Madumduman Mo Bala?
Nabasa mo bala sing maayo ang ulihi nga mga gua sang Ang Lalantawan? Kon amo, tilawi kon masabat mo ang masunod nga mga pamangkot:
Paano naton mapalong ang kalayo sang di-makontrol nga dila?
Dapat naton usisaon ang aton tagipusuon. Imbes nga duhaduhaan ang aton utod, dapat naton binagbinagon kon ngaa amo sini ang aton pagtamod sa iya. Ginapakanubo bala naton sia para paguaon nga mas maayo kita sangsa iya? Isa pa, ang pagpakalain sa iya magapadabdab lang sang sitwasyon.—8/15, pahina 21.
Paano ginpakita sang Kasuguan ang pagtamod sang Dios sa mga babayi?
Ang Israelinhon nga mga babayi nakatigayon sing daku nga kahilwayan kag edukasyon. Ginapadunggan sila, ginatahod, kag may kinamatarong nga amligan.—9/1, pahina 5-7.
Samtang nagahilapit ang adlaw ni Jehova, ano nga mga hitabo ang magaabot?
Ang “Paghidait kag kalig-unan!” ipahayag. Salakayon kag laglagon sang mga pungsod ang Babilonia nga Daku. Salakayon ang katawhan sang Dios. Mahanabo ang inaway sa Armagedon, kag dayon itagbong si Satanas kag ang iya mga demonyo sa kadadalman.—9/15, pahina 4.
Paano kita makabenepisyo bangod wala naton nahibaluan kon san-o maabot ang katapusan?
Ang kamatuoran nga wala naton nahibaluan ang adlaw ukon oras makabulig sa aton nga mapakita kon ano gid ang ara sa aton tagipusuon. Nagahatag ini sa aton sing kahigayunan nga mapahalipay ang Dios. Nagapalig-on ini sa aton nga magsakripisyo kag magsalig sing bug-os sa Dios kag sa iya Pulong. Makabulig man ini sa aton nga makatuon sa mga kabudlayan kag mapabakod ang aton pagtuo.—9/15, pahina 24-25.
Paano naton magamit ang Genesis 3:19 sa pagpangatarungan sa isa nga nagapati sa kalayuon nga impierno?
Ang teksto nagasiling nga sang napatay si Adan nagbalik sia sa yab-ok sang duta, imbes nga nagkadto sa kalayuhon nga impierno.—10/1, pahina 13.
Sin-o ang ginarepresentar sang “pito ka bituon” sa tuo nga kamot ni Jesus suno sa Bugna 1:16, 20?
Nagarepresentar ini sa hinaplas nga mga manugtatap sa mga kongregasyon, kag maaplikar man sa tanan nga manugtatap.—10/15, pahina 14.
Paano solbaron sang pamilya ang ila problema sa utang?
Ang mag-asawa dapat mag-istoryahanay sing tampad kag matawhay parte sa ila utang. Makabulig kon hibaluon nila ang ila badyet subong. Madugangan bala nila ang ila kita ukon malimitahan ang ila gasto? Dapat sila magdesisyon kon paano pasunuron ang pagbayad sa ila mga utang, ayhan istoryahon ang ila nautangan kon san-o ini bayaran. Pero dapat sila mangin realistiko kon nagabadyet kag tamdon sing husto ang kuarta. (1 Tim. 6:8)—11/1, pahina 19-21.
Paano ginpakita ni Jesus ang pagkamapainubuson nga ginsiling sa Isaias 50:4, 5?
Ini nga mga teksto nagasiling nga ang isa nga may “dila sang mga ginaton-an” indi “mag-isul.” Si Jesus nangin mapainubuson kag namati gid sa ginatudlo sang iya Amay sa iya. Nalangkag gid si Jesus nga magtuon kay Jehova, nga nakakita sang pagkamapainubuson sang Dios paagi sa pagkaluoy sa makasasala nga mga tawo.—11/15, pahina 11.
Paano ang isa ka handumanan nga selyo sa Estonia nagapamatuod sang integridad sang mga Saksi ni Jehova?
Sang 2007, ang National Post Office nagpagua sing isa ka selyo nga nagadumdom sa pagpapas ni Stalin sa mga taga-Estonia. Ang numero nga 382 sa selyo nagapatuhoy sa kadamuon sang mga Saksi kag sang ila kabataan nga gintapok sang 1951 sa mga kampo sa Rusya.—12/1, pahina 27-28.
