“INDI ko ya magpamalaybalay!” Amo sini ang ginabatyag sang madamo nga ginatun-an sa Biblia parte sa pagbantala! Pero ginsiling ini sang eksperiensiado nga humalambal sa publiko kag manunudlo sang Biblia nga ginatawag pilgrim.

Madamo nga bumalasa sang Zion’s Watch Tower nga nagbiya sa ila mga simbahan ang luyag makig-upod sa pareho nila nga uhaw sa kamatuoran sa Biblia. Ginpalig-on sang magasin ang mga bumalasa nga pangitaon ang iban nga may amo sini nga pagtuo kag magtipon sing regular para tun-an ang Biblia. Sugod sang mga 1894, ang Watch Tower Society nagpadala sing nagalakbay nga mga tiglawas sa mga grupo nga nagapangabay nga duawon. Sang ulihi, ini nga mga lalaki gintawag nga pilgrim. Ining eksperiensiado kag mapisan nga mga utod ginpili bangod sa ila pagkamapainubuson, ihibalo sa Biblia, ikasarang sa paghambal kag pagtudlo, kag katutom sa gawad. Ang ila pagduaw isa ukon duha lang ka adlaw. Madamo nga Estudyante sang Biblia ang una nga nakabantala paagi sa pagpanagtag sang mga imbitasyon para sa pamulongpulong sang pilgrim. Isa ka gab-i, pagkatapos sang iya pamulongpulong sa isa ka eskwelahan, si Hugo Riemer, nga nangin miembro sang Nagadumala nga Hubon, nagsabat sang mga pamangkot sa Biblia asta sa kaagahon. Bisan kapoy, nagsiling sia nga “kanami” sang pagtinipon.

Ang Watch Tower nagsiling nga ang “panguna nga katuyuan” sang pagduaw sang pilgrim amo nga palig-unon ang “panimalay sang pagtuo” paagi sa pagtinipon sa puluy-an sang mga tumuluo. Ang mga Estudyante sang Biblia sa isa ka lugar nagakadto para mamati sa mga pamulongpulong kag sa pamangkot kag sabat nga mga sesyon. Maabiabihon man ang mga Cristiano. Sang bata pa si Maude Abbott, nagtambong sia sa isa ka pamulongpulong sang aga, dayon ang tanan nagtipon sa malaba nga lamesa sa ugsaran. “Madamo gid sang pagkaon—may ham, pinirito nga manok, tinapay, pie, kag keyk! Ang tanan nagkaon, kag sang mga alas dos sang hapon, nagtipon kami liwat para sa masunod nga pamulongpulong.” Pero nagsiling sia, “Sini nga tion, ginatuyo na ang tanan.” Ang madugay na nga pilgrim nga si Benjamin Barton nagsiling anay, ‘Kon ginkaon ko lang ang tanan nga ginahatag sa akon, ambot lang kon buhi pa ako kag nagaalagad subong pilgrim.’ Sa isa ka sulat halin sa ulong talatapan sa Brooklyn, ginlaygayan ang mga sister nga mas maayo nga “kinaandan lang nga pagkaon sa adlaw-adlaw” ang ihanda sa mga pilgrim kag “patulugon sila sing maayo.”

Ang mga pilgrim maayo magtudlo kag maggamit sing mga tsart, mga halimbawa, ukon bisan ano nga makita nila agod mangin tuodtuod ang ila ginatudlo. Ang pamulongpulong ni R. H. Barber “makawiwili gid pirme.” Si W. J. Thorn, nga daw tatay ang panimuot “pareho sang isa ka patriarka sang una” kon maghambal. Isa ka adlaw samtang nagasakay sa Model A Ford, si Shield Toutjian gulpi lang nagsinggit, “Para!” Nanaug sia sa salakyan, nagpuksi sang mga bulak, dayon naghatag sing leksion parte sa mga tinuga ni Jehova sa iya mga kaupod.

Ang hilikuton sang mga pilgrim madamo sing kabudlayan, ilabi na sa mga may-edad. Pero para sa iban, ang pinakadaku nga kabudlayan amo ang  pagbag-o sang ila hilikuton. Dapat na sila manguna sa pagbantala sa pamalay. Ang Marso 15, 1924, nga Watch Tower nagsiling nga “ang isa sa panguna nga hilikuton” sang matuod nga mga Cristiano “amo ang pagpanaksi parte sa ginharian. Ginapadala ang mga pilgrim sa sini nga katuyuan.”

Ang pila ka pilgrim naakig sa sini nga pagbag-o, kag ginbiyaan nila ang nagalakbay nga hilikuton. Ang iban naman nagtukod sang ila relihion. Nadumduman ni Robie D. Adkins nga ang isa ka pilgrim nga maayo magpamulongpulong nagreklamo: “Ang nabal-an ko lang amo ang pagwali sa entablado. Indi ko ya magpamalaybalay!” Si Brother Adkins naghinumdom: “Nakita ko sia sang ulihi sa kombension sa Columbus, Ohio sang 1924. Sia ang pinakamakaluluoy nga tawo didto, nga nagapasilong sa idalom sang gamay nga kahoy, kag masinulub-on sa tunga sang malipayon nga mga kauturan. Wala ko na sia nakita sugod sadto. Sang ulihi, nagbiya sia sa organisasyon.” Pero “madamo sing malipayon nga kauturan ang nagadala sang ila mga libro sa ila salakyan,” nga nagapakita nga nalangkag sila magbantala sa mga pamalay.—Binu. 20:20, 21.

Madamo nga pilgrim ang nagbantala sing makugihon sa mga pamalay bisan ginakulbaan man sila pareho sang ila mga ginahanas. Ang pilgrim nga si Maxwell G. Friend (Freschel), nga nagahambal sing German, nagsulat parte sa pagpamalaybalay, “Ini nga bahin sang hilikuton sang pilgrim pagpakamaayo gid.” Ang pilgrim nga si John A. Bohnet nagsiling nga ang mga kauturan sa kabilugan kinabubut-on nga nagsuporta sa pagbantala sang Ginharian. Suno sa iya, madamo ang “nagadabdab sa kakugi sang ginbutang sila sa unahan sang patag-awayan.”

Sa sulod sang mga tinuig, maayo gid nga impluwensia ining matutom nga nagalakbay nga mga utod. “Daku gid ang nabulig sang mga pilgrim bisan sang bata pa ako,” siling sang madugay na nga Saksi nga si Norman Larson. “Maayo gid ang ila impluwensia sa akon.” Asta subong, ining masinakripisyuhon kag matutom nga mga manugtatap nagabulig sa mga masigkatumuluo sa pagsiling, “Masarangan naton nga magpamalaybalay!”

[Blurb sa pahina 32]

Makalilipay gid kon ara ang mga pilgrim!

[Retrato sa pahina 31]

Mga 170 tanan ang kaladtuan ni Benjamin Barton sang 1905

[Retrato sa pahina 32]

Si Walter J. Thorn nga isa ka pilgrim, ginatawag nga Pappy bangod daw tatay ang iya panimuot kag ginailog niya si Cristo

[Retrato sa pahina 32]

Si J. A. Browne ginpadala sa Jamaica subong pilgrim sang mga 1902 agod pabakuron kag palig-unon ang 14 ka magagmay nga grupo

[Retrato sa pahina 32]

Ang hilikuton sang mga pilgrim nagpabakod sang pagtuo kag paghiusa, kag nagpasuod sa mga kauturan sa organisasyon