1, 2. Sin-o ang ginpatuhuyan ni Pedro sang ginsambit niya ang “mga pinili,” kag ngaa gintawag niya sila nga “umalagi nga mga pumuluyo”?

MGA 30 ka tuig pagkatapos nagkayab si Jesus sa langit, si apostol Pedro naghimo sing sulat “para sa umalagi nga mga pumuluyo nga nagalinapta sa Ponto, Galacia, Capadocia, Asia, kag Bitinia, sa mga pinili.” (1 Ped. 1:1) Ang ginsambit ni Pedro nga “mga pinili” nagapatuhoy sa mga hinaplas sang balaan nga espiritu pareho sa iya, nga ginhatagan sing “bag-o nga pagkabun-ag pakadto sa isa ka buhi nga paglaum” nga maggahom kaupod ni Cristo sa langit. (Basaha ang 1 Pedro 1:3, 4.) Pero ngaa gintawag niya sang ulihi ini nga mga pinili nga “mga dumuluong kag umalagi nga mga pumuluyo”? (1 Ped. 2:11) Kag ano ang kahulugan sini para sa aton kay mga 1 lamang sa 650 ka aktibo nga Saksi sa bilog nga kalibutan ang pinili nga hinaplas?

² Nagakaigo nga tawgon nga “umalagi nga mga pumuluyo” ang mga hinaplas sang unang siglo. Pareho sa mga nagkalabilin sa sini nga grupo karon, indi man sila permanente diri sa duta. Si apostol Pablo nga miembro sang “diutay nga panong,” nagpaathag: “Tuhoy sa aton, ang aton pagkabanwahanon didto sa langit, kag malangkagon nga ginahulat naton ang isa ka manluluwas gikan sa amo man nga duog, nga amo si Ginuong Jesucristo.” (Luc. 12:32; Fil. 3:20) Bangod ang ila “pagkabanwahanon didto sa langit,” ang mga hinaplas magabiya sa duta kon mapatay sila para sa butang nga mas maayo, ang imortal nga kabuhi sa langit. (Basaha ang Filipos 1:21-23.) Gani sa literal nga paagi, matawag sila nga “umalagi nga mga pumuluyo” sang kalibutan nga ginakontrol ni Satanas.

3. Ano nga pamangkot ang nagautwas parte sa “iban nga mga karnero”?

³ Kamusta naman ang “iban nga mga karnero”? (Juan  10:16) Indi bala nga may paglaum sila base sa Kasulatan nga mangin permanente nga pumuluyo sang duta? Amo ini ang ila mangin puluy-an tubtob sa walay katubtuban! Pero, makabig man sila karon nga umalagi nga mga pumuluyo. Sa ano nga kahulugan?

4. Ano ang indi masarangan solbaron sang mga lider sang kalibutan?

⁴ Samtang nagaluntad ang malaut nga sistema ni Satanas, ang tanan, lakip ang mga Cristiano, padayon nga nagaantos sa resulta sang pagrebelde ni Satanas kay Jehova. Ang Roma 8:22 nagasiling: “Nahibaluan naton nga ang tanan nga tinuga padayon nga nagaugayong sing tingob kag ginasakitan sing tingob tubtob karon.” Bisan pa sinsero ang mga lider sa kalibutan, mga sientipiko, kag mabinuligon nga mga tawo, indi nila ini masarangan nga solbaron.

5. Sugod sang 1914, ano ang ginhimo sang minilyon, kag ngaa?

⁵ Sugod sang 1914, minilyon ang nagdesisyon nga mangin sakop sang gintangdo nga Hari sang Dios, si Jesucristo. Wala sila sing handum nga mangin bahin sang kalibutan ni Satanas, kag ginalikawan nila nga sakdagon ini. Sa baylo, ginagamit nila ang ila kabuhi kag mga pagkabutang para sakdagon ang Ginharian sang Dios kag ang mga intereses sini.—Roma 14:7, 8.

6. Sa ano nga kahulugan matawag nga mga dumuluong ang mga Saksi ni Jehova?

⁶ Huo, ang mga Saksi ni Jehova sa sobra 200 ka pungsod nagasunod sa kasuguan sa ila lugar, pero bisan diin man sila nagaistar, kaangay sila sang mga dumuluong. Nagapabilin sila nga neutral sa mga sinuay sa pulitika kag sa ila palibot. Bisan karon, ginakabig nila ang ila kaugalingon nga banwahanon sang bag-ong kalibutan, nga pagahimuon sang Dios. Nalipay sila nga mahibaluan nga malapit na lang matapos ang ila pag-istar sa sining di-himpit nga kalibutan subong umalagi nga mga pumuluyo.

7. Sa diin mangin permanente nga mga pumuluyo ang mga alagad sang Dios, kag paano?

⁷ Sa indi madugay, laglagon ni Cristo ang malaut nga kalibutan ni Satanas. Dulaon sang iya himpit nga gobierno ang sala kag kasubo sa duta, lakip na ang makita kag indi  makita nga mga inagihan sang pagrebelde sa matarong nga pagkasoberano ni Jehova. Ang matutom nga mga alagad sang Dios may kinamatarong na nga mangin permanente nga mga pumuluyo sa Paraiso nga duta. (Basaha ang Bugna 21:1-5.) Sina nga tion, ang mga tinuga bug-os nga “pagahilwayon . . . gikan sa pagkaulipon sa pagkamadinulunton kag maagom [nila] ang mahimayaon nga kahilwayan sang mga anak sang Dios.”—Roma 8:21.

8, 9. Ipaathag kon ano ang buot silingon ni Pedro nga “maglikaw sa undanon nga mga kailigbon.”

⁸ Si Pedro nagpaathag kon ano ang ginapaabot sa mga Cristiano. Nagsiling sia: “Mga hinigugma, ginalaygayan ko kamo subong mga dumuluong kag umalagi nga mga pumuluyo nga padayon kamo nga maglikaw sa undanon nga mga kailigbon, nga amo gid ang nagapakigsumpong sa kalag.” (1 Ped. 2:11) Ini nga laygay una nga ginpatuhoy sa mga hinaplas, pero maaplikar man sa iban nga mga karnero ni Jesus.

⁹ Indi sala ang pila ka handum kon busgon ini suno sa katuyuan sang Manunuga. Nagadugang ini sing kalipay sa kabuhi. Halimbawa, normal lang nga maghandum sang manamit nga pagkaon kag ilimnon, makigbahin sa makapaumpaw nga mga buluhaton, kag magkalipay sa maayo nga pag-inupdanay. Bisan gani ang paghandum sing seksuwal nga kalipay upod sa tiayon indi malain kag may nagakaigo nga tion. (1 Cor. 7:3-5) Pero si Pedro nagsiling nga may limitasyon ang “undanon nga mga kailigbon” sang naghambal sia parte sa mga “nagapakigsumpong sa kalag.” Para mangin maathag ang iya buot silingon, ang pila ka bersion sang Biblia nagasiling sing “lawasnon nga mga kailigbon” (Maayong Balita nga Biblia) ukon “mga kailigbon sang makasasala nga kinaugali” (BKK). Maathag nga dapat pirme bantayan ang tanan nga handum sang tawo nga supak sa katuyuan ni Jehova kag makahalit sa iya maayo nga kaangtanan sa Dios. Kay kon indi, mahimo mabutang sa katalagman ang paglaum sang isa ka Cristiano nga maluwas ang iya kalag.

10. Ano ang pila ka pamaagi ni Satanas para maganyat ang mga Cristiano nga mangin bahin sang iya kalibutan?

¹⁰ Ang katuyuan ni Satanas amo nga paluyahon ang determinasyon sang matuod nga mga Cristiano nga magpabilin subong “umalagi nga mga pumuluyo” sining sistema. Ang gahom sang materyalismo, tentasyon sang imoralidad, ganyat nga mangin prominente, “ako anay” nga panimuot, kag ang gugma sa pungsod—mga siod tanan ni Satanas kag kinahanglan kita mag-andam sa sini. Paagi sa aton determinasyon nga isikway ining malain nga mga handum sang unod, ginapakita naton nga indi naton gusto mangin bahin sang malaut nga kalibutan ni Satanas. Ginapamatud-an naton nga temporaryo lang ang aton pagkabuhi diri. Ang ginahandum gid naton kag ginatinguhaan amo ang permanente nga pagpuyo sa matarong nga bag-ong kalibutan sang Dios.

11, 12. Paano kon kaisa ginatamod ang mga dumuluong, kag ano ang masiling sa mga Saksi ni Jehova?

¹¹ Si Pedro nagpaathag pa gid kon ano ang ginapaabot sa mga Cristiano subong “umalagi nga mga pumuluyo.” Sia nagsiling sa bersikulo 12: “Hupti nga maayo ang inyo paggawi sa tunga sang mga pungsod, agod bisan nagahambal sila batok sa inyo nga malauton kamo, himayaon nila ang Dios sa adlaw sang iya pag-usisa bangod sang inyo maayong mga buhat nga nasaksihan mismo nila.” Ang mga dumuluong, nga umalagi nga mga pumuluyo sa iban nga pungsod, ginapakalain kon kaisa. Bangod lain sila sa ila mga kaingod, ginakabig sila kon kaisa nga malaut. Mahimo tuhay ang ila hilikuton,  panghambal, pamayo, kag bisan ang ila hitsura. Pero kon nagahimo sila sing maayo, buot silingon, kon ang ila paggawi maayo, ang malain nga mga komento parte sa ila mapamatud-an nga wala sing basihan.

¹² Pareho man sini ang matuod nga mga Cristiano. Tuhay sila sa ila mga isigkatawo sa pila ka bahin, pareho sa ila panghambal ukon ginapili nga kalingawan. Ang ila pamayo kag pamustura masami nga nagapatuhay sa ila sa kalabanan sa komunidad. Kon kaisa, amo ini ang rason kon ngaa ang mga wala makakilala sa ila nagasumbong sa ila nga malauton. Pero ang iban nga tawo mahimo magdayaw sa ila maayo nga pagkabuhi.

13, 14. Paano “ang kaalam ginapamatud-an nga matarong paagi sa mga buhat sini”? Iilustrar.

¹³ Huo, ang maayo nga paggawi makabulig para mapamatud-an nga sala ang mga nagapakalain. Bisan si Jesus, ang lamang nga tawo nga may himpit nga katutom sa Dios, ginsumbong man. Gintawag sia sang iban subong “tawo nga hakugan kag palainom sing alak, abyan sang mga manugsukot sing buhis kag sang mga makasasala.” Pero ang iya maalamon nga pag-alagad sa Dios nagpamatuod nga sala ang mga panumbungon sa iya. “Ang kaalam ginapamatud-an nga matarong paagi sa mga buhat sini,” siling ni Jesus. (Mat. 11:19) Amo man sini sa karon. Halimbawa, ang mga kauturan nga nagaalagad sa Bethel sa Selters, Germany ginatamod sing negatibo sang ila mga kaingod. Pero ang meyor sang ila lugar nagsiling para sa mga Saksi: “Ang mga Saksi nga nagaalagad didto may kaugalingon nga pamaagi sang pagkabuhi, pero wala ini nagatublag sa iban sa komunidad.”

¹⁴ Amo man sini ang konklusion sining karon lang sa mga Saksi ni Jehova sa Moscow, Rusya. Gin-akusahan sila sing pila ka sayop nga mga buhat. Dayon sang Hunyo 2010, ang European Court of Human Rights sa Strasbourg, Pransia nagdesisyon: “Nasapwan sang Korte nga ang pagpasilabot [sang Moscow] sa kahilwayan sa relihion kag pagtilipon sang mga aplikante indi makatarunganon. Ang mga korte [sa Moscow] wala nagpakita sing ‘importante kag bastante’ nga mga pamatuod nga ang grupo sang mga aplikante” nakasala, halimbawa sa pagbungkag sang pamilya, pagpalig-on sa paghikog, ukon pagpangindi sa pagpabulong. Gani napamatud-an nga “ginpasobrahan sang mga korte [sa Moscow] ang ila pamatbat bangod indi mapasibuon ang ila kasuguan kag wala nila ginpatuman kon ano ang yara sa kasuguan.”

15. Ano nga prinsipio sa Biblia ang ginasunod sang matuod nga mga Cristiano sa bilog nga kalibutan?

¹⁵ Ang mga Saksi ni Jehova sa Moscow kag sa bilog nga kalibutan nagasunod sang isa pa ka sugo sa mga Cristiano nga ginsiling ni Pedro. Sia nagsulat:  “Tungod sa Ginuo magpasakop kamo sa tagsa ka butang nga ginhimo sang tawo: sa hari man subong mas mataas ukon sa mga gobernador.” (1 Ped. 2:13, 14) Bisan pa indi bahin sang malaut nga kalibutan, ang matuod nga mga Cristiano kinabubut-on nga nagapasakop sa gobierno “sa ila relatibo nga mga posisyon,” subong sang ginsugo ni Pablo.—Basaha ang Roma 13:1, 5-7.

16, 17. (a) Ano ang mga pamatuod nga indi kita batok sa gobierno? (b) Ano ang ginbaton sang pila ka pulitiko?

¹⁶ Ang paggawi sang mga Saksi ni Jehova subong “umalagi nga mga pumuluyo” sining sistema, nagakahulugan nga wala sila nagaentra sa mga protesta. Wala man sila nagapamatok ukon nagapasilabot sa desisyon sang iban parte sa pulitika ukon katilingban. Indi pareho sa iban nga relihion, ang mga Saksi ni Jehova wala nagaentra sa pulitika. Wala nila ginaimpluwensiahan ang mga awtoridad sa pagpatuman sang mga pagsulundan. Wala gid sing basihan ang pagpati nga gusto nila tublagon ang kahim-ong sa palibot ukon gub-on ang gobierno!

¹⁷ Paagi sa pagtuman sa mga opisyal suno sa laygay ni Pedro nga ‘padunggan ang hari,’ ginatahod kag ginapadunggan sang mga Cristiano ini nga mga opisyal. (1 Ped. 2:17) Kon kaisa, ginabaton sang mga opisyal nga wala sila sing rason nga makulbaan sa mga Saksi ni Jehova. Halimbawa, ang German nga pulitiko nga si Steffen Reiche, nga gabinete anay sa estado sang Brandenburg kag sang ulihi nangin miembro sang parlamento sang Germany, nagsiling: “Ang paggawi sang mga Saksi ni Jehova sa mga kampo kag mga prisuhan nagapakita sang mga panimuot nga importante karon pareho sang una para magluntad ang isa ka demokratiko nga estado: nga amo, ang ila panindugan batok sa SS kag ang ila kaluoy sa pareho nga mga priso. Bangod nagalala ang kapintas sa mga dumuluong kag sa mga [tawo nga] may lain nga ideolohiya kag pagtamod sa pulitika, ini nga mga kinaiya importante gid sa mga pumuluyo sang aton pungsod.”

18. (a) Ngaa normal lang sa aton nga higugmaon ang bug-os nga paghiliutod? (b) Ano ang natalupangdan sang pila nga indi Saksi?

¹⁸ Si apostol Pedro nagsulat: “Higugmaa ang bug-os nga paghiliutod, kahadluki ang Dios.” (1 Ped. 2:17) Ang mga Saksi ni Jehova nahadlok nga indi mapahamut-an ang Dios, kag amo ini ang isa pa ka rason kon ngaa ginahimo nila ang iya kabubut-on. Malipayon sila sa pag-alagad kay Jehova subong bahin sang bug-os kalibutan nga paghiliutod kag may pareho sila nga handum. Gani normal lang sa ila nga ‘higugmaon ang bug-os nga paghiliutod.’ Ining utudnon nga guma, nga talagsa lang karon sa maiyaiyahon nga katilingban, nagapakibot gid sa mga indi Saksi. Halimbawa, ang isa ka tour guide nga nagatrabaho sa isa ka American travel agency nagdayaw sa gugma kag suporta sang mga Saksi sa dumuluong nga mga delegado sang 2009 nga internasyonal nga kombension sa Germany. Nagsiling sia nga sa bilog niya nga kabuhi subong tour guide, wala pa sia sing nakita nga pareho sini. Sang ulihi, isa sa mga Saksi ang nagsiling: “May pagdayaw kag kapagsik sa iya tingog samtang ginapabutyag niya ang tanan parte sa aton.” Sa kombension nga imo natambungan, may nabatian ka bala nga pareho sini nga reaksion sang mga tawo nga nakaobserbar sa mga Saksi?

19. Ano dapat ang aton determinasyon, kag ngaa?

¹⁹ Ang mga ginsambit kaina kag ang iban pa nagapakita nga ang mga Saksi ni Jehova “umalagi nga mga pumuluyo” sa sining sistema ni Satanas. Kag determinado sila nga huptan ini nga panindugan. May mabakod kag malig-on sila nga paglaum nga sa indi madugay mangin permanente sila nga mga pumuluyo sang matarong nga bag-ong kalibutan sang Dios. Nalangkag ka bala nga nagahulat sa sini?