Si Jehova Nagatipon sang Iya Pamilya
Si Jehova Nagatipon sang Iya Pamilya
‘Ako nagahingyo sa inyo nga tipigan ang pag-isa sa espiritu.’—EFE. 4:1, 3.
MAPAATHAG MO BALA?
Ano ang katuyuan sang pagdumalahan sang Dios?
Paano naton “tipigan ang pag-isa sa espiritu”?
Ano ang makabulig sa aton nga “mangin mainayuhon sa isa kag isa”?
1, 2. Ano ang katuyuan ni Jehova sa duta kag sa mga tawo?
KON hinambitan ang tinaga nga pamilya, ano ang mapensaran mo? Pagpalanggaanay? Kalipay? Pagbinuligay? Isa ka dalangpan para sa pag-uswag, pagtuon, kag pagpaambitay sang mga ideya? Mahimo nga matuod ini kon nagdaku ka sa isa ka mainulikdon nga pamilya. Si Jehova mismo amo ang Tagtukod sang pamilya. (Efe. 3:14, 15) Katuyuan niya nga ang tanan nga tinuga sa langit kag sa duta makatigayon sing kalig-unan, pagsalig sa isa kag isa, kag matuod nga paghiusa.
2 Sang nakasala ang mga tawo, indi na sila bahin sang bug-os uniberso nga pamilya sang Dios, pero wala nagbag-o ang katuyuan ni Jehova. Pat-uron niya nga mapuno ang Paraiso nga duta sang mga kaliwat nanday Adan kag Eva. (Gen. 1:28; Isa. 45:18) Naghimo sia sing mga kahimusan para matuman ini. Ang pila sini ginapakita sa tulun-an sang Efeso, nga may tema parte sa paghiusa. Binagbinagon naton ang pila ka bersikulo sa sini nga tulun-an kag tan-awon kon paano kita makakooperar sa katuyuan ni Jehova sa paghiusa sa iya mga tinuga.
ANG PAGDUMALAHAN KAG ANG HIMUON SINI
3. Ano ang pagdumalahan sang Dios nga ginsambit sa Efeso 1:10, kag san-o nanghikot ang una nga bahin sini?
3 Ginsilingan ni Moises ang mga Israelinhon: “Ang GINOO nga aton Dios, isa ka GINOO lamang.” (Deut. 6:4) Ang mga ginahimo ni Jehova nagahisanto sa iya katuyuan. Gani, “sa katapusan sang gintalana nga mga tion,” pahanabuon sang Dios nga manghikot ang “isa ka pagdumalahan,” nga amo ang kahimusan para mahiusa ang tanan nga maalam nga tinuga. (Basaha ang Efeso 1:8-10.) Himuon sini nga pagdumalahan ang iya katuyuan sa duha ka bahin. Una, ihanda sini ang kongregasyon sang mga hinaplas para sa kabuhi sa langit sa idalom sang ila Ulo nga si Jesucristo. Nagsugod ini sang Pentecostes 33 C.E. sang ginsugdan ni Jehova ang pagtipon sa mga magagahom sa langit kaupod ni Cristo. (Binu. 2:1-4) Bangod ginpahayag nga matarong ang mga hinaplas base sa halad gawad ni Cristo, ginabaton nila nga gin-adoptar sila subong “mga anak sang Dios.”—Roma 3:23, 24; 5:1; 8:15-17.
4, 5. Ano ang ikaduha nga bahin sang pagpanghikot sang pagdumalahan sang Dios?
4 Ikaduha, ihanda sini ang mga magaistar sa Paraiso sa duta sa idalom sang Mesianikong Ginharian ni Cristo. Ang “dakung kadam-an” amo ang una nga bahin sa sini nga grupo. (Bug. 7:9, 13-17; 21:1-5) Sa tion sang Isa ka Libo ka Tuig nga Paggahom, updan sila sang binilyon nga ginbanhaw. (Bug. 20:12, 13) Hunahunaa kon paano makita sing labi pa ang aton paghiusa sa tion sang pagkabanhaw! Sa tion nga matapos na ang isa ka libo ka tuig, ang “mga butang sa duta” mapaidalom sa katapusan nga pagtilaw. Ang magapabilin nga matutom adoptahon subong “mga anak sang Dios” sa duta.—Roma 8:21; Bug. 20:7, 8.
5 Ining duha ka bahin sang pagdumalahan sang Dios nagapanghikot na karon, sa langit kag sa duta. Pero bilang mga indibiduwal, paano kita magakooperar sa pagdumalahan sang Dios?
“TIPIGAN ANG PAG-ISA SA ESPIRITU”
6. Paano ginapakita sang Kasulatan nga ang mga Cristiano kinahanglan magtipon?
6 Ginapakita sang Kasulatan nga kinahanglan magtipon ang mga Cristiano. (1 Cor. 14:23; Heb. 10:24, 25) Indi lang ini pagtipon sing tingob sa isa ka lugar, pareho sang pagkadto sang mga tawo sa merkado ukon sa isa ka istadyum para magtan-aw sing hampang. Ang matuod nga paghiusa nasandig sa pagsunod sa mga instruksion ni Jehova kag pagpadihon sa iya balaan nga espiritu.
7. Ano ang buot silingon sang “tipigan ang pag-isa sa espiritu”?
7 Ginpahayag ni Jehova ang mga hinaplas subong matarong nga mga anak kag ang iban nga mga karnero subong matarong nga mga abyan base sa halad gawad ni Cristo, pero magautwas gihapon ang di-paghangpanay bangod nagakabuhi pa kita sa sining sistema sang mga butang. (Roma 5:9; Sant. 2:23) Kay kon wala, indi na kinahanglan nga laygayan kita nga padayon nga ‘batason ang isa kag isa.’ Paano matigayon ang paghiusa sa tunga sang mga masigkatumuluo? Kinahanglan naton palambuon ang “bug-os nga pagpaubos sang hunahuna kag kalulo.” Isa pa, ginpalig-on kita ni Pablo nga tinguhaan gid “nga tipigan ang pag-isa sa espiritu sa nagapahiusa nga higot sang paghidait.” (Basaha ang Efeso 4:1-3.) Ang pag-aplikar sini nga laygay nagalakip sa pagpagiya sa espiritu sang Dios kag pagtugot sini nga magpatubas sing bunga sa aton kaugalingon. Ini nga bunga makabulig para masolbar ang mga di-paghangpanay, indi pareho sa mga buhat sang unod nga nagapabahinbahin.
8. Paano ang mga buhat sang unod nagapabahinbahin?
8 Binagbinaga kon paano “ang mga buhat sang unod” nagapabahinbahin. (Basaha ang Galacia 5:19-21.) Ang pagpakighilawas nagapahamulag sa isa kay Jehova kag sa kongregasyon, kag ang pagpanghilahi nagaresulta sa masakit nga pagbulag sang kabataan sa ila mga ginikanan kag sang mga mag-asawa. Ang kahigkuan makaapektar sa kaangtanan sang isa sa Dios kag sa mga nagahigugma sa iya. Kon gusto ipatapik sang isa ang duha ka butang, dapat nga pareho ini nga matinlo. Ang matampalason nga paggawi nagapakita sing bug-os nga pagsikway sa matarong nga mga kasuguan sang Dios. Ang tagsa ka buhat sang unod nagapahamulag sa isa kag isa kag nagaguba sang ila kaangtanan sa Dios. Ini nga mga paggawi wala gid nahisuno sa personalidad ni Jehova.
9. Paano naton mausisa ang aton kaugalingon kon bala ginatinguhaan gid naton nga “tipigan ang pag-isa sa espiritu”?
9 Gani kinahanglan naton pamangkuton ang aton kaugalingon: ‘Ginatinguhaan ko gid bala nga “tipigan ang pag-isa sa espiritu sa nagapahiusa nga higot sang paghidait”? Ano ang reaksion ko kon may mag-utwas nga mga problema? Ginawaragwag ko bala sa iban ang akon kalain sing buot para makuha ang ila simpatiya? Nagapaabot bala ako nga solbaron sang mga gulang ang amon problema imbes nga ako mismo ang manikasog para mapasag-uli ang amon maayo nga kaangtanan? Ginalikawan ko bala ang iban para indi ko madumduman ang ila sala sa akon, kag ginasiguro nga indi kami magsugat-anay?’ Kon ginahimo naton ini, ginapakita bala naton nga nagapanghikot kita nahisuno sa katuyuan ni Jehova nga tipunon liwat ang tanan nga butang kay Cristo?
10, 11. (a) Daw ano ka importante ang pagpakighidait sa aton mga kauturan? (b) Paano naton matigayon ang paghidait kag pagpakamaayo ni Jehova?
10 Si Jesus nagsiling: “Gani, kon nagadala ka sang imo dulot sa halaran kag madumduman mo didto nga ang imo utod may butang nga batok sa imo, bayai ang imo dulot sa atubangan sang halaran, kag maglakat ka; makighidait ka anay sa imo utod, kag sa pagbalik mo, ihalad ang imo dulot. Makighusay gilayon.” (Mat. 5:23-25) Nagsulat si Santiago nga “ang bunga sang pagkamatarong may binhi nga ginsab-ug sa mahidaiton nga mga kahimtangan para sa mga nagapakighidait.” (Sant. 3:17, 18) Gani, indi naton mahuptan ang matarong nga paggawi kon wala sing paghidait.
11 Sa pag-ilustrar, sa pila ka pungsod nga may inaway, ginabanta nga sobra 35 porsiento sang duta ang mahimo kuntani mauma kon wala nahadlok ang mga pumuluyo sa mga land mine. Kon maglupok ang land mine, indi na sila makapanguma, mawad-an sila sing palangabuhian, kag wala sing mabakal nga pagkaon sa mga siudad. Sing kaanggid, ang aton pagtubo sa espirituwal maupangan kon may mga batasan kita nga makatublag sa aton paghidait. Pero kon handa kita magpatawad kag maghimo sing kaayuhan sa iban, matigayon naton ang paghidait kag pagpakamaayo ni Jehova.
12. Paano kita ginabuligan sang mga gulang para mahiusa?
12 Dugang pa, ang “mga dulot nga mga lalaki” makabulig para sa paghiusa. Gin-aman sila para buligan kita tanan nga ‘makadangat sa pag-isa sa pagtuo.’ (Efe. 4:8, 13) Kon ginaupdan kita sang mga gulang sa aton sagrado nga pag-alagad kag hambalan kita sang aton palauswagon base sa Pulong sang Dios, ginabuligan nila kita para isuklob ang bag-o nga personalidad. (Efe. 4:22-24) Nakita mo bala sa ila laygay ang pagtinguha ni Jehova nga ihanda ka para sa kabuhi sa bag-ong kalibutan sa idalom sang paggahom sang iya Anak? Mga gulang, ginatinguhaan bala ninyo nga ipasibu ang iban para mabuligan sila?—Gal. 6:1.
“MANGIN MAINAYUHON SA ISA KAG ISA”
13. Ano ang mahimo matabo kon indi naton pagtumanon ang laygay sa Efeso 4:25-32?
13 Ginsambit sa Efeso 4:25-29 ang mga paggawi nga dapat naton likawan. Nagalakip ini sang pagbinutig, pagkamaakigon ukon katamad, kag paghambal sang dunot nga pinamulong sa baylo sang mga pinamulong nga maayo kag makapabakod. Kon indi pagsundon sang isa ini nga laygay, mapasubo niya ang espiritu sang Dios, kay ang balaan nga espiritu nagapasanyog sang paghiusa. (Efe. 4:30) Ang pagtuman sa masunod nga ginsulat ni Pablo makabulig man para sa paghidait kag paghiusa: “Ang tanan nga madinumtanon nga paghinakit kag kaakig kag kasingkal kag sininggitanay kag nagapakalain nga hambal kuhaon gikan sa inyo upod ang tanan nga kalainan. Kundi mangin mainayuhon sa isa kag isa, mapinalanggaon nga may kaawa, nga nagapatawad sing kinabubut-on sa isa kag isa subong nga ang Dios nagpatawad man sing kinabubut-on sa inyo paagi kay Cristo.”—Efe. 4:31, 32.
14. (a) Ano ang ginapakita sang mga tinaga nga “mangin mainayuhon”? (b) Ano ang makabulig sa aton nga mangin mainayuhon?
14 Ang mga tinaga nga “mangin mainayuhon” nagapakita nga indi sa tanan nga tion mainayuhon kita, kag kinahanglan naton ini bag-uhon. Nagakaigo nga hanason naton ang aton kaugalingon nga tahuron ang balatyagon sang iban. (Fil. 2:4) Ayhan may inughambal kita nga makapakadlaw ukon mahimo magpakita nga daw maalam kita, pero mainayuhon bala ini? Kon amo sina anay ang aton hunahunaon, mabuligan kita nga “mangin mainayuhon.”
MAGPAKITA SING GUGMA KAG PAGTAHOD SA PAMILYA
15. Ano nga bahin sang pagpakig-angot ni Cristo sa kongregasyon ang ginpatuhuyan ni Pablo sa Efeso 5:28?
15 Ginpaanggid sang Biblia ang kaangtanan ni Cristo sa kongregasyon sa relasyon sang bana sa iya asawa. Ginapadaku sini ang panuytoy, gugma, kag pag-atipan nga dapat ipakita sang isa ka bana kag ang pagpasakop nga dapat himuon sang asawa. (Efe. 5:22-33) Si Pablo nagsulat: “Sa sining paagi ang mga bana dapat maghigugma sang ila asawa subong sang ila kaugalingon nga lawas.” Ano ang “paagi” nga iya ginpatuhuyan? (Efe. 5:28) Antes sini nga pinamulong, ginpatalupangod niya ang paagi sang ‘paghigugma ni Cristo sa kongregasyon kag pagtugyan sang iya kaugalingon tungod sa sini, nga nagatinlo sa sini sa tubig paagi sa pulong.’ Gani, para makapanghikot suno sa katuyuan ni Jehova nga tipunon liwat ang tanan nga butang kay Cristo, dapat handa ang bana sa pag-atipan sa iya pamilya sa espirituwal.
16. Ano ang resulta kon tumanon sang mga ginikanan ang ila Makasulatanhon nga mga responsibilidad sa puluy-an?
16 Dapat dumdumon sang mga ginikanan nga may asaynment sila halin kay Jehova. Makapasubo nga madamo sa karon ang “wala sing kinaugali nga pagpalangga.” (2 Tim. 3:1, 3) Madamo nga amay ang wala nagatuman sang ila responsibilidad, amo nga naluyahan sing buot ang ila kabataan kag nahalitan. Pero ginlaygayan ni Pablo ang Cristiano nga mga amay: “Indi ninyo pagpaakiga ang inyo mga anak, kundi padayon sila nga padakua sa disiplina kag nagatuytoy nga panghunahuna ni Jehova.” (Efe. 6:4) Indi bala sa pamilya una nga matun-an sang kabataan ang gugma kag pagtahod sa may awtoridad? Ang mga ginikanan nga nagmadinalag-on sa pagtudlo sini sa ila kabataan nagapanghikot nahisuno sa pagdumalahan ni Jehova. Kon may gugma sa aton puluy-an, kag ginasikway ang kaakig, kasingkal, kag masakit nga mga tinaga, ginatudluan naton ang aton kabataan sing importante nga mga leksion parte sa pagpakita sing gugma kag pagtahod sa may awtoridad. Makabulig ini para mahanda sila sa kabuhi sa bag-ong kalibutan sang Dios.
17. Ano ang kinahanglan para mapamatukan naton ang Yawa?
17 Nahibaluan naton nga ang Yawa, nga una nga nagtublag sang paghidait sa bug-os nga uniberso, magapamatok gid sa aton mga panikasog nga himuon ang kabubut-on sang Dios. Madamo subong ang nagahimo sang gusto ni Satanas kay nagadiborsio sila, nagaupdanay nga wala nakasal, kag nagapasugot nga kaslon ang mga homoseksuwal. Pero, wala naton ginasunod ang paggawi ukon pamatasan sa aton palibot. Si Cristo ang aton huwaran. (Efe. 4:17-21) Gani ginalaygayan kita nga ‘isuklob ang kompleto nga hinganib gikan sa Dios,’ para mapamatukan sing madinalag-on ang Yawa kag ang iya mga demonyo.—Basaha ang Efeso 6:10-13.
“PADAYON KAMO NGA MAGLAKAT SA GUGMA”
18. Ano ang sekreto sang aton paghiusa?
18 Ang matuod nga sekreto sang aton paghiusa amo ang gugma. Bangod ginahigugma gid naton ang aton “isa ka Ginuo,” ang aton “isa ka Dios,” kag ang kada isa, determinado kita “nga tipigan ang pag-isa sa espiritu sa nagapahiusa nga higot sang paghidait.” (Efe. 4:3-6) Si Jesus nangamuyo parte sini nga gugma: “Nagapangabay ako, indi lamang tungod sa ila, kundi tungod man sa mga nagatuo sa akon paagi sa ila pulong; agod sila tanan mangin isa, subong nga ikaw, Amay, nahiusa sa akon kag ako nahiusa sa imo, agod mahiusa man sila sa aton . . . Kag ginpakilala ko ang imo ngalan sa ila kag ipakilala ko ini, agod ang gugma nga imo ginhigugma sa akon mangin yara sa ila kag ako mahiusa sa ila.”—Juan 17:20, 21, 26.
19. Ano ang determinado mo nga himuon?
19 Kon nabudlayan kita bangod sa aton di-kahimpitan, kabay nga pahulagon kita sang gugma nga mangamuyo kaangay sang salmista: “Bug-osa ang akon tagiposoon sa pagkahadluk sa imo ngalan.” (Sal. 86:11) Mangin determinado kita nga pamatukan ang mga panikasog sang Yawa nga ipahilayo kita sa aton mahigugmaon nga Amay kag sa mga tawo nga Iya nahamut-an. Panikasugi nga ‘ilugon ang Dios subong mga anak nga hinigugma, kag padayon nga maglakat sa gugma’—sa pamilya man, sa aton ministeryo, kag sa kongregasyon.—Efe. 5:1, 2.
[Mga Pamangkot sa Pagtinuon]
[Retrato sa pahina 29]
Ginbiyaan niya anay ang iya dulot sa halaran kag ginkadtuan ang iya utod para makighidait
[Retrato sa pahina 31]
Mga ginikanan, tudlui ang inyo kabataan nga magpakita sing pagtahod
