1, 2. (a) Ano ang kahulugan sang orihinal nga mga tinaga para sa dungog kag himaya? (b) Ano nga mga pamangkot ang aton binagbinagon sa sini nga artikulo?

KON mabatian mo ang tinaga nga “dungug” ukon “himaya” ano ang imo mapensaran? Ang katahom bala sang mga tinuga? (Sal. 19:1) Ang pagdayaw bala kag pagpadungog sa mga tawo nga manggaranon, maalam, kag madinalag-on? Sa Kasulatan, ang orihinal nga tinaga para sa “dungug” kag “himaya” pareho nga nagapahangop sing kabug-aton. Sang ang kuarta human pa sa malahalon nga mga metal, kon mas mabug-at ang sensilyo, mas mataas ang balor. Ang mga tinaga nga gingamit para sa kabug-aton mahimo nagapatuhoy sa butang nga bilidhon, dalayawon, ukon ginapabaloran gid.

² Mahimo kita magdayaw sa gahom, posisyon, ukon reputasyon sang isa ka tawo, pero ano ang ginatan-aw sang Dios sa mga tawo? Ang Kasulatan nagasambit parte sa kadungganan nga ginahatag sang Dios sa mga tawo. Halimbawa, ang Hulubaton 22:4 nagasiling: “Ang balus sang pagpaubus kag sang kahadluk sa GINOO amo ang manggad kag dungug kag kabuhi.” Kag si disipulo Santiago nagsulat: “Magpaubos kamo sa atubangan ni Jehova, kag bayawon niya kamo.” (Sant. 4:10) Ano nga kadungganan ukon himaya ang ginahatag sang Dios sa mga tawo? Ano ang makaupang sa aton sa pagtigayon sini? Kag paano naton mabuligan ang iban nga makatigayon sini nga kadungganan?

3-5. Sa ano nga himaya mahimo kita giyahan ni Jehova?

³ Ang salmista nagpabutyag sing pagsalig nga kaptan sia ni Jehova sa tuo nga kamot kag giyahan padulong sa matuod nga himaya. (Basaha ang Salmo 73:23, 24.) Paano ini ginahimo ni Jehova? Ginagiyahan niya ang iya mapainubuson nga mga alagad padulong sa himaya paagi sa pagpadungog sa ila sa madamo nga paagi. Ginpahangop niya sa ila ang iya kabubut-on. (1 Cor. 2:7) Ginhatagan niya sing  kadungganan nga makatigayon sing suod nga kaangtanan sa iya ang mga nagapamati kag nagatuman sa iya pulong.—Sant. 4:8.

⁴ Ginasalig man ni Jehova sa iya mga alagad ang bilidhon nga Cristianong ministeryo. (2 Cor. 4:1, 7) Ini nga ministeryo nagahatag sing kadungganan. Para sa mga nagatuman sang ila pribilehiyo sa pag-alagad sa kadayawan ni Jehova kag kaayuhan sang iban, si Jehova nagsaad: “Ang mga nagapadungug sa akon padunggan ko.” (1 Sam. 2:30) Ini sila ginapadunggan ni Jehova sing maayo nga ngalan, kag ginadayaw man sila sang iban nga alagad sang Dios.—Hulu. 11:16; 22:1.

⁵ Ano naman ang palaabuton sang mga ‘nagahulat sa GINOO kag nagabantay sang iya dalanon’? Ang Biblia nagsaad: “Sia [Jehova] magapataas sa imo sa pagpanubli sang duta; kon ang malauton utdon makita mo ini.” (Sal. 37:34) Ginalauman nila ang indi matupungan nga kadungganan sa pagtigayon sang kabuhi nga walay katapusan.—Sal. 37:29.

6, 7. Ngaa madamo ang wala nagtuo kay Jesus?

⁶ Ano ang makaupang sa aton sa pagtigayon sang himaya nga luyag ni Jehova ihatag sa aton? Ang isa amo ang pagpabalor sa opinyon sang mga tawo nga wala sing maayo nga kaangtanan sa Dios. Binagbinaga ang ginsulat ni apostol Juan parte sa pila ka tawo nga may awtoridad sang panahon ni Jesus: “Madamo sa mga manugdumala ang nagtuo sa iya, apang bangod sang mga Fariseo wala sila magpahayag sini, agod indi sila pagsikwayon sa sinagoga; kay ginhigugma nila ang pagdayaw sang mga tawo sing labi pa sa pagdayaw sang Dios.” (Juan 12:42, 43) Mas maayo kuntani kon wala ginpabaloran sini nga mga manugdumala ang mga panghunahuna sang mga Fariseo.

⁷ Sa panugod sang iya ministeryo, ginpaathag ni Jesus kon ngaa madamo ang indi magbaton kag magtuo sa iya. (Basaha ang Juan 5:39-44.) Ang pungsod sang Israel ginatos na ka tuig nga nagapaabot sa Mesias. Sang nagsugod si Jesus sa pagpanudlo, ang pila ka indibiduwal mahimo nakahantop gikan sa tagna ni Daniel nga ang gintalana nga tion sang pag-abot sang Cristo natuman na. Pila ka bulan antes sini, sang nagabantala na si Juan nga Manugbawtismo, madamo ang nagsiling: “Sia ayhan ang Cristo?” (Luc. 3:15) Ang ila madugay na nga ginapaabot nga Mesias ara na sa tunga nila nga nagapanudlo. Pero ining mga batid sa Kasuguan wala nagbaton sa iya. Ginsugid ni Jesus ang rason sang namangkot sia sa ila: “Paano kamo magpati, kon nagabaton kamo sang himaya gikan sa isa kag isa kag wala ninyo ginatinguhaan ang himaya gikan sa isa lamang ka Dios?”

8, 9. Paano ang ilustrasyon parte sa kasanag nagapakita nga mahimo matabunan sang himaya gikan sa tawo ang himaya gikan sa Dios?

⁸ Ang pagpaanggid sang himaya sa kasanag nagailustrar kon paano ang himaya gikan sa mga tawo mahimo magtabon sa himaya gikan sa Dios. Ang aton nagabanaag nga uniberso bugana sang himaya. Madumduman mo pa bala sang nagtangla ka sa kalangitan sa isa ka madulom nga kagab-ihon kag nagdayaw sa linibo ka bituon? “Ang himaya sang mga bituon” makahalawhaw gid. (1 Cor. 15:40, 41) Pero ano ayhan ang hitsura sini nga kalangitan kon yara ka sa masanag nga siudad? Bangod sa mga suga sa siudad, halos indi na naton makita ang kasanag sang mga bituon! Ina bala bangod ang mga suga sa mga dalan, istadyum, kag mga bilding mas masanag ukon mas matahom sangsa kasanag sang mga bituon? Indi! Ang rason sini bangod ang mga suga sa siudad mas malapit sa aton, gani mas mabudlay para sa aton nga makita ang mga bituon. Agod makita naton ang katahom sang kalangitan sa kagab-ihon, dapat naton tabunan ukon likawan ang tublag sang artipisyal nga kasanag.

⁹ Sing kaanggid, kon ang indi husto nga himaya malapit sa aton tagipusuon, magapugong ini sa aton sa pag-apresyar kag pagtinguha sang dayon nga himaya nga ginatanyag ni Jehova. Madamo ang wala nagabaton sang  mensahe sang Ginharian bangod nahadlok sila kon ano ang hunahunaon sang ila mga kakilala ukon paryente parte sa ila. Pero mahimo man bala maghandum sing kahimayaan gikan sa tawo ang mga alagad sang Dios? Ibutang ta nga ang isa ka pamatan-on gin-asayn sa pagbantala sa lugar nga kilala sia sang mga tawo, pero indi pa kilala subong Saksi ni Jehova. Mahadlok bala sia? Ukon ano abi kon ang isa ginapakalain bangod sang iya pagtinguha sa teokratiko nga mga tulumuron? Tugutan bala niya yadtong wala sing maathag nga pagtamod sa espirituwal nga mag-impluwensia sa iya mga desisyon? Ukon ayhan ang isa ka Cristiano nakahimo sing mabug-at nga sala. Taguon bala niya ini bangod sa kahadlok nga mahigkuan ang iya reputasyon sa kongregasyon ukon mahatagan sing kasakit ang iya mga hinigugma? Kon luyag gid niya nga ipasag-uli ang iya kaangtanan kay Jehova, “magtawag sia sang mga gulang nga lalaki sang kongregasyon” kag magpabulig sa ila.—Basaha ang Santiago 5:14-16.

10. (a) Ano ang matabo kon sobra ang aton kabalaka sa pagtamod sang iban sa aton? (b) Ano ang aton masaligan kon mapainubuson kita?

¹⁰ Mahimo nga nagauswag kita subong hamtong nga Cristiano, pero ginlaygayan kita sang aton masigkatumuluo. Ang iya tampad nga laygay makabulig sa aton kon indi kita dayon mangita sing rason bangod sa bugal, handum nga indi mahuy-an, ukon huyog nga pakamatarungon ang aton ginhimo. Ukon ibutang ta nga may ara kamo proyekto sang isa ka masigkatumuluo. Mabalaka bala kamo kon sin-o dapat ang makabaton sing kadungganan bangod sa inyo maayo nga mga ideya kag pagpangabudlay? Kon matabo sa imo ini nga mga sitwasyon, makasalig ka nga “ang mapainubuson sing espiritu makaagum sing dungug.”—Hulu. 29:23.

11. Ano dapat ang aton reaksion kon ginahatagan kita sing komendasyon, kag ngaa?

¹¹ Ang mga manugtatap kag ang mga “nagatinguha” para sa sini nga mga responsibilidad dapat man mag-andam sa paghandum nga dayawon sang mga tawo. (1 Tim. 3:1; 1 Tes. 2:6) Ano dapat ang reaksion sang isa ka utod kon makabaton sia sing sinsero nga komendasyon sa iya maayo nga nahimo? Pat-od nga indi sia magpatindog sing monumento para sa iya kaugalingon pareho sang ginhimo ni Hari Saul. (1 Sam. 15:12) Pero, ginabaton bala niya nga ang iya mga hinimuan nangin posible lamang bangod sa wala tupong nga kaayo ni Jehova kag ang bisan ano nga kadalag-an niya sa palaabuton nagadepende gihapon sa pagpakamaayo kag bulig sang Dios? (1 Ped. 4:11) Ang aton reaksion kon ginadayaw kita nagapakita kon ano nga himaya ang aton ginapangita.—Hulu. 27:21.

12. Ngaa ang pila ka Judiyo wala namati kay Jesus?

¹² Ang isa pa nga makaupang sa pagtigayon sing himaya gikan sa Dios amo ang sala nga mga handum ukon kailigbon. Mahimo ini mag-upang sa aton sa pagpamati sang kamatuoran. (Basaha ang Juan 8:43-47.) Ginsilingan ni Jesus ang pila ka Judiyo nga wala sila namati sa iya mensahe bangod ‘luyag nila himuon ang mga kailigbon sang ila amay nga amo ang Yawa.’

13, 14. (a) Suno sa mga researcher, paano ginaproseso sang aton utok ang pagpamati sa tingog sang tawo? (b) Sa ano nagadepende kon sin-o ang aton pamatian?

¹³ Masami nga ginapamatian lang naton ang luyag naton mabatian. (2 Ped. 3:5) Gintuga kita ni Jehova nga may ikasarang nga balewalaon ang pila ka gahod. Tilawi nga magdulog sing makadali kag magkonsentrar kon daw ano kadamo nga gahod ang mabatian mo subong. Mahimo nga madamo sa sini ang wala mo ginasapak kaina. Ang limbic system sang imo utok nagabulig sa imo nga magkonsentrar sa isa ka butang bisan pa mabatian mo ang lainlain nga gahod. Pero nasapwan sang mga researcher nga mabudlay ini himuon kon tingog na sang tawo ang aton mabatian. Buot silingon kon duha ka tingog ang imo mabatian, dapat ka magpili kon diin ang imo pamatian. Ang imo pilion nagadepende kon  sin-o ang luyag mo pamatian. Ang mga Judiyo nga luyag maghimo sang mga kailigbon sang ila amay, nga amo ang Yawa, wala namati kay Jesus.

¹⁴ Nagabaton kita sing mga mensahe halin sa ‘balay sang kaalam’ kag sa ‘balay sang buangbuang.’ (Hulu. 9:1-5, 13-17) Daw subong nga ang kaalam kag kabuangan pareho nga nagapanawag sa aton, kag ginapapili kita. Diin sa sini ang aton pamatian? Ang sabat nagadepende kon kay sin-o kabubut-on ang luyag naton himuon. Ang karnero ni Jesus nagapamati sa iya tingog kag nagasunod sa iya. (Juan 10:16, 27) “Dampig [sila] sa kamatuoran.” (Juan 18:37) “Indi nila kilala ang tingog sang mga estranghero.” (Juan 10:5) Ining mga mapainubuson makatigayon sing kadungganan.—Hulu. 3:13, 16; 8:1, 18.

15. Paano ang mga kapipit-an ni Pablo ‘nagakahulugan sang himaya’ para sa iban?

¹⁵ Ang aton padayon nga paghimo sang kabubut-on ni Jehova makabulig sa iban nga matigayon ang kadungganan. Si Pablo nagsulat sa kongregasyon sa Efeso: “Ginapangabay ko kamo nga indi magpangampo bangod sining akon mga kapipit-an tungod sa inyo, kay nagakahulugan ini sang himaya para sa inyo.” (Efe. 3:13) Paano ang mga kapipit-an ni Pablo “nagakahulugan . . . sang himaya” para sa mga taga-Efeso? Ang kahanda ni Pablo nga magpadayon sa pag-alagad sa ila bisan pa sang mga pagtilaw nagtudlo sa mga taga-Efeso nga ang ila mga pribilehiyo subong mga Cristiano may mabug-at kag daku katama nga balor. Kon nangampo si Pablo sa kapipit-an, indi bala nga ginapakita sina nga wala sing balor ang ila kaangtanan kay Jehova, ang ila ministeryo, kag paglaum? Ang pagbatas ni Pablo nagbayaw sang Cristianismo kag nagpakita nga takus gid sa bisan ano nga sakripisyo ang mangin disipulo ni Cristo.

16. Ano nga kapipit-an ang naeksperiensiahan ni Pablo sa Listra?

¹⁶ Hunahunaa ang epekto sang kakugi kag pagbatas ni Pablo. Ang Binuhatan 14:19, 20 nagasiling: “Nag-abot ang mga Judiyo gikan sa Antioquia kag sa Iconio kag ginhaylo nila ang kadam-an, kag ginbato nila si Pablo kag ginganoy sia pagua sa siudad [sang Listra], nga nagahunahuna nga patay na sia. Apang, sang nagtipon sa palibot niya ang mga disipulo, nagtindog sia kag nagsulod sa siudad. Kag sang masunod nga adlaw nagkadto sia sa Derbe upod kay Bernabe.” Hunahunaa lamang kon daw ano kabudlay para kay Pablo nga maglakat sing 100 ka kilometro pagkatapos nga ginbato sia kag ginbayaan nga halos patay na!

17, 18. (a) Sa ano nga paagi mahimo nasundan sing maayo ni Timoteo ang pag-antos ni Pablo sa Listra? (b) Ano ang epekto kay Timoteo sang pagbatas ni Pablo?

¹⁷ Isa bala si Timoteo sa “mga disipulo” nga nagbulig kay Pablo? Wala ini gin-athag sang Binuhatan, pero posible ini. Binagbinaga  ang ginsiling ni Pablo sa iya ikaduha nga sulat kay Timoteo: “Ginsunod mo sing maayo ang akon panudlo, ang akon dalanon sang kabuhi, . . . ang akon mga pag-antos, ang sahi sang mga butang nga natabo sa akon sa Antioquia, sa Iconio, kag sa Listra, ang sahi sang mga paghingabot nga akon ginbatas; apang gikan sa sini tanan ginluwas ako sang Ginuo.”—2 Tim. 3:10, 11; Binu. 13:50; 14:5, 19.

¹⁸ ‘Ginsundan sing maayo’ ni Timoteo yadto nga mga hitabo kag nahibaluan gid niya ang pagbatas ni Pablo. May daku ini nga impluwensia sa panghunahuna ni Timoteo. Sang nagduaw si Pablo sa Listra, nakita niya nga huwaran gid nga Cristiano si Timoteo, kay “maayo ang ginasugid tuhoy sa iya sang mga kauturan sa Listra kag Iconio.” (Binu. 16:1, 2) Sang ulihi, nangin kalipikado si Timoteo sa mabug-at nga mga responsibilidad.—Fil. 2:19, 20; 1 Tim. 1:3.

19. Paano makaapektar sa iban ang aton pagbatas?

¹⁹ Ang aton pagbatas sa paghimo sang kabubut-on sang Dios may amo man sini nga epekto sa iban—ilabi na sa mga pamatan-on, nga ang madamo sa ila mangin mapuslanon gid nga alagad sang Dios pagdaku nila. Ang pamatan-on nga mga disipulo wala lamang nagaobserbar kag nagatuon sa aton mga ikasarang sa pagtudlo kag pagministeryo kundi nagabenepisyo man kon paano naton ginaatubang ang mga kabudlayan. Si Pablo “padayon . . . nga nagabatas sang tanan nga butang” agod ang tanan nga nagapabilin nga matutom ‘makatigayon sing kaluwasan upod ang wala katapusan nga himaya.’—2 Tim. 2:10.

20. Ngaa dapat naton padayon nga tinguhaan ang himaya ukon kadungganan gikan sa Dios?

²⁰ Gani, indi bala nga dapat naton padayon nga ‘tinguhaan ang himaya gikan sa isa lamang ka Dios’? (Juan 5:44; 7:18) Dapat gid! (Basaha ang Roma 2:6, 7.) Si Jehova nagahatag sing “kabuhi nga walay katapusan sa mga nagapangita sang himaya.” Isa pa, ang aton “pagbatas sa buhat nga maayo” nagapahulag sa iban nga magpabilin nga malig-on, para sa ila dayon nga kaayuhan. Gani, indi pagtuguti ang bisan ano nga mag-upang sa imo sa pagtigayon sing kadungganan nga ginahatag sang Dios.