Magsalig kay Jehova—Ang Dios sang “mga Tion kag sang mga Panag-on”

“Sia nagabaylo sang mga tion kag sang mga panag-on; sia nagapahalin sang mga hari kag nagapahamtang sang mga hari.”—DAN. 2:21.

PAANO MO SABTON?

Paano ang mga tinuga kag ang natuman nga mga tagna nagapakita nga si Jehova ang Dakung Manughupot sang Tion?

Ang pagkahibalo nga si Jehova amo ang Dios sang “mga tion kag sang mga panag-on” magapahulag sa aton nga himuon ang ano?

Ngaa ang ginpat-od nga tion ni Jehova indi kontrolado sang mga hitabo sa kalibutan ukon sang ginahimo sang mga tawo?

1, 2. Ano ang nagapakita nga nahangpan gid ni Jehova ang tion?

ANTES pa gintuga ni Jehova nga Dios ang tawo, naghatag sia sing pamaagi kon paano mahibaluan ang tion. Sang ikap-at nga adlaw sang pagpanuga, ang Dios nagsiling: “Magmay mga sulo sa kahawaan sang mga langit sa pagpain sang adlaw sa gab-i; kag sila mangintandaan kag nga sa mga panag-on kag nga sa mga adlaw kag mga tuig.” (Gen. 1:14, 19, 26) Natabo gid ini suno sa katuyuan ni Jehova.

² Apang asta subong, nagadebate gihapon ang mga sientipiko parte sa tion. “Ang tion isa sa pinakamadalom nga misteryo sa kalibutan,” siling sang isa ka ensiklopedia. “Wala sing may makapaathag kon ano gid ini.” Apang nahangpan gid ni Jehova kon ano ang tion. Siempre, sia ang “nagtuga sang mga langit . . . nga naghuman sang duta kag naghimo sini.” Si Jehova man ang “nagapahayag sang katapusan kutub sa ginsuguran kag kutub sa dumaan nga mga tion sang mga butang nga wala pa mahimo.” (Isa. 45:18; 46:10) Agod magbakod ang aton pagtuo sa iya kag sa iya Pulong, ang Biblia, binagbinagon naton kon paano ang mga tinuga kag ang natuman nga mga tagna nagapakita nga si Jehova amo ang Dakung Manughupot sang Tion.

ANG MGA TINUGA NI JEHOVA NAGAPABAKOD SING PAGTUO

3. Paano ang pagkasibu sang tion makita sa aton palibot?

³ Madamo sang mga tinuga, halin sa pinakagamay asta sa pinakadaku, ang sibu gid sa pagbantay sang tion. Halimbawa, ang hulag sang mga atom wala nagabag-o. Ang pinasahi nga mga relo nga nagaandar paagi sa hulag sang atom sibu gihapon bisan pagligad sang 80 milyones ka tuig. Ang paggiho sang mga planeta kag bituon sibu man sa tion. Ang ila posisyon sa kalangitan ginagamit nga basihan sang mga panag-on kag pagpanakayon.  Si Jehova, ang Manughimo sini tanan, ‘makusug gid sa gahum’ kag takus nga dayawon.—Basaha ang Isaias 40:26.

4. Paano ang pagkasibu sang tion sa buhi nga mga tinuga nagapakita sang kaalam sang Dios?

⁴ Ang pagkasibu sang tion makita man sa buhi nga mga tinuga. Madamo nga tanom kag kasapatan ang daw may relo sa sulod nila nga nagakontrol sang siklo sang ila kabuhi. Amo nga madamo nga pispis ang may duna nga ihibalo kon san-o sila malakbay. (Jer. 8:7) Ang mga tawo daw may relo man sa sulod sang ila lawas. Halimbawa, nahibaluan sang aton lawas kon adlaw na ukon gab-i. Kon ang isa magsakay sa eroplano pakadto sa iban nga pungsod nga may tuhay nga oras, mga pila pa ka adlaw antes maka-adjust ang iya lawas sa bag-o nga oras. Ini nga mga halimbawa nagapamatuod sang gahom kag kaalam sang Dios sang “mga tion kag sang mga panag-on.” (Basaha ang Salmo 104:24.) Huo, ang Dakung Manughupot sang Tion tuman kaalam kag labing gamhanan. Makasalig gid kita nga tumanon niya ang iya katuyuan!

MGA TAGNA NGA NATUMAN SUNO SA TION

5. (a) Paano naton mahibaluan ang palaabuton sang katawhan? (b) Ngaa mapahayag ni Jehova ang mga butang nga mahanabo sa ulihi kag ang husto nga tion nga matabo ini?

⁵ Ang mga tinuga nagatudlo sa aton parte sa “di-makita nga mga kinaiya” ni Jehova, apang wala sini ginasabat ang importante nga mga pamangkot subong sang, Ano ang palaabuton sang katawhan? (Roma 1:20) Agod masabat ini, dapat naton usisaon ang Pulong sang Dios, ang Biblia. Matun-an naton diri ang mga tagna nga natuman gid suno sa tion! Mapahayag ni Jehova kon ano ang mahanabo sa ulihi bangod nahibaluan niya ang palaabuton. Dugang pa, ang mga gintagna sa Kasulatan nagakatuman sa husto nga tion bangod mapahanabo ni Jehova ang mga butang suno sa iya tion kag katuyuan.

6. Ano ang nagapakita nga luyag ni Jehova nga mahangpan naton ang katumanan sang mga tagna sa Biblia?

⁶ Luyag ni Jehova nga mahangpan sang iya mga sumilimba ang mga tagna sa Kasulatan kag makabenepisyo sa sini. Bisan pa ang pagtamod sang Dios sa tion indi pareho sa aton, nagagamit sia sing mga termino nga mahangpan naton kon magtagna sia sing mahanabo sa espesipiko nga tion. (Basaha ang Salmo 90:4.) Halimbawa, ang tulun-an sang Bugna nagasugid parte sa “apat ka anghel” nga “ginhanda para sa oras kag adlaw kag bulan kag tuig,”—mga termino nga mahangpan naton. (Bug. 9:14, 15) Ang mga tagna nga nagakatuman suno sa tion dapat magpabakod sang aton pagtuo sa Dios sang “mga tion kag sang mga panag-on” kag sa iya Pulong. Binagbinagon naton ang pila ka halimbawa.

7. Paano ginapakita sang katumanan sang tagna ni Jeremias parte sa Jerusalem kag Juda nga si Jehova amo ang Dakung Manughupot sang Tion?

⁷ Una, binagbinagon naton ang natabo sang ikapito nga siglo B.C.E. “Sa ikap-at nga tuig ni Joaquim nga anak ni Josias, hari sang Juda,” ang pinamulong sang Dakung Manughupot sang Tion “nag-abut kay Jeremias nahanungud sa tanan nga katawohan sang Juda.” (Jer. 25:1) Gintagna ni Jehova nga mahapay ang Jerusalem kag itapok ang mga Judiyo halin sa Juda pakadto sa Babilonia. Didto ‘magaalagad sila sa hari sang Babilonia sing kapitoan ka tuig.’ Natabo ini sang 607 B.C.E. sang ginlaglag sang mga hangaway sang Babilonia ang Jerusalem, kag ang mga Judiyo gintapok sa Babilonia. Pero ano ang matabo pagkatapos sang 70 ka tuig? Si Jeremias nagtagna: “Amo ini ang ginasiling sang GINOO: Sa tapus nga matuman ang kapitoan ka tuig tungud sa Babilonia, duawon ko kamo, kag magahimo sa inyo sang akon maayo nga polong sa pagpabalik sa inyo sa sini nga duug.” (Jer. 25:11, 12; 29:10) Ini nga tagna natuman gid suno sa tion—sang 537 B.C.E. pagkatapos ginhilway sang mga  Medianhon kag Persianhon ang mga Judiyo sa Babilonia.

8, 9. Paano ang mga tagna ni Daniel tuhoy sa pag-abot sang Mesias kag sa pagtukod sang Ginharian sa langit nagapakita nga si Jehova amo ang Dios sang “mga tion kag sang mga panag-on”?

⁸ Binagbinaga ang isa pa ka tagna parte sa katawhan sang Dios sadto. Mga duha ka tuig antes magbiya ang mga Judiyo sa Babilonia, gintagna sang Dios paagi kay manalagna Daniel nga magaabot ang Mesias 483 ka tuig pagkatapos ipagua ang sugo nga patindugon liwat ang Jerusalem. Ang hari sang Medo-Persia nagpagua sina nga sugo sang 455 B.C.E. Eksakto 483 ka tuig sang ulihi—sang 29 C.E.—ginhaplas sang balaan nga espiritu si Jesus sang Nazaret sa iya bawtismo kag nangin Mesias. *—Neh. 2:1, 5-8; Dan. 9:24, 25; Luc. 3:1, 2, 21, 22.

⁹ Talupangda man kon ano ang gintagna sang Kasulatan parte sa Ginharian. Ginapakita sang tagna sa Biblia nga ang Mesianikong Ginharian tukuron sa langit sa tuig 1914. Halimbawa, ginasugid sini ang mga “tanda” sang presensia ni Jesus, diin itagbong si Satanas halin sa langit nga magaresulta sing daku nga kailo sa duta. (Mat. 24:3-14; Bug. 12:9, 12) Dugang pa, ginapakita sang tagna sa Biblia ang eksakto nga tion—1914—nga “matuman ang gintalana nga mga tion sang mga pungsod” kag ang Ginharian magagahom sa langit.—Luc. 21:24; Dan. 4:10-17. *

10. Ano nga mga hitabo sa palaabuton ang sigurado nga mahanabo sa ginpat-od nga tion?

¹⁰ Mahanabo sa palaabuton ang “dakung kapipit-an” nga gintagna ni Jesus. Pagasundan ini sang iya Isa ka Libo ka Tuig nga Paggahom. Sigurado gid nga mahanabo ini suno sa tion. Sang si Jesus yari sa duta, ginpat-od na ni Jehova ang “adlaw kag oras” kon san-o ini mahanabo.—Mat. 24:21, 36; Bug. 20:6.

‘BAKLA ANG NAGAKAIGO NGA TION’

11. Ano ang aton himuon kay nagakabuhi na kita sa tion sang katapusan?

¹¹ Ano ang himuon naton kay nahibaluan naton nga nagagahom na ang Ginharian kag nagakabuhi na kita sa “tion sang katapusan”? (Dan. 12:4) Nakita sang madamo ang nagalala nga mga kahimtangan sa kalibutan pero wala sila nagapati nga katumanan ini sang tagna sa Biblia parte sa katapusan nga mga adlaw. Para sa iban, ini nga mga problema madula sa ulihi ukon masarangan sang mga tawo nga paluntaron ang “paghidait kag kalig-unan.” (1 Tes. 5:3) Apang kamusta kita? Kon kumbinsido kita nga malapit na gid ang katapusan sining kalibutan ni Satanas, indi bala nga dapat naton gamiton ang aton nabilin nga tion agod alagaron ang Dios sang “mga tion kag sang mga panag-on” kag buligan ang iban nga makilala sia? (2 Tim. 3:1) Dapat mangin maalamon kita sa paggamit sang aton tion.—Basaha ang Efeso 5:15-17.

12. Ano ang matun-an naton sa ginsiling ni Jesus parte sa adlaw ni Noe?

 ¹² Indi mahapos ang ‘pagbakal sang nagakaigo nga tion’ bangod madamo nga butang sa sini nga kalibutan ang makatublag sa aton. “Subong sang mga adlaw ni Noe,” paandam ni Jesus, “amo man ang presensia sang Anak sang tawo.” Ano ang natabo sang adlaw ni Noe? Gintagna nga ang kalibutan sadto pagalaglagon. Sina nga tion, ang mga malauton malumos sa anaw. Subong “manugbantala sang pagkamatarong,” matutom nga ginpahayag ni Noe ang mensahe sang Dios sa mga katawhan. (Mat. 24:37; 2 Ped. 2:5) Apang “nagakaon [sila] kag nagainom, ang mga lalaki nagapangasawa kag ang mga babayi nagapamana, . . . kag wala sila magsapak tubtob nga nag-abot ang anaw kag nag-anod sa ila tanan.” Gani ginpaandaman ni Jesus ang iya mga sumulunod: “Pamatud-i man ninyo nga handa kamo, bangod sa oras nga wala ninyo ginahunahuna, magaabot ang Anak sang tawo.” (Mat. 24:38, 39, 44) Dapat ilugon naton si Noe, indi ang mga tawo sang iya adlaw. Ano ang makabulig sa aton nga mangin handa?

13, 14. Samtang ginahulat naton ang pagkari sang Anak sang tawo, ano ang dapat naton dumdumon parte kay Jehova nga makabulig sa aton nga alagdon sia sing matutom?

¹³ Bisan pa ang Anak sang tawo magakari sa oras nga wala naton ginapaabot, dapat naton dumdumon nga si Jehova amo ang Dakung Manughupot sang Tion. Ano man ang matabo sa kalibutan ukon ang himuon sang mga tawo, si Jehova ang nagapat-od kon san-o mahanabo ang mga butang kag ano ang mangin resulta sini. (Basaha ang Daniel 2:21.) Ang Hulubaton 21:1 nagasiling: “Ang tagiposoon sang hari yara sa kamut sang GINOO subong sang mga iligan sang tubig; ginaliso niya ini sa bisan diin ang buut niya.”

¹⁴ Makontrol ni Jehova ang mga hitabo agod matuman ang iya katuyuan suno sa tion. Madamo nga hitabo sa kalibutan ang katumanan sang tagna, ilabi na ang pagbantala sang maayong balita sang Ginharian sa bug-os nga duta. Binagbinaga ang pagkabungkag sang Unyon Sobyet kag ang mga resulta sini. Wala gid ginapaabot nga ining daku nga pagbag-o sa pulitika mahanabo sing hinali. Apang bangod sini, ang maayong balita ginabantala na karon sa madamo nga lugar diin ginadumilian anay ang aton hilikuton. Gani, dapat baklon naton ang nagakaigo nga tion agod alagdon sing matutom ang Dios sang “mga tion kag sang mga panag-on.”

MAGTUO SA GINPAT-OD NGA TION NI JEHOVA

15. Kon may mga pagbag-o nga ginahimo sa organisasyon, paano naton mapakita ang pagtuo?

¹⁵ Kinahanglan ang pagtuo sa ginpat-od nga tion ni Jehova agod makapadayon kita sa pagbantala sa sining katapusan nga mga adlaw. Bangod nagabag-o ang sitwasyon sa kalibutan, mahimo magbag-o man ang mga pamaagi sa paghimo sing disipulo. Ang organisasyon ni Jehova nagahimo kon kaisa sing mga pagbag-o agod buligan kita nga makabantala sing epektibo. Paagi sa aton pagsunod sa sini, ginapakita naton ang pagtuo sa Dios sang “mga tion kag sang mga panag-on,” samtang matutom kita nga nagaalagad sa idalom sang iya Anak, “ang ulo sang kongregasyon.”—Efe. 5:23.

16. Ngaa makasalig kita nga sakdagon kita ni Jehova sa nagakaigo nga tion?

¹⁶ Luyag ni Jehova nga mangamuyo kita sa iya nga may pagsalig nga sakdagon niya kita “sa tion nga nagakinahanglan kita sang bulig.” (Heb. 4:16) Wala bala ini nagapakita nga nagaulikid sia sa kada isa sa aton? (Mat. 6:8; 10:29-31) Mapakita naton ang pagtuo kay Jehova nga Dios kon padayon kita nga mangamuyo sang iya bulig kag magsunod sa iya panuytoy. Dapat man naton ilakip sa aton pangamuyo ang aton mga masigkatumuluo.

17, 18. (a) Ano ang himuon ni Jehova sa iya mga kaaway sa indi madugay? (b) Ano ang dapat naton likawan?

 ¹⁷ Indi kita subong dapat “malingkang” sa aton pagtuo, kundi ini ang tion nga mangin mabakod sa aton pagtuo. (Roma 4:20) Ginatinguhaan sang mga kaaway sang Dios—si Satanas kag ang iya mga sakop—nga pauntaton ang hilikuton nga ginsugo ni Jesus sa Iya mga sumulunod, lakip na kita. (Mat. 28:19, 20) Bisan pa sang mga pag-atake sang Yawa, nakahibalo kita nga si Jehova “buhi nga Dios, nga amo ang Manluluwas sang tanan nga sahi sang mga tawo, ilabi na sang mga matutom.” “Nahibaluan ni Jehova kon paano luwason ang mga tawo nga may diosnon nga debosyon gikan sa pagtilaw.”—1 Tim. 4:10; 2 Ped. 2:9.

¹⁸ Sa indi madugay, laglagon ni Jehova ang malaut nga sistema sang mga butang. Bisan pa wala naton nahibaluan ang tanan nga detalye kon san-o ini matabo, nahibaluan naton nga sa ginpat-od nga tion, laglagon ni Cristo ang mga kaaway sang Dios, kag mabindikar ang pagkasoberano ni Jehova. Gani, makatalagam gid kon malipatan naton ang kahulugan sang “mga tion kag sang mga panag-on” nga nagakabuhi kita! Kabay nga likawan naton nga maghunahuna nga “ang tanan nga butang nagapadayon nga amo gid gihapon kutob sa ginsuguran sang pagpanuga.”—1 Tes. 5:1; 2 Ped. 3:3, 4.

“MAGAHULAT AKO”

19, 20. Ngaa dapat kita maghulat kay Jehova?

¹⁹ Nalakip sa orihinal nga katuyuan ni Jehova para sa katawhan amo ang walay katapusan nga pagtuon parte sa iya kag sa iya matahom nga mga tinuga. Ang Manugwali 3:11 nagasiling: “Ang tagsa ka butang ginhimo niya [Jehova] nga matahum sa iya tion; ginbutang man niya ang wala sing katubtuban sa ila tagiposoon, apang agud nga ang tawo indi makatungkad sang binuhatan nga ginhimo sang Dios kutub sa ginsuguran bisan tubtub sa katapusan.”

²⁰ Nalipay gid kita nga wala nagbag-o ang katuyuan ni Jehova para sa katawhan! (Mal. 3:6) Sa Dios “wala sing pagbag-o subong sang pagbag-obag-o sang landong.” (Sant. 1:17) Ginaisip sang mga tawo ang tion paagi sa pagtiyog sang duta. Pero ang ginpat-od nga tion sang Dios wala nabase sa sini. Si Jehova amo ang “Hari nga dayon.” (1 Tim. 1:17) Gani, ‘magahulat kita sa Dios sang aton kaluwasan.’ (Miq. 7:7) “Magpakabakud, kag magpakaisug ang inyo tagiposoon, tanan kamo nga nagalaum sa GINOO!”—Sal. 31:24.

[Mga Nota]

[Mga Pamangkot sa Pagtinuon]

[Retrato sa pahina 19]

Nagatuo si Daniel nga matuman ang gintagna sang Dios

[Retrato sa pahina 21]

Ginagamit mo bala sing maayo ang imo tion sa paghimo sang kabubut-on ni Jehova?