“Natuman ang Akon Handum”

Sang nagligad nga 15 ka tuig, si Emilia nagaalagad subong regular payunir. Pero nag-untat sia. Sining karon lang, pirme niya ginadumdom inang pinakamalipayon nga bahin sang iya kabuhi, kag gusto niya dugangan liwat ang iya tion sa pagministeryo.

Halos ang tanan nga tion ni Emilia ara sa iya obra, amo nga daw wala na sia sing kalipay. Isa ka bes, nakamuno sia sa atubangan sang iya mga kaupod sa trabaho: “Tani, pila lang ka oras ang akon obra!” Nabatian ini sang iya boss kag ginpamangkot sia kon matuod ang iya ginsiling. Ginsilingan sia ni Emilia nga matuod ina. Pero, ang iya ginapangabay kinahanglan aprobahan sang direktor, bangod regulasyon sa ila kompanya nga ang tanan nga empleyado dapat magpokus gid sa ila obra. Ginhandaan ni Emilia ang pagpakig-istorya sa direktor kag nangamuyo sia nga mangin kalmado kag maisugon.

Sa tion sang pag-istoryahanay, mataktikanhon apang malig-on nga nangabay si Emilia nga buhinan ang iya tion sa pag-obra. Ginpaathag niya nga kon wala sia sing obra, ginabuligan niya ang iban: “Isa ako sa mga Saksi ni Jehova kag ginabuligan ko ang mga tawo sa espirituwal. Sa karon, guba na gid ang moralidad sang madamo nga tawo. Kinahanglan sila tudluan sing maayo nga mga paggawi kag mga prinsipio, kag makabulig gid sa ila ang kaalam nga ginapaambit ko base sa Biblia. Indi ko gusto nga maupangan sang iban ko nga mga buluhaton ang akon trabaho diri, pero gusto ko tani nga mas madamo ako sing tion sa pagbulig sa mga tawo. Gani, gusto ko nga buhinan ang akon oras sa pagtrabaho.”

Namati sing maayo ang direktor kag nagsiling nga sang una nagaplano sia nga magbulig sa mga nagakinahanglan. Dayon nagsiling sia: “Bangod sa imo mga rason, pasugtan ko ikaw. Pero narealisar mo bala nga mabuhinan ang imo sueldo?” Nagsabat si Emilia nga nahibaluan niya ini, kag kon mahimo, pasimplehon niya ang iya kabuhi. Nagsiling pa sia: “Tulumuron ko gid nga makahimo sing butang nga makahatag sing kaayuhan sa mga tawo.” Ginsilingan sia sang direktor: “Dayaw gid ako sa mga tawo nga nagahatag sang ila tion sa iban.”

Wala na sing iban nga empleyado sa sina nga kompanya ang ginhatagan sing amo sini nga pabor. Gintugutan si Emilia sa pag-obra sing apat ka adlaw kada semana. Nakibot sia kay ginpasakaan pa ang iya sueldo! Nagsiling sia: “Natuman ang akon handum, kag makaregular payunir na ako liwat!”

Napamensaran mo man bala nga maghimo sing mga pagbag-o sa imo kabuhi para makapayunir?

[Blurb sa pahina 32]

Ginsilingan sia sang direktor: “Dayaw gid ako sa mga tawo nga nagahatag sang ila tion sa iban”