1, 2. Ano ang mga kabudlayan sang madamo nga tawo subong, apang ano ang luyag sang mga alagad sang Dios?

NAGAKABUHI kita sa tion sang mga kabudlayan. Madamo sing mga kalamidad ang nagakatabo sa kalibutan. Ang mga linog, tsunami, sunog, baha, paglupok sang bulkan, buhawi, kag bagyo nagahalit sa mga tawo. Luwas sini, ang mga problema sa pamilya kag personal nga mga kabudlayan nagresulta sa kahadlok kag kasubo. Matuod gid nga ang “tion kag ang kahigayonan” nagakahanabo sa aton tanan.—Man. 9:11.

² Ang mga alagad sang Dios sa kabilugan nakabatas sa sini nga mga kabudlayan. Pero luyag naton nga mangin handa sa tanan nga kabudlayan nga magaabot samtang nagahilapit ang katapusan sini nga sistema. Paano naton maatubang ini nga mga kabudlayan? Ano ang makabulig sa aton para maatubang ini sing maisugon?

3. Suno sa Roma 15:4, paano kita malugpayan kon nagaatubang sing grabe nga mga kabudlayan?

³ Bisan pa ang mga kabudlayan nagaapektar sa mas madamo nga tawo karon, indi na ini bag-o sa katawhan. Binagbinagon naton ang aton matun-an sa pila ka alagad sang Dios sang una nga nagpakita sing kaisog.—Roma 15:4.

4. Ano nga mga kabudlayan ang ginbatas ni David, kag ano ang nakabulig sa iya?

⁴ Binagbinaga si David. Kinahanglan niya batason ang kaakig sang hari, pagsalakay sang mga kaaway, pagbihag sang iya mga asawa, pagtraidor sang iya abyan, kag pagbatyag sing kasubo. (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8) Ang mga rekord sang Biblia nagapakita nga nasakitan si David sa sini nga mga kabudlayan. Pero wala ini nagpaluya sa iya sa espirituwal. May bug-os sia nga pagtuo nga nagsiling: “Ang  GINOO amo ang kalig-onan sang akon kabuhi; sin-o bala ang kahangaw-an ko?”—Sal. 27:1; basaha ang Salmo 27:5, 10.

5. Ano ang nakabulig kanday Abraham kag Sara nga maatubang ang mga kabudlayan?

⁵ Sa halos bilog nila nga kabuhi, sanday Abraham kag Sara nag-istar sa mga tolda subong mga dumuluong sa iban nga lugar. Masami nga nakaeksperiensia sila sing mga kabudlayan. Pero malig-on nila nga ginbatas ang kahimtangan pareho sang tiggulutom kag mga katalagman sa mga pungsod sa palibot. (Gen. 12:10; 14:14-16) Paano nila ini nahimo? Nagasiling ang Pulong sang Dios nga “ginahulat [ni Abraham] ang siudad nga may matuod nga mga sadsaran, nga ang manunukod kag manugbuhat sini nga siudad amo ang Dios.” (Heb. 11:8-10) Sanday Abraham kag Sara nagkonsentrar sa mga butang sa unahan, nga wala gintugutan ang mga sitwasyon sa palibot nga magpaluya sa ila.

6. Paano naton mailog si Job?

⁶ Si Job nakaeksperiensia man sing grabe nga mga kabudlayan. Hunahunaa ang iya ginbatyag sang puro na lang malain ang nagakatabo sa iya. (Job 3:3, 11) Ang mas malain pa, wala niya mahangpan sing bug-os kon ngaa nagakatabo ini sa iya. Pero wala sia nangampo. Ginhuptan niya ang iya integridad kag pagtuo sa Dios. (Basaha ang Job 27:5.) Isa gid sia ka maayo nga halimbawa sa aton!

7. Ano ang mga naagyan ni Pablo sa iya pag-alagad sa Dios, apang ano ang nakahatag sa iya sing kaisog nga makapadayon?

⁷ Binagbinaga man ang halimbawa ni apostol Pablo. Naagyan niya ‘ang mga katalagman sa siudad, sa kahanayakan, kag sa dagat.’ Naeksperiensiahan man niya ang ‘gutom kag kauhaw, tugnaw kag kahubo.’ Suno sa iya, naagyan niya nga magpautaw-utaw sing ‘isa ka gab-i kag isa ka adlaw sa lawod,’ nga mahimo bangod sa pagkaguba sang sakayan. (2 Cor. 11:23-27) Bisan pa sini tanan, talupangda ang iya panimuot pagkatapos sang tion nga diutayan lang sia mapatay sa pag-alagad sa Dios: “Amo sini agod magsalig kami, indi sa amon kaugalingon, kundi sa Dios nga nagabanhaw sang mga patay. Gikan sa sining daku nga butang subong sang kamatayon ginluwas niya kami kag luwason niya kami.” (2 Cor. 1:8-10) Diutay lang ang nakaagi sang mga naagyan ni Pablo. Pero madamo sa aton ang makahangop sa iya nabatyagan kag makakuha sing lugpay sa iya kaisog.

8. Paano makaapektar sa aton ang mga problema subong? Iilustrar.

⁸ Sa karon nga lapnag ang kalamidad, problema, kag kabudlayan, madamo ang nagabatyag nga indi na nila ini masarangan. Bisan gani ang pila ka Cristiano nagabatyag sini. Si Lani * nagaalagad sing bug-os tion upod sa iya bana sa Australia. Sang nabal-an niya nga may breast cancer sia, daw ginkilatan sia. Nagsiling sia, “Grabe ang epekto sa akon sang mga pagbulong, kag pamatyag ko wala na ako sing pulos.” Isa pa, kinahanglan niya atipanon ang iya bana nga gin-operahan sa taludtod. Kon amo sini ang aton kahimtangan, ano ang aton himuon?

9, 10. (a) Ano ang indi naton dapat pagtugutan nga himuon ni Satanas? (b) Paano naton maatubang ang kamatuoran nga ginsiling sang Binuhatan 14:22?

⁹ Dapat naton dumdumon nga luyag ni Satanas nga paluyahon ang aton pagtuo paagi sa mga kabudlayan. Pero indi naton pagtugutan nga mapaluya niya kita sa sini nga paagi. Ang Hulubaton 24:10 nagsiling: “Kon mapunaw ka sa adlaw sang kapiotan, ang imo kusug diotay.” Ang pagpamalandong sa mga halimbawa sa Biblia, pareho sang ginbinagbinag kaina, makabulig sa aton nga maatubang sing maisugon ang mga kabudlayan.

¹⁰ Maayo man nga dumdumon nga indi naton madula ang tanan nga problema. Ang matuod, dapat naton ini paabuton. (2 Tim. 3:12) Ang Binuhatan 14:22 nagsiling: “Dapat kita magsulod sa ginharian sang Dios paagi  sa madamo nga kapipit-an.” Sa baylo nga tugutan ang mga problema nga magpaluya sa imo, ngaa indi mo ini pagtamdon subong kahigayunan para mapakita ang kaisog, kay nagatuo ka sa ikasarang sang Dios sa pagbulig sa imo?

11. Paano naton malikawan nga maluyahan bangod sa mga kabudlayan?

¹¹ Dapat kita magkonsentrar sa maayo nga mga butang sa aton kabuhi. Ang Pulong sang Dios nagasiling: “Ang tagiposoon nga masadya nagahimo sing malipayon nga nawung, apang sa kasubo sang tagiposoon ang espiritu naboong.” (Hulu. 15:13) Madugay na nga nahibaluan sang mga doktor nga ang pagkapositibo makapaayo. Madamo nga pasyente nga ginpainom sang sugar pills (ukon placebo) ang nag-ayoayo bangod nagapati sila nga makabulong ini sa ila. Pero kon ang pasyente ginhambalan nga ang ginpainom sa iya may malain nga epekto, nagalala pa gid ang iya balatian—ginatawag ini nga nocebo effect. Ginapakita sini nga ang pagpamensar pirme sang mga sitwasyon nga indi naton mabag-o mahimo magpaluya sa aton. Pero si Jehova wala nagahatag sa aton sing “sugar pills.” Sa baylo, bisan sa tion sang kalamidad, ginabuligan niya kita paagi sa pagpalig-on sang iya Pulong, pagsuporta sang mga kauturan, kag sa kusog gikan sa balaan nga espiritu. Ang pagpamensar sa sini nga mga butang makapabakod sa aton. Sa baylo nga pensaron pirme ang malain nga mga hitabo, himua ang praktikal nga pamaagi para maatubang ang problema kag magkonsentrar sa maayo nga mga butang sa imo kabuhi.—Hulu. 17:22.

12, 13. (a) Ano ang nakabulig sa mga alagad sang Dios nga mabatas ang mga kalamidad? Iilustrar. (b) Sa tion sang kalamidad, ano ang marealisar naton nga pinakaimportante sa aton kabuhi?

¹² Sining karon lang, may pila ka pungsod nga ginhalitan sang mga kalamidad. Madamo nga kauturan sini nga mga lugar ang nagbatas sa sini nga mga kahimtangan bisan pa nga indi ini mahapos. Sang 2010, bangod sa mabaskog nga linog kag tsunami sa Chile, nadulaan ang mga kauturan sing balay kag mga pagkabutang, pati na sing palangabuhian. Bisan pa sini, wala nila ginpabay-an ang ila espirituwalidad. Si Samuel, nga ang iya balay nawasak gid, nagsiling: “Bisan pa sini nga kahimtangan, wala kami nag-untat sang akon asawa sa pagtambong sa mga miting kag sa pagbantala. Nagapati ako nga nakabulig ini sa amon nga indi madulaan sing paglaum.” Sila kag ang iban pa nga kauturan wala nagpadala sa kalamidad kundi nagpadayon sa pag-alagad kay Jehova.

¹³ Sang Septiembre 2009, sobra 80 porsiento sang Manila ang ginbaha bangod sa mabunok nga ulan. Ang isa ka manggaranon nga tawo, nga halos nadulaan sang tanan nga pagkabutang, nagsiling, “Bangod sa baha, nangin palareho ang tanan, kay nabudlayan kag nag-antos ang mga imol kag manggaranon.” Ginapahanumdom sini sa aton ang maalamon nga laygay ni Jesus: “Magtipon kamo para sa inyo kaugalingon sang mga bahandi sa langit, diin wala sing sipit kag tuktok nga mang-ut-ot, kag diin wala sing mga kawatan nga mangrungkab kag mangawat.” (Mat. 6:20) Ang pag-una sa materyal nga mga butang, nga madasig lang madula, masami nagaresulta sa kalugaw-an. Mas maalamon nga unahon naton ang aton kaangtanan kay Jehova, nga indi gid madula ano man ang matabo sa aton palibot!—Basaha ang Hebreo 13:5, 6.

14. Ano ang mga rason kon ngaa dapat kita magpakita sing kaisog?

¹⁴ Nahibaluan ni Jesus nga may magaluntad nga mga problema sa tion sang iya presensia, pero nagsiling sia: “Indi kamo magkahadlok.” (Luc. 21:9) Sa bulig niya subong aton Hari kag ni Jehova subong Manunuga sang uniberso, may rason gid kita nga magsalig. Ginpalig-on ni Pablo si Timoteo: “Ginhatagan kita sang Dios indi sing  espiritu sang katalaw, kundi sang gahom kag sang gugma kag sang maligdong nga hunahuna.”—2 Tim. 1:7.

15. Paano ginpakita sang pila ka alagad sang Dios ang ila pagsalig sa Iya, kag paano naton mailog ang ila kaisog?

¹⁵ Talupangda ang mabakod nga pagsalig sang pila ka alagad sang Dios. Si David nagsiling: “Ang GINOO kusug nakon kag taming nakon; ang akon tagiposoon nagsalig sa iya, kag nabuligan ako; busa nagakasadya sing daku ang akon tagiposoon.” (Sal. 28:7) Ginpabutyag man ni Pablo ang iya malig-on nga pagsalig: “Sa tanan sini nga butang bug-os kita nga nagdaug paagi sa iya nga naghigugma sa aton.” (Roma 8:37) Sang malapit na lang sia patyon, ginpakita ni Jesus sa iya mga tagpalamati ang iya mabakod nga kaangtanan sa Dios, nga nagasiling: “Wala ako nagaisahanon, bangod ang Amay upod sa akon.” (Juan 16:32) Ano ang ginapakita sang ila ginsiling? Sila tanan may mabakod nga pagsalig kay Jehova. Kon ginatinguhaan man naton nga magbakod ang aton pagsalig sa Dios, makatigayon kita sing kaisog sa pag-atubang sa mga kabudlayan karon.—Basaha ang Salmo 46:1-3.

16. Ngaa importante nga tun-an naton ang Pulong sang Dios?

¹⁶ Ang kaisog sang isa ka Cristiano indi resulta sang pagsalig sa kaugalingon. Sa baylo, resulta ini sang aton pagkilala sa Dios kag pagsalig sa iya. Mahimo naton ini paagi sa pagtuon sa iya Pulong, ang Biblia. Ginpaathag sang isa ka sister nga may depresyon kon ano ang nakabulig sa iya, “Ginabasa ko sing sulitsulit ilabi na ang makapalugpay nga mga teksto.” Ginasunod bala naton ang panuytoy nga maghiwat sing regular nga pangpamilya nga pagsimba? Paagi sini, mailog naton ang panimuot sang salmista nga nagsiling: “Daw ano ang paghigugma ko sang imo kasogoan! Pamalandongan ko ini sa bug-os nga adlaw.”—Sal. 119:97.

17. (a) Ano ang makabulig sa aton para makapabilin nga maisugon? (b) Ano nga mga sugilanon sang kabuhi sa aton publikasyon ang nakabulig sa imo?

¹⁷ May ara man kita base sa Biblia nga mga publikasyon nga makapalig-on sang aton pagsalig kay Jehova. Nakabulig gid sa madamo nga kauturan ang mga sugilanon sang kabuhi sa aton mga magasin. Ang isa ka sister sa Asia nga may bipolar mood disorder nalipay sang nabasa niya ang sugilanon sang isa anay ka misyonero nga nagmadinalag-on sa pag-atubang sini nga balatian. Nagsulat sia, “Nakabulig ini sa akon nga mahangpan kon ano ang akon balatian kag makatigayon sing paglaum.”

18. Ngaa dapat kita mangamuyo pirme?

¹⁸ Ang pangamuyo makabulig man sa tanan nga sitwasyon. Ginpatalupangod ni  Pablo ang kapuslanan sang pangamuyo, nga nagasiling: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sang inyo tagipusuon kag sang inyo ikasarang sa paghunahuna paagi kay Cristo Jesus.” (Fil. 4:6, 7) Ginapanginpuslan bala naton ini nga bulig para makatigayon sing kusog kon may mga kabudlayan? Si Alex, isa ka utod sa Britanya nga madugay na nga may depresyon, nagsiling: “Ang pagpakighambal kay Jehova sa pangamuyo kag pagpamati sa iya paagi sa pagbasa sang Biblia nakabulig gid sa akon.”

19. Paano naton dapat tamdon ang aton mga miting?

¹⁹ Importante man ang pagtambong sa mga miting. Ang salmista nagsulat: “Ang akon kalag ginahidlaw, hoo, ginapunaw tungud sa mga luwang sang GINOO.” (Sal. 84:2) Amo man bala sini ang aton ginabatyag? Si Lani, nga ginsambit kaina, nagpaathag sang iya pagtamod sa aton pagtilipon: “Importante gid ang pagtambong sa mga miting. Kinahanglan ko nga magtambong kon gusto ko nga magpabulig kay Jehova.”

20. Paano makabulig sa aton ang pagbantala?

²⁰ Mangin maisugon man kita paagi sa aktibo nga pagbantala. (1 Tim. 4:16) Ang isa ka sister sa Australia nga madamo sing problema nagsiling: “Wala ko gid mapensaran nga kinahanglan ko magbantala, pero ginhagad ako sang isa ka gulang. Nag-upod ako. Ginbuligan gid ako ni Jehova; kada magbantala ako, nagabatyag ako sing kalipay.” (Hulu. 16:20) Nasapwan sang madamo nga kon ginabuligan nila ang iban nga magpakita sing pagtuo kay Jehova, nagabakod man ang ila pagtuo. Gani, indi na nila madumduman ang ila mga problema kag makakonsentrar sila sa mas importante nga mga butang.—Fil. 1:10, 11.

21. Ano ang aton masaligan kon may mga kabudlayan?

²¹ Si Jehova nagaaman sing bugana nga bulig para maatubang sing maisugon ang mga kabudlayan. Kon panginpuslan naton ining tanan nga aman kag kon pamalandungan kag ilugon naton ang maayo nga mga halimbawa sang maisog nga mga alagad sang Dios, makasalig kita nga maatubang naton sing madinalag-on ang mga kabudlayan. Bisan pa sang malain nga mga butang nga mahimo matabo samtang nagahilapit ang katapusan sini nga sistema, makasiling kita pareho kay Pablo: “Ginapukan kami, apang wala malaglag. . . . Wala kami nagapangampo.” (2 Cor. 4:9, 16) Sa bulig ni Jehova, maatubang naton sing maisugon ang mga kabudlayan subong.—Basaha ang 2 Corinto 4:17, 18.