidad.
15. Ngaa wala ginsugid ni Jesus ang tanan nga nahibaluan niya parte sa iya Amay?
15 Ginsugid bala ni Jesus ang tanan nga nahibaluan niya parte sa iya Amay? Wala. Maalamon nga wala niya ginsugid ang tanan sa iya mga disipulo. (Basaha ang Juan 16:12.) Ngaa? Kay sa sina nga tion, ‘indi pa nila ini mahangpan.’ Apang, ginpaathag niya nga isugid sa ila ang dugang pa nga ihibalo kon mag-abot “ang manugbulig,” ang balaan nga espiritu, nga magatuytoy sa ila “sa bug-os nga kamatuoran.” (Juan 16:7, 13) Wala ginasugid sang maalamon nga mga ginikanan ang tanan nga butang kon indi pa ini maintiendihan sang ila mga anak. Sing kaanggid, ginhulat ni Jesus nga mahangpan na sang iya mga disipulo ang dugang pa nga kamatuoran parte sa Amay. Gindumdom gid niya ang ila mga limitasyon.
ILUGA SI JESUS PAAGI SA PAGBULIG SA IBAN NGA MAKILALA SI JEHOVA
16, 17. Ngaa dapat naton isugid sa iban ang parte sa Amay?
16 Kon may tawo nga kilala mo gid kag nanamian ka gid sa iya, indi bala nga gusto mo nga isugid sia sa iban? Sang si Jesus ari sa duta, ginsugid niya ang parte sa iya Amay. (Juan 17:25, 26) Mailog man bala naton sia paagi sa pagpahayag kay Jehova sa iban?
17 Subong sang nabinagbinag na, mas madamo sing nahibaluan si Jesus parte sa Amay. Pero luyag niya nga isugid ang pila sang iya nahibaluan, kag ginbuligan pa niya ang iya mga sumulunod nga mahangpan ang mas madalom nga mga butang tuhoy sa mga kinaiya sang Dios. Ginbuligan niya kita nga makilala ang aton Amay bisan pa ang kalabanan subong wala makakilala sa Iya. Nagapasalamat gid kita nga paagi sa mga panudlo kag mga ginhimo ni Jesus, ginpahayag niya sa aton ang Amay. Mahimo pa gani naton ipabugal nga kilala naton ang Amay. (Jer. 9:24; 1 Cor. 1:31) Samtang nagatinguha kita nga magsuod kay Jehova, nangin suod man sia sa aton. (Sant. 4:8) Gani, dapat naton ini isugid sa iban. Paano?
18, 19. Paano mo mapahayag ang Amay sa iban? Ipaathag.
18 Mailog naton si Jesus sa pagpahayag sa Amay paagi sa aton ginahambal kag ginahimo. Dumduma nga ang kalabanan nga maistorya naton sa ministeryo wala makakilala sa Dios. Mahimo nga tiko ang ila pagtamod sa Dios bangod sang butig nga panudlo. Ayhan mapaambit naton sa ila ang ngalan sang Dios, ang iya katuyuan para sa katawhan, kag ang iya mga kinaiya nga mabasa sa Biblia. Dugang pa, mabinagbinag naton ang pila ka sugilanon sa Biblia nga nagapakita sang mga kinaiya sang Dios nga wala naton maapresyar sadto kag isugid ini sa mga kauturan agod makabenepisyo man sila.
19 Mapahayag man naton ang Amay paagi sa aton ginahimo samtang ginatinguhaan naton nga ilugon si Jesus. Kon paagi sa aton paggawi makita sang mga tawo ang aton gugma sa Cristo, mahimo mapahulag man sila nga makigsuod sa Amay kag kay Jesus. (Efe. 5:1, 2) Ginpalig-on kita ni apostol Pablo nga ‘mangin manug-ilog niya, subong nga sia man kay Cristo.’ (1 Cor. 11:1) Pribilehiyo gid naton nga buligan ang katawhan nga makilala si Jehova paagi sa aton paggawi! Kabay nga padayon naton nga ilugon si Jesus paagi sa pagpahayag sang Amay sa iban.
[Mga Pamangkot sa Pagtinuon]
