Mag-alagad sa Dios sang Kahilwayan

“Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.”—1 JUAN 5:3.

MASABAT MO BALA?

Ano ang ginahimo ni Satanas para paguaon nga mabug-at ang mga kasuguan sang Dios?

Ngaa dapat gid kita maghalong kon sin-o ang aton mga kaupdanan?

Ano ang makabulig sa aton para magpabilin nga matutom sa Dios sang kahilwayan?

1. Ano ang pagtamod ni Jehova sa kahilwayan, kag paano niya ini ginpakita kanday Adan kag Eva?

SI Jehova lamang ang Persona nga may bug-os nga kahilwayan. Pero wala niya ini ginaabusuhan, ukon ginakontrol ang iya mga alagad bisan sa magamay nga mga butang. Sa baylo, ginhatagan niya sila sing kahilwayan, nga nagatugot sa ila nga gamiton ang ila inisyatibo kag tigayunon ang ila husto nga mga handum. Halimbawa, isa lang ka pagdumili ang ginhatag sang Dios kanday Adan kag Eva—nga indi nila pagkaunon ang bunga sang “kahoy sang pagkilala sang maayo kag malaut.” (Gen. 2:17) May dalayawon sila nga kahilwayan sa pagtuman sang kabubut-on sang ila Manunuga.

2. Ngaa nadula sang aton una nga mga ginikanan ang ila hatag-Dios nga kahilwayan?

² Ngaa ginhatagan sang Dios ang aton una nga mga ginikanan sing daku nga kahilwayan? Gintuga niya sila sa iya dagway kag ginhatagan sing konsiensia. Gani, ginapaabot niya nga ang ila gugma sa Manunuga magagiya sa ila sa husto nga paagi. (Gen. 1:27; Roma 2:15) Makapasubo nga wala gin-apresyar nanday Adan kag Eva ang ila Manughatag sing Kabuhi kag ang kahilwayan nga ginhatag sa ila. Ginpili nila ang indi matuod nga kahilwayan nga gintanyag ni Satanas, nga amo ang kahilwayan sa pagdesisyon kon ano ang maayo kag malain. Gani, imbes nga makatigayon sing daku nga kahilwayan, ginbaligya sang aton una nga mga ginikanan ang ila kaugalingon kag ang ila kaliwatan sa pagkaulipon sa sala, kag malain gid ang nangin resulta sini.—Roma 5:12.

3, 4. Paano kita ginadayaan ni Satanas parte sa mga talaksan ni Jehova?

³ Kon nadala ni Satanas ang duha ka himpit nga tawo, pati na ang madamo nga espiritu nga tinuga, sa pagsikway sa pagkasoberano sang Dios, mahimo man niya kita madaya. Ang iya pamaagi amo man gihapon. Ginapapati niya kita nga mabudlay ang mga talaksan sang Dios, kag  indi makalilipay ang pagtuman sini. (1 Juan 5:3) Mangin mabaskog ang impluwensia sini nga panghunahuna kon pirme kita mapadayag sa sini. “Ang malain nga kaupdanan nakaimpluwensia gid sa akon, ilabi na kay nahadlok ako nga mangin tuhay ang akon opinyon sa ila,” siling sang 24 anyos nga sister nga nakahimo sing seksuwal nga imoralidad. Mahimo nga naeksperiensiahan mo man ini nga pag-ipit.

⁴ Makapasubo kay kon kaisa ang indi maayo nga impluwensia nagahalin sa sulod mismo sang Cristianong kongregasyon. “May kilala ako nga mga pamatan-on nga nagadeyt sa mga indi tumuluo,” siling sang isa ka pamatan-on nga Saksi. “Pero sang ulihi narealisar ko nga ginailog ko sila kon pirme ako nagaupod sa ila. Nagluya ako sa espirituwal. Wala na ako nanamian sa mga miting, kag talagsa na lang nagagua sa latagon. Bangod sini, nagdesisyon ako nga indi na makig-upod sa ila.” Nakita mo bala kon daw ano kabaskog ang mangin impluwensia sang imo mga kaupdanan? Binagbinaga ang suno sa tion nga halimbawa sa Biblia.—Roma 15:4.

GINBIHAG NIYA ANG ILA TAGIPUSUON

5, 6. Paano ginpatalang ni Absalom ang iban, kag nagmadinalag-on bala ang iya pahito?

⁵ Sa Biblia, madamo sing halimbawa parte sa mga tawo nga may malain nga impluwensia sa iban. Isa sa ila amo si Absalom, ang anak ni Hari David. Si Absalom guapo katama. Apang sang ulihi, kaangay ni Satanas, gintugutan niya nga magtubo ang iya makagod nga ambisyon. Ginhandum niya ang trono sang iya amay, nga indi para sa iya. * Para maagaw ang pagkahari, nagpakunokuno si Absalom nga nabalaka gid sia sa mga Israelinhon kag ginpabatyag niya nga indi interesado ang hari sa ila. Pareho sang Yawa sa hardin sang Eden, ginpagua ni Absalom nga nagaulikid gid sia ila. Ginguba man niya ang reputasyon sang iya amay.—2 Sam. 15:1-5.

⁶ Nagmadinalag-on bala ang pahito ni Absalom? Makasiling kita nga huo, kay ang Biblia nagsiling: “Si Absalom nagbihag sang mga tagiposoon sang mga tawo sang Israel.” (2 Sam. 15:6) Apang sang ulihi, ang kakahas ni Absalom nagresulta sa iya pagkapukan, pati na sa iya kamatayon kag sang linibo nga iya nadala.—2 Sam. 18:7, 14-17.

7. Ano nga mga leksion ang aton matun-an parte kay Absalom? (Tan-awa ang piktyur sa pahina 14.)

⁷ Ngaa madali lang nadaya ini nga mga Israelinhon? Mahimo nga ginhandum nila ang mga butang nga ginpromisa ni Absalom. Ukon basi nadala sila sa iya kaguapuhon. Ano man ang rason, isa lang ang pat-od: Indi sila matutom kay Jehova kag sa iya gintangdo nga hari. Sa karon, padayon nga ginagamit ni Satanas ang “mga tulad-Absalom” para bihagon ang tagipusuon sang mga alagad ni Jehova. ‘Tama ka estrikto ang mga talaksan ni Jehova,’ mahimo nila isiling. ‘Kag tan-awa bala ang mga tawo nga wala nagaalagad kay Jehova. Kasadya gid sa ila!’ Kabigon mo bala ini nga wala sing pulos nga mga kabutigan, kag magpabilin nga matutom sa Dios? Nagapati ka bala nga ang “himpit nga kasuguan” ni Jehova, ang kasuguan sang Cristo, amo lamang ang makahatag sa imo sang matuod nga kahilwayan? (Sant. 1:25) Kon amo, pabalori ini nga kasuguan, kag indi gid pag-abusuhi ang imo Cristianong kahilwayan.—Basaha ang 1 Pedro 2:16.

8. Anong matuodtuod nga mga halimbawa ang nagapakita nga indi makalilipay ang pagsikway sa mga talaksan ni Jehova?

⁸ Ang mga pamatan-on amo gid ang puntariya ni Satanas. Ang isa ka brother nga treintahon nagsiling parte sa iya pagkatin-edyer: “Gintamod ko ang mga talaksan ni Jehova sa moral subong restriksion, indi proteksion.” Gani, nakakomiter sia sing seksuwal nga imoralidad. Pero indi sia malipayon. “Tinuig ako nga ginakonsiensia kag ginasubuan,”  siling niya. Ang isa ka sister naghinumdom parte sa iya pagkatin-edyer: “Sa tapos ka makahimo sing imoralidad, makabatyag ka sing kasubo kag daw wala ka na sing pulos. Pagligad sang 19 ka tuig, nagakadumduman ko gihapon ang malain ko nga ginhimo.” Ang isa pa ka sister nagsiling: “Grabe gid ang halit sa akon sa mental, espirituwal, kag emosyonal kon madumduman ko nga ang akon ginhimo nakahatag sing kasakit sa akon mga hinigugma. Wala gid sing pulos ang kabuhi kon wala ka ginakahamut-an ni Jehova.” Indi gusto ni Satanas nga hunahunaon mo ang malain nga mga resulta sang sala.

9. (a) Ano nga mga pamangkot ang makabulig sa aton para mausisa ang aton pagtamod kay Jehova kag sa iya mga kasuguan kag mga prinsipio? (b) Ngaa importante nga makilala naton sing maayo ang Dios?

⁹ Makapasubo nga madamo nga pamatan-on sa sulod sang kongregasyon, kag bisan ang mga may edad na, ang nakamarasmas sa masakit nga paagi nga may malain gid nga resulta ang pagpangalipay sa sala. (Gal. 6:7, 8) Gani, pamangkuta ang imo kaugalingon: ‘Nagapati bala ako nga mapintas ang mga pahito ni Satanas? Ginakabig ko bala si Jehova subong pinakasuod ko nga Abyan, nga nagasugid pirme sang kamatuoran kag gusto niya ang pinakamaayo para sa akon? Kumbinsido bala ako nga indi niya ako pagdingutan sang maayo nga mga butang nga makapahalipay gid sa akon?’ (Basaha ang Isaias 48:17, 18.) Para huo gid ang imo sabat, dapat nga indi hapaw ang imo ihibalo parte kay Jehova. Dapat kilalahon mo sia sing maayo kag batunon nga ang mga kasuguan kag prinsipio sa Biblia nagapakita sang iya gugma sa imo, kag indi agod dingutan ka.—Sal. 25:14.

 MANGAMUYO SING MAALAM KAG MATINUMANON NGA TAGIPUSUON

10. Ngaa dapat naton ilugon si Hari Solomon sang pamatan-on pa sia?

¹⁰ Sang pamatan-on pa si Solomon, mapainubuson sia nga nangamuyo: “Ako isa lamang ka diotay nga bata; indi ako makahibalo kon paano ang paggowa ukon ang pagsulud.” Dayon nangamuyo sia nga hatagan sing maalam kag matinumanon nga tagipusuon. (1 Hari 3:7-9, 12) Ginsabat ni Jehova ang iya hanuot nga pangabay. Sabton man niya ang imo pangamuyo, bata ka man ukon may edad na. Siempre, indi ka paghatagan ni Jehova sing paghantop kag kaalam paagi sa milagro. Pero buligan ka niya nga mangin maalam kon magtuon ka sing maayo sa iya Pulong, mangamuyo sing balaan nga espiritu, kag manginpulos sa tanan nga espirituwal nga aman sa Cristianong kongregasyon. (Sant. 1:5) Paagi sini, buligan ni Jehova bisan ang pamatan-on niya nga mga alagad nga mangin mas maalam sangsa mga wala nagasapak sa iya laygay. Mangin maalam pa sila sa ginatawag nga “mga maalam kag mga intelihente” sining kalibutan.—Luc. 10:21; basaha ang Salmo 119:98-100.

11-13. (a) Ano ang matun-an naton sa Salmo 26:4, Hulubaton 13:20, kag 1 Corinto 15:33? (b) Paano mo maaplikar ining Makasulatanhon nga mga prinsipio?

¹¹ Sa pag-ilustrar sang kapuslanan sang pagtuon sa Biblia kag pagpamalandong sang aton nabasa para makilala sing maayo si Jehova, binagbinaga ang masunod nga mga teksto. Ang kada teksto may importante nga mga prinsipio parte sa pagpili sang mga kaupdanan: “Wala ako nagaupod sa wala sing pulos nga mga tawo, wala ako nagasapak sa mga salimpapaw.” (Sal. 26:4, HPV) “Maglakat upud sa maalam nga mga tawo kag manginmaalam ka, apang ang kaupdanan sang mga buangbuang magaantus.” (Hulu. 13:20) “Ang malain nga pagpakig-upod nagapalain sang mapuslanon nga mga batasan.”—1 Cor. 15:33.

¹² Anong matun-an naton sa sini nga mga teksto? (1) Gusto ni Jehova nga pilion naton ang aton mga kaupdanan. Gusto niya nga proteksionan kita sa moral kag espirituwal. (2) Maimpluwensiahan gid kita sa maayo ukon sa malain sang mga tawo nga aton ginaupdan. Ginapakita sang mga tinaga sa mga teksto nga nagapangabay sa aton si Jehova. Ngaa? Talupangda nga ang mga teksto wala nagasugo sa aton nga “indi ka dapat . . . ” Kundi, ginapakita lang sini ang kamatuoran. Daw subong bala nga si Jehova nagasiling sa aton: ‘Amo ini ang kamatuoran. Ano ang himuon mo? Ano ang ginabatyag mo sa sini?’

¹³ Isa pa, bangod ining tatlo ka teksto panguna nga kamatuoran, wala ini nagalubad kag may masangkad nga aplikasyon. Halimbawa, pamangkuta ang imo kaugalingon: Paano ko malikawan ang mga tawo nga “salimpapaw”? Sa ano nga mga kahimtangan mahimo ako makapakig-angot sa ila? (Hulu. 3:32; 6:12) Sin-o ang “maalam nga mga tawo” nga gusto ni Jehova nga pakig-updan ko? Sin-o ang “mga buangbuang” nga luyag niya nga likawan ko? (Sal. 111:10; 112:1; Hulu. 1:7) Anong “mapuslanon nga mga batasan” ang maguba sang akon malain nga pagpakig-upod? Sa kalibutan ko lang bala makita ang malain nga mga kaupdanan? (2 Ped. 2:1-3) Ano ang imo sabat sa sini nga mga pamangkot?

14. Paano ninyo mapauswag ang inyo Pangpamilya nga Pagsimba?

¹⁴ Sa tapos mausisa ini nga mga teksto, ngaa indi mo usisaon ang iban nga teksto sa Biblia nga nagapakita sang panghunahuna sang Dios sa mga butang tuhoy sa imo ukon sa imo pamilya? * Mga ginikanan, binagbinaga ini nga mga topiko sa inyo Pangpamilya nga Pagsimba. Dumduma nga ang inyo tulumuron amo nga buligan ang kada  miembro sang pamilya nga maapresyar sing labi pa ang tudok nga gugma sang Dios sa aton nga ginapakita sa iya mga kasuguan kag mga prinsipio. (Sal. 119:72) Ini nga pagtuon dapat magpasuod sa inyo kay Jehova kag sa isa kag isa.

15. Paano mo mahibaluan nga may maalam ka kag matinumanon nga tagipusuon?

¹⁵ Paano mo masiling nga may maalam ka kag matinumanon nga tagipusuon? Ang isa ka paagi amo ang pagpaanggid sang imo panghunahuna sa mga matutom sang una, pareho kay Hari David, nga nagsulat: “Nagakalipay ako sa paghimo sang imo kabubut-on, O Dios ko; ang imo kasogoan yari sa sulud sang akon tagiposoon.” (Sal. 40:8) Nagsiling man ang manunulat sang Salmo 119: “O daw ano ang paghigugma ko sang imo kasogoan! Pamalandongan ko ini sa bug-os nga adlaw.” (Sal. 119:97) Ini nga gugma indi hapaw. Resulta ini sang maukod nga pagtuon, pagpangamuyo, pagpamalandong, kag sa nabaton mo nga mga pagpakamaayo sa pagtuman sa mga talaksan sang Dios.—Sal. 34:8.

IPAKIGBATO ANG IMO CRISTIANONG KAHILWAYAN!

16. Ano ang dumdumon naton agod magdaug sa aton pagpakig-away para sa matuod nga kahilwayan?

¹⁶ Sa bug-os nga kasaysayan, ang mga pungsod nagapakig-away para sa ila kahilwayan. Gani, ilabi na nga ipakig-away mo sa espirituwal ang imo Cristianong kahilwayan. Dumduma nga ang imo kaaway indi lang si Satanas, ang kalibutan, kag ang makahililo nga espiritu sini. Kinahanglan mo man pakigbatuan ang imo di-kahimpitan, lakip na ang imo malimbungon nga tagipusuon. (Jer. 17:9; Efe. 2:3) Pero sa bulig ni Jehova, magamadinalag-on ka. Isa pa, ang tagsa ka pagdaug, daku man ukon gamay, may duha ka maayo nga epekto. Una, mapahalipay mo si Jehova. (Hulu. 27:11) Ikaduha, samtang nagabenepisyo ka sa nagahilway nga gahom sang “himpit nga kasuguan [sang Dios] nga nagadala sang kahilwayan,” mangin determinado ka pa gid nga magpabilin sa ‘masipot nga dalan’ padulong sa kabuhi nga walay katapusan. Sa ulihi, matigayon mo man ang mas daku nga kahilwayan nga natigana para sa mga matutom kay Jehova.—Sant. 1:25; Mat. 7:13, 14.

17. Ngaa indi kita dapat maluyahan sing buot sa aton di-kahimpitan, kag ano ang ginaaman ni Jehova nga bulig?

¹⁷ Kon kaisa, makahimo kita sing sala. (Man. 7:20) Kon matabo ina, indi maluyahan sing buot ukon magbatyag nga wala ka sing pulos. Kon matumba ka, magbangon kag magpadayon. Mangayo sing bulig sa mga gulang, kon kinahanglanon. Ang ila “pangamuyo nga may pagtuo” sulat ni Santiago, “magaayo sa isa nga nagamasakit, kag si Jehova magabangon sa iya. Subong man, kon nakahimo sia sang mga sala, patawaron sia.” (Sant. 5:15) Indi pagkalimti nga ang Dios maluluy-on kag ginbuyok ka niya pakadto sa kongregasyon bangod nakita niya ang imo potensial. (Basaha ang Salmo 103:8, 9.) Gani, kon magpabilin ka nga matutom kay Jehova, indi ka niya pag-isikway.—1 Cron. 28:9.

18. Ano ang aton himuon nahisuno sa pangamuyo ni Jesus sa Juan 17:15?

¹⁸ Sa katapusan nga gab-i ni Jesus upod sa iya 11 ka apostoles, nangamuyo sia: “Bantayan mo sila bangod sa isa nga malauton.” (Juan 17:15) Indi lang mga apostoles ang ginkabalak-an ni Jesus, kundi ang tanan niya nga sumulunod. Gani, mapat-od naton nga sabton ni Jehova ang pangamuyo ni Jesus paagi sa pagbantay sa aton sa sining mabudlay nga mga tion. Si Jehova “taming sa mga nagalakat sa kadungganan . . . Matipigan [niya] ang dalan sang iya mga balaan.” (Hulu. 2:7, 8) Indi mahapos ang paglakat sa dalanon sang kadungganan ukon integridad, pero ini lamang ang dalan para sa kabuhi nga walay katapusan kag matuod nga kahilwayan. (Roma 8:21) Indi pagtuguti nga upangan ka sa pagtigayon sini.

[Mga Nota]

[Mga Pamangkot sa Pagtinuon]

[Mga Retrato sa pahina 14]

Paano naton makilala ang mga tulad-Absalom karon kag makabantay batok sa ila?