Ginapabanaag Mo Bala ang Himaya ni Jehova?
Ginapabanaag Mo Bala ang Himaya ni Jehova?
“Ginapabanaag naton . . . kaangay sang mga espiho ang himaya ni Jehova.”—2 COR. 3:18.
ANO ANG IMO SABAT?
Bisan pa makasasala kita, paano naton mahimaya si Jehova?
Paano ang aton mga pangamuyo kag pagtambong sa mga miting makabulig sa aton nga mapabanaag ang himaya sang Dios?
Ano ang makabulig sa aton agod padayon nga mahimaya si Jehova?
1, 2. Ngaa posible nga mailog sang mga tawo ang mga kinaiya ni Jehova?
HALOS tanan kita nakailog gid sa aton mga ginikanan. Gani, masami naton mabatian nga ginasilingan ang isa ka bata, ‘Daw si Tatay mo gid ka’ ukon ‘Daw si Nanay mo gid ka.’ Kag sa masami, ginailog sang mga bata ang ila nakita sa ila ginikanan. Kamusta naman kita? Mailog bala naton ang aton Amay sa langit nga si Jehova? Bisan indi naton sia makita, matun-an naton ang iya hamili nga mga kinaiya paagi sa pagtuon sa iya Pulong, pagpanilag sa iya mga tinuga, kag pagpamalandong sa Kasulatan ilabi na sa mga ginsiling kag ginhimo sang Anak sang Dios nga si Jesucristo. (Juan 1:18; Roma 1:20) Gani, posible gid naton mapabanaag ang himaya ni Jehova.
2 Antes gintuga sanday Adan kag Eva, nagasalig gid ang Dios nga mahimo sang tawo ang Iya kabubut-on, mapabanaag ang iya mga kinaiya, kag mahimaya sia. (Basaha ang Genesis 1:26, 27.) Subong mga Cristiano, dapat naton ipakita ang mga kinaiya sang Isa nga naghimo sa aton. Kon himuon naton ini, may dalayawon kita nga pribilehiyo nga ipabanaag ang himaya sang Dios, ano man ang aton kultura, edukasyon, ukon ginhalinan. Ngaa? Bangod “ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.”—Binu. 10:34, 35.
3. Ano ang nabatyagan sang mga Cristiano samtang nagaalagad sila kay Jehova?
3 Ang hinaplas nga mga Cristiano nagapabanaag sang himaya ni Jehova. Si apostol Pablo nga isa sa ila, nagsulat: “Samtang ginapabanaag naton nga wala sing tabon sa nawong kaangay sang mga espiho ang himaya ni Jehova, kita tanan ginabalhin sa amo man nga larawan gikan sa himaya pa himaya.” (2 Cor. 3:18) Sang magdulhog si manalagna Moises sa Bukid Sinai dala ang tapitapi nga bato nga nasulatan sang Napulo ka Sugo, nagsilak ang iya nawong bangod nakighambal si Jehova sa iya. (Ex. 34:29, 30) Bisan pa wala nagasilak ang nawong sang mga Cristiano kaangay ni Moises, makita sa ila pangguyahon ang kalipay samtang ginasugid nila sa iban ang parte kay Jehova, ang iya mga kinaiya, kag ang iya dalayawon nga katuyuan sa katawhan. Kaangay sang dumaan nga mga espiho, ang mga hinaplas kag ang ila mga kaupod nga may paglaum sa duta nagapabanaag sang himaya ni Jehova sa ila kabuhi kag ministeryo. (2 Cor. 4:1) Ginapabanaag mo bala ang himaya ni Jehova paagi sa imo maayo nga paggawi kag regular nga pagbantala sang Ginharian?
HANDUM NATON NGA IPABANAAG ANG HIMAYA NI JEHOVA
4, 5. (a) Kaangay ni Pablo, ano ang ginapakigbatuan naton? (b) Ano ang epekto sang sala sa aton?
4 Subong mga alagad ni Jehova, luyag gid naton padunggan kag himayaon ang aton Manunuga sa tanan naton nga ginahimo. Apang sa masami, ang luyag naton himuon wala naton ginahimo. Amo man sina ang ginapakigbatuan ni Pablo. (Basaha ang Roma 7:21-25.) Ginpaathag niya kon ngaa: “Ang tanan nakasala kag wala makalab-ot sa himaya sang Dios.” (Roma 3:23) Bangod sa napanubli nga sala kay Adan, napaidalom ang mga tawo sa ‘sala nga nagagahom subong hari.’—Roma 5:12; 6:12.
5 Ano ang sala? Amo ini ang bisan ano nga supak sa personalidad, dalanon, talaksan, kag kabubut-on ni Jehova. Ginaguba sini ang aton kaangtanan sa Dios. Subong nga may mag-upang sa manugpana sa pag-igo sang iya target, ginaupangan kita sang sala sa pagpabanaag sang himaya sang Dios. Mahimo kita makasala sing hungod ukon indi. (Num. 15:27-31) Mabaskog gid ang impluwensia sang sala sa katawhan kag nagapahamulag ini sa ila gikan sa ila Manunuga. (Sal. 51:5; Isa. 59:2; Col. 1:21) Gani, ang katawhan sa kabilugan nahamulag kay Jehova kag nadula nila ang hamili nga kahigayunan nga mapabanaag ang himaya sang Dios. Malain katama ang epekto sang sala sa mga tawo.
6. Bisan pa makasasala kita, paano naton mahimaya ang Dios?
6 Bisan pa makasasala kita, si Jehova amo gid “ang Dios nga nagahatag sang paglaum.” (Roma 15:13) Nag-aman sia sing paagi para dulaon ang sala—ang halad gawad ni Jesucristo. Kon magtuo kita sa sina nga halad, indi na kita mangin “ulipon sang sala,” kundi mapabanaag naton ang himaya ni Jehova. (Roma 5:19; 6:6; Juan 3:16) Kon huptan naton ining maayo nga kaangtanan kay Jehova, matigayon naton karon ang iya pagpakamaayo subong man ang kahimpitan kag kabuhi nga walay katapusan sa palaabuton. Isa gid ka pagpakamaayo nga kabigon kita sang Dios nga makapabanaag sang iya himaya, bisan pa makasasala kita!
PAGPABANAAG SANG HIMAYA SANG DIOS
7. Ano ang dapat naton batunon sa aton kaugalingon agod mapabanaag ang himaya sang Dios?
7 Agod mapabanaag naton ang himaya sang Dios, dapat naton batunon nga makasasala kita. (2 Cron. 6:36) Kinahanglan naton hibaluon ang aton makasasala nga mga huyog kag tinguhaan nga kontrolon ini agod mag-uswag kita tubtob mahimaya naton ang Dios. Halimbawa, kon nagatan-aw kita sang pornograpiya, dapat naton batunon nga kinahanglan naton ang espirituwal nga bulig—kag tinguhai nga matigayon ini. (Sant. 5:14, 15) Amo ini ang una nga tikang nga dapat himuon kon luyag naton mapadunggan ang Dios. Subong mga sumilimba ni Jehova, dapat padayon naton nga usisaon ang aton kaugalingon kon bala nagasunod kita sa iya matarong nga mga talaksan. (Hulu. 28:18; 1 Cor. 10:12) Ano man ang aton makasasala nga huyog, dapat padayon naton ini nga pakigbatuan agod mapabanaag ang himaya sang Dios.
8. Bisan pa indi kita himpit, ano ang dapat naton himuon?
8 Si Jesus lamang ang tawo nga bug-os nga nakapahamuot sa Dios kag nakapabanaag sang Iya himaya tubtob napatay sia. Indi kita kaangay ni Jesus nga himpit, pero masarangan naton nga sundon ang iya halimbawa, kag tinguhaan naton nga himuon ini. (1 Ped. 2:21) Nakita ni Jehova ang aton pag-uswag pati na ang aton mga panikasog nga himayaon sia kag ginapakamaayo niya ini.
9. Ano ang mabulig sang Biblia sa mga Cristiano nga luyag magsunod sa mga ginapatuman sang Dios?
9 Ang nasulat nga Pulong ni Jehova makapasanag sang aton dalanon para mag-uswag kita. Gani importante nga tun-an sing maayo ang Biblia, basahon ini, kag pamalandungan. (Sal. 1:1-3) Ang pagbasa sing Biblia kada adlaw makabulig sa aton. (Basaha ang Santiago 1:22-25.) Ang aton mga natun-an sa Biblia nagapabakod sang aton pagtuo kag sang aton determinasyon nga likawan ang mabug-at nga mga sala para mapahamut-an si Jehova.—Sal. 119:11, 47, 48.
10. Paano ang pangamuyo makabulig sa aton nga maalagad si Jehova sing bug-os?
10 Agod mapabanaag ang himaya sang Dios, dapat man kita “magpadayon sa pagpangamuyo.” (Roma 12:12) Dapat naton ipangamuyo nga buligan kita ni Jehova nga maalagad sia sa paagi nga luyag niya. Gani, mahimo kita mangabay sa iya sing balaan nga espiritu, dugang nga pagtuo, kusog nga mabatuan ang pagsulay, kag sing ikasarang nga ‘gamiton sing husto ang pulong sang kamatuoran.’ (2 Tim. 2:15; Mat. 6:13; Luc. 11:13; 17:5) Subong sang isa ka bata nga nagasalig sa iya amay, dapat man kita magsalig sa aton Amay sa langit, si Jehova. Kon mangabay kita sang iya bulig agod maalagad naton sia sing bug-os, makasalig kita nga buligan niya kita. Indi gid kita magbatyag nga masabaran sia sa aton! Kundi sa aton pangamuyo dayawon naton sia, pasalamatan, kag pangabayon nga tuytuyan kita ilabi na kon may pagtilaw. Mahimo man naton sia pangabayon nga buligan kita nga mahimaya ang iya ngalan sa aton pag-alagad.—Sal. 86:12; Sant. 1:5-7.
11. Paano ang mga miting makabulig sa aton nga mapabanaag ang himaya sang Dios?
11 Gintugyan sang Dios ang pag-atipan sang iya hamili nga karnero sa “matutom kag mainandamon nga ulipon.” (Mat. 24:45-47; Sal. 100:3) Interesado gid ang ulipon nga klase kon paano naton ginapabanaag ang himaya ni Jehova. Ang mga miting nagabulig sa aton nga bag-uhon ang aton pagkabuhi kag pauswagon ang aton Cristiano nga mga kinaiya, subong nga ginapaliwat naton sa mananahi ang aton bayo agod magbagay ini sa aton. (Heb. 10:24, 25) Gani dapat kita mag-abot sing temprano, kay kon pirme kita leyt, mawasi naton ang pila ka espirituwal nga pagtudlo nga makapauswag sang aton mga kinaiya subong mga alagad ni Jehova.
ILUGON NATON ANG DIOS
12. Paano naton mailog ang Dios?
12 Agod mapabanaag ang himaya ni Jehova, dapat ‘mangin manug-ilog kita sa Dios.’ (Efe. 5:1) Mailog naton si Jehova kon sundon naton ang iya pagtamod sa mga butang. Kon indi, daw pareho lang nga wala naton sia ginapadunggan kag makahalalit gid ini. Ang kalibutan karon yara sa impluwensia sang malauton nga si Satanas nga Yawa, gani dapat maninguha kita nga dumtan ang mga butang nga ginadumtan ni Jehova kag higugmaon ang iya ginahigugma. (Sal. 97:10; 1 Juan 5:19) Dapat kumbinsido kita nga ang lamang nga paagi nga maalagad naton sing maayo ang Dios amo ang paghimo sang tanan nga butang para sa iya kahimayaan.—Basaha ang 1 Corinto 10:31.
13. Ngaa dapat naton dumtan ang sala, kag magapahulag ini sa aton nga himuon ang ano?
13 Ginadumtan ni Jehova ang sala kag dapat amo man kita. Dapat likawan gid naton ang bisan ano nga butang nga magaresulta sa pagpakasala. Halimbawa, dapat kita mag-andam nga maimpluwensiahan sang apostasya, kay kon indi, mangin indi kita takus sa paghimaya sa Dios. (Deut. 13:6-9) Gani, dapat naton likawan ang mga apostata ukon ang bisan sin-o nga nagapangangkon nga utod apang wala nagapadungog sa Dios, bisan pa miembro sia sang aton pamilya. (1 Cor. 5:11) Wala kita sing makuha nga kaayuhan kon debatihon naton ang mga apostata ukon ang bisan sin-o nga nagamulay sa organisasyon ni Jehova. Ang matuod, makahalit gid sa aton espirituwalidad ang pagbasa sang ila mga literatura ukon mga sinulatan sa Internet.—Basaha ang Isaias 5:20; Mateo 7:6.
14. Kon ginapabanaag naton ang himaya sang Dios, ano nga kinaiya ang dapat gid naton ipakita, kag ngaa?
14 Ang pagpakita sing gugma isa gid ka importante nga paagi para mailog naton ang aton Amay sa langit. Dapat mangin mahigugmaon kita kaangay niya. (1 Juan 4:16-19) Ang gugma sa tunga naton nagapakilala sa aton subong mga disipulo ni Jesus kag mga alagad ni Jehova. (Juan 13:34, 35) Bisan pa indi ini mahapos bangod makasasala kita, dapat tinguhaan naton nga mangin mahigugmaon sa tanan nga tion. Kon tinguhaan naton nga ipakita ang gugma kag ang iban pa nga diosnon nga kinaiya, malikawan naton ang sala kag ang paghimo sing malain sa iban.—2 Ped. 1:5-7.
15. Paano ang gugma nagaapektar sa aton kaangtanan sa iban?
15 Ang gugma amo ang nagapahulag sa aton nga maghimo sing maayo sa iban. (Roma 13:8-10) Halimbawa, kon ginahigugma naton ang aton tiayon, indi naton pagdagtaan ang higdaan sang pag-asawahay. Kon ginahigugma naton ang mga gulang kag ginatahod ang ila hilikuton, mangin masinulundon kita kag mapinasakupon sa ila. Kon ginahigugma sang kabataan ang ila ginikanan, ginatuman nila sila, ginapadunggan, kag wala ginapakalain. Kon ginahigugma naton ang aton isigkatawo, wala naton sila ginapakanubo ukon ginahambalan sing malain. (Sant. 3:9) Kag kon ginahigugma sang mga gulang ang karnero sang Dios, ginaatipan nila ini sing mahigugmaon.—Binu. 20:28, 29.
16. Paano ang pagpakita sing gugma makabulig sa aton sa ministeryo?
16 Dapat man naton ipakita ang gugma sa ministeryo. Bangod sa aton gugma kay Jehova, indi kita dapat maluyahan kon ang pila ka tagbalay indi mamati ukon indi interesado. Sa baylo, padayon kita nga magabantala sing maayong balita. Ang gugma magapahulag man sa aton nga maghanda sing maayo kag magtinguha nga mangin epektibo sa ministeryo. Kon ginahigugma gid naton ang Dios kag ang aton isigkatawo, indi naton pagkabigon ang pagbantala nga isa lang ka trabaho ukon obligasyon. Kundi, ginakabig naton ini nga isa ka daku nga pribilehiyo kag ginahimo ini sing malipayon.—Mat. 10:7.
PADAYON NGA HIMAYAA SI JEHOVA
17. Ngaa makabenepisyo kita kon batunon naton nga wala kita nakalab-ot sa himaya sang Dios?
17 Ginapakadiutay sang kalabanan nga tawo ang sala, pero indi kita pareho sa ila. Gani ginabaton naton nga kinahanglan gid pakigbatuan ang aton makasasala nga huyog. Kon batunon naton nga makasasala kita, mahanas naton ang aton konsiensia nga himuon ang husto kon daw nagatubo na ang sala sa aton hunahuna kag tagipusuon. (Roma 7:22, 23) Matuod maluya kita, apang mapabakod kita sang Dios nga himuon ang husto sa tanan nga kahimtangan.—2 Cor. 12:10.
18, 19. (a) Ano ang makabulig sa aton agod mangin madinalag-on batok sa malaut nga mga espiritu? (b) Ano ang determinado naton nga himuon?
18 Para mahimaya si Jehova, dapat man naton pakigbatuan ang malaut nga mga espiritu. Ginhatagan kita sang Dios sing espirituwal nga hinganib agod mangin madinalag-on batok sa ila. (Efe. 6:11-13) Ginatinguhaan gid ni Satanas nga kuhaon kay Jehova ang himaya nga para lang sa Iya. Pirme man niya ginapanikasugan nga gub-on ang aton kaangtanan kay Jehova. Apang mapakahuy-an gid si Satanas kon huptan naton ang aton integridad kag himayaon ang Dios upod sa iban pa nga minilyon ka di-himpit nga lalaki, babayi, kag kabataan. Gani, padayon naton nga dayawon si Jehova kaangay sang mga tinuga sa langit nga nagasiling: “Takus ka, Jehova, nga amon Dios, nga magbaton sang himaya kag dungog kag gahom, bangod gintuga mo ang tanan nga butang, kag bangod sang imo kabubut-on nagluntad sila kag natuga.”—Bug. 4:11.
19 Kabay pa nga mangin determinado kita nga padayon nga himayaon si Jehova ano man ang matabo. Nalipay gid sia kon madamo sang matutom nga tawo nga nagatinguha nga ilugon sia kag nagapabanaag sang iya himaya. (Hulu. 27:11) Kabay nga magbatyag kita kaangay ni David nga nag-amba: “Dayawon ko ikaw, O Ginoo nga Dios nakon, sa bug-os ko nga tagiposoon, kag himayaon ko ang imo ngalan sa gihapon.” (Sal. 86:12) Ginakalangkagan gid naton ang tion nga mapabanaag naton sing bug-os ang himaya ni Jehova kag madayaw sia sing dayon! Maeksperiensiahan gid ini sang matinumanon nga katawhan. Ginapabanaag mo bala ang himaya ni Jehova nga Dios subong, kag padayon nga himuon ini sa walay katubtuban?
[Mga Pamangkot sa Pagtinuon]
[Mga Retrato sa pahina 27]
Ginapabanaag mo bala ang himaya ni Jehova sa sini nga mga paagi?
