SANG Pebrero sina nga tuig, ang 122 ka payunir nag-abot sa South Lansing, New York, para mag-eskwela sa ika-17 nga klase sang Gilead. Ang pila ka palaabuton nga misyonero amo sanday Lowell Turner, William (Bill) Kasten, Richard Kelsey, kag Ramon Templeton. Sanday Lowell kag Bill, naghalin sa Michigan, si Richard sa Iowa, kag si Ramon sa California. Sila tanan nangin mag-abyan.

Lima ka bulan sang ulihi, nalangkag gid ang tanan sang ginpahibalo nga maabot si Brother Nathan Knorr gikan sa ulong talatapan para makig-istorya sa mga estudyante. Ang apat ka utod nagpabutyag sang ila handum nga mag-alagad sa pareho nga pungsod, kon posible. Ipahibalo na bala subong kon diin sila iasayn? Huo!

Naggrabe pa gid ang ila kalangkag sang si Brother Knorr, nga nagahambal sa bilog nga klase, nagpahibalo sang mga pungsod nga ila kadtuan. Ining apat ka pamatan-on amo ang una nga gintawag sa plataporma. Ginakulbaan sila, pero naumpawan sang nahibaluan nila nga magaupdanay sila gihapon! Pero sa diin? Nakibot ang ila mga klasmeyt kag nagpamalakpak sang ginpahibalo nga ipadala sila sa Germany.

Ang mga Saksi ni Jehova bisan diin nagadayaw gid sa katutom sang mga Saksi sa Germany halin sang 1933 sang naggahom si Hitler. Nadumduman sang madamo nga estudyante nga nagahimos sila sing mga bayo kag CARE nga mga package nga ipadala sa ila mga kauturan sa Europa pagkatapos sang Bug-os Kalibutan nga Inaway II. Ang katawhan sang Dios sa Germany maayo gid nga halimbawa sang pagtuo, determinasyon, kaisog, kag pagsalig kay Jehova. ‘Makilala na gid man naton sing personal ining pinalangga nga mga kauturan,’ nasiling anay ni Lowell. Wala duhaduha nga nalangkag gid ang tanan amo nga nagtawag sila sa telepono sina nga gab-i!

Sang Hulyo 27, 1951, ang SS Homeland naglarga halin sa pantalan sa New York’s East River, kag umpisa na ini sang 11 ka adlaw nga paglakbay sang apat ka mag-abyan pakadto sa Germany. Si Brother Albert Schroeder, nga isa sa mga instruktor  sang Gilead kag sang ulihi nangin miembro sang Nagadumala nga Hubon, nagtudlo sa ila sang pila ka German nga tinaga. Kag karon nga kaupod nila ang pila ka pasahero nga German, mahimo madugangan ang ila natun-an. Ugaling, ang mga pasahero nagahambal sing lainlain nga dialekto sang German. Gani naglibog na gid ang ila ulo!

Sang Martes sang aga, Agosto 7, pagkatapos sang makalilingin sing ulo nga biyahe sa dagat, nakaabot gid man ang apat ka utod sa Hamburg, Germany. Nakita nila bisan diin ang mga inagyan sang inaway sang nagligad nga anom ka tuig. Nasubuan sila sang ila nakita, gani gab-i sila nagbiyahe sakay sa tren pakadto sa Wiesbaden, diin nahamtang anay ang sanga talatapan.

Sang kaagahon sang Mierkoles, nagkit-anay sila sang una nga Saksi nga ila nakilala sa Germany—si Hans, nga isa ka komon nga ngalan didto. Ginsugat sila ni Hans sa estasyon sang tren kag gindul-ong sa Bethel. Dayon ginbilin niya sila sa may edad na kag daw estrikta nga sister nga indi makahibalo mag-Ingles. Abi sang sister, maintiendihan nila sia kon tunugon niya maghambal. Pero bisan pa nga daw masinggit na sia, indi sila gihapon mag-intiendihanay. Maayo lang kay nag-abot si Brother Erich Frost, ang branch servant, kag gintamyaw sila sa Ingles. Medyo nakaginhawa gid man sila.

Sa hingapusan sang Agosto, ang apat nagtambong sa ila una nga German nga kombension, ang “Clean Worship” nga Asembleya sa Frankfurt am Main. Ang tumalambong naglab-ot sa 47,432 kag ang 2,373 nga nabawtismuhan nagpabakod sa kakugi sini nga mga misyonero kag sa ila handum nga magbantala. Pero pagligad sang pila ka adlaw, ginsilingan sila ni Brother Knorr nga sa Bethel sila iasayn.

Bangod gusto gid ni Ramon nga magmisyonero, ginbalibaran niya anay ang kahigayunan nga mag-Bethelite sa Estados Unidos. Bisan sanday Richard kag Bill wala man magpamensar nga mag-alagad sa Bethel. Pero bangod sa ila kalipay sa ila asaynment, narealisar nila nga nahibaluan pirme ni Jehova ang pinakamaayo. Maalamon gid nga magsalig sa iya panuytoy sa baylo nga sundon ang personal  nga mga gusto. Ang isa nga nakatuon sini nga leksion mangin malipayon sa pag-alagad kay Jehova bisan diin kag bisan ano nga asaynment ang iya mabaton.

Madamo sa pamilya Bethel sa Germany ang nalipay nga makaupod ang mga Amerikano para makatuon sila sing Ingles. Pero isa ka adlaw sa dining room, gulpi lang nagbaliskad ang kahimtangan. Ang masinadyahon nga si Brother Frost naghambal sa German parte sa isa ka serioso nga butang. Ang kalabanan sa pamilya naghipos na lang nga nagatulok sa ila pinggan. Bisan pa wala maintiendihan sining apat ka utod ang ginaistoryahan, narealisar nila nga parte ini sa ila. Gani sang ginhambal sing matunog ni Brother Frost ang tinaga nga, “VERBOTEN!” (“Ginadilian!”) kag nagabaskog pa ang iya tingog samtang ginasulitsulit ini, indi sila mapahamtang. Ano ayhan ang ila nahimo?

Pagkatapos nila kaon, ang tanan nagdalidali pauli sa ila mga kuarto. Sang ulihi, ang isa ka utod nagpaathag: “Para makabulig kamo sa amon, dapat kahibalo kamo mag-German. Amo nga naghambal si Brother Frost nga VERBOTEN ang pagpakig-istorya sa inyo sing Ingles tubtob makahibalo kamo maghambal sang amon lenguahe.”

Nagtuman gilayon ang pamilya Bethel. Wala lamang ini nakabulig sa apat nga makatuon sing German kundi natun-an man nila nga ang laygay sang mahigugmaon nga utod, bisan pa sa primero daw kabudlay sundon, masami nga para sa aton kaayuhan. Makita sa laygay ni Brother Frost ang iya pag-ulikid sa organisasyon ni Jehova kag ang iya gugma sa iya mga kauturan. * Amo nga ginhigugma gid sia sining apat ka utod!

Makatuon kita sing importante nga mga leksion sa diosnon nga mga abyan, nga makabulig sa aton nga mangin mas maayo nga mga abyan ni Jehova. Madamo sing natun-an ang apat gikan sa matutom nga mga kauturan nga German, pero may natun-an man sila sa isa kag isa. Si Richard nagpaathag: “Si Lowell may ihibalo sa German amo nga kahapos lang sa iya magtuon, pero kami nga tatlo nabudlayan. Tungod sia man ang magulang sa amon, sia dayon ang amon ginapalapitan parte sa lenguahe kag para manguna sa amon.” Si Ramon nagsaysay: “Nalipay gid ako sang gintanyag sa amon sang taga-Switzerland nga utod ang iya gamay nga balay sa ila  lugar para bakasyunan namon pagligad sang isa ka tuig sa Germany! Gani duha ka semana nga indi kami maghambal sing German! Pero wala ko marealisar ang himuon ni Lowell. Nag-insister sia nga basahon namon kag binagbinagon ang teksto kada aga—sa German! Naluyahan gid ako kay wala nagbag-o ang iya hunahuna. Pero nakatuon kami sing importante nga leksion. Tumana ang mga nabalaka sa imo kaayuhan, bisan pa kon kaisa wala ka nagaugyon. Ini nga panimuot nakabulig sa amon sa sulod sang mga tinuig kag nangin mahapos para sa amon nga magpasakop sa teokratiko nga panuytoy.”

Natun-an man sang apat ka mag-abyan nga pabaloran ang maayo nga kinaiya sang isa kag isa, kay ang Filipos 2:3 nagsiling: “May pagpaubos sang hunahuna [kabiga ang] iban nga labaw sa inyo.” Gani masami nga ginapabaloran sang tatlo si Bill paagi sa paghatag sa iya sing mga buluhaton nga para sa ila mas maatipan niya sing maayo. “Kon may importante ukon mabudlay nga mga tikang nga dapat himuon para masolusyonan ang daku nga problema,” saysay ni Lowell, “nagapalapit kami kay Bill. Maayo sia mag-atubang sang mabudlay nga mga kahimtangan nga amo man kuntani ang amon himuon pero wala lang kami sing kaisog ukon ikasarang.”

Ang apat nagdesisyon nga mangasawa. Ang ila pag-abyanay nabase sa ila gugma kay Jehova kag sa ila bug-os tion nga ministeryo, gani nangita sila sing mapangasawa nga nagauna man sa pag-alagad kay Jehova. Ang bug-os tion nga pag-alagad nagtudlo sa ila nga ang paghatag mas makalilipay sangsa pagbaton kag unahon pirme ang mga intereses sang Ginharian sangsa personal nga mga handum. Gani nangita sila sing sister nga ara na sa bug-os tion nga pag-alagad. Nagresulta ini sa apat ka mabakod kag malipayon nga pag-asawahay.

Para magpadayon ang pag-abyanay ukon pag-asawahay, dapat ara gid si Jehova sa tunga nila. (Man. 4:12) Bisan pa napatay sang ulihi ang asawa ni Bill kag ni Ramon, pareho nila nga nabaton ang kalipay kag pagsakdag sang isa ka matutom nga asawa. Sanday Lowell kag Richard padayon nga nakabaton sini nga pagsakdag. Si Bill nangin maalamon sa pagpangasawa liwat, amo nga nakapabilin sia sa bug-os tion nga pag-alagad.

Pagligad sang mga tinuig, ang apat ka mag-abyan nakalab-ot sa lainlain nga lugar bangod sa ila asaynment—kalabanan sa Germany, Austria, Luxembourg, Canada, kag Estados Unidos. Gani indi na sila pirme makaupdanay bisan pa gusto nila. Pero bisan pa nagalayuay sila, pirme sila nagakontakanay, nga nagakalipay sa ila mga pagpakamaayo kag nagahibi sa ila mga kasubo. (Roma 12:15) Ang mga abyan nga pareho sini dapat pabaloran kag indi dapat balewalaon. Hamili sila nga regalo halin kay Jehova. (Hulu. 17:17) Talagsa na lang ang matuod nga mga abyan sa karon! Pero madamo sa sini ang matigayon sang matuod nga mga Cristiano. Subong mga Saksi ni Jehova, nalipay kita makig-abyan sa aton  mga masigkatumuluo sa bilog nga kalibutan, kag labaw sa tanan, kay Jehova nga Dios kag kay Jesucristo.

Pareho sa aton, may tinion man nga nakaatubang sing mga kabudlayan ang apat ka mag-abyan—mahimo bangod sa pagkapatay sang asawa, grabe nga balatian, pag-atipan sa nagatigulang nga mga ginikanan, pagpadaku sang bata samtang ara sa bug-os tion nga pag-alagad, pagpangalag-ag sa pagbaton sang bag-o nga asaynment, kag sa karon, ang kabudlayan sang pagtigulang. Pero nahibaluan man nila base sa ila eksperiensia nga ang mga abyan—malapit man ukon malayo—nagabulig sa mga nagahigugma kay Jehova nga maatubang sing madinalag-on ang tanan nga kabudlayan.

Dalayawon gid nga sanday Lowell, Ramon, Bill, kag Richard sa edad nga 18, 12, 11, kag 10 nagdedikar sang ila kabuhi kay Jehova, kag sa edad nga 17 tubtob 21, nagsulod sa bug-os tion nga pag-alagad. Gintuman gid nila ang ginpalig-on sang Manugwali 12:1: “Dumduma man ang imo Manunuga sa mga adlaw sang imo pagkapamatan-on.”

Kon isa ikaw ka pamatan-on nga lalaki, batuna ang pangagda ni Jehova nga magsulod sa bug-os tion nga pag-alagad kon posible. Bangod sa iya wala tupong nga kaayo, mabatyagan mo ang kalipay—pareho sining apat ka mag-abyan—nga mag-alagad sa sirkito, distrito, ukon sa sona; mag-alagad sa Bethel, lakip na ang mangin katapo sang Komite sang Sanga; matudlo sa KMS kag PSS; kag magpamulongpulong sa dalagku kag magagmay nga mga kombension. Nalipay gid ining apat kay linibo ang nakabenepisyo sa ila hilikuton! Ini tanan nangin posible bangod subong pamatan-on, ginbaton nila ang mahigugmaon nga pangagda ni Jehova nga alagaron sia sing bug-os kalag.—Col. 3:23.

Sa karon, sanday Lowell, Richard, kag Ramon nagaalagad liwat sa sanga talatapan, nga ara na sa Selters, Germany. Makapasubo nga napatay si Bill sang 2010 samtang nagaalagad subong espesyal payunir sa Estados Unidos. Ang halos 60 ka tuig nga pinasahi nga pag-abyanay sining apat ginhalitan sang kamatayon! Pero ang aton Dios, nga si Jehova, wala gid nagakalipat sa iya mga abyan. Mapat-od naton nga sa idalom sang iya Ginharian, ipasag-uli ang pag-abyanay sang tagsa ka Cristiano nga temporaryo nga ginbungkag sang kamatayon.

Antes napatay si Bill, nagsulat sia: “Sa sulod sang 60 ka tuig, wala gid ako sing madumduman nga indi maayo sa aton pag-abyanay. Pinasahi gid ini pirme sa akon.” Ang iya tatlo ka abyan, nga nagalaum gid nga magapadayon ang ila pag-abyanay sa bag-o nga kalibutan, nagsabat, “Kag umpisa pa lang ini sang amon pag-abyanay.”