Magpagiya kay Jehova sa Matuod nga Kahilwayan
Magpagiya kay Jehova sa Matuod nga Kahilwayan
“[Magtulok] sing maayo sa himpit nga kasuguan nga nagadala sang kahilwayan.”—SANT. 1:25.
MAPAATHAG MO BALA?
Ano nga kasuguan ang nagadul-ong sa matuod nga kahilwayan, kag sin-o ang makabenepisyo sa sini?
Ano ang sekreto para matigayon ang matuod nga kahilwayan?
Ano nga kahilwayan ang nagahulat sa mga nagapabilin sa dalanon sang kabuhi?
1, 2. (a) Ano ang nagakatabo sa kahilwayan sa kalibutan subong, kag ngaa? (b) Ano nga kahilwayan ang ginapaabot sang mga alagad ni Jehova?
NAGAKABUHI kita sa tion nga nagalala ang kasakon, pagkamalinapason, kag kapintas. (2 Tim. 3:1-5) Bangod sini, ang mga gobierno nagahimo sing dugang pa nga kasuguan, nagapabakod sang puersa sang kapulisan, kag nagatakod sing elektroniko nga mga kagamitan para mabantayan ang palibot. Sa pila ka pungsod, ginabutangan sang mga pumuluyo ang ila balay sang mga alarm system, madamo nga kandado, kag nagapangoryente nga mga kudal para mangin luwas sila sa peligro. Madamo man ang wala nagagua kon gab-i ukon nagatugot sa ila kabataan nga maghampang sa gua nga wala sing nagabantay bisan adlaw. Ginapakita sini nga amat-amat na nga nagakadula ang kahilwayan, kag daw nagapadayon pa ini.
2 Sa hardin sang Eden, nagsiling si Satanas nga ang sekreto para sa matuod nga kahilwayan amo ang pagkaindependiente kay Jehova. Makahalalit gid ini nga kabutigan! Ang matuod, kon isikway sang mga tawo ang talaksan sang Dios sa moral kag espirituwal, magaantos gid sila. Apektado man kita sini bilang mga alagad ni Jehova. Apang may paglaum kita nga makita ang katapusan sang pagkaulipon sang mga tawo sa sala kag kalainan. Matigayon man naton ang ginasiling sang Biblia nga “mahimayaon nga kahilwayan sang mga anak sang Dios.” (Roma 8:21) Ang matuod, ginahanda na ni Jehova ang iya mga alagad para sa sini nga kahilwayan. Sa ano nga paagi?
3. Ano nga kasuguan ang ginhatag ni Jehova sa mga sumulunod ni Cristo, kag ano nga mga pamangkot ang aton binagbinagon?
3 Ang sabat makita sa ginsiling ni disipulo Santiago nga “himpit nga kasuguan nga nagadala sang kahilwayan.” (Basaha ang Santiago 1:25.) Sa iban nga bersion sang Biblia, ini nga pinamulong ginbadbad nga “himpit nga kasugoan nga nagahilway sa mga tawo” (Maayong Balita nga Biblia, HPV) kag “himpit nga kasugoan sang kahilwayan” (Biblia sang Katilingban sang mga Kristiano). Kinaandan na nga ginaangot sang mga tawo ang kasuguan sa mga pagdumili, indi sa kahilwayan. Gani, ano ang “himpit nga kasuguan nga nagadala sang kahilwayan”? Kag paano ini nagahilway sa aton?
ANG KASUGUAN NGA NAGAHILWAY SA ATON
4. Ano ang “himpit nga kasuguan nga nagadala sang kahilwayan,” kag sin-o ang makabenepisyo sa sini?
4 Ang “himpit nga kasuguan nga nagadala sang kahilwayan” indi ang Mosaikong Kasuguan, kay ina nga kasuguan nagpadayag sang mga paglapas kag natuman na kay Cristo. (Mat. 5:17; Gal. 3:19) Gani, ano nga kasuguan ang ginpatuhuyan ni Santiago? Amo ini “ang kasuguan ni Cristo,” nga ginatawag man nga “kasuguan sang pagtuo” kag “kasuguan sang hilway nga katawhan.” (Gal. 6:2; Roma 3:27; Sant. 2:12) Kon amo, ang “himpit nga kasuguan” nagalakip sa tanan nga ginapatuman ni Jehova sa aton. Ang hinaplas nga mga Cristiano kag ang “iban nga mga karnero” makabenepisyo sa sini.—Juan 10:16.
5. Ngaa ang kasuguan sang kahilwayan indi mabudlay sundon?
5 Indi pareho sang mga kasuguan sang madamo nga pungsod, ang “himpit nga kasuguan” indi komplikado ukon mabudlay sundon. Nagalakip ini sang simple nga mga sugo kag panguna nga mga prinsipio. (1 Juan 5:3) “Ang akon gota mahapos pas-anon kag ang akon lulan mamag-an,” siling ni Jesus. (Mat. 11:29, 30) Isa pa, ang “himpit nga kasuguan” wala nagaunod sang tuman kadamo nga silot, kay napasad ini sa gugma kag nasulat sa hunahuna kag tagipusuon, indi sa mga tapitapi nga bato.—Basaha ang Hebreo 8:6, 10.
KON PAANO ANG “HIMPIT NGA KASUGUAN” NAGAHILWAY SA ATON
6, 7. Ano ang masiling naton parte sa mga talaksan ni Jehova, kag ano ang aton matigayon kon sundon naton ang kasuguan sang kahilwayan?
6 Ang limitasyon nga ginapahamtang ni Jehova sa iya intelihente nga mga tinuga para gid sa ila kaayuhan kag proteksion. Halimbawa, binagbinaga ang pisikal nga mga kasuguan nga nagakontrol sa enerhiya kag mga butang sa uniberso. Wala nagareklamo ang mga tawo nga ginapabudlayan sila sini nga mga kasuguan. Sa baylo, ginaapresyar nila ini kay nahibaluan nila nga para ini sa ila kaayuhan. Sing kaanggid, ang mga talaksan ni Jehova sa moral kag espirituwal nga makita sa “himpit nga kasuguan” ni Cristo para sa aton kaayuhan.
7 Paagi man sa kasuguan sang kahilwayan matigayon naton ang aton nagakaigo nga mga handum nga wala nagahalit sa aton kaugalingon ukon sa kinamatarong kag kahilwayan sang iban. Gani agod matigayon ang matuod nga kahilwayan, ukon mahimo ang mga butang nga gusto naton, kinahanglan naton palambuon ang husto nga mga handum nga nahisuno sa personalidad kag mga talaksan ni Jehova. Buot silingon, dapat naton tun-an nga higugmaon ang ginahigugma ni Jehova kag dumtan ang iya ginadumtan. Ginabuligan kita sang kasuguan sang kahilwayan nga mahimo ini.—Amos 5:15.
8, 9. Ano ang mga benepisyo sang mga nagasunod sa kasuguan sang kahilwayan? Iilustrar.
8 Indi kita himpit, gani mabudlay tapnaon ang aton sayop nga mga handum. Apang, kon sundon naton ang kasuguan sang kahilwayan, mabatyagan naton ang epekto sini bisan karon. Sa pag-ilustrar: Ang isa ka bag-o nga estudyante sa Biblia nga si Jay naadik sa tabako. Sang natun-an niya nga wala nahamuot ang Dios sa iya bisyo, dapat sia maghimo sing desisyon. Sundon bala niya ang iya sayop nga handum, ukon si Jehova? Maalamon nga ginpili niya ang pag-alagad sa Dios, bisan pa ginapangita sang iya lawas ang nikotina. Ano ang iya ginbatyag sang nauntat niya ini nga bisyo? “Hilway na ako kag malipayon katama,” siling niya sang ulihi.
9 Natun-an ni Jay sa iya eksperiensia nga ang kahilwayan sa kalibutan, nga nagaimpluwensia sa mga tawo nga ‘maghunahuna sa unod,’ sa pagkamatuod nagaulipon. Pero ang kahilwayan nga halin kay Jehova, nga amo “ang paghunahuna sa espiritu,” nagahilway kag nagaresulta sa “kabuhi kag paghidait.” (Roma 8:5, 6) Sa diin si Jay nakakuha sing kusog para mauntat ang iya bisyo? Indi sa iya kaugalingon kundi sa Dios. “Regular ako nga nagatuon sing Biblia, nagapangamuyo sang balaan nga espiritu, kag nagabaton sang mahigugmaon nga bulig sang Cristianong kongregasyon,” siling niya. Ini nga mga butang makabulig man sa aton para matigayon ang matuod nga kahilwayan. Tan-awon naton kon paano.
MAGTULOK SING MAAYO SA PULONG SANG DIOS
10. Ano ang buot silingon sang tinaga nga “nagatulok sing maayo” sa kasuguan sang Dios?
10 Mabasa sa Santiago 1:25: “Sia nga nagatulok sing maayo sa himpit nga kasuguan nga nagadala sang kahilwayan kag nagapabilin sa sini . . . mangin malipayon sa paghimo niya sini.” Ang Griego nga tinaga nga ginbadbad “nagatulok sing maayo” nagakahulugan sing “pagduko para maghimutad,” nga nagapakita sing daku nga panikasog. Gani, kon gusto naton nga maimpluwensiahan kita sang kasuguan sang kahilwayan, dapat naton tun-an sing maukod ang Biblia kag pamalandungan sing maayo ang aton ginabasa.—1 Tim. 4:15.
11, 12. (a) Paano ginpadaku ni Jesus nga kinahanglan naton ikabuhi ang kamatuoran? (b) Subong sang ginpakita sang eksperiensia, ano nga katalagman ang dapat likawan sang mga pamatan-on?
11 Dapat man kita ‘magpabilin’ ukon magpadayon sa pag-aplikar sa Pulong sang Dios. Buot silingon, ikabuhi naton ang kamatuoran. Amo man sini ang ginpabutyag ni Jesus sang nagsiling sia sa pila nga nagtuo sa iya: “Kon magpabilin kamo sa akon pulong, mga disipulo ko gid kamo, kag mahibaluan ninyo ang kamatuoran, kag ang kamatuoran magahilway sa inyo.” (Juan 8:31, 32) Suno sa isa ka reperensia, ang tinaga diri nga “mahibaluan,” nagakahulugan man sing pag-apresyar bangod “ang butang nga ‘nahibaluan’ may balor ukon importansia sa isa nga nakahibalo.” Gani, “mahibaluan” naton sing bug-os ang kamatuoran kon ginakabuhi naton ini. Sa amo, makasiling gid kita nga ang ‘pulong sang Dios nagapanghikot’ sa aton, nga nagadihon sang aton personalidad para mapabanaag sing maayo ang aton Amay sa langit.—1 Tes. 2:13.
12 Pamangkuta ang imo kaugalingon, ‘Nahibaluan ko gid bala ang kamatuoran? Ginakabuhi ko bala ini? Ukon nagahandum gihapon ako sang pila ka “kahilwayan” sang kalibutan?’ Ang isa ka utod nga babayi nga ginpadaku sang Cristianong mga ginikanan nagsulat parte sa tion nga pamatan-on pa sia: “Kon nagdaku ka sa kamatuoran, masiling nga ara gid pirme si Jehova. Pero sa akon bahin, wala ko gid sia makilala. Wala ko gid natun-an nga dumtan ang iya ginadumtan. Wala ako nagpati nga importante sa iya ang akon ginabuhat. Kag wala gid ako nagapalapit sa iya kon may problema ako. Nagsalig ako sa akon paghangop, pero kabuangan gali ini kay wala gid ako sing nahibaluan.” Maayo na lang kay nakamarasmas ini nga utod, kag nagbag-o. Nangin regular payunir pa gani sia sang ulihi.
ANG BALAAN NGA ESPIRITU MAKABULIG PARA MAHILWAY KA
13. Paano kita mabuligan sang balaan nga espiritu para mahilway?
13 Sa 2 Corinto 3:17, aton mabasa: “Kon diin ang espiritu ni Jehova, may kahilwayan.” Paano ang balaan nga espiritu makabulig para mahilway kita? Nagapalambo ini sa aton sing mga kinaiya nga kinahanglan para sa kahilwayan—“ang gugma, kalipay, paghidait, pagkamapinasensiahon, kaayo, pagkamaayo, pagtuo, kalulo, pagpugong sa kaugalingon.” (Gal. 5:22, 23) Kon wala ini nga mga kinaiya, ilabi na ang gugma, wala sing tawo nga matuod nga hilway. Amo gid sini ang nagakatabo sa kalibutan karon. Pagkatapos masulat ang mga kinaiya nga ginapatubas sang espiritu, nagsiling pa gid si apostol Pablo: “Batok sa sini nga mga butang wala sing kasuguan.” Ano ang buot niya silingon? Ang paglambo sang bunga sang espiritu sang Dios indi mapunggan sang bisan ano nga kasuguan. (Gal. 5:18) Kay man, ano ang mahimo sina nga mga kasuguan? Kabubut-on ni Jehova nga palambuon naton ang Cristiano nga mga kinaiya kag ipakita ini sing padayon.
14. Paano ginaulipon sang espiritu sang kalibutan ang mga nagapaimpluwensia sa sini?
14 Ang mga naimpluwensiahan sang espiritu sang kalibutan kag ang mga nagapatuyang sa mga kailigbon sa unod mahimo maghunahuna nga hilway sila. (Basaha ang 2 Pedro 2:18, 19.) Pero ang matuod indi sila hilway. Madamo nga pagsulundan kag regulasyon ang kinahanglan para kontrolon ang ila malain nga mga handum kag paggawi. “Ang kasuguan ginapatuman, indi para sa matarong nga tawo, kundi para sa mga tawo nga malinapason kag di-masuweto,” siling ni Pablo. (1 Tim. 1:9, 10) Ulipon man sila sang sala, nga isa ka mapintas nga agalon. Gani ginahimo nila ang “mga butang nga ginahandum sang unod.” (Efe. 2:1-3) Ini nga mga indibiduwal daw mga insekto nga nagakamang pakadto sa yahong nga may dugos. Bangod sang ila handum, mahimo sila masiod kag indi na makahalin.—Sant. 1:14, 15.
KAHILWAYAN SA SULOD SANG CRISTIANONG KONGREGASYON
15, 16. Daw ano ka importante ang aton pagpakig-upod sa kongregasyon, kag ano nga kahilwayan ang aton natigayon?
15 Sang nakig-upod ka sa Cristianong kongregasyon, wala ka nag-aplay para mangin miembro sang isa ka asosasyon. Sa baylo, nangin bahin ka sini bangod ginbuyok ka ni Jehova. (Juan 6:44) Ngaa ginhimo niya ini? Bangod bala nakita ka niya nga matarong kag mahinadlukon sa iya? “Indi gid man,” mahimo isiling mo. Ti, ano ang nakita sang Dios? Nakita niya nga ang imo tagipusuon mabinatunon sa iya nagahilway nga kasuguan, kag handa magsunod sa iya. Sa sulod sang kongregasyon, ginaatipan ni Jehova ang imo tagipusuon paagi sa pagpakaon sa imo sa espirituwal, paghilway sa imo sa butig nga mga panudlo kag disparatis, kag pagtudlo sa imo nga ipakita ang Cristiano nga mga personalidad. (Basaha ang Efeso 4:22-24.) Subong resulta, malakip ka sa mga tawo nga nagakaigo tawgon nga “hilway nga katawhan.”—Sant. 2:12.
16 Binagbinaga ini: Kon kaupod mo ang mga tawo nga matuod nga nagahigugma kay Jehova, nahadlok ka bala? Pirme ka bala nagapangaman? Kon may ginaistorya ka sa Kingdom Hall, ginauyatan mo bala sing maayo ang imo bag kay basi agawon ini sang iban? Wala ka gid sing may ginakabalak-an, indi bala? Amo man bala sini ang imo ginabatyag kon kaupod mo ang mga tawo nga indi alagad ni Jehova? Mahimo nga indi gid! Ini nga kahilwayan sa tunga sang katawhan sang Dios, patilaw lang sa kahilwayan nga mahanabo sa palaabuton.
“ANG MAHIMAYAON NGA KAHILWAYAN SANG MGA ANAK SANG DIOS”
17. Paano ang kahilwayan sang katawhan naangot sa “pagpahayag sa mga anak sang Dios”?
17 Sang ginabinagbinag ang kahilwayan nga ginatigana ni Jehova sa iya mga alagad sa duta, si Pablo nagsulat: “Paagi sa malangkagon nga pagpaabot ang tinuga nagahulat sa pagpahayag sa mga anak sang Dios.” Nagsiling pa sia: “Ang tinuga mismo pagahilwayon man gikan sa pagkaulipon sa pagkamadinulunton kag maagom ang mahimayaon nga kahilwayan sang mga anak sang Dios.” (Roma 8:19-21) “Ang tinuga” nagapatuhoy sa mga tawo nga may paglaum sa duta, nga makabenepisyo sa “pagpahayag” sang hinaplas sa espiritu nga mga anak sang Dios. Magasugod ini nga pagpahayag kon ining “mga anak,” nga pagabanhawon sa langit, magaupod kay Cristo sa pagdula sang kalautan sa duta kag sa pagluwas sang “dakung kadam-an” pasulod sa bag-ong sistema sang mga butang.—Bug. 7:9, 14.
18. Ano pa nga kahilwayan ang matigayon sang matinumanon nga katawhan, kag ano nga kahilwayan ang ila matigayon sa katapusan?
18 Ang gingawad nga katawhan makaeksperiensia sing bug-os nga kahilwayan—kahilwayan gikan sa impluwensia ni Satanas kag sang iya mga demonyo. (Bug. 20:1-3) Daku gid ini nga kaumpawan! Dayon, ang 144,000 nga mga hari kag saserdote nga kaupod ni Cristo padayon nga magahilway sa katawhan paagi sa amat-amat nga pagpadapat sang benepisyo sang halad gawad asta madula sing bug-os ang sala kag di-kahimpitan nga napanubli kay Adan. (Bug. 5:9, 10) Kon magpabilin nga matutom ang katawhan bisan pa may pagtilaw, matigayon nila ang himpit nga kahilwayan suno sa gintuyo ni Jehova para sa ila—“ang mahimayaon nga kahilwayan sang mga anak sang Dios.” Hunahunaa ini. Indi ka na mabudlayan sa paghimo sing matarong sa atubangan sang Dios, kay ang imo lawas himpit na kag ang imo personalidad nahisuno na sing bug-os sa mga kinaiya sang Dios.
19. Ano dapat ang padayon naton nga himuon agod makapabilin sa matuod nga kahilwayan?
19 Ginahandum mo bala “ang mahimayaon nga kahilwayan sang mga anak sang Dios”? Kon amo, padayon nga magpaimpluwensia sa “himpit nga kasuguan nga nagadala sang kahilwayan.” Tun-i sing maukod ang Biblia. Ikabuhi ang kamatuoran. Mangamuyo sing balaan nga espiritu. Batuna ang bulig sang Cristianong kongregasyon kag panginpusli ang espirituwal nga pagkaon nga ginaaman ni Jehova. Indi pagtuguti nga madaya ka ni Satanas sa paghunahuna nga tuman ka estrikto ang mga dalanon sang Dios, pareho sang ginpapati niya kay Eva. Malimbungon gid ang Yawa. Pero, subong sang matun-an naton sa masunod nga artikulo, kinahanglan “indi kita madaug ni Satanas, kay indi kita wala sing nahibaluan sa iya mga pahito.”—2 Cor. 2:11.
[Mga Pamangkot sa Pagtinuon]
[Mga Retrato sa pahina 9]
Ginahandum ko bala gihapon ang pila ka “kahilwayan” sang kalibutan?
[Mga Retrato sa pahina 9]
Ginakabuhi ko bala ang kamatuoran?
