1-3. (a) Ano nga mga sitwasyon ang nagailustrar sa punto sang duha ka parabola ni Jesus? (b) Ano nga mga pamangkot ang aton sabton?

IBUTANG ta nga ginpangabay ikaw sang isa ka mataas nga opisyal nga idul-ong sia sa iya importante nga kaladtuan. Pero wala madugay antes mo sia sugaton, natalupangdan mo nga diutay na lang ang gasolina sang imo salakyan. Kinahanglan mo pa nga magpatughong. Sang naglakat ka, nag-abot ang opisyal. Nagtulok sia sa palibot pero wala ka niya makita. Indi na sia makahulat, gani nagpadul-ong sia sa iban. Pagbalik mo, nahibaluan mo nga naglakat na ang opisyal. Ano ang imo batyagon?

² Karon, ibutang ta nga ikaw ang opisyal kag nagpili ka sing tatlo ka masaligan nga tawo sa pagdumala sang pila ka importante nga buluhaton. Ginpaathag mo ang ila asaynment, kag ginbaton nila ini sing kinabubut-on. Pero pagbalik mo, nahibaluan mo nga duha lang ang nagtuman sang ila asaynment. Ang isa nga wala nagtuman nangita pa sing balibad. Ang matuod, wala gani sia nagtinguha nga himuon ang iya asaynment. Ano ang imo batyagon?

³ Sa iya parabola parte sa mga ulay kag mga talanton, naggamit si Jesus sing pareho sini nga sitwasyon para iilustrar kon ngaa sa tion sang katapusan, ang pila ka hinaplas nga Cristiano mapamatud-an nga matutom kag mainandamon, kag ang iban indi. * (Mat. 25:1-30) Ginpadaku niya ang iya punto paagi sa pagsiling: “Busa, magpadayon kamo sa pagbantay, bangod wala kamo makahibalo sang adlaw ukon sang oras”—nga amo ang tion nga ipadapat ni Jesus ang paghukom sang Dios sa kalibutan ni Satanas. (Mat. 25:13) Maaplikar naton ini nga laygay subong. Paano kita makabenepisyo sa padayon nga pagbantay, subong sang ginpalig-on ni Jesus sa aton? Sin-o ang napamatud-an nga handa para sa kaluwasan? Kag  ano ang aton himuon para makapabilin nga nagabantay?

4. Ngaa ang ‘pagpabilin nga nagamata’ wala nagakahulugan sang pagtan-aw sa oras?

⁴ Kinahanglan naton sundon ang iskedyul sa pila ka buluhaton, pareho sang pagsulod sa obra, pagpadoktor, ukon pagsakay sa bus. Pero sa iban nga buluhaton, pareho sang pagtapna sang sunog ukon pagluwas sa mga biktima sang kalamidad, ang pagtan-aw sa oras mahimo makatublag, ukon makahalit pa gani. Sa sini nga mga kahimtangan, importante gid nga magkonsentrar sa imo ginaobra sangsa magsunod sa iskedyul. Sing kaanggid, samtang nagahilapit ang katapusan sini nga sistema, importante katama ang hilikuton nga pagtudlo sa mga tawo sang kahimusan ni Jehova para sa kaluwasan. Ang pagpabilin nga nagamata subong Cristiano wala nagakahulugan nga magtan-aw kita sa oras. Ang matuod, may lima ka kaayuhan nga matigayon naton bangod wala kita nakahibalo sang eksakto nga adlaw ukon oras sang pag-abot sang katapusan.

5. Paano ang kamatuoran nga wala naton nahibaluan ang adlaw ukon oras makabulig sa aton nga mapakita kon ano ang ara sa aton tagipusuon?

⁵ Una, bangod wala naton nahibaluan kon san-o ang katapusan, mapakita naton kon ano gid ang ara sa aton tagipusuon. Ang matuod, nagahatag ini sa aton sing dignidad, kay magamit naton ang aton kahilwayan sa pagdesisyon para mapamatud-an ang aton katutom kay Jehova. Bisan pa gusto naton maluwas sa katapusan sini nga sistema, ginaalagad naton si Jehova bangod ginahigugma naton sia, indi lang para makatigayon sing kabuhi. (Basaha ang Salmo 37:4.) Nalipay kita sa paghimo sang iya kabubut-on, kag nahangpan naton nga para sa aton kaayuhan ang pagtudlo sang Dios. (Isa. 48:17) Wala kita nabug-atan sa iya mga sugo.—1 Juan 5:3.

6. Ano ang batyagon sang Dios kon ginaalagad naton sia tungod sa gugma, kag ngaa?

⁶ Ikaduha, may kahigayunan kita nga mapahalipay si Jehova. Kon ginaalagad naton sia tungod sa gugma—indi bangod sa petsa ukon sa padya—makabulig kita sa pagsabat ni Jehova sa wala sing basihan nga panumbungon sang iya kaaway nga si Satanas. (Job 2:4, 5; basaha ang Hulubaton 27:11.) Nahibaluan naton ang tanan nga kasakit kag kasubo nga ginhimo sang Yawa, gani nalipay kita nga magdampig sa pagkasoberano ni Jehova kag isikway ang paggahom ni Satanas.

7. Ngaa luyag mo gamiton ang imo kabuhi sa pag-alagad sa Dios kag sa pagbulig sa iban?

⁷ Ikatlo, ang pag-alagad nga wala nagabantay sang petsa nagapalig-on sa aton nga magsakripisyo. Ang pila subong nga wala makakilala sa Dios nagapati man nga indi na magdugay ang kalibutan. Bangod nahadlok sila sa nagahilapit nga kalamidad, may panimuot sila nga: “Magkaon kita kag mag-inom, kay buas mapatay kita.” (1 Cor. 15:32) Pero kita iya wala nahadlok. Wala naton ginapain ang aton kaugalingon para matigayon ang aton personal nga mga handum. (Hulu. 18:1) Sa baylo, ginasikway naton ang aton kaugalingon kag ginagamit ang aton tion, kusog, kag mga pagkabutang sa pagsugid sa iban sang maayong balita sang Ginharian sang Dios. (Basaha ang Mateo 16:24.) Nalipay kita sa pag-alagad sa Dios, ilabi na sa pagbulig sa iban nga makilala sia.

8. Ano nga halimbawa sa Biblia ang nagapakita nga dapat kita magsalig sing bug-os kay Jehova kag sa iya Pulong?

⁸ Ikap-at, makabulig ini sa aton sa pagsalig sing bug-os kay Jehova kag sa pag-aplikar sang iya Pulong. Bangod makasasala kita, masami nga nagasalig kita sa aton kaugalingon. Ginlaygayan ni Pablo ang tanan nga Cristiano: “Ang nagahunahuna nga nagatindog sia mag-andam nga indi sia mapukan.” Nadula sang 23,000 ang kahamuot ni Jehova wala madugay antes ginpangunahan ni Josue ang katawhan sang Dios sa pagsulod sa  Ginsaad nga Duta. “Ini nga mga butang,” siling ni Pablo, “ginsulat . . . subong paandam sa aton nga naabtan sang katapusan sang mga sistema sang mga butang.”—1 Cor. 10:8, 11, 12.

9. Paano ang mga kabudlayan makapabakod sang aton pagtuo kag makapasuod sa aton sa Dios?

⁹ Ikalima, nagabulig ini sa aton nga makatuon sa mga kabudlayan kag mapabakod ang aton pagtuo. (Basaha ang Salmo 119:71.) Ang katapusan nga mga adlaw sining sistema matuod gid nga ‘makahalanguyos kag mabudlay atubangon.’ (2 Tim. 3:1-5) Madamo sa kalibutan ni Satanas ang nagadumot sa aton, gani mahimo kita hingabuton bangod sa aton pagtuo. (Juan 15:19; 16:2) Kon magpaubos kita kag magsunod sa panuytoy sang Dios sa tion sang mga pagtilaw, magabakod ang aton pagtuo pareho sang metal nga ginaulay sang kalayo. Wala kita nagapangampo, kundi nagasuod pa gid kita kay Jehova.—Sant. 1:2-4; 4:8.

10. Ngaa kon kaisa daw kadasig lang magligad sang tion?

¹⁰ Ang pagligad sang tion mahimo mangin madasig ukon mahinay. Kon masako kita kag wala nagatan-aw sang oras, daw kadasig lang sang tion. Sing kaanggid, kon masako kita sa makalilipay nga hilikuton nga ginsugo sa aton ni Jehova, indi naton matalupangdan nga nag-abot na ang katapusan. Ang kalabanan nga hinaplas nangin maayo nga halimbawa parte sini. Usisaon naton sing makadali ang natabo sa tapos ginpapungko si Jesus subong Hari sang 1914 kag tan-awon naton kon paano ginpamatud-an sang pila ka hinaplas nga handa sila, samtang ang iban indi.

11. Pagkatapos sang 1914, ngaa ang pila ka hinaplas nagbatyag nga nagpalantang ang Ginuo?

¹¹ Binagbinaga ang mga parabola ni Jesus parte sa mga ulay kag mga talanton. Kon nahibaluan sang mga ulay ukon mga ulipon sa sini nga parabola kon san-o maabot ang nobyo ukon ang agalon, indi na kinahanglan nga magpadayon sila sa pagbantay. Pero wala sila kahibalo, gani dapat sila pirme maghanda. Madugay na nga nagapati ang mga hinaplas nga pinasahi nga tuig ang 1914, pero wala nila mahangpan sing maayo kon ano ang matabo. Sang wala natabo ang ila ginapaabot, ang pila sa ila nagbatyag nga nagpalantang ukon naatrasar ang Nobyo. Ang isa ka brother nagsaysay, “Ang pila sa amon kumbinsido gid nga mapalangit sa una nga semana sang Oktubre [1914].”

12. Paano ginpamatud-an sang mga hinaplas nga matutom sila kag mainandamon?

¹² Hunahunaa kon daw ano ka makapaluya sang wala nag-abot ang katapusan nga ila ginapatihan! Isa pa, ang mga kauturan nakaeksperiensia sing pagpamatok sang Bug-os Kalibutan nga Inaway I. Sini nga tion, nagluya ang ila hilikuton, nga daw pareho lang nga nagtulog ang mga hinaplas. Pero sang 1919, may nagpukaw sa ila! Si Jesus nagsulod sa espirituwal nga templo sang Dios, kag nag-abot ang tion sang pagpangusisa. Ang iban wala nakapasar sa sini nga pagpangusisa kag sang ulihi nadula nila ang ila pribilehiyo sa hilikuton sang Hari. (Mat. 25:16) Daw pareho lang nga nagtinamad sila sa pagpuno sang ila mga suludlan sang espirituwal nga lana, kaangay sang buangbuang nga mga ulay. Kag kaangay sang uyaya nga ulipon, indi nila gusto nga magsakripisyo para sa Ginharian. Pero, ang kalabanan nga hinaplas nagpakita sing tumalagsahon nga katutom kag mabaskog nga handum nga alagaron ang ila Agalon bisan pa sa tion sang inaway.

13. Ano ang panimuot sang ulipon nga klase pagkatapos sang 1914, kag ano ang ila panimuot subong?

¹³ Pagkatapos sang 1914, ang The Watchtower nagpahayag: “Mga kauturan, kita nga may husto nga panimuot parte sa Dios wala naluyahan sa Iya mga kahimusan. Indi naton gusto nga ang aton kabubut-on amo ang masunod; gani sang nahibaluan naton nga indi  husto ang aton pagpaabot sa Oktubre, 1914, nalipay kita nga wala ginbag-o sang Ginuo ang Iya Plano para paayunan ang aton gusto. Indi naton luyag nga himuon Niya ini. Gusto lang naton nga mahangpan ang Iya mga plano kag mga katuyuan.” Ini nga pagpaubos kag debosyon makita gihapon sa mga hinaplas sang Ginuo. Wala sila nagapangangkon nga gin-inspirar sila, apang determinado sila nga tumanon ang hilikuton sang Ginuo sa duta. Sa karon, ang “dakung kadam-an” sang “iban nga mga karnero,” ukon mga Cristiano nga may paglaum sa duta, nagailog sa pagkamabinantayon kag kakugi sang mga hinaplas.—Bug. 7:9; Juan 10:16.

14. Paano ang pagpabilin nga suod sa gingamit sang Dios nga mag-aman sang espirituwal nga pagkaon nagaamlig sa aton?

¹⁴ Subong sang ginahimo sang hinaplas nga mga Cristiano, ang alisto nga mga miembro sang dakung kadam-an nagapabilin nga suod sa gintangdo sang Dios nga mag-aman sang espirituwal nga pagkaon. Bilang resulta, daw pareho lang nga ginapuno nila ang ila mga suludlan sang espirituwal nga lana gikan sa espiritu kag Pulong sang Dios. (Basaha ang Salmo 119:130; Juan 16:13.) Bangod napabakod sila, ginpamatud-an man nila nga handa sila sa pag-abot sang Cristo, kag nagapabilin nga aktibo bisan sa mabudlay nga pagtilaw. Halimbawa, sa isa ka prisuhan sang Nazi, ang mga kauturan may isa lang ka kopya sang Biblia. Gani nangamuyo sila sing dugang nga espirituwal nga pagkaon. Wala madugay, nahibaluan nila nga may bag-o nga utod nga napriso kag nakadala sa prisuhan sing pila ka bag-o nga isyu sang The Watchtower nga ara sa sulod sang iya kahoy nga tiil. Ang isa sa mga nakaluwas amo ang hinaplas nga utod nga si Ernst Wauer, nga nagsaysay sang ulihi: “Si Jehova nagbulig sa amon sa makatilingala nga paagi agod masaulo ang makapalig-on nga mga punto sa mga artikulo.” Dayon nagsiling sia: “Sa karon, mahapos na lang matigayon ang espirituwal nga pagkaon, apang pirme bala naton ini ginaapresyar? Nagapati ako nga si Jehova nagatigana sing bugana nga mga pagpakamaayo para sa mga nagasalig sa iya, nagapabilin nga matutom, kag nagakaon sa iya latok.”

15, 16. Paano ginpadyaan ang kakugi sa ministeryo sang isa ka mag-asawa, kag ano ang matun-an mo sa ila eksperiensia?

¹⁵ Ang iban nga mga karnero nagapabilin man nga masako sa hilikuton sang Agalon bilang pagsuporta sa mga kauturan ni Cristo.  (Mat. 25:40) Indi pareho sang malaut kag uyaya nga ulipon sa parabola ni Jesus, handa sila nga magsakripisyo kag magpangabudlay sa pag-una sang Ginharian. Halimbawa, sanday Jon kag Masako gin-agda nga magbulig sa pagbantala sa mga Chinese sa Kenya, pero nagduhaduha sila sang primero. Pagkatapos mangamuyo kag mabinagbinag sing maayo ang ila kahimtangan, nagdesisyon sila nga magsaylo sa Kenya.

¹⁶ Ginpadyaan gid ang ila panikasog. “Makalilipay ang pagministeryo diri,” siling nila. Nakahiwat sila sing pito ka pagtuon sa Biblia. Madamo pa gid sila sing makalilipay nga eksperiensia. Nagsiling sila, “Nagapasalamat kami kay Jehova kada adlaw kay ginpadala niya kami diri.” Madamo pa nga kauturan ang nagdesisyon nga mangin masako sa pag-alagad sa Dios, bisan san-o pa mag-abot ang katapusan. Hunahunaa ang linibo nga naggradwar sa Gilead kag nangin misyonero. Madamo ka sing matun-an parte sa sining pinasahi nga pag-alagad sa artikulo nga “Ginahimo Namon ang Amon Bug-os nga Masarangan!” sa Oktubre 15, 2001 nga Ang Lalantawan. Samtang ginabasa mo ining makawiwili nga hitabo parte sa pagmisyonero, hunahunaa kon paano mo mapasangkad ang imo pag-alagad para sa kadayawan sang Dios, nga nagaresulta sing kalipay.

17. Paano nangin pagpakamaayo nga wala naton nahibaluan ang adlaw ukon oras sang katapusan?

¹⁷ Maathag nga pagpakamaayo para sa aton bangod wala naton nahibaluan ang eksakto nga adlaw ukon oras sang katapusan sining sistema. Imbes nga napaslawan ukon naluyahan, nangin suod pa gid kita kay Jehova, ang aton mahigugmaon nga Amay, samtang masako kita sa paghimo sang iya kabubut-on. Ang pag-una sang buluhaton nga ginsugo ni Jesus kag paglikaw sa mga tublag magaresulta sa daku nga kalipay sa hilikuton sang Agalon.—Luc. 9:62.

18. Ngaa indi naton luyag nga magluya ang aton pagtuo?

¹⁸ Malapit na katama ang adlaw sang paghukom sang Dios. Indi naton gusto nga mapasubo si Jehova ukon si Jesus. Gintugyanan nila kita sing hamili nga pribilehiyo sang pag-alagad sa sining katapusan nga mga adlaw. Nalipay gid kita kay ginsalig nila ini sa aton!—Basaha ang 1 Timoteo 1:12.

19. Paano naton mapamatud-an nga handa kita?

¹⁹ Sa langit man ukon sa Paraiso nga duta ang aton paglaum, dapat kita mangin determinado nga magmatutom sa pagtuman sa sugo sang Dios nga magbantala kag maghimo sing disipulo. Wala gihapon naton nahibaluan ang adlaw ukon oras sang pag-abot sang adlaw ni Jehova, pero kinahanglan pa bala naton ina hibaluon? Masarangan naton nga pamatud-an nga handa kita, kag dapat lang nga himuon naton ini. (Mat. 24:36, 44) Makapat-od kita nga samtang nagasalig kita sing bug-os kay Jehova kag ginauna ang iya Ginharian, indi gid kita malugaw-an.—Roma 10:11.