1. Ano ang pagtamod sang kalabanan sa pagkaindependiente?

MGA 2,500 ka tuig ang nagligad, ang Griego nga manunulat nagsiling: “Wala sing gusto magpas-an sang gota sang pagkaulipon.” Madamo karon ang nagaugyon sa sini. Kon magsiling kita ulipon, mahunahuna naton ang mga tawo nga ginapigos kag ginakadenahan, nga ginapatrabaho indi para sa ila kaugalingon kundi para sa kaayuhan sang nagadominar sa ila.

2, 3. (a) Ano ang natigayon sang mga ulipon ukon alagad ni Cristo? (b) Ano nga mga pamangkot parte sa pagkatulugyanan ang aton binagbinagon?

² Ginpakita ni Jesus nga ang iya mga disipulo mangin mapainubuson nga mga alagad ukon ulipon. Pero, ang pagkaulipon sang matuod nga mga Cristiano wala nagapakanubo kag indi mapiguson. Ini nga mga ulipon nakatigayon sing kadungganan, pagsalig, kag pagtahod. Halimbawa, binagbinaga ang ginsiling ni Jesus parte sa isa ka “ulipon” antes Sia napatay. Gintagna ni Cristo nga magatangdo sia sing mga hilikuton sa “matutom kag mainandamon nga ulipon.”—Mat. 24:45-47.

³ Talalupangdon nga sa kaanggid sini nga rekord, ini nga ulipon gintawag nga “tulugyanan.” (Basaha ang Lucas 12:42-44.) Ang kalabanan sa matutom nga Cristiano karon indi miembro sining matutom nga tulugyanan. Pero, ginapakita sang Kasulatan nga ang tanan nga nagaalagad sa Dios mangin tulugyanan. Ano ang ila mga responsibilidad? Paano sila dapat tamdon? Para mahibaluan ini, usisaon naton ang papel sang mga tulugyanan sang una.

4, 5. Ano ang mga responsibilidad sang mga tulugyanan sang una? Maghatag sing mga halimbawa.

⁴ Sang una, ang tulugyanan masami nga isa ka masaligan nga ulipon nga naasayn sa pagdumala sa panimalay  ukon negosyo sang iya agalon. Medyo mataas ang iya awtoridad kag ginasaligan sa pag-atipan sa mga pagkabutang, kuarta, kag iban nga alagad sa sulod sang panimalay. Ang halimbawa sini amo si Eliezer, nga ginsaligan sa pag-atipan sa madamo nga pagkabutang ni Abraham. Mahimo nga sia ang ginpadala ni Abraham sa Mesopotamia para magpili sang mapangasawa sang iya anak nga si Isaac. Importante kag mabug-at gid ini nga asaynment!—Gen. 13:2; 15:2; 24:2-4.

⁵ Ang apo sa tuhod ni Abraham nga si Jose amo ang nagadumala sa panimalay ni Potifar. (Gen. 39:1, 2) Sang ulihi, nakatigayon si Jose sing kaugalingon nga alagad, nga nangin “tulugyanan sang [iya] balay.” Ina nga tulugyanan amo ang nag-amuma sa napulo ka utod ni Jose. Sa sugo ni Jose, ang iya tulugyanan amo ang nagmaniobra sang mga butang parte sa “ginkawat” nga tagayan nga pilak. Ginapakita sini nga ang mga tulugyanan ginasaligan gid.—Gen. 43:19-25; 44:1-12.

6. Ano ang gintugyan sa mga gulang?

⁶ Pagligad sang mga siglo, si apostol Pablo nagsulat nga ang Cristianong mga manugtatap mangin “tulugyanan sang Dios.” (Tito 1:7) Bangod gintangdo sila nga magbantay sa “panong sang Dios,” ang mga manugtatap nagagiya kag nagadumala sa kongregasyon. (1 Ped. 5:1, 2) Matuod, lainlain ang ila responsibilidad. Halimbawa, kalabanan sang manugtatap karon nagaalagad sa isa ka kongregasyon. Ang mga nagalakbay nga manugtatap nagaalagad sa madamo nga kongregasyon. Ang mga miembro sang Komite sang Sanga nagaatipan sa tanan nga kongregasyon sa bilog nga pungsod. Pero tanan sila kinahanglan mangin matutom sa pagtuman sang ila mga hilikuton, kay sila tanan “manabat” sa Dios.—Heb. 13:17.

7. Ngaa masiling nga ang tanan nga Cristiano mga tulugyanan?

⁷ Apang kamusta ang matutom nga mga Cristiano nga indi mga manugtatap? Si apostol Pedro nagsulat sa tanan nga Cristiano: “Suno sa dulot nga nabaton sang tagsatagsa, gamita ini sa pag-alagad sa isa kag isa subong maayong mga tulugyanan sang wala tupong nga kaayo sang Dios nga ginpakita sa nanuhaytuhay nga paagi.” (1 Ped. 1:1; 4:10) Bangod sa kaayo sang Dios, ginhatagan niya kita sing mga dulot, ikasarang, abilidad, ukon talento nga magamit naton sa pagbulig sa aton pareho nga tumuluo. Ang tanan nga nagaalagad sa Dios mga tulugyanan, nga ginapadunggan, ginasaligan, kag ginahatagan sing responsibilidad.

8. Ano ang isa ka importante nga prinsipio nga dapat naton dumdumon?

⁸ Talupangdon naton karon ang tatlo ka prinsipio nga dapat naton binagbinagon subong mga tulugyanan. Una: Tanan kita iya sang Dios kag manabat sa iya. Si Pablo nagsulat: “Indi na kamo natungod sa inyo kaugalingon, kay ginbakal kamo sa daku nga bili,” ang ginhalad nga dugo sang Cristo. (1 Cor. 6:19, 20) Bangod iya na kita ni Jehova, obligado kita nga tumanon ang iya mga sugo, kag indi ini mabug-at. (Roma 14:8; 1 Juan 5:3) Nangin mga ulipon man kita sang Cristo. Kaangay sang mga tulugyanan sang una, ginhatagan kita sing daku nga kahilwayan—pero may limitasyon ini. Dapat naton tumanon ang aton mga responsibilidad suno sa ginsugo sa aton. Ano man ang aton pribilehiyo sa pag-alagad, mga ulipon gihapon kita sang Dios kag sang Cristo.

9. Paano gin-ilustrar ni Jesus ang kaangtanan sang agalon kag ulipon?

⁹ Ginabuligan kita ni Jesus nga mahangpan ang kaangtanan sang agalon kag ulipon. Isa ka bes, ginsilingan niya ang iya mga disipulo nga may isa ka ulipon nga nagpauli halin sa bug-os nga adlaw nga pagtrabaho. Silingan bala sia sang agalon: “Palapit diri gilayon kag magsaliay sa lamesa”? Indi. Sa baylo masiling sia: “Handai ako sang panihapon,  kag magpangwagkus ka kag mag-alagad sa akon tubtob nga makakaon ako kag makainom, kag pagkatapos sini makakaon ka na kag makainom.” Ano ang aplikasyon sa sini nga ilustrasyon? Si Jesus nagsiling: “Gani, kamo man, kon nahimo na ninyo ang tanan nga butang nga gintangdo sa inyo, magsiling kamo, ‘Mga ulipon kami nga wala sing pulos. Ginhimo lamang namon ang dapat namon himuon.’”—Luc. 17:7-10.

10. Ano ang nagapakita nga ginaapresyar ni Jehova ang aton mga panikasog sa pag-alagad sa iya?

¹⁰ Ginaapresyar gid ni Jehova ang aton mga panikasog sa pag-alagad sa iya. Ang Biblia nagapasalig sa aton: “Ang Dios indi di-matarong nga kalimtan ang inyo binuhatan kag ang gugma nga ginpakita ninyo para sa iya ngalan.” (Heb. 6:10) Makatarunganon pirme si Jehova sa iya mga ginapangabay sa aton. Isa pa, para ini sa aton kaayuhan kag indi mabug-at. Pero suno sa parabola ni Jesus, ang ulipon wala nagpatawhay, ukon nag-una sang iya kaugalingon. Ang punto amo: Sang nagdedikar kita sa Dios, nagdesisyon kita nga unahon sia sa aton kabuhi. Nagaugyon ka bala sa sini?

11, 12. Subong mga tulugyanan, ano nga kinaiya ang dapat naton ipakita, kag ano ang dapat likawan?

¹¹ Ikaduha: Subong mga tulugyanan, pareho nga mga talaksan ang aton ginasunod. Matuod, may mga responsibilidad nga gin-asayn sa pila lang ka indibiduwal sa kongregasyon. Pero ang kalabanan nga responsibilidad kinahanglan himuon sang tanan. Halimbawa, subong mga disipulo sang Cristo kag mga Saksi ni Jehova, ginsugo kita nga maghigugmaanay. Si Jesus nagsiling nga ang gugma amo ang tanda sang matuod nga mga Cristiano. (Juan 13:35) Apang indi lamang mga kauturan ang aton higugmaon. Ginapalig-on kita nga higugmaon man ang indi pareho sa aton sing pagtuo. Masarangan naton ini himuon, kag dapat naton himuon.

¹² Ginapatuman man sa aton ang maayo nga paggawi. Ginalikawan naton ang paggawi kag pagkabuhi nga ginapakamalaut sang Pulong sang Dios. Si Pablo nagsulat: “Wala sing mga makihilawason, ukon mga nagasimba sa mga idolo, ukon mga makihilahion, ukon mga lalaki nga ginahuptan para sa di-kinaugali nga mga katuyuan, ukon mga lalaki nga nagahulid sa mga lalaki, ukon mga kawatan, ukon makagod nga mga tawo, ukon mga palahubog, ukon mga nagatamay sa iban, ukon mga manugkilkil nga makapanubli sang ginharian sang Dios.” (1 Cor. 6:9, 10) Matuod, kinahanglan ang panikasog para masunod ang matarong nga mga talaksan sang Dios. Pero nagakaigo gid ini panikasugan kay makabaton kita sing mga benepisyo. Lakip sa sini ang pagkabuhi nga nagaresulta sa ikaayong lawas, maayo nga kaangtanan sa iban, kag kahamuot sang Dios.—Basaha ang Isaias 48:17, 18.

13, 14. Ano nga responsibilidad ang ginhatag sa tanan nga Cristiano, kag paano naton ini dapat tamdon?

¹³ Dumduma man nga madamo sing hilikuton ang tulugyanan. Amo man kita. Ginhatagan kita sing hamili nga dulot—ang ihibalo sa kamatuoran. Ginapaabot sang Dios nga ipaambit naton ini sa iban. (Mat. 28:19, 20) Si Pablo nagsulat: “Kabigon kuntani kami sang tawo subong mga sakop ni Cristo kag mga tulugyanan sang sagrado nga mga likom sang Dios.” (1 Cor. 4:1) Nahibaluan ni Pablo nga kinahanglan mahalungon nga atipanon sang mga tulugyanan ang “sagrado nga mga likom” kag matutom nga ipaambit ini sa iban suno sa sugo sang Agalon, nga si Jesucristo.—1 Cor. 9:16.

¹⁴ Ang pagpaambit sang kamatuoran pagpakita gid sing gugma. Siempre, lainlain ang kahimtangan sang kada Cristiano. Indi pareho ang ila mahimo sa ministeryo. Nahangpan ini ni Jehova. Ang importante amo nga ginahimo naton ang aton bug-os nga masarangan. Paagi sini, ginapakita naton ang indi  makagod nga gugma sa Dios kag sa aton isigkatawo.

15-17. (a) Ngaa importante nga mangin matutom ang tulugyanan? (b) Paano gin-ilustrar ni Jesus ang malain nga resulta kon ang isa indi matutom?

¹⁵ Ang ikatlo naangot sa duha nga ginsambit: Dapat kita mangin matutom kag masaligan. Ang tulugyanan mahimo may maayo nga mga kinaiya kag ikasarang, pero mangin wala ini sing pulos kon iresponsable sia ukon indi matutom sa iya agalon. Importante ang katutom para mangin epektibo kag madinalag-on nga tulugyanan. Dumduma nga nagsulat si Pablo: “Ang ginapangita sa mga tulugyanan amo nga sila masapwan nga matutom.”—1 Cor. 4:2.

¹⁶ Kon matutom kita, pat-od nga padyaan kita, kay kon indi, magaantos kita sing kadulaan. Makita naton ini sa ilustrasyon ni Jesus parte sa mga talanton. Ang matutom nga ulipon nga “nagpatikang” sa kuarta sang agalon ginhatagan sing komendasyon kag ginpakamaayo gid. Ang ulipon nga iresponsable sa gintugyan sang agalon ginhukman nga “malaut,” “uyaya,” kag “wala sing pulos.” Ginkuha ang talanton nga ginhatag sa iya, kag ginhaboy sia sa gua.—Basaha ang Mateo 25:14-18, 23, 26, 28-30.

¹⁷ Sa isa pa ka sitwasyon, ginpatalupangod ni Jesus ang indi maayo nga resulta kon ang isa indi matutom. Sia nagsiling: “May isa ka tawo nga manggaranon kag may yara sia tulugyanan, kag ginsumbong sa iya nga ini nga tulugyanan nagausik sang iya mga pagkabutang. Gani gintawag niya sia kag nagsiling sa iya, ‘Ano ining nabatian ko nahanungod sa imo? Ihatag ang husay sang imo pagkatulugyanan, kay indi ka na makadumala sa balay.’” (Luc. 16:1, 2) Bangod gin-uyangan sang tulugyanan ang pagkabutang sang iya agalon, ginpahalin sia sang agalon. May leksion gid kita nga matun-an sa sini!  Dapat kita mangin matutom sa kon ano ang ginapangabay sa aton.

18. Ngaa indi naton dapat ipaanggid ang aton kaugalingon sa iban?

¹⁸ Mahimo naton pamangkuton ang aton kaugalingon, ‘Paano ko ginatamod ang akon pagkatulugyanan?’ Magautwas ang problema kon ipaanggid naton ang aton kaugalingon sa iban. Ang Biblia nagalaygay: “Pamatud-an sang kada isa kon ano ang iya kaugalingon nga binuhatan, kag nian may rason sia sa paghugyaw may kaangtanan sa iya kaugalingon lamang, kag indi sa pagpaanggid sa iban nga tawo.” (Gal. 6:4) Imbes nga ipaanggid sa iban ang aton nahimo, dapat kita mangin kontento sa aton masarangan. Magaamlig ini sa aton nga indi magpahambog kag maluyahan sing buot. Sa pag-usisa sa aton kaugalingon, dapat naton batunon nga nagabag-o ang aton kahimtangan. Ayhan bangod sa balatian, pagtigulang, ukon lainlain nga responsibilidad indi na naton mahimo ang aton masarangan sang una. Sa pihak nga bahin, basi madugangan naton ang aton mga ginahimo sa karon. Kon amo, ngaa indi naton ini paghimuon?

19. Kon indi kita makabaton sing pila ka pribilehiyo, ngaa indi kita dapat maluyahan?

¹⁹ Binagbinagon naman naton ang mga responsibilidad nga ara na sa aton ukon ginatinguhaan nga lab-uton. Halimbawa, ang isa ka utod nagatinguha nga mag-alagad subong gulang ukon makabaton sing bahin sa mga asembleya ukon kombension. Maayo gid nga panikasugan ini nga mga pribilehiyo, pero indi kita dapat maluyahan kon wala ini ginahatag sa aton. Ayhan bangod sa mga rason nga indi pa naton mahangpan, mahimo nga ang pila ka pribilehiyo indi pa naton mabaton sa karon. Dumduma nga para kay Moises, handa na sia sa pagdumala sa mga Israelinhon paggua sa Egipto, pero kinahanglan pa niya maghulat sing 40 ka tuig. Bangod sini, may bastante sia nga tion para mapalambo ang mga kinaiya nga kinahanglan para dumalahan ang batinggilan kag rebelyuso nga katawhan.—Binu. 7:22-25, 30-34.

20. Ano nga leksion ang matun-an naton kay Jonatan?

²⁰ Kon kaisa indi gid naton mabaton ang pila ka pribilehiyo. Amo sini ang natabo kay Jonatan. Anak sia ni Saul, gani sia kuntani ang magabulos nga hari sa Israel. Pero, ang mas bata nga si David ang ginpili sang Dios nga mangin hari. Ano ang reaksion ni Jonatan? Ginbaton niya ini kag ginsuportahan si David, bisan pa nabutang sa katalagman ang iya kabuhi. Nagsiling sia kay David: “Ikaw magahari sa ibabaw sang Israel, kag ako magadason sa imo.” (1 Sam. 23:17) Ano ang punto sini? Ginbaton ni Jonatan ang iya kahimtangan, kag indi pareho sa iya amay, wala sia nahisa kay David. Imbes nga mahisa sa mga responsibilidad nga ginhatag sa iban, dapat kita mangin kontento sa aton nabaton nga mga responsibilidad. Makasiguro kita nga sa bag-ong kalibutan, pat-uron ni Jehova nga matigayon sang tanan niya nga alagad ang ila nagakaigo nga mga handum.

21. Paano naton dapat tamdon ang aton pagkatulugyanan?

²¹ Dapat naton dumdumon nga subong masaligan nga mga tulugyanan, wala kita nakaeksperiensia sing grabe nga pagpigos kag kasakit. Sa baylo, nakabaton kita sing daku nga kadungganan kag ginsaligan sang indi na masulit nga hilikuton nga pagbantala sang maayong balita sa katapusan nga mga adlaw sining sistema sang mga butang. Samtang ginahimo ini, may daku kita nga kahilwayan sa pagtatap sang aton mga responsibilidad. Gani, dapat kita mangin matutom nga tulugyanan. Kabay nga pabaloran naton ang pribilehiyo nga alagaron ang Isa nga labing daku sa bug-os nga uniberso.