Panugiron ni Max Lloyd

Isa ka gab-i sang 1955, kami sang akon kaupod nga misyonero ara sa amon asaynment sa Paraguay, Bagatnan nga Amerika. Ang balay nga amon gindayunan ginlibutan sang akig nga guban nga nagasinggit: “Ang amon dios uhaw sa dugo, kag gusto niya ang dugo sang mga gringo.” Paano kami nga mga gringo (dumuluong) nakaabot diri?

NAGDAKU ako sa Australia, kag didto ako gintudluan ni Jehova nga himuon ang iya kabubut-on. Nakabaton si Tatay sing libro nga Enemies sa isa ka Saksi sang 1938. Si Tatay kag Nanay wala gid nanamian sa klero sa amon lugar, kay suno sa iya sugidsugid lamang ang pila ka bahin sang Biblia. Pagligad sang mga isa ka tuig, nabawtismuhan ang akon mga ginikanan bilang simbulo sang ila dedikasyon kay Jehova. Sugod sadto, ang paghimo sang kabubut-on ni Jehova amo ang pinakaimportante sa amon pamilya. Ang akon utod nga si Lesley, nga magulang sa akon sing lima ka tuig, amo ang masunod nga nabawtismuhan, kag ako naman sang 1940 sa edad nga siam.

Wala madugay pagsugod sang Bug-os Kalibutan nga Inaway II, gindumilian sa Australia ang pag-imprinta kag pagpanagtag sang mga literatura sa Biblia sang mga Saksi ni Jehova. Gani bilang isa ka bata, nakatuon ako sa pagpaathag sang akon pagtuo nga Biblia lang ang ginagamit. Pirme ko ginadala ang akon Biblia sa eskwelahan para ipakita kon ngaa indi ako magsaludo sa bandera ukon magsuportar sa inaway sang mga pungsod.—Ex. 20:4, 5; Mat. 4:10; Juan 17:16; 1 Juan 5:21.

Madamo sa eskwelahan ang indi makig-upod sa akon kay espiya kuno ako sang Germany. Sa sina nga tion, nagapasalida sing pelikula sa eskwelahan. Antes magsugod ang salida, kinahanglan magtindog ang tanan kag magkanta sang pungsudnon nga ambahanon. Sang wala ako nagtindog, ginbutong ako sa buhok sang duha ukon tatlo ka bata para patindugon. Ginpahalin ako sa eskwelahan bangod sa akon mga panindugan base sa Biblia. Pero nakaeskwela ako sa balay paagi sa sulat.

NALAB-OT KO ANG AKON TULUMURON

Naghimo ako sing tulumuron nga mapayunir sa edad nga 14. Gani naluyahan gid ako sang ginsilingan ako sang akon mga ginikanan nga mangita anay sing obra. Nag-insister sila nga bayaran ko ang akon pag-istar sa balay kag nagsiling nga pasugtan nila ako nga magpayunir kon 18 anyos na ako. Bangod sini, pirme lang kami nagabaisay sa akon kinitaan. Ginatigana ko tani ini sa pagpayunir, pero ginakuha nila.

Sang magsugod na ako sa pagpayunir, gin-istorya ako sang akon mga ginikanan kag ginpaathagan  nga gindeposito nila sa bangko ang kuarta nga ginahatag ko sa ila. Gin-uli nila ini tanan sa akon para ibakal sang mga bayo kag iban pa nga kinahanglanon sa pagpayunir. Gintudluan nila ako nga suportahan ang akon kaugalingon kag indi magsalig sa iban. Ini nga paghanas nakabulig gid sa akon.

Samtang nagadaku kami ni Lesley, pirme nagadayon ang mga payunir sa amon balay kag nalipay kami sa pagbantala upod sa ila. Kada Sabado kag Domingo, masako kami sa pagbantala sa mga balay, dalan, kag sa pagdumala sing mga pagtuon sa Biblia. Ang tulumuron sang manugbantala sadto 60 ka oras kada bulan. Halos pirme ini malab-ot ni Nanay, nga isa ka maayo nga halimbawa sa amon ni Lesley.

PAGPAYUNIR SA TASMANIA

Ang una ko nga asaynment subong payunir amo ang isla sang Tasmania sa Australia, diin nag-upod ako sa akon utod kag sa iya bana. Pero wala magdugay, naghalin sila para mag-eskwela sa ika-15 nga klase sang Gilead. Mahuluy-on gid ako kag wala pa nakaagi nga nagpalayo sa balay. Abi sang iban, tatlo lang ako ka bulan didto. Pero sa sulod sang isa ka tuig sang 1950, gintangdo ako bilang company servant, nga ginatawag karon nga koordenitor sang hubon sang mga gulang. Sang ulihi, gintangdo ako nga espesyal payunir, kag nangin partner ko ang isa ka pamatan-on nga brother.

Ang amon teritoryo isa ka naligwin nga banwa nga may minahan sang saway. Wala sing Saksi didto. Nagsakay kami sa bus kag hapon na kami nakaabot. Nagdayon kami sa isa ka daan nga hotel sa una nga gab-i. Pagkaaga, samtang nagabantala kami sa pamalay, ginapamangkot namon ang mga tagbalay kon may nahibaluan sila nga bakante nga kuarto. Sang hapon na, ginhambalan kami sang isa ka tawo nga bakante ang dalayunan sang ministro sa tupad sang simbahan sang Presbiteryo. Ginsilingan niya kami nga istoryahon ang deakono. Mainabyanon ang deakono kag ginpadayon kami sa balay. Daw kasaw-a nga maggua sa balay sang klero kada adlaw para magbantala.

Madamo sing interesado sa amon teritoryo. Madamo kami sing naistorya kag nasugdan nga pagtuon sa Biblia. Sang nahibaluan ini sang mga lider sang simbahan nga ara sa kapital, kag nabalitaan nila nga nagaistar ang mga Saksi ni Jehova sa balay sang ministro, ginhambalan nila ang deakono nga pahalinon gilayon kami. Gani wala naman kami sing maistaran!

Pagkaaga, nagbantala kami asta sa udto kag nangita sing matulugan. Ang grandstand sa istadyum amo ang pinakamaayo nga amon nakit-an. Gintago namon diri ang amon mga maleta kag nagpadayon sa pagbantala. Bisan sirom na, gintapos namon bantala ang isa ka kalye. Dayon, may isa ka tawo nga nagtanyag sa amon sing gamay nga balay nga may duha ka kuarto sa likod sang iya lote.

 PAG-ALAGAD SA SIRKITO KAG PAG-ESKWELA SA GILEAD

Pagligad sing walo ka bulan sa akon asaynment, gintangdo ako sang sanga talatapan sa Australia subong manugtatap sang sirkito. Nakibot gid ako sa sini kay 20 anyos pa lang ako. Pagkatapos sang duha ka semana nga paghanas, nagbisita dayon ako sa mga kongregasyon. Ang tanan daw mas magulang sangsa akon, pero wala nila ginpakanubo ang akon pagkapamatan-on kundi ginrespeto nila ang akon ginahimo.

Madamo gid ako sing eksperiensia samtang nagabiyahe pakadto sa mga kongregasyon. Sa una nga semana, nagasakay ako sa bus, pagkasunod naman nga semana sa tren, dayon sa salakyan ukon sa motorsiklo samtang nagabitbit sang akon maleta kag preaching bag. Makalilipay gid makig-upod sa mga kauturan. Ang isa ka company servant nalipay gid sa pagpadayon sa akon sa iya balay bisan wala pa ini nahuman. Sa sina nga semana, bathtub ang akon ginatulugan, pero napalig-on gid kami sa bug-os nga semana.

Nakibot pa gid ako sang 1953 kay nakabaton ako sing aplikasyon para sa ika-22 nga klase sa Gilead. Nalipay ako, pero daw nabalaka man. Kay man, sang nakagradwar ang akon magulang kag ang iya bana sa Gilead sang Hulyo 30, 1950, gin-asayn sila sa Pakistan. Wala pa isa ka tuig, nagmasakit si Lesley kag napatay didto. Ano ayhan ang batyagon sang akon mga ginikanan kon iasayn ako sa ulihi sa malayo nga lugar? Pero nagsiling sila: “Lakat kag alagda si Jehova bisan diin ka man niya iasayn.” Wala ko na liwat nakita si Tatay kay napatay sia sang 1957.

Wala madugay, nagsakay ako sa barko upod sa lima pa ka taga-Australia kag nagpanakayon sing anom ka semana pakadto sa New York City. Sa barko, nagabasa kami sang Biblia, nagatuon, kag nagapanaksi sa mga pasahero. Antes kami magkadto sa eskwelahan sa South Lansing, New York, nagtambong anay kami sa internasyonal nga kombension sa Yankee Stadium sang Hulyo 1953. May kataason nga 165,829 ang nagtambong!

Ang amon klase sa Gilead may 120 ka estudyante nga naghalin sa lainlain nga pungsod. Sa tion lang sang gradwasyon ginsugid ang amon asaynment. Pagkabaton namon sini, nagdalidali kami sa librarya sang Gilead para matun-an ang pungsod nga asaynan sa amon. Natun-an ko nga sa akon asaynment, sa Paraguay, madamo sing rebolusyon bangod sa pulitika. Wala magdugay pag-abot namon didto, ginpamangkot ko ang iban nga misyonero isa ka aga kon ano ang “selebrasyon” sang nagligad nga gab-i. Nagyuhum sila kag nagsiling: “Naeksperiensiahan mo na ang imo una nga rebolusyon. Tan-awa sa gua sang puertahan.” Kadamo sing soldado!

MAKAKULULBA NGA EKSPERIENSIA

Isa ka bes, gin-updan ko ang manugtatap sang sirkito sa pagbisita sa isa ka naligwin nga kongregasyon para ipasalida ang The New World Society in Action. Mga walo ukon siam ka oras ang amon  biyahe. Una sa tren, dayon sa kabayo kag kalesa, kag sang ulihi sa karo. May dala kami nga generator kag projector. Sang ulihi, nag-abot kami sa amon kaladtuan. Pagkaaga, nagkadto kami sa mga kaumhan para imbitahon ang tanan sa pagtan-aw sang salida sa sina nga gab-i. Mga 15 ang nagtan-aw.

Pagligad sing mga 20 minutos nga pagpasalida, ginhambalan kami nga magsulod gilayon sa balay. Ginbulakwit namon ang projector kag nagsulod. Nakasulod na kami sang ang mga tawo nagsinggitan, nagpalupok sing pusil, kag sulitsulit nga nagsiling: “Ang amon dios uhaw sa dugo, kag gusto niya ang dugo sang mga gringo.” Duha lang ang gringo diri kag ako ang isa! Ginpunggan sang mga nagtan-aw sang salida ang guban sa pagsulod sa balay. Pero nagbalik sila sang mga alas 3:00 sang kaagahon. Nagpalupok sila sang ila pusil kag nagpromisa nga lambatan kami sa amon pagbalik sa banwa sa sina nga adlaw.

Ginkontak sang mga utod ang serip, kag nag-abot sia sang hapon nga may dala nga duha ka kabayo nga amon sakyan pa banwa. Sang nagalakbay kami, kon may kasiutan gani ukon kakahuyan, ginahanda niya ang iya pusil kag mauna para inspeksionon ang lugar. Narealisar ko nga importante ang kabayo, gani nagbakal ako sang ulihi.

NAG-ABOT ANG IBAN NGA MISYONERO

Nagpadayon gihapon ang pagbantala bisan pa pirme ini ginapamatukan sang mga klerigo. Sang 1955, nag-abot ang lima ka bag-o nga misyonero, lakip ang dalaga nga taga-Canada nga si Elsie Swanson, nga naggradwar sa ika-25 nga klase sang Gilead. Nag-updanay kami sa sanga talatapan sing makadali antes sia gin-asayn sa isa ka banwa. Gingamit niya ang iya kabuhi sa pag-alagad kay Jehova sa bulig sang iya mga ginikanan nga indi Saksi. Sang Disiembre 31, 1957, nagpakasal kami ni Elsie, kag duha lang kami ang nag-istar sa puluy-an sang mga misyonero sa bagatnan nga bahin sang Paraguay.

Wala sing gripo sa amon balay, pero may bubon sa likod sini. Wala man sing shower ukon kasilyas sa sulod, subong man sing washing machine, kag repredyeritor. Gani, adlaw-adlaw kami nga nagabakal sing pagkaon. Pero bangod sa simple nga kabuhi kag mahigugmaon nga kaangtanan sa amon mga kauturan sa kongregasyon, amo ini ang pinakamalipayon nga bahin sang amon pag-asawahay.

Sang 1963, nagpauli kami sa Australia para magbisita kay Nanay. Wala madugay, gin-atake sia sa tagipusuon nga mahimo bangod sa kalipay nga  makita liwat ang iya bata pagligad sang napulo ka tuig. Sang malapit na lang kami magbalik sa Paraguay, dapat kami maghimo sing isa ka mabudlay nga desisyon. Biyaan bala namon ang akon iloy sa ospital, kag magpaabot nga atipanon sia sang iban, dayon mabalik sa amon pinalangga nga asaynment sa Paraguay? Pagkatapos sang hanuot nga pangamuyo, nagdesisyon kami ni Elsie nga atipanon si Nanay. Gin-atipan namon sia kag nagpabilin sa bug-os tion nga ministeryo asta sang napatay sia sang 1966.

Nakapribilehiyo ako nga mag-alagad sa sirkito kag sa distrito sa Australia sa sulod sang mga tinuig, kag magtudlo sa mga gulang sa Kingdom Ministry School. Dayon, may pagbag-o na naman sa amon kabuhi. Gintangdo ako nga mangin miembro sa una nga Komite sang Sanga sa Australia. Dayon, kinahanglan kami magtukod sang bag-o nga sanga talatapan, kag ako ang gintangdo nga tsirman sang building committee. Bangod sa eksperiensia kag kooperasyon sang mga boluntaryo, napatindog ang matahom nga talatapan.

Dayon, gin-asayn ako sa Service Department, nga amo ang nagatatap sang pagbantala sa pungsod. Nakapribilehiyo man ako sa pagbisita sa iban nga sanga sa bilog nga duta subong zone overseer para magbulig kag magpalig-on. Ilabi na nga napalig-on ako sa pagbisita sa pila ka pungsod nga ang mga kauturan napriso sing tinuig ukon mga dinekada bangod sang ila katutom kay Jehova.

ANG AMON ASAYNMENT SUBONG

Sang nagpauli kami halin sa makakalapoy nga pagbiyahe sang 2001, nakabaton ako sing imbitasyon nga magkadto sa Brooklyn, New York, agod mangin bahin sang bag-o lang naporma nga Komite sang Sanga sa Estados Unidos. Ginbinagbinag namon ini sing maayo ni Elsie, kag ginbaton namon ang asaynment. Pagligad sing sobra 11 ka tuig, ari gihapon kami sa Brooklyn.

Malipayon ako kay luyag gid sang akon asawa nga himuon ang tanan nga ginapangabay ni Jehova. Sa karon, kami ni Elsie sobra na 80 anyos kag mapagros gihapon. Ginapaabot namon nga matudluan ni Jehova sa walay katapusan kag matigayon ang tanan nga bugana nga pagpakamaayo para sa mga nagahimo sang iya kabubut-on.

[Blurb sa pahina 19]

Sa una nga semana, nagasakay ako sa bus, pagkasunod naman nga semana sa tren, dayon sa salakyan ukon sa motorsiklo samtang nagabitbit sang akon maleta kag preaching bag

[Blurb sa pahina 21]

Ginapaabot namon nga matudluan ni Jehova sa walay katapusan

[Mga Retrato sa pahina 18]

Wala: Sang nagaalagad ako sa sirkito sa Australia Tuo: Upod sa akon mga ginikanan

[Retrato sa pahina 20]

Sa amon kasal sang Disiembre 31, 1957