“Ako Kaupod Ninyo”
“Ako Kaupod Ninyo”
“Madamu ang magadalagan pakadto-pakari, kag magadugang ang [matuod nga] ihibalo.”—DAN. 12:4.
ANO ANG IMO SABAT?
Paano naglapnag ang matuod nga ihibalo sa moderno nga tion?
Paano ‘nagdamu’ ang nagbaton sang kamatuoran?
Paano ‘nagdugang’ ang sibu nga ihibalo?
1, 2. (a) Paano naton nahibaluan nga si Jesus kaupod sang iya mga sumulunod sa karon kag sa palaabuton? (b) Suno sa Daniel 12:4, ano ang mangin resulta sa pagpangusisa sing maayo sa Kasulatan?
HUNAHUNAA nga ara ka na sa Paraiso. Pagbugtaw mo kada aga, kanami sang imo pamatyag kag nalangkag ka sa imo mga hilikuton. Wala na nagapalanakit ang imo kalawasan. Wala naman ang imo mga kasablagan sa lawas. Maayo na ang imo panulok, palamatin-an, pamatyag, panimaho, kag panabor. Tuman sa imo kapagsik. Ang imo hilikuton makalilipay, madamo ka sing abyan, kag wala ka na sing ginapaligban. Amo sina ang imo maeksperiensiahan sa paggahom sang Ginharian sang Dios. Ang gintangdo nga Hari, nga si Jesucristo, magapakamaayo sang iya mga sakop kag magatudlo sa ila sang ihibalo ni Jehova.
2 Si Jehova mangin kaupod sang iya matutom nga mga alagad sina nga tion samtang ginatudluan nila ang mga tawo sa bug-os nga duta. Ang Dios kag ang iya Anak nangin kaupod na sang mga matutom sa sulod sang mga siniglo. Antes magkayab si Jesus sa langit, ginpasalig niya ang iya matutom nga mga disipulo nga sia mangin kaupod nila. (Basaha ang Mateo 28:19, 20.) Agod mapabakod ang aton pagtuo sa sini nga pasalig, binagbinagon naton ang isa ka tagna nga ginsulat sa dumaan nga Babilonia sang nagligad nga kapin sa 2,500 ka tuig. Tuhoy sa “tion sang katapusan,” diin nagakabuhi kita karon, si manalagna Daniel nagsulat: “Madamu ang magadalagan pakadto-pakari, kag magadugang ang [matuod nga] ihibalo.” (Dan. 12:4) Nahangpan naton karon nga ang Hebreo nga tinaga nga ginbadbad “magadalagan pakadto-pakari” nagakahulugan sing pagpangusisa sing maayo. Ginpakita sa tagna nga ang mga nagapangusisa sing maayo sa Kasulatan makabaton sing daku nga pagpakamaayo kay matigayon nila ang matuod, ukon sibu, nga ihibalo sa Pulong sang Dios. Ang tagna nagasiling man nga madamo ang magabaton sang “[matuod nga] ihibalo.” Isa pa, ina nga ihibalo magabugana. Ipalapnag ini agod matigayon sang tanan. Samtang ginausisa naton kon paano nagakatuman ini nga tagna, mahangpan naton nga si Jesus nagaupod sa iya mga disipulo sa karon, kag si Jehova makasarang gid magtuman sang tanan niya nga saad.
ANG MATUOD NGA IHIBALO NASAPWAN
3. Ano ang natabo sa matuod nga ihibalo sang napatay ang mga apostoles?
3 Sang napatay ang mga apostoles, natabo ang gintagna nga apostasya sa tunga sang matuod nga mga Cristiano kag naglapnag subong sang kalayo. (Binu. 20:28-30; 2 Tes. 2:1-3) Mga siniglo sang ulihi, indi pa bugana ang matuod nga ihibalo sa mga wala sing ihibalo sa Biblia, pati na sa nagapangangkon nga mga Cristiano. Ang mga lider sang Cristiandad nagasiling nga nagapati sila sa Kasulatan pero nagatudlo sila sing kabutigan—“mga panudlo sang mga demonyo” nga wala nagapadungog sa Dios. (1 Tim. 4:1) Ang mga tawo sa kabilugan wala nakahibalo sang kamatuoran parte sa Dios. Ang mga doktrina sang mga apostata nagalakip sang butig nga panudlo nga ang Dios Trinidad, ang kalag wala nagakapatay, kag ang pila ka kalag ginapaantos sing dayon sa kalayuhon nga impierno.
4. Paano ang isa ka grupo sang mga Cristiano sang katuigan 1870 nagpangusisa sang matuod nga ihibalo?
4 Pero, sang katuigan 1870—mga apat ka dekada antes sang “katapusan nga mga adlaw”—nagtipon ang isa ka gamay nga grupo sang sinsero nga mga Cristiano sa Pennsylvania, U.S.A., agod tun-an sing maid-id ang Biblia kag usisaon ang matuod nga ihibalo. (2 Tim. 3:1) Gintawag nila ang ila kaugalingon nga mga Estudyante sang Biblia. Indi sila ang “mga maalam kag mga intelihente” nga ginsiling ni Jesus nga sa ila ginlikom ang ihibalo. (Mat. 11:25) Mga mapainubuson sila nga nagahandum sa paghimo sang kabubut-on sang Dios. Maukod kag mapinangamuyuon nila nga ginbasa, ginbinagbinag, kag ginpamalandungan ang Kasulatan. Ginpaanggid man nila ang mga dinalan sa Biblia kag gin-usisa ang mga sinulatan sang iban nga nagtuon man sang Kasulatan. Gani, nahangpan sing amat-amat sining mga Estudyante sang Biblia ang mga kamatuoran nga nangin indi maathag sa sulod sang mga siglo.
5. Ano ang katuyuan sang mga serye sang tract nga The Old Theology?
5 Bisan pa nalipay ang mga Estudyante sang Biblia sa mga butang nga ila natun-an, wala sila nagpahambog bangod sa ila bag-o nga natun-an ukon nag-angkon sang kadayawan sa pagpahayag sini nga ihibalo. (1 Cor. 8:1) Sa baylo, nagbalhag sila sing mga serye sang tract nga The Old Theology. Katuyuan sini nga tudluan ang mga bumalasa sang mga kamatuoran sa Biblia. Ang una sa sini nga mga tract nagahatag sing “dugang nga impormasyon nga makabulig sa pagtuon sa Biblia, para masikway ang tanan nga butig nga mga tradisyon sang tawo kag mahibaluan liwat ang mga panudlo sang Ginuo kag sang mga apostoles.”—The Old Theology, Num. 1, Abril 1889, pahina 32.
6, 7. (a) Ano nga mga kamatuoran ang nahangpan naton sugod sang katuigan 1870? (b) Ano nga mga kamatuoran ang ginapabaloran mo gid?
6 Natukiban ining dalayawon nga mga kamatuoran sang nagligad nga kapin sa 100 ka tuig! * Ini nga mga kamatuoran indi makatalaka, ukon kinahanglan debatihan sang mga teologo. Kundi nagahatag ini sa aton sing kalipay, paglaum, kag kaayuhan. Nagabulig ini para makilala naton si Jehova—ang iya mahigugmaon nga personalidad kag katuyuan. Ginapaathag man sini ang papel ni Jesus, kon ngaa nagkabuhi sia kag napatay, kag kon ano ang iya ginahimo karon. Nagatudlo man ini kon ngaa gintugutan sang Dios ang kalautan, kon ngaa nagakapatay kita, kon paano mangamuyo, kag kon paano mangin malipayon.
7 Mahangpan na naton ang kahulugan sang mga tagna nga madugay na nga “natakpan” pero nagakatuman na sa sining tion sang katapusan. (Dan. 12:9) Lakip sa sini ang mga tagna sa bug-os nga Kasulatan, ilabi na sa mga Ebanghelyo kag tulun-an sang Bugna. Ginbuligan man kita ni Jehova nga mahangpan ang mga hitabo nga wala naton nakita—ang paghari ni Jesus, ang inaway sa langit, kag ang pagtagbong kay Satanas sa duta. (Bug. 12:7-12) Ginhatagan man niya kita sing kaalam para mahangpan ang kahulugan sang mga hitabo nga aton makita—mga inaway, linog, peste, kakulang sa kalan-on, kag paglapnag sang di-diosnon nga mga tawo nga isa ka rason kon ngaa nagakabuhi kita sa “makahalanguyos nga mga tion nga mabudlay atubangon.”—2 Tim. 3:1-5; Luc. 21:10, 11.
8. Sin-o ang dapat naton dayawon sa mga butang nga aton nakita kag nabatian?
8 Nahangpan gid naton ang ginsiling ni Jesus sa iya mga disipulo: “Malipayon ang mga mata nga makakita sang mga butang nga inyo makita. Kay nagasiling ako sa inyo, Madamo nga manalagna kag mga hari ang naghandum nga makita ang mga butang nga inyo ginatan-aw apang wala makakita sini, kag mabatian ang mga butang nga inyo ginapamatian apang wala makabati sini.” (Luc. 10:23, 24) Dapat naton dayawon si Jehova nga Dios kay ginbuligan niya kita nga makita kag mabatian ini nga mga butang. Kag nagapasalamat kita kay “ang manugbulig,” ang balaan nga espiritu sang Dios, ginapadala para giyahan ang mga sumulunod ni Jesus “sa bug-os nga kamatuoran”! (Basaha ang Juan 16:7, 13.) Kabay nga pabaloran naton ang matuod nga ihibalo kag ipaambit ini sa iban!
“MADAMU” ANG NAGBATON SANG MATUOD NGA IHIBALO
9. Ano ang panawagan sa Abril 1881 nga isyu sang Watch Tower?
9 Sang Abril 1881, wala pa duha ka tuig sa tapos ginpagua ang una nga isyu sang Watch Tower, ini nga magasin nagpanawagan sing 1,000 ka manugbantala. Ang artikulo nagasiling: “Para sa mga makahatag sing tunga ukon kapin pa sang ila tion para sa hilikuton sang Ginuo, amo ini ang amon panugda: Nga magkadto kamo sa dalagku ukon gamay nga mga siudad, suno sa inyo ikasarang, subong mga Colporteur ukon Ebanghelisador, nga nagapangita sing sinsero nga mga Cristiano sa kada lugar, madamo sa ila ang makugi nga nagaalagad sa Dios, pero indi suno sa ihibalo; pangitaon ninyo sila agod ipahibalo sa ila ang bugana nga bugay sang Aton Amay kag ang katahom sang Iya pulong.”
10. Paano ginsabat ang panawagan para sa bug-os tion nga manugbantala?
10 Ina nga panawagan nagapakita nga ang mga Estudyante sang Biblia nagapati nga ang importante nga hilikuton sang matuod nga mga Cristiano amo ang pagbantala sing maayong balita. Apang ang panawagan para sa 1,000 ka bug-os tion nga manugbantala daw pagpasobra kay pila lamang ka gatos ang nagatambong sa mga miting sang mga Estudyante sang Biblia sadto. Pero pagkatapos mabasa ang tract ukon magasin, madamo ang nagbaton sang kamatuoran kag nagsabat sa panawagan. Halimbawa sang 1882, ang isa ka bumalasa sa London, Inglaterra nga nakabaton sang isyu sang Watch Tower kag bukleta nga ginbalhag sang mga Estudyante sang Biblia, nagsulat: “Palihug tudlui ako kon ano ang ibantala kag kon paano ini himuon agod matuman ang hilikuton suno sa luyag sang Dios.”
11, 12. (a) Ano ang tulumuron sang mga colporteur? (b) Paano nagtukod ang mga colporteur sang “mga klase,” ukon mga kongregasyon?
11 Sang 1885, mga 300 ka Estudyante sang Biblia ang nakigbahin sa hilikuton sang mga colporteur. Ining bug-os tion nga mga ministro may pareho man nga tulumuron sa aton—ang paghimo sing disipulo ni Jesucristo. Apang tuhay ang ila pamaagi. Sa karon, masami nga ginatun-an naton sing indibiduwal ang isa ka estudyante. Dayon ginaagda sia nga makig-upod sa kongregasyon. Apang sang una, nagatanyag anay ang mga colporteur sing mga libro dayon ginatipon nila ang mga interesado agod tun-an ang Kasulatan subong isa ka grupo. Sa baylo nga maghiwat sing pagtuon sa mga indibiduwal, nagatukod sila sing “mga klase,” ukon mga kongregasyon.
12 Halimbawa sang 1907, ang isa ka grupo sang mga colporteur nangita sa isa ka siudad sing mga tawo nga may mga kopya sang Millennial Dawn (ginatawag man nga Studies in the Scriptures). Ang Watch Tower nagsiling: “Ini [nga mga interesado] ginaagda sa gamay nga pagtinipon sa isa sa ila mga balay. Ginabinagbinag sa ila sang mga Colporteur ang Divine Plan of the Ages sa bilog nga Domingo, kag pagkasunod nga Domingo ginpalig-on sila nga maghiwat sang regular nga miting.” Sang 1911, ginbag-o sang mga utod ini nga pamaagi. Singkuentay otso ka nagalakbay nga mga ministro ang naghatag sing mga pamulongpulong sa bug-os nga Estados Unidos kag Canada. Ginkuha sini nga mga utod ang ngalan kag adres sang mga interesado nga nagtambong kag gin-organisar sila nga magtipon sa pribado nga mga puluy-an agod magtukod sing bag-o nga “mga klase.” Sang 1914, may 1,200 na ka kongregasyon sang mga Estudyante sang Biblia sa bilog nga kalibutan.
13. Ano ang nagpadayaw sa imo parte sa paglapnag sang matuod nga ihibalo karon?
13 Sa karon, may mga 109,400 ka kongregasyon sa bug-os nga kalibutan, kag mga 895,800 ang payunir. Halos walo ka milyon man ang nagabaton sang matuod nga ihibalo kag nagaaplikar sini. (Basaha ang Isaias 60:22.) * Talalupangdon gid ini nga pag-uswag, kay gintagna ni Jesus nga ang iya mga disipulo ‘dumtan sang tanan nga tawo’ tungod sa iya ngalan. Nagsiling man sia nga ang iya mga sumulunod hingabuton, bilangguon, kag patyon pa gani. (Luc. 21:12-17) Bisan pa sa mga pagpamatok ni Satanas, sang iya mga demonyo, kag sang mga tawo, ang katawhan ni Jehova nagmadinalag-on sa paghimo sing disipulo. Sa karon, nagabantala sila “sa bug-os napuy-an nga duta”—sa mga kagulangan, kabukiran, desyerto, siudad, pinakamalayo nga kaumhan, kag iban pa nga lugar. (Mat. 24:14) Indi gid ini mahimo kon wala ang bulig sang Dios.
‘ANG MATUOD NGA IHIBALO NAGDUGANG’
14. Paano ang matuod nga ihibalo naglapnag paagi sa naimprinta nga mga publikasyon?
14 Ang matuod nga ihibalo nagdugang bangod madamo ang nagpahayag sang maayong balita. Nagdugang man ini paagi sa naimprinta nga mga publikasyon. Sang Hulyo 1879, ginbalhag sang mga Estudyante sang Biblia ang una nga isyu sini nga magasin nga may tig-ulo Zion’s Watch Tower and Herald of Christ’s Presence. Ina nga isyu, nga gin-imprinta sa komersial nga imprintahan, may 6,000 ka kopya sa Ingles lamang. Ang 27 anyos nga si Charles Taze Russell amo ang ginpili nga editor, upod sa lima pa ka hamtong nga mga Estudyante sang Biblia nga nagasulat sang mga artikulo. Ang Lalantawan ginabalhag na karon sa 195 ka lenguahe. Amo ini ang pinakalapnag nga napanagtag nga magasin sa bug-os nga kalibutan, nga may sirkulasyon nga 42,182,000 ka kopya kada isyu. Ang ikaduha amo ang kaupod sini nga magasin nga Magmata! nga may sirkulasyon nga 41,042,000 sa 84 ka lenguahe. Dugang pa, mga 100 ka milyon ka libro kag Biblia ang ginaimprinta kada tuig.
15. Paano ginasuportahan ang pag-imprinta sang aton mga publikasyon?
15 Ining tuman kadaku nga hilikuton ginasuportahan sang boluntaryo nga mga donasyon. (Basaha ang Mateo 10:8.) Natingala gid sa sini ang nagaimprinta nga mga kompanya kay nahibaluan nila nga daku katama ang gasto para sa makinarya, papel, tinta, kag iban pa nga materyales. Ang isa ka utod nga lalaki nga nagabakal sing mga materyales para sa mga imprintahan sa Bethel nagsiling: “Ang mga negosyante nga nagabisita sa aton mga imprintahan nagadayaw gid kay ang moderno nga mga teknolohiya nga aton ginagamit sa pag-imprinta sing tuman kadamo nga publikasyon ginasuportahan lamang sang boluntaryo nga mga donasyon. Nagadayaw man sila kay ang mga nagatrabaho sa Bethel mga pamatan-on pa kag malipayon.”
MATUGOB ANG DUTA SANG IHIBALO SANG DIOS
16. Ano ang katuyuan sang pagpalapnag sang matuod nga ihibalo?
16 Ang matuod nga ihibalo may maayo nga katuyuan. Kabubut-on sang Dios nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:3, 4) Luyag ni Jehova nga mahibaluan sang mga tawo ang kamatuoran agod masimba nila sia sing nagakaigo kag mabaton nila ang iya pagpakamaayo. Paagi sa pagpalapnag sang matuod nga ihibalo, ginatipon ni Jehova ang matutom nga nagkalabilin sang hinaplas nga mga Cristiano. Ginatipon man niya ang “dakung kadam-an” gikan “sa tanan nga pungsod kag tribo kag katawhan kag hambal,” nga may paglaum nga mabuhi sing dayon sa duta.—Bug. 7:9.
17. Ano ang ginapamatud-an sang pag-uswag sang matuod nga pagsimba?
17 Nag-uswag ang matuod nga pagsimba sugod sang nagligad nga 130 ka tuig. Pamatuod ini nga ang Dios kag ang iya gintangdo nga Hari, si Jesucristo, nagaupod sa mga alagad ni Jehova sa duta, nga nagagiya, nagaamlig, nagaorganisar, kag nagatudlo sa ila. Ang ila pag-uswag nagapamatuod man nga tumanon gid ni Jehova ang iya mga saad sa palaabuton. “Ang duta matugub sang pagkilala sa GINOO subong nga ang mga tubig nagatabon sang dagat.” (Isa. 11:9) Daku gid ini nga pagpakamaayo nga matigayon sang katawhan!
[Mga Nota]
^ par. 6 Makatuon ka pa gid sa mga DVD nga Jehovah’s Witnesses—Faith in Action, Part 1: Out of Darkness kag Jehovah’s Witnesses—Faith in Action, Part 2: Let the Light Shine.
^ par. 13 Tan-awa Ang Tagna ni Isaias—Kapawa Para sa Tanan nga Tawo II, pahina 320.
[Mga Pamangkot sa Pagtinuon]
[Retrato sa pahina 6]
Ang mga Estudyante sang Biblia sadto mapainubuson nga mga tawo nga nagahandum sa paghimo sang kabubut-on sang Dios
[Retrato sa pahina 7]
Ginapabaloran ni Jehova ang imo mga panikasog sa pagpalapnag sang matuod nga ihibalo sang Dios
