Naghalad sang Ila Kaugalingon sing Kinabubut-on—Sa Ecuador

SANG naggradweyt sa hayskul ang isa ka utod nga pamatan-on sa Italya, sia ang may pinakamataas nga grado. Ginpalig-on sia sang iya mga paryente kag mga manunudlo nga magkuha sing mas mataas nga edukasyon. Apang mga pila ka tuig antes sini, nagdedikar si Bruno kay Jehova, nga nagapromisa nga unahon niya ang kabubut-on sang Dios. Ano ang iya ginpili? Nagpaathag sia: “Ginsilingan ko si Jehova sa akon pangamuyo nga gusto ko tumanon ang akon promisa nga unahon sia. Pero ginsilingan ko man sia nga indi ko gusto ang makatalaka nga kabuhi, kundi ang madamo nga buluhaton sa pag-alagad sa iya.”

 Pila ka tuig sang ulihi, ara na si Bruno sa Ecuador sa Bagatnan nga Amerika. Nagsiling sia: “Ang sabat ni Jehova sa akon pangamuyo sobra pa sa akon ginapaabot.” Pag-abot niya sa Ecuador, nakibot gid sia nga madamo man gali nga pamatan-on ang nagsaylo didto para alagaron si Jehova sing bug-os.

MGA PAMATAN-ON NGA ‘NAGTILAW’ KAY JEHOVA

Si Bruno isa lamang sa linibo ka pamatan-on sa bilog nga kalibutan nga nagbaton sa pangagda ni Jehova: “Tilawi ako karon sa sini, . . . kon indi ko pagbuksan sa inyo ang mga talambuan sang langit kag iula sa inyo ang pagpakamaayo.” (Mal. 3:10) Bangod sa ila gugma sa Dios, nagdesisyon sila nga ‘tilawan’ si Jehova paagi sa paghatag sang ila tion, kusog, kag mga pagkabutang para mag-alagad sa pungsod nga daku ang kinahanglanon sang mga manugbantala.

Sang nag-abot ining mga manugbantala sa ila bag-o nga asaynment, nakita nila gilayon nga “ang alanyon bugana, apang pila lamang ang mamumugon.” (Mat. 9:37) Halimbawa, si Jaqueline nga taga-Germany, malipayon nga nagsulat sa sanga sa Ecuador: “Nagaalagad ako sa Ecuador sing sobra pa lang duha ka tuig, kag may 13 na ako ka ginatun-an sa Biblia. Apat sa ila ang nagatambong na sing regular sa mga miting. Makapabakod gid ini!” Si Chantal nga taga-Canada, nagsiling: “Sang 2008, nagsaylo ako sa isa ka baybayon sa Ecuador nga may isa lang ka kongregasyon. Sa karon  may tatlo na ka kongregasyon kag sobra 30 ka payunir sa sina nga lugar. Makalilipay gid nga makita ang madamo nga bag-uhan nga nagauswag.” Nagsiling pa sia: “Bag-o lang ako nagsaylo sa isa ka siudad sa Andes Mountains nga may kataason nga 2,743 metros. Sobra sa 75,000 ang pumuluyo diri, pero isa lang ang kongregasyon. Madamo sing interesado kag nalipay gid ako sa pagministeryo.”

MGA KABUDLAYAN

May mga kabudlayan man sa pag-alagad sa iban nga pungsod. Ang iban gani nga pamatan-on, wala pa nakasaylo may kabudlayan na. Si Kayla nga taga-Estados Unidos, nagsiling: “Ang negatibo nga reaksion sang iban nga kauturan sa amon lugar makapaluya gid. Indi nila mahangpan kon ngaa makadto pa ako sa iban nga pungsod para magpayunir. Kon kaisa nagapamensar ako, ‘Husto bala ang akon desisyon?’” Pero, nagsaylo gid si Kayla. Nagpaathag sia: “Ang pagpangamuyo pirme kay Jehova kag ang pagpakighambal sa hamtong nga mga utod nakabulig sa akon nga mahangpan nga ginapakamaayo ni Jehova ang handa mag-alagad sa iya.”

Para sa madamo, mabudlay ang pagtuon sang bag-o nga lenguahe. Si Siobhan nga taga-Ireland, nagsiling: “Mabudlay gid kay indi ko mapabutyag ang akon kaugalingon. Kinahanglan ko mangin pasensiosa, tun-an sing maayo ang lenguahe, kag tun-an nga kadlawan ang akon mga sala sa paghambal.” Si Anna nga taga-Estonia, nagdugang: “Maagwanta ko ang mainit nga klima, yab-ok, kag wala sing mainit nga shower, pero ang pagtuon sing Espanyol mabudlay gid. Kon kaisa, daw masurender na ako. Pero natun-an ko nga tan-awon ang akon pag-uswag, indi ang akon mga sayop.”

Ang isa pa ka kabudlayan amo ang kahidlaw sa pamilya. Si Jonathan nga taga-Estados Unidos, nagsiling: “Wala madugay pag-abot ko, nasubuan ako kay nahidlaw ako sa akon mga abyan kag pamilya. Pero nalandas ko ini sang nagkonsentrar ako sa akon personal nga pagtuon sa Biblia kag pagministeryo. Sang ulihi, bangod sa makalilipay nga mga eksperiensia sa pagministeryo kag sa bag-o nga mga abyan sa kongregasyon nadula ang akon kamingaw.”

Ang isa pa ka kabudlayan amo ang pangabuhi nga wala nila naandan. Si Beau nga taga-Canada, nagsiling: “Sa imo pungsod, daw ginabalewala mo lang  ang serbisyo sa elektrisidad kag tubig. Pero diri, wala pirme sing tubig kag koryente.” Sa madamo nga imol nga pungsod, kinaandan na ang kapigaduhon kag kabudlayan sa transportasyon. Ang kalabanan nga tawo indi kabalo magbasa kag magsulat. Naeksperiensiahan ini ni Ines nga taga-Austria, pero ang gintan-aw niya amo ang maayo nga mga kinaiya sang mga tawo. “Maabiabihon gid sila, mabuot, mabinuligon, kag mapainubuson,” siling niya. “Labaw sa tanan, interesado gid sila magtuon parte sa Dios.”

“ANG PAGPAKAMAAYO SA BAGAY NGA WALA NA SING MASUDLAN”

Ini nga mga pamatan-on nagsakripisyo gid sa ila pag-alagad sa Ecuador, apang nabatyagan nila nga gin-amanan sila ni Jehova sing butang nga “labaw gid sa tanan” nila nga ginapaabot. (Efe. 3:20) Nagbatyag gid sila nga nabaton nila “ang pagpakamaayo sa bagay nga wala na sing masudlan.” (Mal. 3:10) Ari ang ila ginsiling sa ila ministeryo:

Bruno: “Ang una ko nga teritoryo sa Ecuador amo ang isa ka lugar sa matahom nga rehiyon sang Amazon. Sang ulihi, nagbulig ako sa pagpasangkad sang sanga talatapan sa Ecuador. Karon, nagaalagad na ako sa Bethel. Sang didto pa ako sa Italya, nagdesisyon ako nga unahon si Jehova, kag ginhatag niya ang akon handum nga makatigayon sing madamo nga buluhaton sa pag-alagad sa iya.”

Beau: “Nagsuod pa gid ako kay Jehova kay diri sa Ecuador mahatag ko ang tanan ko nga tion sa espirituwal nga mga buluhaton. Nakapamasyar pa ako sa matahom nga mga lugar—butang nga madugay ko na nga gusto himuon.”

Anna: “Bilang isa ka dalaga, naghunahuna ako nga indi ko gid maeksperiensiahan ang kabuhi subong isa ka misyonera. Pero karon, narealisar ko nga puede gali. Nagapasalamat ako sa pagpakamaayo ni Jehova. Nalipay gid ako sa paghimo sing disipulo, pagtukod sing mga Kingdom Hall, kag pagpakig-abyan sa iban.”

Elke: “Sa amon lugar sa Austria, pirme ako nagapangamuyo kay Jehova sing bisan isa lang ka pagtuon sa Biblia. Diri, 15 ang akon ginatun-an. Nalipay gid ako nga makita ang matam-is nga yuhum sang akon mga estudyante nga nagauswag.”

Joel: “Makakulunyag gid ang pagsaylo sa iban nga lugar para mag-alagad kay Jehova. Makatuon ka nga magsalig pa gid sa iya, kag makalilipay gid nga makita ang iya pagpakamaayo sa imo mga panikasog. Sa una ko nga tuig nga pagsaylo diri halin sa Estados Unidos, nangin 21 na ang 6 ka manugbantala sa grupo nga akon ginaalagaran kag 110 ang nagtambong sa Memoryal.”

ANO ANG PILION MO?

Mga pamatan-on, ginatugot bala sang inyo kahimtangan nga mag-alagad sa lugar nga nagakinahanglan sing mga manugbantala? Kinahanglan ninyo ini binagbinagon sing maayo. Labaw sa tanan, dapat nga may mabakod kamo nga gugma kay Jehova kag sa inyo isigkatawo. Kon may amo ka sini nga gugma kag kalipikado ka, ipangamuyo sing hanuot kay Jehova ang pag-alagad sa iban nga lugar. Isa pa, ipakig-istorya ini sa imo Cristiano nga mga ginikanan kag sa mga gulang sa kongregasyon. Paagi sini, mahimo ka makadesisyon nga magpakigbahin man sa sining makalilipay nga buluhaton sa pag-alagad sa Dios.

[Blurb sa pahina 3]

“Ang pagpangamuyo pirme kay Jehova kag ang pagpakighambal sa hamtong nga mga utod nakabulig sa akon nga mahangpan nga ginapakamaayo ni Jehova ang handa mag-alagad sa iya.”—Kayla, taga-Estados Unidos

[Kahon/Retrato sa pahina 6]

Kon paano makaalagad sa iban nga pungsod

• Ugalia ang maayo nga personal nga pagtuon

• Repasuha ang Agosto 2011 nga Ang Aton Ministeryo sa Ginharian, pahina 4-6

• Makig-istorya sa iban nga nakaalagad na sa iban nga pungsod

• Mag-research parte sa kultura kag kasaysayan sina nga pungsod

• Tun-i ang ila lenguahe

[Kahon/Retrato sa pahina 6]

Ginasuportahan sang pila ang ila pag-alagad sa iban nga pungsod paagi sa . . .

• pagtrabaho sing pila ka bulan sa ila pungsod

• pagpaarkila sang ila balay, apartment ukon puesto sa negosyo

• pagtrabaho paagi sa Internet

[Kahon/Retrato sa pahina 4, 5]

1 Si Jaqueline nga taga-Germany

2 Si Bruno nga taga-Italya

3 Si Beau nga taga-Canada

4 Si Siobhan nga taga-Ireland

5 Si Joel nga taga-Estados Unidos

6 Si Jonathan nga taga-Estados Unidos

7 Si Anna nga taga-Estonia

8 Si Elke nga taga-Austria

9 Si Chantal nga taga-Canada

10 Si Ines nga taga-Austria