1. Ano nga paglaum ang ginpabutyag ni Pablo sang nagsulat sia sa iya mga masigkatumuluo?

SANG nagsulat si apostol Pablo sa iya mga masigkatumuluo, sulitsulit niya nga ginpabutyag ang iya paglaum nga ang Dios kag ang Cristo mahamuot sa espiritu nga ginapakita sang mga kongregasyon. Halimbawa, nagsulat sia sa mga taga-Galacia: “Ang wala tupong nga kaayo sang aton Ginuong Jesucristo mangin sa espiritu nga inyo ginapakita, mga kauturan. Kabay pa.” (Gal. 6:18) Ano ang iya buot silingon sang ginsiling niya ang “espiritu nga inyo ginapakita”?

2, 3. (a) Ano ang ginapatuhuyan ni Pablo sang gingamit niya ang tinaga nga “espiritu”? (b) Ano ang mahimo naton ipamangkot sa aton kaugalingon parte sa espiritu nga aton ginapakita?

² Sa sini nga konteksto, ang tinaga nga “espiritu” nga gingamit ni Pablo nagapatuhoy sa puersa nga nagapahulag sa aton sa paghambal ukon pagbuhat. Ang isa ka tawo mahimo nga malulo, mapinalanggaon, mainayuhon, maalwan, ukon mapinatawaron. Ang Biblia nagsiling nga dapat kita mangin “malinong kag malulo [sing] espiritu” kag mangin “mabugnaw sing espiritu.” (1 Ped. 3:4; Hulu. 17:27) Sa pihak nga bahin, ang isa naman mahimo nga matigdas, materyalistiko, madali masaklaw, ukon independiente. Ang mas malain pa sini kay may mga tawo nga nagapakita sing mahigko, di-matinumanon, ukon rebelyuso nga espiritu.

³ Sang gingamit ni Pablo ang mga ekspresyon pareho sang “ang Ginuo mangin sa espiritu nga inyo ginapakita,” ginapalig-on niya ang mga kauturan nga ipakita ang espiritu nga nahisuno sa kabubut-on sang Dios kag personalidad sang Cristo. (2 Tim. 4:22; basaha ang Colosas 3:9-12.) Gani dapat naton pamangkuton ang aton kaugalingon: ‘Ano nga espiritu ang akon ginapakita? Paano ko pa gid mapakita ang espiritu nga ginakahamut-an sang Dios? May mahimo pa bala ako para mag-uswag ang  maayo nga espiritu sa kongregasyon?’ Bilang pagpaanggid, sa isa ka katamnan sang mga sunflower, ang tagsa ka bulak nagapatahom sa bilog nga katamnan. Isa bala kita sa sini nga mga “bulak” nga nagapadugang sa katahom sang kongregasyon? Dapat gid naton ini panikasugan. Binagbinagon naton karon kon paano naton mapakita ang espiritu nga nagapahamuot sa Dios.

4. Ano “ang espiritu sang kalibutan”?

⁴ Ang Kasulatan nagasiling: “Nabaton naton, indi ang espiritu sang kalibutan, kundi ang espiritu nga gikan sa Dios.” (1 Cor. 2:12) Ano “ang espiritu sang kalibutan”? Amo man ini ang espiritu nga ginsambit sa Efeso 2:2, nga nagasiling: “[Naglakat kamo] sadto suno sa sistema sang mga butang sini nga kalibutan, suno sa manugdumala sang awtoridad sang hangin, ang espiritu nga nagapanghikot karon sa mga anak sang pagkadimatinumanon.” Ining “hangin” amo ang espiritu sang kalibutan, ukon panimuot, kag yara ini sa aton palibot kaangay sang literal nga hangin. Ara ini bisan diin. Makita ini pirme sa panimuot sang madamo nga tawo karon nga nagasiling, ‘Wala sing may magdikta sa akon!’ ukon, ‘Ipakigbato ang imo kinamatarong!’ Sila ang “mga anak sang pagkadimatinumanon” sang kalibutan ni Satanas.

5. Anong malain nga espiritu ang ginpakita sang pila ka Israelinhon?

⁵ Indi na bag-o ini nga panimuot. Sang panahon ni Moises, si Kora nagrebelde sa mga may awtoridad sa kongregasyon sang Israel. Ginpakalain niya si Aaron kag ang mga anak sini, nga nagaalagad subong mga saserdote. Mahimo nakita niya ang ila di-kahimpitan. Ukon ayhan nangatarungan sia nga si Moises nagapakita sing nepotismo—ang paghatag sang pribilehiyo sa iya mga paryente. Ano man ang rason, maathag nga nagbase si Kora sa tawhanon nga pagtamod kag naghambal batok sa mga gintangdo ni Jehova. Sia nagsiling: “Nagapalakas kamo sa inyo! . . . Busa niyan ngaa bala nga nagapakataas kamo sa pagtilipon?” (Num. 16:3) Sanday Datan kag Abiram nagreklamo man batok kay Moises, nga nagasiling nga ‘ginhimo niya ang iya kaugalingon nga principe sa ibabaw nila.’ Sang ginpatawag sila ni Moises, arogante sila nga nagsabat: “Indi kami magtaklad.” (Num. 16:12-14) Maathag nga wala nahamuot si Jehova sa ila espiritu. Ginlaglag niya ang tanan nga rebelde.—Num. 16:28-35.

6. Paano ginpakita sang pila sang unang siglo ang ila malain nga panimuot, kag ano ang mahimo nga rason sini?

⁶ Ang pila sang unang siglo wala man nagpakita sing pagtahod sa mga may katungdanan sa kongregasyon, kag ‘nagtamay sang pagkaginuo.’ (Jud. 8) Ini nga mga lalaki mahimo nga indi kontento sa ila mga pribilehiyo kag gintinguhaan nila nga impluwensiahan ang iban batok sa mga gintangdo nga mapisan sa pagtuman sang ila obligasyon halin sa Dios.—Basaha ang 3 Juan 9, 10.

7. Ano nga panimuot ang dapat naton likawan?

⁷ Maathag nga ini nga panimuot indi dapat makita sa Cristianong kongregasyon. Amo nga dapat gid naton ini likawan. Ang mga gulang sa kongregasyon indi himpit, pareho sang panahon ni Moises kag ni apostol Juan. Ang mga gulang mahimo makasala nga makaapektar sa aton. Kon matabo ini, indi gid nagakaigo para sa bisan sin-o nga miembro sang kongregasyon nga maggawi nahisuno sa espiritu sang kalibutan, nga magpamilit nga hatagan sia sing “hustisya” ukon magsiling nga “dapat may himuon gid sa sini nga utod”! Mahimo nga palampason ni Jehova ang ginagmay nga mga sala. Mailog man bala naton sia? Ang pila nga nakahimo sing mabug-at nga sala sa kongregasyon wala nagaatubang sa komite sang mga gulang nga gin-asayn sa pagbulig sa ila kay ginatulok nila ang kakulangan sini nga mga gulang. Mapaanggid ini sa pasyente nga wala  nagbaton sang isa ka pagbulong bangod may naindi-an sia sa doktor.

8. Ano nga mga teksto ang makabulig para mahuptan naton ang nagakaigo nga pagtamod sa mga nagapanguna sa kongregasyon?

⁸ Para malikawan ini nga espiritu, dumdumon naton ang paglaragway kay Jesus. Suno sa Biblia, “sa iya tuo nga kamot may pito ka bituon.” Ang mga “bituon” nagarepresentar sa hinaplas nga mga manugtatap kag maaplikar man sa tanan nga manugtatap sa kongregasyon. Mahimo kontrolon ni Jesus ang mga “bituon” sa iya kamot suno sa iya luyag. (Bug. 1:16, 20) Gani subong Ulo sang Cristianong kongregasyon, kontrolado ni Jesus ang tanan nga hubon sang mga gulang. Kon may ara sa hubon nga kinahanglan gid tadlungon, siguraduhon sang Isa nga “ang iya mga mata subong sang nagadabdab nga kalayo” nga mahusay ini sa Iya tion kag pamaagi. (Bug. 1:14) Gani dapat naton gihapon tahuron ang mga gintangdo sang balaan nga espiritu, kay si Pablo nagsulat: “Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag subong nga sila ang manabat; agod himuon nila ini nga may kalipay kag wala nagapanghayhay, kay makahalit ini sa inyo.”—Heb. 13:17.

9. (a) Paano matilawan ang isa ka Cristiano kon ginatadlong ukon ginadisiplina sia? (b) Ano ang pinakamaayo nga himuon kon ginasabdong kita?

⁹ Ang panimuot sang isa ka Cristiano mahimo man matilawan kon gintadlong sia ukon ginkuhaan sing mga pribilehiyo sa kongregasyon. Ang isa ka bataon nga brother mainayuhon nga ginlaygayan sang mga gulang parte sa paghampang sang masingki  nga mga video game. Makapasubo nga wala niya ginbaton ang laygay kag nataktak sia sa pagkaministeryal kay wala na niya malab-ot ang mga kalipikasyon sa Kasulatan. (Sal. 11:5; 1 Tim. 3:8-10) Sang ulihi, ginpalapta sini nga brother nga wala sia nagaugyon sa desisyon, kag sulitsulit nga nagsulat sa sanga talatapan para pakalainon ang mga gulang. Gin-impluwensiahan pa gani niya ang iban sa kongregasyon nga himuon man ini. Indi gid maayo nga gub-on naton ang kalinong sang kongregasyon para lang paguaon nga husto kita. Mas maayo nga kon ginasabdong kita, tamdon naton ini subong pamaagi para makita ang aton kaluyahon kag batunon ang pagtadlong.—Basaha ang Panalabiton 3:28, 29.

10. (a) Ipaathag kon ano ang aton matun-an parte sa nagakaigo kag indi nagakaigo nga espiritu sa Santiago 3:16-18. (b) Ano ang mga resulta sang pagpakita sang “kaalam nga gikan sa hitaas”?

¹⁰ Ang Santiago 3:16-18 nagabulig sa aton nga mahangpan kon ano ang nagakaigo kag indi nagakaigo nga espiritu. Nagasiling ini: “Kon diin ang kahisa kag huyog nga makigbais, yara ang kagamo kag ang tagsa ka malaut nga butang. Apang ang kaalam nga gikan sa hitaas una sa tanan putli, dayon mahidaiton, makatarunganon, handa sa pagtuman, puno sang kaluoy kag maayong mga bunga, wala sing ginapasulabi, indi salimpapaw. Dugang pa, ang bunga sang pagkamatarong may binhi nga ginsab-ug sa mahidaiton nga mga kahimtangan para sa mga nagapakighidait.” Kon ang ginahimo naton nahisuno sa “kaalam nga gikan sa hitaas,” ang diosnon nga mga kinaiya magabulig sa aton sa pagpakita sing maayo nga espiritu sa mga kauturan.

11. (a) Ano ang malikawan naton kon padayon naton nga huptan ang nagakaigo nga espiritu? (b) Ano ang aton matun-an sa halimbawa ni David?

¹¹ Dapat naton pirme dumdumon nga gintangdo ni Jehova ang mga gulang “agod bantayan ang kongregasyon sang Dios.” (Binu. 20:28; 1 Ped. 5:2) Gani, nahibaluan naton nga maalamon nga tahuron ang kahimusan sang Dios, gulang man kita ukon indi. Ang paghupot sang nagakaigo nga espiritu makabulig sa aton nga malikawan ang sobra nga paghingamo sang posisyon. Sang nagbatyag si Hari Saul sang Israel nga kaagaw niya sa pagkahari si David, “padayon [sia nga] nagpanilag kay David.” (1 Sam. 18:9) Nagpakita ang hari sang malain nga espiritu kag gusto pa gani niya patyon si David. Sa baylo nga ilugon si Saul nga nabalaka gid sa iya posisyon, mas maayo nga ilugon naton si David. Bisan pa nag-antos sia sang madamo nga inhustisya, padayon nga gintahod ni David ang gintangdo sang Dios.—Basaha ang 1 Samuel 26:23.

12. Ano ang mahimo naton para makabulig sa paghiusa sa kongregasyon?

¹² Ang lainlain nga pagtamod mahimo bangdan sang kinagamo sa kongregasyon—bisan sa mga manugtatap. Ang laygay sang Biblia makabulig sa aton sa sini: “Sa pagpadungog sa isa kag isa manguna kamo” kag, “Indi magpakaalam sa inyo kaugalingon nga mga mata.” (Roma 12:10, 16) Imbes nga magpamilit nga eksakto kita, dapat naton batunon nga sa masami indi lang isa ang husto nga pagtamod sa isa ka sitwasyon. Kon ginabaton naton ang pagtamod sang iban, makabulig kita sa paghiusa sa kongregasyon.—Fil. 4:5.

13. Paano naton dapat tamdon ang aton mga opinyon, kag ano nga halimbawa sa Biblia ang nagailustrar sini?

¹³ Ginapakita bala sini nga sala ang paghambal sang aton obserbasyon kon may makita kita nga kinahanglan bag-uhon sa kongregasyon? Indi. Sang unang siglo, may isa ka isyu nga ginbaisan sang madamo. “Ginpakadto [sang mga kauturan] si Pablo kag si Bernabe kag ang iban pa nga kauturan sa mga apostoles kag sa mga gulang nga  lalaki sa Jerusalem nahanungod sini nga pagbinaisay.” (Binu. 15:2) Pat-od nga ang kada isa may opinyon parte sa isyu kag sing ideya kon paano ini solbaron. Pero sang mapabutyag na sang kada isa ang ila ideya kag nakahimo na sing desisyon sa bulig sang balaan nga espiritu, wala na nila gin-insister ang ila mga opinyon. Sang nakalab-ot na ang desisyon sa mga kongregasyon, “nagkasadya sila tungod sa pagpalig-on” kag “padayon gid nga naglig-on sa pagtuo.” (Binu. 15:31; 16:4, 5) Sa karon, kon ang isa ka butang gintugyan na naton sa mga gulang, dapat kita magsalig nga atipanon nila ini sing nagakaigo.

14. Paano naton mapakita ang maayo nga espiritu sa pagpakig-angot sa iban?

¹⁴ Sa aton pagpakig-angot sa iban, madamo kita sing kahigayunan nga mapakita ang maayo nga espiritu. Ang kada isa sa aton makahimo sing maayo kon patawaron naton ang mga nakasaklaw sa aton. Ang Pulong sang Dios nagsiling: “Padayon nga batasa ninyo ang isa kag isa kag patawaron sing kinabubut-on ang isa kag isa kon may reklamo ang isa batok sa isa. Subong nga si Jehova nagpatawad sing kinabubut-on sa inyo, amo man ang himuon ninyo.” (Col. 3:13) Ang ekspresyon nga “kon may reklamo ang isa” nagapakita nga mahimo may rason kita nga maakig sa iban. Pero sa baylo nga mairitar dayon sa ginagmay nga mga sala kag tublagon ang kalinong sang kongregasyon, tinguhaan naton nga ilugon si Jehova, patawaron sing kinabubut-on ang iban, kag magpadayon sa pag-alagad sa Dios upod sa ila.

15. (a) Ano ang matun-an naton parte sa pagkamapinatawaron ni Job? (b) Paano ang pangamuyo makabulig sa aton nga mapakita ang maayo nga espiritu?

¹⁵ Parte sa pagpatawad, makatuon kita kay Job. Ang tatlo ka lalaki nga dapat kuntani maglugpay kay Job naghambal sing makapasakit sa iya. Pero mapinatawaron si Job. Paano? “Nagpangamuyo sia tungud sa iya mga abyan.” (Job 16:2; 42:10) Ang pagpangamuyo para sa iban mahimo magpabag-o sang aton pagtamod sa ila. Kon ipangamuyo naton ang tanan nga kauturan, mapauswag naton ang espiritu nga ginpakita ni Cristo. (Juan 13:34, 35) Dapat man naton ipangamuyo nga matigayon ang balaan nga espiritu. (Luc. 11:13) Ang espiritu sang Dios magabulig sa aton nga mapakita ang Cristiano nga mga kinaiya sa pagpakig-angot sa iban.—Basaha ang Galacia 5:22, 23.

16, 17. Ano nga espiritu ang determinado mo nga ipakita?

¹⁶ Makalilipay gid ang resulta kon tinguhaan sang kada isa nga makabulig sa maayo nga espiritu sa kongregasyon! Sa tapos mabinagbinag ini nga artikulo, mahimo maghunahuna kita kon ano pa ang aton mabulig para mag-uswag ang maayo nga espiritu. Kon amo, dapat naton usisaon ang aton kaugalingon base sa Pulong sang Dios. (Heb. 4:12) Si Pablo, nga nagatinguha gid nga mangin huwaran sa mga kongregasyon, nagsiling: “Wala ako sing nahibaluan nga bisan ano nga butang batok sa akon kaugalingon. Apang wala ako mapamatud-an nga matarong tungod sini, kundi sia nga nagausisa sa akon amo si Jehova.”—1 Cor. 4:4.

¹⁷ Samtang ginapanikasugan naton nga sundon ang kaalam gikan sa hitaas, nga ginalikawan ang sobra nga paghingamo sang posisyon, makabulig kita sa maayo nga espiritu sa kongregasyon. Kon mapinatawaron kita kag ginatamod sing positibo ang iban, makatigayon kita sing maayo nga kaangtanan sa aton mga masigkasumilimba. (Fil. 4:8) Samtang ginahimo naton ini, makasalig kita nga malipay si Jehova kag si Jesus sa ‘espiritu nga aton ginapakita.’ —Filem. 25.