1. Ano ang pagtamod sang pila ka tawo sa mga dumuluong, pero ngaa indi ini makatarunganon?

SUBONG sang ginpakita sang nagligad nga artikulo, ginagamit sang mga tawo ang tinaga nga “dumuloong” sa negatibo nga paagi, nga nagapakita sing pagpanghikay ukon pagpakamalaut. Kakulang sing pagtahod ang pagkabig sa mga tawo sa isa ka pungsod nga mas manubo sa mga tawo sa iban nga pungsod. Ginapakita man sini nga panimuot nga wala nahibaluan sang isa ang mga kamatuoran. Ang balasahon nga The Races of Mankind nagsiling: “Ang rasa sang mga tawo suno sa Biblia—mag-ulutod.” Ang mga mag-utod masami nga may kinatuhayan, pero mag-ulutod sila gihapon.

2, 3. Ano ang pagtamod ni Jehova sa mga dumuluong?

² Diin man kita nagaistar, may mga dumuluong gid. Amo man sini ang kahimtangan sadto sang mga Israelinhon, nga paagi sa Kasuguan nga katipan nakatigayon sing pinasahi nga kaangtanan kay Jehova nga Dios. Ang mga kinamatarong sang mga indi Israelinhon limitado lang, pero ginapatuman nga mangin matinahuron kag makatarunganon ang mga Israelinhon sa ila. Maayo gid ini nga halimbawa para sa aton! Wala dapat sing pinilian ukon diskriminasyon ang matuod nga mga Cristiano. Ngaa? Si apostol Pedro nagsiling: “Matuod gid nga nahantop ko nga ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.”—Binu. 10:34, 35.

³ Ang mga dumuluong sadto sa Israel nakabenepisyo sa ila suod nga pagpakig-upod sa mga Israelinhon. Ginapakita sini ang pagtamod ni Jehova sa mga butang subong sang ginsiling ni apostol Pablo sang ulihi sang namangkot sia parte kay Jehova: “Sia bala Dios sang mga Judiyo lamang? Indi bala Dios man sia sang mga tawo  sang mga pungsod? Huo, sang mga tawo man sang mga pungsod.”—Roma 3:29; Joel 2:32.

4. Ngaa masiling nga wala sing mga dumuluong sa “Israel sang Dios”?

⁴ Paagi sa bag-o nga katipan, ang kongregasyon sang hinaplas nga mga Cristiano nagbulos sa literal nga Israel subong pungsod nga may pinasahi nga kaangtanan sa Dios. Gintawag ini nga “Israel sang Dios.” (Gal. 6:16) Kag subong sang ginpaathag ni Pablo, sa sining bag-o nga pungsod, “wala sing Griego ukon Judiyo, natuli ukon wala matuli, dumuluong, Escita, ulipon, hilway nga tawo, kundi si Cristo amo ang tanan nga butang kag yara sa tanan.” (Col. 3:11) Ginapakita sini nga wala sing mga dumuluong sa kongregasyon sang hinaplas nga mga Cristiano.

5, 6. (a) Ano nga pamangkot ang mahimo mag-utwas parte sa Isaias 61:5, 6? (b) Sin-o ang “mga sacerdote sang GINOO” kag “mga dumuloong” nga ginsambit sa Isaias? (c) Ano ang pareho nga hilikuton sining duha ka grupo?

⁵ Sa pihak nga bahin, mahimo patuhuyan sang iban ang kapitulo 61 sang Isaias, nga nagaunod sing tagna nga natuman sa Cristianong kongregasyon. Ginsambit sa bersikulo 6 ang mga magaalagad subong “mga sacerdote sang GINOO.” Ang bersikulo 5 naman nagsambit parte sa “mga dumuloong” nga magabulig sa buluhaton sang “mga sacerdote.” Ano ang kahulugan sini?

⁶ Nahangpan naton nga ang “mga sacerdote sang GINOO” amo ang mga hinaplas nga nalakip “sa nahauna nga pagkabanhaw” nga “mangin mga saserdote . . . sang Dios kag ni Cristo, kag magagahom subong mga hari upod sa iya sa sulod sang isa ka libo ka tuig.” (Bug. 20:6) Madamo man nga matutom nga Cristiano ang may paglaum sa duta. Ini sila, nga nagapanghikot kag nagapakig-upod sing suod sa mga magaalagad sa langit, mga dumuluong sa malaragwayon nga paagi. Malipayon sila nga nagasakdag kag nagapanghikot upod sa “mga sacerdote sang GINOO,” nga daw nagaalagad subong ila “mga manug-arado” kag “mga manugtatap sang uvas.” Nagabulig sila nga mapalambo ang espirituwal nga bunga para sa kahimayaan sang Dios, nga nagaatipan kag nagaani sang mga tawo. Ginapangita kag ginaatipan sing mahigugmaon sining mga hinaplas kag “iban nga mga karnero” ang mga interesado sa pag-alagad sa Dios sing dayon.—Juan 10:16.

7. Sa ano nga paagi ang mga Cristiano karon pareho kay Abraham kag sa iban nga matutom sadto?

⁷ Subong sang nabinagbinag sang nagligad nga artikulo, ang matuod nga mga Cristiano kaangay sa mga dumuluong, ukon umalagi nga mga pumuluyo sa malaut nga kalibutan ni Satanas. Kaangay sila sa matutom nga mga tawo sadto—lakip kay Abraham—nga “mga estranghero kag umalagi nga mga pumuluyo sa duta.” (Heb. 11:13) Ano man ang aton paglaum, may pribilehiyo kita nga matigayon ang kaangtanan kay Jehova pareho ni Abraham. Si Santiago nagpaathag nga “‘si Abraham nagtuo kay Jehova, kag bangod sini ginkabig sia nga matarong,’ kag gintawag sia nga ‘abyan ni Jehova.’”—Sant. 2:23.

8. Ano ang ginsaad kay Abraham, kag ano ang iya ginbatyag sa katumanan sini?

⁸ Nagsaad ang Dios nga paagi kay Abraham kag sa iya mga kaliwatan, ang tanan nga pamilya sa duta—indi lamang isa ka pungsod—pakamaayuhon. (Basaha ang Genesis 22:15-18.) Ini nga saad sang Dios matuman pa sa palaabuton, pero nagsalig gid sa sini si Abraham. Sa sobra katunga sang iya kabuhi, sia kag ang iya pamilya nagsaylosaylo sa lainlain nga lugar. Sa sini nga mga tion, nahuptan ni Abraham ang iya pagpakig-abyan kay Jehova.

9, 10. (a) Sa ano nga mga paagi masunod naton ang halimbawa ni Abraham? (b) Ano nga pangagda ang aton ginapalab-ot sa iban?

⁹ Wala makahibalo si Abraham kon daw ano kadugay antes matuman ang iya ginalauman, pero wala nagluya ang iya gugma kag debosyon kay Jehova. Nagsalig gid sia sa sini, kag wala nagpuyo sing permanente sa pila ka pungsod. (Heb. 11:14, 15) Maalamon nga sundon naton ang halimbawa ni Abraham nga magkabuhi sing simple kag wala nagakabalaka sing sobra sa mga pagkabutang, tindog sa katilingban, ukon karera! Ngaa panikasugan naton ang daw normal nga kabuhi sa sining sistema nga madali na lang malaglag? Ngaa tinguhaan naton ang temporaryo nga mga butang? Pareho kay Abraham, nagahulat kita sang mas maayo nga mga butang, kag handa man kita magpailob tubtob matuman ang aton ginalauman.—Basaha ang Roma 8:25.

¹⁰ Ginaagda gihapon ni Jehova ang mga tawo sa tanan nga pungsod para pakamaayuhon paagi sa binhi ni Abraham. Ang hinaplas nga “mga sacerdote sang GINOO” kag ang iban nga karnero nga “mga dumuloong,” nagapalab-ot sini nga pangagda sa bilog nga kalibutan sa sobra sa 600 ka lenguahe.

11. Ano nga pagtamod ang ginpabutyag ni Solomon indi lamang para sa mga Israelinhon?

¹¹ Sa inagurasyon sang templo sang 1026 B.C.E., kag nahisuno sa saad ni Jehova kay Abraham, naobserbahan ni Solomon nga ang mga tawo sang tanan nga pungsod magabuylog sa pagdayaw kay Jehova. Paagi sa pangamuyo, sia nagsiling: “Labut pa kon ang dumuloong, nga indi gikan sa imo katawohan nga Israel, mag-abut gikan sa malayong duta tungud sa imo ngalan (kay mabatian nila ang imo dakung ngalan, kag ang imo gamhanan nga kamut, kag ang imo inuntay nga butkon), kon magkari sia kag magpangamuyo nayon sining balay, pamati ka sa langit nga imo puluy-an, kag himoa sono sa tanan nga pagpanawag sa imo sang dumuloong; agud nga ang tanan nga katawohan sang duta makakilala sang imo ngalan sa pagkahadluk sa imo, subong sang ginahimo sang imo katawohan nga Israel.”—1 Hari 8:41-43.

12. Ngaa mahimo tamdon sang iban ang mga Saksi ni Jehova subong “mga dumuloong”?

¹² Ang dumuluong isa ka tawo nga nagaistar sa iban nga pungsod, ukon tawo nga nagkadto sa isa ka komunidad ukon nag-entra  sa isa ka grupo. Amo gid sini ang kahimtangan sang mga Saksi ni Jehova. Ang ila katutom para lang sa gobierno sa langit, ang Ginharian sang Dios nga ginagamhan ni Cristo. Gani neutral gid sila sa pulitika, bisan pa para sa pila ka tawo dapat sila mag-entra.

13. (a) Sa ano nga paagi matun-an naton nga indi pagtamdon ang isa nga “dumuluong”? (b) Nalakip bala sa orihinal nga katuyuan ni Jehova ang ideya parte sa mga dumuluong? Ipaathag.

¹³ Ang mga dumuluong masami nga makilala bangod sang identidad nga kinaandan sa ila. Mahimo sila makilala paagi sa ila lenguahe, kustombre, hitsura, kag bisan sa estilo sang ila pamayo. Pero diin man sila nga pungsod naghalin, ang ila mga kinaiya nga makita man sa tanan nga tawo amo ang mas importante sangsa sini nga mga identidad. Ang isa ginatamod nga dumuluong bangod lain sia sa pila ka paagi. Pero kon indi naton pagtan-awon ini nga mga kinatuhayan, madula na ang kahulugan sang tinaga nga “dumuluong.” Kon ang tanan nga tawo sa duta ginagamhan sang isa lamang ka pulitikal nga organisasyon ukon gobierno, wala na sing mangin dumuluong. Ang matuod, ang orihinal nga katuyuan ni Jehova amo nga ang tanan nga tawo mahiusa subong isa ka pamilya sa idalom sang isa ka pagginahom—sa iya pagginahom. Matabo bala ini karon sa mga tawo sa tanan nga pungsod sa bilog nga kalibutan?

14, 15. Subong isa ka grupo, ano ang napabaloran sang mga Saksi ni Jehova?

¹⁴ Sa sining maiyaiyahon kag nasyonalistiko nga kalibutan, makalilipay makita nga may mga tawo nga wala nagatan-aw sa rasa sang iban. Mahimo mabudlay dulaon ang diskriminasyon. Si Ted Turner, nga nagtukod sang TV network nga CNN, nagsiling parte sa iya pagtrabaho upod sa pila ka abilidaran nga mga tawo halin sa lainlain nga pungsod: “Dalayawon nga eksperiensia nga makilala ini nga mga tawo. Ginatamod ko na subong ang mga tawo halin sa iban nga pungsod indi subong ‘dumuluong,’ kundi pareho ko nga pumuluyo sa sini nga planeta. Para sa akon ang tinaga nga ‘dumuluong’ nagapakanubo, kag naghimo ako sing pagsulundan sa CNN nga ini nga tinaga indi paggamiton sa kahanginan ukon sa pagpakig-istorya sa bilog nga opisina. Sa baylo, ang tinaga nga ‘internasyonal’ amo ang gamiton.”

¹⁵ Subong isa ka grupo, ang mga Saksi ni Jehova lamang sa bilog nga kalibutan ang nagasunod sa panghunahuna sang Dios. Paagi sa pagtan-aw sa mga butang suno sa pagtamod ni Jehova, nasarangan nila dulaon ang diskriminasyon. Sa baylo nga suspetsahan, dumtan, ukon indi pagsaligan ang mga tawo halin sa iban nga pungsod, natun-an nila nga pabaloran ang mga kinaiya kag  mga ikasarang sini nga mga tawo. Napamalandungan mo na bala ini nga butang kag kon paano ini nakabulig sa imo sa pagpakig-angot sa iban?

16, 17. Ano ang kahulugan para sa imo sang katumanan sang Bugna 16:16 kag Daniel 2:44?

¹⁶ Sa indi madugay, ang tanan nga pungsod magapakig-away kay Jesucristo kag sa iya puersa sa langit sa katapusan nga inaway batok sa paggahom sang Dios, nga “ginatawag sa Hebreo Har–Magedon.” (Bug. 16:14, 16; 19:11-16) Sang nagligad nga sobra 2,500 ka tuig, ginpasulat sang Dios kay manalagna Daniel ang mahanabo sa mga gobierno sang tawo nga nagasupak sa katuyuan sang Dios. Sia nagsulat: “Sa mga adlaw sadto nga mga hari magapatindug ang Dios sang langit sing ginharian nga dili gid malaglag, ukon ang pagbulut-an sini ibilin sa iban nga katawohan. Kondi dugmokon sini kag papason ini tanan nga ginharian kag ini magapadayon sa gihapon.”—Dan. 2:44.

¹⁷ Mahunahuna mo bala kon ano ang kahulugan sini para sa imo kon matuman na ini? Madula na ang mga dulunan sang pungsod nga ginhimo sang tawo, nga amo ang isa ka rason kon ngaa ang kada isa ginatawag nga dumuluong. Ang lainlain nga hitsura ukon pisikal nga mga kinatuhayan nagapakita nga dalayawon gid ang pagkananarisari sa mga tinuga sang Dios. Ining makalilipay nga paglaum dapat magpahulag sa aton tanan nga padayon nga dayawon kag padunggan sa bug-os naton nga masarangan ang aton Manunuga, si Jehova nga Dios.

18. Ano nga mga hitabo sining karon lang ang nagapakita nga mahimo madula ang ideya parte sa “dumuluong”?

¹⁸ Imposible bala nga matabo ini nga pagbag-o? Indi gid! Makatarunganon gid nga magsalig sa sini. Ang ideya parte sa “dumuluong” halos wala na sing kahulugan para sa mga Saksi ni Jehova, nga wala nagapakita sing diskriminasyon ano man ang ila rasa. Halimbawa, sining karon lang, gintingob ang pila ka gamay nga sanga talatapan para mapasimple ang pagdumala kag mangin mas epektibo ang pagbantala. (Mat. 24:14) Tubtob ginatugot sang kasuguan, wala nila ginasapak ang kinatuhayan sang ila rasa sang gintingob ini nga mga sanga. Pamatuod pa gid ini nga si Jesucristo, ang gintangdo ni Jehova nga Manuggahom, nagbungkag sang dulunan sang mga tawo, kag sa indi madugay ‘magatapos sang iya pagpangdaug’!—Bug. 6:2.

19. Ano ang nahimo sang putli nga lenguahe sang kamatuoran?

¹⁹ Ang mga Saksi ni Jehova naghalin sa madamo nga pungsod kag nagahambal sing lainlain nga lenguahe, pero ginapanikasugan nila nga sundon ang putli nga lenguahe sang kamatuoran. Nagaresulta ini sa higot sang paghiusa nga indi mabungkag. (Basaha ang Sofonias 3:9.) Isa sila ka internasyonal nga pamilya sa tunga sining malaut nga sistema, pero indi sila bahin sini. Ining nahiusa nga pamilya patilaw lamang sa mahanabo sa palaabuton—ang kalibutan nga wala na sing mga dumuluong. Dayon ang tanan nga tawo malipayon nga magabaton sang kamatuoran nga ginsiling sang balasahon kaina: “Ang rasa sang mga tawo suno sa Biblia—mag-ulutod.”—The Races of Mankind.